Samweli Wakutoma 27:1-12
-
Dhavidhi apaswa Zikilage na Afilisti (1-12)
27 Dhavidhi alonga muntima mwace: “Ntsiku inango Sauli anadzandipha. Cinthu cadidi cinafunika ine kucita ndi kuthawira+ ku dziko ya Afilisti; Sauli anadzaneta kundisaka mu dziko yonsene ya Izraeli.+ Natenepa ine ndinadzapulumuka mʼmanja mwace.”
2 Penepo Dhavidhi pabodzi na amuna 600+ akhali na iye, alamuka mbaenda kuna Akisi+ mambo wa ku Gati, mwana wa Maoke.
3 Dhavidhi na amuna akhali na iye, pabodzi na mabanja awo, akhala na Akisi ku Gati. Dhavidhi akhali na akazace awiri, Ainowamu+ wa ku Yezrieli na Abhigaili+ wa ku Karmelo wakuti akhali nkazi wa Nabhale.
4 Sauli pidapangwa iye kuti Dhavidhi athawira ku Gati, iye asiya kunsaka.+
5 Buluka penepo Dhavidhi apanga Akisi: “Khala ndi pyakutawirika kuna imwe, ndipasenimbo mbuto mu nzinda ubodzi mwa mizinda yanu mingʼono toera ine ndikhale. Thangwi yanji ine ntumiki wanu ndisafunika kukhala pabodzi na imwe mu nzinda unakhala mambo?”
6 Natenepa Akisi ampasa Zikilage+ pa ntsiku ineyi. Na thangwi ineyi, Zikilage ndi wa amambo a Yuda mpaka lero.
7 Dhavidhi akhala mu dziko ya Afilisti caka cibodzi na miyezi minai.+
8 Dhavidhi na amuna akhali na iye akhaenda kamenyana na Ajesuri,+ Ajirizite na Amaleki.+ Madzindza anewa akakhala mucisa cakuti cikhatomera ku Telami mbicipita na ku Suri,+ mpaka kumadire a dziko ya Ejitu.
9 Mu ndzidzi ukhaenda Dhavidhi kamenya nkhondo mu dziko ineyi, iye akhapha amuna na akazi ene,+ pontho akhakwata mabira, ngʼombe, maburu, makamelo na nguwo, buluka penepo akhabwerera kuna Akisi.
10 Pikhabvundza Akisi kuti: “Ndi kupi kudamenya imwe nkhondo lero?” Dhavidhi akhatawira: “Kunterero* kwa Yuda”+ peno “Kunterero kwa dziko ya Ayerameli”+ peno “Kunterero kwa dziko ya Akeneu.”+
11 Dhavidhi akhapha amuna na akazi ene toera akhonde kuenda nawo ku Gati, mbalonga: “Gopa anaenda katisumira mbalonga pidacita ine.” (Ndi pyenepi pikhacita Dhavidhi ndzidzi onsene ukakhala iye mu nzinda ungʼono wa Afilisti.)
12 Akisi akhanyindira Dhavidhi mbalonga muntima mwace: ‘Mwakukhonda penula iye atoma kuidiwa na mbumba yace Izraeli, natenepa ndzidzi onsene iye anakhala ntumiki wanga.’
Pidzindikiro Pyapantsi
^ Peno: “Nejebhu.”
