MUZWIILE-HABUSU KUTONDA!
Mifilifili Ikomokisa ya Kuzinda Intobolo Mucisi Coonse—IBibele Iwambanzi?
Mu mwezi wa July 2022, zicitantu za mifilifili ikomokisa ya kuzinda intobolo ibapangahali mucisi coonse:
“Kwihayiwa kwe politisheni yowi zibenkene ahulu wee zina lya Shinzo Abe, wakwa Japan [yabali kubanga Ikwambuyu yowicilila Mueteleli wee Nkaanda] kuba bengisi ahulu bantu mwi nkaanda ni kukomokisa ahulu bantu boonse mucisi, sihulu cee baka lya kuti inkaanda ya Japan kayina ahulu indaba za bugebenga ni milawo yiina mwateni kaza kuluwa intobolo.”— 10 July, 2022, impiho ya The Japan Times.
“Bantu bamwa Denmark bakomoketwe mukwame wee ntobolo ya behayi bantu bootatwe ku cibaka ca zintolo cisumpwa Copenhagen shopping mall.”—July 4, 2022, Impiho ya Reuters.
“Mwa South Africa: Bantu beena 15 babafwi mukwame wee ntobolo ha zinda cibaka kunywinwa mwa Soweto.”—10 July, 2022, impiho ya The Guardian
“Bantu balikana 220 baba zindwa ni kwihayiwa mwa Amerika ( U.S.) mwi mpumulo 4 July.”—July 5, 2022, impiho ya CBS News.
Kana twiina insepo yakuti mifilifili yiina buti kayimane? IBibele iwambanzi?
Kumana kwa Mifilifili
IBibele italusa inako ituhala kuyili kuba “mazuba a mamani-mani,” iyo nako bantu kababe bakali, beena lunya, ni bapanga ziintu ziswabisa ahulu. (2 Timoteya 3:1, 3) Mifilifili yiina buti iletisa kuti bantu bahale ni balikalililwe ahulu. (Luka 21:11) Nihakuba bulyo, iBibele isepisa inako yeete ni ku maniswe mifilifili mweyo nako “bantu kabahale mu cibaka cee nkozo ciikalilile, mu zibaka zisilelezwe ni mahuzilo ee nkozo.” (Isaya 32:18) Mifilifili kayimane bule?
ILeza kaa zwiise mucisi bantu boonse babilala ni kushinya zilwiiso zoonse.
“Bantu babilala, kaba zwiiswe mucisi.”—Inguli 2:22.
“[ILeza] umanisa inkoondo mucisi coonse. Ucola buta ni kukosola mulinga; uhisa inkoloyi zee nkoondo ca mulilo.”—Lisamu 46:9.
ILeza kaa manise ziintu ziletete mifilifili ca kuluta bantu kuhala cee nkozo.
“Keete balete inkozi ihi kamba ihi, kamba kuleta inshinyeho he lundu lyaangu lyoonse lijolola, kakuti cisi coonse ka ciizule inzibo ya Jehova sina meenzi mwawumbile iwate.”—Isaya 11:9.
Nangati mwe yiinu nako, iLeza ukweete kuluta bantu kusaaba ni mifilifili ni kusasebelisa zilwiiso, “kabasandule mikwale yaabo kupanga mahamba akulimisa mi kabasandule milinga yaabo kuba majekesi.”—Miika 4:3.
Kuti mulitute ziingi kaze insepiso ya mwi Bibele ya cisi museete ni kube ni kuhala ca kulikalililwa, mubale indaba yahe webbusaiti itakuti “Kuhala Mucisi Museena Kulikalililwa—Kana Kuwooleka?”
Kuti mulitute ziingi mweete imanisizwe mifilifili, mubale indaba yahe webbusaiti itakuti “Ku Mamani-mani Kakube ni Nkozo Mucisi!”
