Bungi bwa mibuso ya mucisi coonse babahi mulawo wa kusaba hamwiina cabuntu mane ni kukungana hamwiina ubu cikwata. Impaki za Jehova balidukiseze kwiicilila iyo milawo izwa ku mibuso kono ni bazwiila-habusu kulapela hamwiina. Mi bakweete kucita bulyo, cakulitusisa ividiyokofarensi ca mutala iprogramu isumpwa Zoom, kukupanga mikopano.

Ilikuti tuwole kuba ni mikopano cenako zoonse ni kuba ni ntukiso ziyenda censwanelo, Citopa Cietelela cibalukululi masheleñi kuzwiilila ku nubu zihewa cakusaka kuti alitusiswe kukuwula maakaunti ezoom emputeho. Iyi intukiso itusize ahulu imputeho zisete ni zibawoli kuliwulila maakauti ama vidiyokofarensi awula $15-$20 dola ya America kamba kuhitilila aho. Izi imputeho zibali kulitusisa maprogramu asa lihilwa ahinda bulyo impalo ilikene ya baputehi bakonekita kwateni kamba naasa silelezi hande intukiso. Imputeho zoonse zisebelisa maakaunti enkopano batusehete kweyi intukiso inhuba izuminina impalo ya bantu bangi kukonekita ku umwi ni umwi wa mikopano. Mwe yiinu nako, imputeho zihitilila 65, 000 mukaanda zihitilila 170 zilitusisa aa maakaunti enkopano.

Imputeho ya Kairagi, ya mwa Manado, North Sulawesi, Indonesia, baba cinci kuzwa kwi programu isalihilwa ni kutangisa kulitusisa iprogramu ya Zoom ye akaunti ye nkopano. Muzwale Hadi Santoso utalusa buti: “Nangati mizwale ni bancizye basena ahulu iseli lyo kulitusisa tupangaliko, mwe yiinu inako cibalikola mikopano cenako indee, kakuti ka basikonekiti tungi-tungi cenako ya mukopano umwiina.”

Lester Jijón, Jr., mukulu-kwame we mputeho ya Guayacanes Oeste mwa Guayaquil, Ecuador, utalusa buti: “Cebaka lya cifumu cenkaanda cibolele haasi bungi bwa mizwale ni bancinzye, buniti feela ni kubabi bukabo luli kuzimwi imputeho kuti bawole kulihila ilaisensi ya zoom iwola kuzuminina imputeho yoonse kukonekita ku mikopano. Njikuti tulitumele ahulu kunkopano cokutuwanisa izoom akaunti itutusa kuwola kukonekita ku mikopano ca bungi, mwe yiinu inako cituwola kumema bantu bangi ni tulukuluhite ni kusena kulikalililwa zempalo ya bantu baswanela kukonekita.”

Johnson Mwanza, mukulu-kwame waku mputeho ya Ngwerere North mwa Lusaka, Zambia, uñola buti: “Bungi bwa mizwale ni bancinzye bawamba buti cakubolela-bolela, ‘Intukiso ye nkopano kaze zoom kayi tuletisezi feela kuba afuhi ni mizwale ni bancinzyeetu kono itutusa kulizuwa kusakiwa ni kubabalelwa kuzwa kwa Jehova.’”

Aa maakaunti akweete kuwuliwa ca kulitusisa cikwama ca masheleñi a bikilwe kutusa mwi nkozi zilizila bulyo. Aa masheleñi azwa kwinubu zihewa cakusaka kuti zituse mu mutendo wa mucisi coonse. Bungi bwezi inubu zihewa ce intaneti ha donate.pr418.com. Tulitumela ahulu-hulu ku buhaani bweenu, mane zikweete kutusa mu miikalilo icincene-cincene ya mucisi coonse kusakahala intuso.—2 Bakorinte 8:14.