Inkopano ya Macaba (United Nations) ibiha kuti:

•   Kuzwa kali 7 October kutwaala kali 23 October 2023, inkoondo ya Gaza ni Isilayele ibaletisi mafu ku bantu basika ha 6,400 ni nkolofalo kubeena 15,200, buungi bwaabo bantu kaheena masole. Kuweela hateni, buungi-buungi babakuuli mu zibaka zaabo.

•   Kwiiza kusika kali 24 September 2023, inkoondo ya Russia ni Ukraine cibehayi bantu basali masole basika ha 9,701 ni kuholofaza balikana 17,748 mu nkaanda ya Ukraine.

 Insepo yiina bule yiiha iBibele ku bantu banyanda cebaka lye nkoondo?

 IBibele ibapolofiti kuti Ireeza “kaa manise inkoondo zoonse mu cisi.” (Lisamu 46:9) Kalitusise muuso wa kwiwulu, kapa mubuso, kuyolisa impuso zoonse za bantu. (Danyele 2:44) Mubuso wee Reeza kawu imulule bantu.

 Mubone zeete apange Jesu Kreste, Simwiine wa Mubuso wee Reeza:

•   “Kakuti kalamulele mubotana yolilila kwaali, ni muntu wa mazimo a kuunsi ni muntu yeense yaseena yomutusa. Kafwiile insee muntu wa mazimo a kuunsi ni mubotana, mi kahaze buhalo bwa mubotana. Kabalamulele ku babalyatilila ni ku mifilifili.”—Lisamu 72:12-14.

 Ca Mubuso waakwe, Ireeza kaa manise manyando ni bubilala boonse buletetwe inkoondo ni mifilifili.

•   “Kaa sinde zinsozi ku meenso abo, mi ifu keete nilibe kwateni, nangati maswabi kapa kulila kapa kusasaminwa keete nizibe kwateni. Ziintu zakale cizibamani.”—Kuzikula 21:4.

 Hahanu Mubuso wee Reeza kawulete incinceho zikaando mu cisi. IBibele ibapolofiti zee “nkoondo ni mpiho zee nkoondo” zitubweene zikweete kupangahala suunu. (Matewu 24:6) Izi nkezahalo ni zimwi zikweete kupangahala zitondeza kuti tuhala “mu mazuba a mamanisilizo” e mpuso za bantu.—2 Timoteya 3:1.