Samweli Wakutoma 18:1-30
18 Dhavidhi pidamala iye kucedza na Sauli, Yonatani+ na Dhavidhi adzakhala axamwali a ponda ndipondembo,* pontho Yonatani atoma kunfuna kakamwe ninga mukhafunira iye manungo ace.+
2 Kutomera pa ntsiku ineyi, Sauli apitiriza kukhala na Dhavidhi, pontho nee antawirisa toera abwerere kunyumba kwa babace.+
3 Yonatani acita cibverano ca uxamwali na Dhavidhi,+ thangwi iye akhanfuna kakamwe ninga mukhafunira iye manungo ace.+
4 Yonatani adula tunika yace yakusowa mikono mbapasa Dhavidhi, pabodzi na nguwo zace za nkhondo, supada yace, uta wace na sintu yace.
5 Dhavidhi atoma kuenda kamenya nkhondo, pontho konsene kukhatumwa iye na Sauli, iye akhakunda anyamalwa ace.*+ Natenepa, Sauli ansankhula toera akhale nkulu wa anyankhondo ace,+ pontho pyenepi pyatsandzayisa anthu onsene kuphatanizambo anyabasa a Sauli.
6 Dhavidhi na anyankhondo anango angabwerera buluka kapha Afilisti, akazi a mʼmizinda yonsene ya Izraeli akhaenda na kuimba+ mbabvina toera kutambira Mambo Sauli. Iwo akhatsandzaya, pontho akhaimba ngʼoma zingʼono+ na pyakuimba napyo pinango pya nkhambala zitatu.
7 Akazi anewa akhaimba tenepa:
“Sauli apha anyamalwa 1.000,Mbwenye Dhavidhi apha anyamalwa 10.000.”+
8 Pidabva Sauli nyimbo ineyi,+ atsukwala mbaipirwa kakamwe. Iye alonga: “Iwo asimba Dhavidhi mbalonga kuti iye apha anyamalwa 10.000, mbwenye ine ndapha anyamalwa 1.000. Cidasala iwo toera kumpasa ndi umambo basi!”+
9 Kutomera ntsiku ineyi, ndzidzi onsene Sauli akhayangʼana Dhavidhi na ntsonga ya diso.
10 Mangwana mwace, Mulungu atawirisa kuti Sauli athabuswe na manyerezero akuipa,*+ natenepa iye atoma kucita pinthu ninga nyansala* nʼnyumba mwace. Mu ndzidzi unoyu, Dhavidhi akhaimba arpa+ ninga pikhacita iye maulendo anango. Sauli akhali na dipa mʼmanja mwace.+
11 Natenepa, iye aponyera Dhavidhi dipa+ ineyi maulendo mawiri, mbalonga muntima mwace: ‘Ndinakhomera Dhavidhi pa pfufu!’* Mbwenye Dhavidhi anʼthawa.
12 Buluka penepo, Sauli akhagopa Dhavidhi thangwi Yahova akhali na iye,+ mbwenye akhadabuluka kuna Sauli.+
13 Natenepa Sauli abulusa Dhavidhi pana iye, mbanʼkhazikisa ninga nkulu wa anyankhondo 1.000, pontho Dhavidhi akhatsogolera anyankhondo anewa pakumenya nkhondo.+
