Kakusasani kali 24 February, 2022, impi ya masole ba Russia ibataangisi kutaseza Ukraine, nihakuba kuti babusi ba mucisi baba likatazi kuti kaanzi kubi ni nkoondo. Iyi inkoondo ikweete kupangahala kayiame bule miikalilo mucisi? Muñoli wee nkopano ya macaba isumpwa United Nations, António Guterres, abawambi buti mazuba alikene ku masule: “Manyando eete bakopane naawo bantu, kusinyeha kwa ziintu, mucisi ca Europu hamwiina bulyo ni mucisi coonse kakube kukaando ahulu.”

•   Jesu Kreste abapolofiti zee nako iyo “inkaanda kayi lwiise inkaanda yimwi ni mubuso kulwiisa mubuso umwi.” (Matewu 24:7) Kuti mubone iBibele mwi tondeleza kuti inkoondo zitubweene suunu zizuzilikiza bupolofita bwa Jesu mubale indaba yahe webbusaiti itakuti: “Cisuponzi Citondeza ‘Mazuba Amamanisilizo,’ kamba ‘Mamanisilizo ee Nako’?”.

•   Imbuka ya mwi Bibele ya Kuzikula italusa inkoondo kuba muntu yowikeele “he mbizi isubila sina mulilo” yozwiisa “inkoozo mucisi.” (Kuzikula 6:4) Kuti muwaane ubu bupolofita mubutondekela ku nkoondo ziina kwateni suunu mubale indaba yahe webbusaiti itakuti: “Batiizi Bee Mbizi Boone—Njibaani?”.

•   Imbuka ya Danyele ibapolofiti za kulilwiisa mukati ka “simwiine wakwa mutulo” ni “simwiine wakwa mboela.” (Danyele 11:25-45) Mulweele ividiyo itakuti: Kwizuzilikizwa kwa Bupolofita—Danyele Inkauhanyo 11 kuti muwoole kulituta ibaka Russia ni bawoondinsana naaye ha bazimanina simwiine wakwa mutulo. a

•   Imbuka ya Kuzikula hape italusa zee “nkoondo ye zuba ikaando lye Leza wa Ziho zoonse.” (Kuzikula 16:14, 16) Nihakuba bulyo, iyi kaheena inkoondo mukati kee nkaanda ubu izi zitubweene suunu. Kuti muwaane indaba ziingi kaze inkezahalo zeete ni zipangahale kubusu mubale indaba yahe webbusaiti itakuti: “Inkoondo ya Armageddoni Ciintuzi?”.

•   IBibele iwamba kuti iLeza “kaa manise inkoondo mucisi coonse.” (Lisamu 46:9) Kuti mulitute ziingi zee nsepiso zee Leza za kubusu mubale indaba yahe webbusaiti itakuti: “Insepo yee Niti ya Miikalilo Yiina Hande ya Kubusu”.

•   Jesu abaluti becilili baakwe kulapelela Mubuso wee Leza kuti wiize. (Matewu 6:9, 10) Mubuso wee Leza muuso wa kwiwulu weete upange zaasaka iLeza hanu haansi, zimwi ku zasaka iLeza zikopanyeleza inkoozo mucisi. Kuti mulitute uwo Mubuso mweete umituseze mulweele ividiyo itakuti: Mubuso wee Leza Ciintunzi?

 Mu nkaanda ya Ukraine kuwaanika Impaki za Jehova bahitilila 129,000. Sina muzikaliile Impaki mwi nkaanda zimwi, Impaki bamwa Ukraine balikanyisa Jesu cakuzwiila-habusu kuba basalinjiziki mu ndaba zepolitiki ni kukaana kulwa mu nkoondo. (Johani 18:36) Mucisi coonse, Impaki za Jehova bazwiilile-habusu kukutaza “indaba indotu ya Mubuso” kuti uwo Mubuso njiwona feela weete umanise bukaabo ni nkoondo mucisi. (Matewu 24:14) Kuti mulitute ziingi zee ndaba iha insepo ya mwi Bibele mubone zumwi wee Mpaki za Jehova.