Tsamba Yakutoma Kuna Akristu a ku Tesalonika 1:1-10
1 Ine Paulu, Silvano*+ na Timoti,+ tikutumiza tsamba iyi ku mpingo wa ku Tesalonika wakuti uli wakuphatana na Mulungu Baba, pabodzi na Mbuya Yezu Kristu:
Khalani na kukoma ntima kukulu pabodzi na ntendere.
2 Ndzidzi onsene ife tisapereka takhuta kuna Mulungu tingalonga pya imwe monsene mʼmaphembero athu,+
3 thangwi pamaso pa Mulungu Babathu, ndzidzi onsene ife tisakumbuka basa inaphata imwe thangwi ya cikhulupiro canu, kuwangisira kunacita imwe thangwi ya kukulumizwa na ufuni na kupirira kwanu thangwi ya cidikhiro ciri na imwe+ mwa Mbuyathu Yezu Kristu.
4 Imwe abale akufuniwa na Mulungu, ife tisadziwa kuti iye akusankhulani,
5 thangwi mphangwa zadidi zidamwaza ife nee zafika kuna imwe na mafala basi, mbwenye zafikambo na mphambvu, nzimu wakucena na cinyindiro cakuwanga. Pontho imwe musadziwa makhaliro adapangiza ife pakati panu toera kukuphedzani.
6 Natenepa, imwe mwatowezera ife+ na Mbuya,+ thangwi mwatawira mafala a Mulungu na kutsandzaya kunabulukira mwa nzimu wakucena, maseze mwathimbana na nyatwa zizinji,+
7 munjira ineyi, imwe mwadzakhala akuthema kutowezerwa na anyakukhulupira onsene a ku Masedhonya na ku Akaya.
8 Mwandimomwene, thangwi ya imwe mafala a Yahova* nee abviwa ku Masedhonya na ku Akaya basi, mbwenye cikhulupiro canu kuna Mulungu camwazika mu mbuto zonsene;+ natenepa, ife nee tisafunikabve kulonga cinthu cinango.
9 Thangwi iwo asapitiriza kulonga pya ulendo wakutoma udaonana ife na imwe, pontho kuti mwasiya tani madzimunthu anu+ mbamutoma kukhulupira Mulungu, toera mukhale mabitcu a Mulungu wa mʼmaso na wandimomwene,
10 pontho toera mudikhire Mwanace buluka kudzulu,+ wakuti ndi Yezu adalamusa iye muli akufa, ule anafuna kutiombola mu ukali wa Mulungu unafuna kudza.+
