Samweli Wakutoma 23:1-29
23 Mukupita kwa ndzidzi Dhavidhi apangwa: “Afilisti akumenyana na anthu a ku Keila,+ pontho iwo akutapata cakudya pa mbuwa.”
2 Natenepa Dhavidhi abvundza Yahova:+ “Ndisafunika kuenda kamenyana na Afilisti?” Yahova antawira: “Ndoko kamenyana na Afilisti mbupulumusa anthu a ku Keila.”
3 Mbwenye amuna akhali na Dhavidhi ampanga: “Khala ife tiri kugopa mbitiri kuno ku Yuda,+ ndiye tani tingaenda ku Keila kamenyana na anyankhondo a Afilisti!”+
4 Natenepa Dhavidhi abvundza pontho Yahova.+ Yahova antawira: “Lamuka, ndoko ku Keila thangwi ine ndinapereka Afilisti mʼmanja mwako.”+
5 Dhavidhi pabodzi na amuna akhali na iye aenda ku Keila mbamenyana na Afilisti; iye akwata pifuyo pyawo mbapha Afilisti azinji kakamwe, munjira ineyi Dhavidhi apulumusa anthu a ku Keila.+
6 Abhiyatari+ mwana wa Aimeleki pidathawa iye mbaenda kuna Dhavidhi ku Keila, iye akhali na efodhi mʼmanja mwace.
7 Sauli apangwa: “Dhavidhi ali ku Keila.” Penepo Sauli alonga: “Mulungu ampereka mʼmanja mwanga,*+ thangwi iye afungirika ekhene pidapita iye mu nzinda wakuti uli na misuwo mikulu na mipiringanyo.”
8 Natenepa Sauli acemeresa anyankhondo ace onsene toera kuenda kunkhondo ku Keila kazungulira Dhavidhi na amuna akhali na iye.
9 Pidadziwa Dhavidhi kuti Sauli akucita masasanyiro toera kuncita pyakuipa, iye apanga nyantsembe Abhiyatari: “Bweresa efodhi pano.”+
10 Penepo Dhavidhi alonga: “Yahova Mulungu wa Izraeli, ine ntumiki wanu ndabva kuti Sauli asafuna kubwera kuno ku Keila toera kudzafudza nzinda thangwi ya ine.+
11 Kodi atsogoleri* a mu Keila anandipereka mʼmanja mwace? Sauli anabweradi kuno ninga pidabva ine ntumiki wanu? Yahova Mulungu wa Izraeli, ndaphata miyendo, ndipangeni ine ntumiki wanu.” Penepo Yahova alonga: “Iye anabwera.”
12 Buluka penepo Dhavidhi abvundza: “Kodi atsogoleri a mu Keila anadzapereka ine pabodzi na amuna ali na ine mʼmanja mwa Sauli?” Yahova atawira: “Iwo anadzakuperekani.”
13 Mwakukhonda dembuka, Dhavidhi pabodzi na amuna akhali na iye cifupi na 600,+ abuluka ku Keila mbaenda mʼmbuto zakusiyana-siyana. Sauli pidapangwa iye kuti Dhavidhi abuluka ku Keila, iye nee aendabve kweneko.
14 Dhavidhi akhala nʼthando mʼmbuto zakunentsa toera kuzifika, mucisa ca mapiri ca thando ya Zifi.+ Ndzidzi onsene Sauli akhansaka,+ mbwenye Yahova nee ampereka mʼmanja mwace.
15 Dhavidhi pikhali iye nʼthando ya Zifi ku Oresi, adzindikira kuti* Sauli akhansaka toera kumupha.
16 Yonatani mwana wa Sauli aenda kaonana na Dhavidhi ku Oresi, pontho amʼphedza kuwangisa cinyindiro cace* kuna Yahova.+
17 Iye ampanga: “Leka gopa, thangwi babanga nee anadzakugumana; iwe unadzakhala mambo wa Izraeli,+ pontho ine ndinadzakhala waciwiri mu umambo wako, babanga Sauli asadziwambo pyenepi.”+
18 Penepo uwiri wawo acita cibverano+ pamaso pa Yahova, pontho Dhavidhi akhala ku Oresi, mbwenye Yonatani abwerera kunyumba kwawo.
19 Mukupita kwa ndzidzi, amuna a ku Zifi aenda kuna Sauli ku Jibheya+ mbampanga: “Dhavidhi abisala dhuzi na ife+ mʼmbuto zakunentsa toera kuzifika ku Oresi,+ paphiri ya Akila+ yakuti iri kunterero* kwa Yesimoni.*+
20 Mambo, mungafuna bwerani, ife tinadzampereka mʼmanja mwanu.”+
21 Natenepa Sauli alonga: “Yahova mbakupaseni nkhombo, thangwi imwe mwandibvera ntsisi.
22 Ndaphata miyendo, ndokoni mukaonesese kunakhala iye, pontho mbani adamuona, thangwi ndabva kuti iye ndi wakucenjera kakamwe.
23 Ndokoni mukaone mbuto zonsene zinabisala iye, pontho bwerani na pinthu pinapangiza kuti iye asabisaladi mʼmbuto zenezi. Buluka penepo ine ndinadzaenda pabodzi na imwe, pontho khala ali mu dziko ineyi, ndinadzansaka pakati pa pikwi pya anthu a Yuda mpaka kunʼgumana.”
24 Natenepa iwo atsogola kuenda ku Zifi+ mbasiya Sauli nduli. Mu ndzidzi unoyu, Dhavidhi pabodzi na amuna akhali na iye akhali nʼthando ya Maoni+ ku Arabha,+ kunterero kwa Yesimoni.
25 Buluka penepo Sauli afika na amuna akhali na iye+ toera kusaka Dhavidhi. Dhavidhi pidapangwa iye pyenepi, aenda pamwala+ wakuti ukhali nʼthando ya Maoni mbakhala kweneko. Sauli pidabva iye pyenepi, atowera Dhavidhi kuthando ya Maoni.
26 Sauli pikhali iye kukhundu ibodzi ya phiri, Dhavidhi na amuna akhali na iye akhali kukhundu inango ya phiri. Dhavidhi akhathawa Sauli mwakucimbiza kakamwe,+ mbwenye Sauli na amuna akhali na iye akhali dhuzi kakamwe toera kuphata Dhavidhi pabodzi na amuna akhali na iye.+
27 Mbwenye afika munthu mbapanga Sauli: “Bwerani mwakucimbiza, thangwi Afilisti apita mu dziko mwathu!”
28 Penepo Sauli asiya kutowera Dhavidhi+ mbaenda kamenyana na Afilisti. Na thangwi ineyi, mbuto ineyi isacemerwa Mwala wa Kumwazana.
29 Natenepa Dhavidhi abuluka pa mbuto ineyi mbaenda kakhala mʼmbuto zakunentsa toera kuzifika za ku Eni-Jedhi.+
Pidzindikiro Pyapantsi
^ Fala na Fala: “anʼgulisa mʼmanja mwanga.”
^ Munjira inango: “anaciro nzinda.”
^ Munjira inango: “akhagopa thangwi.”
^ Fala na Fala: “djanja yace.”
^ Fala na Fala: “khundu yamadyo.”
^ Munjira inango: “thando.”