14 Dhavidhi apitiriza kupembera*+ mu pinthu pyonsene pikhacita iye, pontho Yahova akhali na iye.+
15 Pidaona Sauli kuti Dhavidhi akhapembera kakamwe, iye atoma kunʼgopa.
16 Mbwenye anthu onsene a mu Izraeli na Yuda akhafuna Dhavidhi thangwi iye akhaatsogolera mu nkhondo zawo.
17 Mukupita kwa ndzidzi Sauli apanga Dhavidhi: “Ine ndinakupasa Merabhi,+ mwananga wankulu wankazi toera akhale nkazako.+ Mbwenye usafunika kupitiriza kunditumikira mwacipapo, mbumenya nkhondo za Yahova.”+ Sauli akhalonga muntima mwace: ‘Ine nee ndisafunika kupha Dhavidhi, mbwenye mbaphiwe na Afilisti.’+
18 Natenepa Dhavidhi apanga Sauli: “Ndine ani ine, pontho mbani abale a babanga mu Izraeli toera ndikhale nkamwene wa mambo?”+
19 Mbwenye pidafika ndzidzi toera Merabhi mwana wa Sauli aperekwe kuna Dhavidhi, iye akhadaperekwa kale toera akhale nkazi wa Adhriyeli+ wa ku Meola.*
20 Mikale+ mwana wa Sauli akhafuna Dhavidhi, pontho Sauli pidabva iye pyenepi akomerwa.
21 Natenepa Sauli anyerezera: “Ine ndinapereka mwananga kuna iye kuti akhale ninga nsampha, toera Dhavidhi aphiwe na Afilisti.”+ Sauli apanga Dhavidhi paulendo waciwiri: “Lero iwe unakhala nkamwene wanga.”
22 Kusiyapo pyenepi, Sauli apanga anyabasa ace: “Pangani Dhavidhi pace ekha kuti: ‘Mambo asakomerwa kakamwe na iwe, pontho anyabasa ace onsene asakufuna. Natenepa, tawira kukhala nkamwene wa mambo.’”
23 Anyabasa a Sauli pidapanga iwo Dhavidhi mafala anewa, Dhavidhi alonga: “Kodi imwe musanyerezera kuti ndi pyakukhonda nentsa kuna munthu wakupwazika na wakutcerenga ninga ine toera kukhala nkamwene wa mambo?”+
24 Buluka penepo, anyabasa a Sauli aenda kampanga pidalonga Dhavidhi.
25 Penepo Sauli alonga: “Kampangeni tenepa Dhavidhi: ‘Mambo nee asafuna kobiri yakusemba nayo,+ mbwenye asafuna makanda 100 a ntsonga za kumaso+ kwa Afilisti, toera kubwezera pyakuipa pidacita anyamalwa a mambo.’” Sauli akhacita masasanyiro toera Dhavidhi aphiwe na Afilisti.
26 Natenepa anyabasa a Sauli alonga mafala anewa kuna Dhavidhi, pontho iye akomerwa toera kukhala nkamwene wa mambo.+ Mbidzati kufika ntsiku idabverana iwo toera kulipa,
27 Dhavidhi aenda pabodzi na anyankhondo ace, apha amuna 200 a Afilisti, mbabweresa kuna mambo makanda 200 a ntsonga za kumaso kwa Afilisti toera akhale nkamwene wa mambo. Natenepa Sauli ampasa mwanace anacemerwa Mikale toera akhale nkazace.+
28 Sauli adzindikira kuti Dhavidhi+ akhaphedzwa na Yahova, pontho adzindikira kuti mwanace anacemerwa Mikale akhafuna Dhavidhi.+
29 Pyenepi pyacitisa Sauli kugopa kakamwe Dhavidhi, pontho Sauli adzakhala nyamalwa wa Dhavidhi mpaka kufa kwace.+
30 Atsogoleri a Afilisti akhaenda kunkhondo, mbwenye ndzidzi onsene ukhaenda iwo, Dhavidhi akhaakunda* kakamwe kupiringana anyankhondo onsene a Sauli;+ natenepa dzina yace yabvekera kakamwe.+
Pidzindikiro Pyapantsi
^ Peno: “Yonatani adzakhala wakuphatana kakamwe na Dhavidhi.”
^ Peno: “akhacita pinthu mwandzeru.”
^ Peno: “mprofeta.”
^ Fala na Fala: “nzimu wakuipa.”
^ Peno: “paredhi!”
^ Peno: “kucita pinthu mwandzeru.”
^ Pisaoneka kuti kweneku ndi ku Abheli-Meola.
^ Peno: “akhacita pinthu mwandzeru.”
