MUZWIILE-HABUSU KUTONDA!
Mifilifili yee Politiki—IBibele Iwambanzi?
Mifilifili miingi yee politiki ikweete kupangahala mu cisi, kuletisa kuti buungi bwa bantu mu cisi balikalililwe ahulu.
Mwa Mexico, kubehayiwa mapolitisheni beena 39, kutalusa impalo inkaando ahulu mane bulyo ni mifilifili yimwi itiizize ahulu bantu kuabana mwi ketisa za 2023-2024.
Hahanu mwa Europe kubabi ni mifilifili miingi yee politiki, kuzwaho kali 15 May 2024 kubabi ni mulelo wa kusaka kwihaya mueteleli yowicilila mueteleli wee nkaanda ya Slovakia.
Bantu bamwa Amerika babakomokwa ahulu zee ndaba ya kusaka kwihayiwa kwa Donald Trump kali 13 July 2024 yabali kubanga mueteleli wee nkaanda.
Ibakanzi mifilifili yee politiki hayinjihite ahulu mu cisi? Kana kayimane inako yimwi? IBibele iwambanzi?
Kusazuminzana kwa bantu mu ndaba zee politiki kuba polofitwa
IBibele ibapolofiti kuti mu nako zeetu, zitalwiiswe kuba “mazuba a mamanisilizo,” buungi bwa bantu kababe ni mikwa iletisa mifilifili ni kusazuminzana.
“Kono wiizibe ciinu, mu mazuba a mamanisilizo inako inkaabo, ziziyeza kazibe kwateni. Kakuti bantu kababe . . . baseena buitumelo, basasepahali, . . . bakakanina ha mihupulo yaabo, . . . beena bukali, . . . babeteki, beena mutwi mukukutu, balitemba ca kulikuumusa.”—2 Timoteya 3:1-4.
IBibele hape ibapolofiti kuti mu nako zeetu bantu kabasandukile mubuso ni kuleta mifilifili yee politiki. (Luka 21:9, indaba za kuunsi) Nihakuba bulyo, mifilifili yee politiki ni kusazuminzana keete ni kuzwiile-habusu kuya kwiile.
Mamanisilizo a mifilifili yee politiki
IBibele italusa kuti Ireeza kayolise mibuso yoonse ya bantu ca mubuso waakwe wa kwiwulu.
“Ireeza wa kwiwulu kaatome mubuso weete . . . niusinye ni kumanisa mibuso yiinu [yimwi] yoonse, mi njiwona bulyo weete ube kwateni kuya kwiile.”—Danyele 2:44.
Mubuso wee Reeza kawu wondinsanise bantu ni kuleta inkozo mu cisi coonse.
Mubusi waawo, iye Jesu Kreste, usumpwa “Induna wee Nkozo,” impuso yaakwe “kayizwiile-habusu, mi inkozo keete niimane.”—Isaya 9:6, 7.
Nangati hanu, babusiwa kowo mubuso balituta mwa kuhalila mu nkozo. Celyo ibaka, IBibele iwamba kuti: “Kabapange mikwale yaabo kuba malimi a zikekele mi kabapange malumo abo kuba majekisi. Cicaba keete ni cilwiise cicaba cimwi ca mukwale, mi keete ni balitute inkoondo.”—Isaya 2:3, 4.
Kuti mulitute ziingi, mubale indaba yahe webbusaiti icokuti “Mubuso wa Mulimu Ukaezañi?” ni kulweela ividiyo icokuti Mubuso wee Reeza Ciintunzi?