Surasak Suwanmake/Moment via Getty Images
MUZWIILE-HABUSU KUTONDA!
Kuhiisa Ahulu mwi Mbumbi ya 2023—iBibele Iwambanzi?
Bantu mu cisi coonse bakopene ahulu ni bukaabo bwa kuhiisa ahulu ku zamba mwi nako za ku masule. Mubone impiho zicilila:
“Ciinu cilimo mu mwezi wa June ku babihiwa kuhiisa ahulu kuseeni kubonwa mu zilimo ziina 174 bantu baba batangi kubiha mazimo ewulu.”—National Oceanic and Atmospheric Administration, U.S. Department of Commerce, 13 July 2023.
“Inkaanda ya Italy, Spain, France, Germany ni Poland bakopene ni kuhiisa ahulu kuwoola kukasika ha 48°C [118°F] mu cooli ca Sicily ni ca Sardinia – Iyi kayibe impiho ya kuhiisa ahulu ibabihiwa mwa Europe.”—European Space Agency, 13 July 2023.
“Cebaka lya kuhiisa ahulu mu cisi, tubona kuti ico ka ciletise ahulu invula yiingi, yeete ni letise ahulu muunda mukaando.”—Stefan Uhlenbrook, mukulwana wee ofisi ibona za sayansi ni mazimo ewulu ni menzi mu cisi World Meteorological Organization, 17 July 2023.
Kana impiho za kuweleka ahulu kwa kuhiisa zimibileza? Mubone ziiwamba iBibele heyi ndaba.
Kana kuhiisa kwizuzilikiza bupolofita bwa mwi Bibele??
Inkalabo nji eeni. Kuhiisa kuama cisi coonse kutondeza ziibapolofiti iBibele kuamana ni nako yeetu. Ca mutala, Jesu abapolofiti kuti katubone “ziintu zitiiza,” kapa “ziintu zikomokisa ni zitiiza.” (Luka 21:11; Good News Translation) Kuweleka kwa kuhiisa kwa mazimo a cisi kutiizize baangi kuti zibakweete kupanga bantu ka ziletise kuti cisi kaanzi cihalwa bantu.
Kana cisi keete ni ciwoole kuhalwa bantu hape?
Inkalabo nji nee. ILeza ababumbi cisi kuti ibe muzi weetu kuya kwiile; keete naa siilile bantu kuti ba cisinye. (Lisamu 115:16; Muwambi 1:4) Mane usepisa kuti “kaa shinye bashinya cisi.”—Kuzikula 11:18.
IBibele itondeza kuti iLeza uwoola mi kaa sileleze cisi kuti kaanzi cisinywa.
“[ILeza] utontoza luhuho lukaando; mandinda ee wate atontola.” (Lisamu 107:29) ILeza wiina ziho za kuyendisa ziintu zibabumbwa. Uwoola kumanisa bukaabo boonse buletise manyando ku bantu kukopanyeleza ni kuhiisa ahulu.
“Ubabalela cisi, uciha kuti cibe ni zicelo ziingi mi ucinunisa ahulu.” (Lisamu 65:9) Cee mbuyoti za Jehova, cisi kacibe iparadaisi.
Kuti mulitute ziingi ziisepisa iBibele kuamana ni kubozekezwa kwa mwiikalilo wiina hande, mubone indaba yahe webbusaiti itakuti “Who Will Save the Earth?”
