Mavidiyo a lweliswanga ku mikopano yeetu mikaando atusikanga luli kunkulo zeetu, mi hape atutusanga ahulu kuwela ku nkutwisiso yeetu ye ntuto zeetu zitomete hamañolo. Mukopano mukaando wa cilimo ca 2020 utakuti “Mube Basangite Cenako Zoonse”! wiina mavidiyo alikana 114, hamwiina bulyo ni ingambolo ziina 43 zibahewa kuba Citopa Cietelela hamwiina ni batusi baabo. Kana cimubalibuzite kaza buikatazo ni shinyehelo za litusiswa kukuzwiisa mavidiyo aa?

Impalo yilikana 900 ya mizwale ni bancinzye bazwiila munkalulo ze cisi coonse babali tomboli inako ni izibo yaabo kuti kuwole kuzwiiswa aa mavidiyo. Hamwiina, babasebezi mahora awola kusika mwa 100,000 muzilimo zoobele zowu mutendo. Ico cikopanyeleza mahora eena 70,000 abali kusakahala kuti kumaniswe cizano ca mwi Bibele ca mizuzu yiina 76 citakuti Nehemiya: Kakuti “Intabo Yaha Jehova Yi Misileleza.”

Ubu feela mu mwiizibile, kuba litusiswa masheleñi maangi mukutusa muzintu zisakahala za buhalo bwa baitomboli, mane bulyo ni zibaka za kusebeleza, zisebeliso, ni zibaka ziswanela ili kuti mutendo uwole kumaniswa hande.

“Katengo kabona za Kuluta ka Citopa Cietelela bakondwa ahulu hababona zizo za mishobo-shobo ni zibaka zicincene zitondezwe mu mavidiyo eetu. Uwu mucitilo ututusa ahulu kunahana ca kunepahala bulotu bwa mucikalile cizwale ceetu ca mucisi coonse.” Mu bawambila ba Jared Gossman, ba sebeza ni luko lya ma Odiyo/Vidiyo. “Kuti uwu mulelo uwole kupetiwa, zikwata ziina 24 za munkaanda zicincene-cincene ziina 11 baba tendi hamwiina mowu mutendo. Buikatazo ubu bwakuti bantu bazwa muzibaka zicincene-cincene bawole kusebeza hamwiina kusakahala masheleñi maangi, kulukisa, ni kuonga-onga luli.”

Kuzwaho bungi bwa mavidiyo eetu kuti awole kuzwiiswa kusakahala zisebeliso ni cibaka ciswanele. Camutala, cibaka ca cizano citakuti Nehemiya:Kakuti “Intabo Yaha Jehova Yi Misileleza.” Zibazakilwa mukati ke situdiyo ci sumpwa Mt. Ebo studio hafuhi ni Patterson, mwa New York, munkaanda ya U.S.A. Ili kuti inubu zihewa ziwole kulitusiswa hande ni kuti ifilimu iwole kutondeza hande zintu zakale ni kuba zinepahele, mizwale baba pangi mabwe mahuba apangitwe cenzila iswana ni mwabali kwiikalile mamota a Jerusalema wakwa ikale. Imota ni imota libeena mamiita eena 6 kuya mwiwulu kamba (20 ft) imbokisi iba pangwa hamabala iwumbitwe cefoomu ni kupendwa zibali kuboneka ubu mabwe aluli. Aa “mamota” abali kuwolwa kushimbululwa kuti a yendeleze zintu, ili kunyinyifaza impalo ya mamota abali kusakahala. Nihakuba bulyo, masheleñi alikana $100,000 ya madola a Amelica (U.S.) abalitusiswa kukuzaka aa mamota ee cizano feela. *

Kwiiziba izi indaba kututusa ahulu kuba batondeza buitumelo kutukiso ya mukopano mukaando we ciinu cilimo. Twiina buikolwiso bwakuti buikatazo boonse bwabikwa mukuzwiisa iprogaramu yoonse iyi kabuletise muhuho wa kutemba Jehova. Tusisa buitumelo ku nubu zeenu zihewa ce intaneti ha donate.pr418.com mane ni zihewa cenzila zimwi.