MUZWIILE-HABUSU KUTONDA!
Inkoondo ya mwa Ukraine Iletise Kutayela kwa Zilyo Mucisi
Kali 19 May, 2022, Katengo kee Nsilelezo ya Macaba (United Nations Security Council) baba tambuli impiho ku maofisa bakutekeha balikana 75 bawamba kuti “bukaabo bwa zilyo mucisi coonse, bubatangi cebaka lya butuku bwa COVID-19 buyambite hamwiina ni ncinceho ku mazimo ewulu, kuletisa kuti kutayela kwa zilyo mucisi kuekezehe ahulu cebaka lye nkoondo ya mwa Ukraine.” Hahanu kamba kubusu, Yobona za mazimo a masheleñi abawambi kuti “inkoondo kayiletise bukaabo bwa kutayela kwa zilyo bukaando ahulu mucisi.” IBibele ibapolofiti kuti kutayela kwa zilyo kakube kwateni munako zeetu, kono ituha intuso iwoola kututusa kukolela iyi miikalilo.
IBibele ibapolofiti za kutayela kwa zilyo
Jesu abapolofiti: “Inkaanda kayi lwiise inkaanda yimwi ni mubuso kulwiisa mubuso umwi, mi kakube ni kutayela kwa zilyo.”—Matewu 24:7.
Imbuka ya mwi Bibele ya Kuzikula italusa inswanisezo ya batiizi bee mbizi boone. Zumwi waabo batiizi bee mbizi uzimanina inkoondo. Mi wiciliilwe zumwi yozimanina inzala, inako yeete ni kube ni kutayela kwa zilyo ni kudula kwa zilyo. “Ni baboni imbiizi isiiha, mi mutiizi waayo abali kukweete zikala zoobele mwi yanza. Cinazuwa ciintu cibali kuzuweka sina liinzwi . . . Cicati, ‘ Ikilo imwiina ya buloto kayiwuzwe isheleñi ya sebeleza muntu izuba lyoonse! Mi makilo ootatwe a mahira kaa wuzwe isheleñi ya sebeleza muntu izuba lyoonse.’”—Kuzikula 6:5, 6, Intoloko ya Contemporary English Version.
Bupolofita bwa mwi Bibele kaza kutayela kwa zilyo cibwe zuzilikizwa mwi nako isumpwa mwi Bibele kuba “mazuba a mamani-mani.” (2 Timoteya 3:1) Kuti mulitute ziingi kaza “mazuba a mamani-mani” ni batiizi bee mbizi boone bawambitwe kwiñolo lya Kuzikula, mulweele ividiyo Cisi Cibacinci Kuzwa Cilimo ca 1914 mubale hape n indaba yahe webbusaiti itakuti “Batiizi Bee Mbizi Boone—Njibaani?”
IBibele mwi woola kumituseza
Mwi Bibele kuwaanika inkelezo iwoola kututusa kukolela miikalilo mikukutu itukopana naayo, kukopanyeleza bulyo kudula ni kutayela kwa zilyo. Mubone mitala yiina mwi ndaba yahe webbusaiti “Mumuwoola Kuhalila ca Masheleñi Manini.”
IBibele hape ituha insepo yakuti ziintu kazibe hande. Itusepisa inako yeete ni kube “ni zilyo ziingi mucisi” mi zumwi ni zumwi kaabe ni zilyo ziingi za kulya. (Lisamu 72:16) Kuti mulitute ziingi kaze nsepo ya mwi Bibele ya kubusu ni ibaka a muwoola kwi sepa, mubale indaba yahe webbusaiti itakuti “Insepo yee Niti ya Buhalo Bulotu bwa Kubusu.”