Samweli Wakutoma 6:1-21
-
Afilisti abweza Bokosi ya Cibverano ku Izraeli (1-21)
6 Bokosi+ ya Yahova yakhala mu dziko ya Afilisti miyezi minomwe.
2 Afilisti acemeresa anyantsembe na anyakulotera+ mbaabvundza: “Tinacitanji na Bokosi ya Yahova? Tipangeni kuti tinaibweza tani ku mbuto ikakhala iyo.”
3 Iwo atawira: “Mungabweza bokosi ya cibverano ya Yahova Mulungu wa Izraeli, musafunika kuitumiza pabodzi na muoni. Musafunika kuibweza kuna iye na muoni wa kuphemba kulekererwa.+ Mungacita pyenepi munawangiswa, pontho munadzadziwa kuti thangwi yanji Mulungu akhakuthabusani.”
4 Natenepa Afilisti abvundza: “Ndi muoni upi wakuphemba kulekererwa unafunika ife kutumiza kuna iye?” Iwo atawira: “Pinthu pixanu pya ouro pyakulandana na mikola na mbewa zixanu za ouro, mwakubvera na numero ya atsogoleri a Afilisti,+ thangwi imwe pabodzi na atsogoleri anu mwathabuswa na nyatwa zibodzi zene.
5 Citani pinthu pyakulandana na mikola yanu, pontho citani pinthu pyakulandana na mbewa+ zinabvunga pinthu pya dziko yanu, mbamusimba Mulungu wa Izraeli. Panango iye anadzapungula nyatwa zinabweresa iye kuna imwe, kuna mulungu wanu na kuna dziko yanu.+
6 Thangwi yanji musaumisa mitima yanu ninga pidacita Aejitu pabodzi na Farau?+ Pidathabuswa iwo na Mulungu,+ iwo atawirisa Aizraeli toera aende.+
7 Sasanyani ngolo ipswa, pontho sakani ngʼombe ziwiri zakuyamwisa, zakuti cipo zamangirwa kale pagoli. Buluka penepo, zimangireni pa ngolo, mbwenye ana a ngʼombe zenezi abwezeni nʼthanga toera akhale kutali na amai awo.
8 Kwatani Bokosi ya Yahova muiikhe mu ngolo, pontho kwatani pinthu pyonsene pya ouro pinafuna kutumiza imwe kuna iye ninga miyoni toera kuphemba kulekererwa mupiikhe mʼbokosi inango, dhuzi na bokosi ineyi.+ Mungamala zisiyeni ziende,
9 mbamuzionera: Mungaziona ziri kuenda ku Bheti-Semesi,+ ku mbuto idabuluka bokosi, penepo tinadziwa kuti ndi Mulungu anacita pinthu pyenepi pyakuipa kakamwe kuna ife. Mbwenye zingakhonda kuenda kweneko, tinadziwa kuti nee ndiye anatithabusa; basi ene pyacitika mwasusudeu.”
10 Amuna acita pidapangwa iwo. Akwata ngʼombe ziwiri zakuyamwisa, azimangira pa ngolo, mbafungira nʼthanga ana a ngʼombe zenezi.
11 Buluka penepo, akwata Bokosi ya Yahova mbaiikha mu ngolo, aikhambo mu ngolo ineyi bokosi yakuti ikhali na mbewa za ouro na pinthu pyakulandana na mikola yawo.
12 Ngʼombe zaenda na nseu unaenda ku Bheti-Semesi.+ Izo zapitiriza na nseu ubodzi ene, mbazilira mu ndzidzi ukhafamba izo; nee zapeuka kunkono wamadyo peno wabzwere. Atsogoleri a Afilisti azitowera mpaka kumadire a dziko ya Bheti-Semesi.
13 Anthu a ku Bheti-Semesi akhabvuna tirigu nʼgowa. Pidathukula iwo maso awo mbaona Bokosi, akomerwa kakamwe.
14 Ngolo yafika mʼmunda wa Yoswa wa ku Bheti-Semesi, mbilimira dhuzi na mwala ukulu. Natenepa iwo apandula matabwa a ngolo mbakhala nkhuni, pontho akwata nʼgombe+ mbazipereka ninga ntsembe yakupiswa kuna Yahova.
15 Alevi+ atcitisa Bokosi ya Yahova na bokosi inango ikhali na pinthu pya ouro, iwo aikha mabokosi anewa pamwala ukulu. Pa ntsiku ineyi, amuna a ku Bheti-Semesi+ apereka kuna Yahova ntsembe zakupiswa na ntsembe zinango za pinyama.
16 Atsogoleri a Afilisti pidaona iwo pyenepi, abwerera ku Ekroni ntsiku ibodzi ene.
17 Pinthu pya ouro pyakulandana na mikola pidatumiza Afilisti kuna Yahova ninga muoni wakuphemba kulekererwa ndi ipi:+ Cibodzi cabuluka ku Asidhodhe,+ cibodzi ku Gaza, cibodzi ku Asikaloni, cibodzi ku Gati+ na cibodzi ku Ekroni.+
18 Numero ya mbewa za ouro ikhali sawasawa na numero ya mizinda yonsene ya Afilisti yakuti ikhali ya atsogoleri axanu, mizinda yakutsidzikizwa kuphatanizambo pisa.
Pontho mwala ukulu udaikha iwo Bokosi ya Yahova mʼmunda wa Yoswa wa ku Bheti-Semesi, ndi ninga umboni mpaka lero.
19 Mbwenye Mulungu apha amuna a ku Bheti-Semesi, thangwi iwo ayangʼana Bokosi ya Yahova. Pakati pa mbumba, iye apha amuna 50.070,* penepo mbumba yatoma kulira thangwi Yahova akhadapha anthu azinji kakamwe.+
20 Natenepa amuna a ku Bheti-Semesi abvundza: “Mbani anakwanisa kulimira pamaso pa Yahova, Mulungu wakucena?+ Pontho anaenda kuna ani angabuluka kuna ife?”+
21 Iwo atuma anthu ku Kiriyati-Jearimu+ toera akapange anthu a kweneko kuti: “Afilisti abweza Bokosi ya Yahova. Bwerani mudzaikwate.”+
Pidzindikiro Pyapantsi
^ Fala na Fala: “amuna 70, amuna 50.000.”
