Kronika Wakutoma 14:1-17
14 Iramu+ mambo wa ku Tiro atuma anthu kuna Dhavidhi, iye atumizambo matabwa a sedhro, amesiri anamanga nyumba za miyala na amesiri a matabwa toera am’mangire nyumba.*+
2 Penepo Dhavidhi adzindikira kuti Yahova awangisa umambo wace kuna Izraeli,+ thangwi iye akuza kakamwe umambo wace thangwi ya mbumba Yace ya Izraeli.+
3 Dhavidhi asemba akazi azinji+ mu Yerusalemu, pontho iye abala ana azinji amuna na akazi.+
4 Madzina a ana adabala iye mu Yerusalemu+ ndi awa: Samuwa, Sobhabhi, Natani,+ Salomoni,+
5 Ibhari, Eliswa, Elpeleti,
6 Noga, Nefeji, Yafiya,
7 Elizama, Bheliyadha na Elifeleti.
8 Afilisti pidabva iwo kuti Dhavidhi adzodzwa toera akhale mambo wa dziko yonsene ya Izraeli,+ onsene abwera kudzasaka Dhavidhi.+ Dhavidhi pidabva iye pyenepi, abuluka mbaenda kamenyana nawo.
9 Natenepa, Afilisti abwera, mbatoma kumenyana na anthu akakhala ku Gowa ya Refaimu.+
10 Dhavidhi abvundza* Mulungu: “Kodi ndisafunika kuenda kamenyana na Afilisti? Munaapereka m’manja mwanga?” Penepo Yahova antawira: “Ndoko, thangwi mwakukhonda penula, ine ndinaapereka m’manja mwako.”+
11 Natenepa Dhavidhi aenda ku Bhaale-Perazimu+ mbapha Afilisti kweneko. Na thangwi ineyi Dhavidhi alonga: “Mulungu wandimomwene aphatisira manja anga mbakunda anyamalwa anga ninga munagomolwa mpanda na madzi.” Natenepa, mbuto ineyi, iwo aipasa dzina ya Bhaale-Perazimu.*
12 Afilisti asiya alungu awo kweneko, Dhavidhi apanga anthu toera apise alungu anewa, natenepa iwo apiswa pa moto.+
13 Mukupita kwa ndzidzi, Afilisti abwera pontho kudzamenya nkhondo mu gowa ineyi.+
14 Dhavidhi abvundza pontho* Mulungu, mbwenye Mulungu wandimomwene ampanga: “Leka kuenderatu kutsogolo kwawo, mbwenye ndoko na nduli mwawo mbumenyana nawo kutsogolo kwa miti ya bhaka.*+
15 Ungabva mititi ya anthu ninga akufamba padzulu pa miti ya bhaka, menya nkhondo mwakucimbiza, thangwi pa ndzidzi unoyu Mulungu wandimomwene anadzaenda kutsogolo kwako toera kupha anyankhondo a Afilisti.”+
16 Natenepa Dhavidhi acita pidapangwa iye na Mulungu wandimomwene,+ iwo apha anyankhondo a Afilisti kutomera ku Jibheyoni mpaka ku Jezeri.+
17 Na thangwi ineyi, mbiri ya Dhavidhi yamwazika m’madziko onsene, pontho Yahova acitisa kuti anthu a madzindza onsene agope Dhavidhi.+
Pidzindikiro Pyapantsi
^ Peno: “nyumba ya mambo.”
^ Peno: “asaka ciphedzo ca.”
^ Dzina ineyi isabveka “Mbuya Wakufudza.”
^ Peno: “asaka pontho ciphedzo ca.”
^ Dzina yakuti bhaka ndi Yacihebheri. Muti unoyu nee usadziwika kuti ukhali tani.
