Samweli Waciwiri 18:1-33
18 Buluka penepo Dhavidhi alengesa amuna akhali na iye mbaasankhulira atsogoleri a amuna 1.000 na atsogoleri a amuna 100.+
2 Dhavidhi atuma anthu akhali na iye m’misoka mitatu: Nsoka ubodzi ukhatsogolerwa na* Yoabhe,+ unango ukhatsogolerwa na m’bale wace Yoabhe, Abhisai+ mwana wa Zeruya,+ nsoka wacitatu ukhatsogolerwa na Itai+ wa ku Gati. Buluka penepo mambo apanga amuna anewa: “Ine ndinaendambo pabodzi na imwe.”
3 Mbwenye iwo alonga: “Lekani kuenda pabodzi na ife,+ thangwi tingathawa iwo nee anadzudzumika na* ife; pontho anango a ife angafa, iwo nee anadzudzumika thangwi imwe ndimwe wakufunika kakamwe kupiringana anthu 10.000.+ Natenepa, mphyadidi kuti musale pyanu mbamutiphedza kubulukira mu nzinda.”
4 Mambo aapanga: “Ndinacita pyonsene pinaona imwe kuti ndi pyadidi.” Natenepa mambo alimira dhuzi na nsuwo ukulu wa nzinda, mu ndzidzi wakuti amuna akhabuluka mu nzinda m’misoka ya anthu 100 na m’misoka ya anthu 1.000.
5 Buluka penepo mambo apereka ntemo uyu kuna Yoabhe, Abhisai na Itai: “Tsalakanani mwadidi Abhisaloni thangwi ya ine.”+ Mambo pidapereka iye ntemo unoyu kuna atsogoleri onsene thangwi ya Abhisaloni, amuna onsene abva pyenepi.
6 Amuna anewa abuluka mu nzinda mbaenda kamenyana na Izraeli, nkhondo ineyi yamenyerwa mu nsitu wa Efraimu.+
7 Mu nsitu unoyu Aizraeli+ akundwa na amuna a Dhavidhi,+ pontho pa ntsiku ineyi anthu azinji afa, aphiwa amuna 20.000.
8 Nkhondo ineyi yamwazika mucisa consene. Kusiyapo pyenepi, anthu adaphiwa mu nsitu pa ntsiku ineyi akhali azinji kupiringana ale adaphiwa na supada.
9 Mwakukhonda dikhira, Abhisaloni aonana na amuna a Dhavidhi. Pidaaona iye, athawa. Abhisaloni akhadakwira buru, mbwenye buru ineyi yapita na pantsi pa nthawi za muti ukulu nsolo wace mbupanangika pa nthawi za muti unoyu, natenepa iye akhali lengalenga mu ndzidzi wakuti buru ikhadakwira iye yapitiriza kuthamanga.
10 Munthu m’bodzi aona pyenepi mbaenda kapanga Yoabhe:+ “Ine ndaona Abhisaloni amanikika m’muti ukulu.”
11 Yoabhe apanga mamuna unoyu: “Khala iwe wamuona, thangwi yanji nee wamupha penepo mbunsiya agwe pantsi? Natenepa ine mbandidakupasa mwakukomerwa masiklo khumi a parata na sintu.”
12 Mbwenye mamuna unoyu atawira Yoabhe: “Maseze mbandidapaswa* masiklo 1.000 a parata, ine nee mbandidathukula nkono wanga toera kucita pyakuipa mwana wa mambo, thangwi ife tabva ntemo udapereka mambo kuna imwe, kuna Abhisai na kuna Itai kuti: ‘Citani pyonsene pinakwanisa imwe toera Abhisaloni+ akhonde kucitwa pyakuipa.’
13 Ine mbandidakhonda kubvera mbandimupha, mambo mbadabva pyenepi, pontho imwe nee mbamudanditsidzikiza.”
14 Natenepa Yoabhe alonga: “Nee ndinabvungabve ndzidzi wanga na iwe!” Penepo iye akwata mapswimo matatu* m’manja mwace mbaenda kuna Abhisaloni mu ndzidzi wakuti iye akhadzati kufa pamuti udapanangika iye, mbamulasa nawo pantima.
15 Buluka penepo atumiki khumi akhakwata pida pya nkhondo pya Yoabhe afika mbamenya Abhisaloni mpaka kufa.+
16 Yoabhe aliza nyanga, penepo amuna onsene asiya kutowerera Izraeli; natenepa Yoabhe aakhondesa.
17 Iwo akwata Abhisaloni, amponya n’djenje ikulu mu nsitu mbanfikira na nkuku ukulu wa miyala.+ Mbwenye Aizraeli onsene athawa mbaenda m’manyumba mwawo.
18 Abhisaloni pikhali iye m’maso, akhadatcimika mwala ukulu ku Gowa ya Mambo,+ thangwi iye alonga: “Ine nkhabe mwana wamamuna toera anthu apitirize kukumbuka dzina yanga.”+ Natenepa mwala unoyu iye aupasa dzina yace, pontho mpaka lero iwo usacemerwa Cakukumbuka Naco Abhisaloni.
19 Akimazi+ mwana wa Zadhoke alonga: “Ndaphata miyendo, nditawiriseni toera ndiende kapanga mambo mphangwa zenezi thangwi Yahova ancitira ulungami mukunsudzula m’manja mwa anyamalwa ace.”+
20 Mbwenye Yoabhe ampanga: “Leka kuenda kalonga mphangwa zenezi lero. Unaenda kazilonga ntsiku inango, tayu lero, thangwi afa mwana wa mambo.”+
21 Buluka penepo Yoabhe apanga munthu m’bodzi wa ku Kusi:+ “Ndoko kapange mambo pinthu pidaona iwe.” Penepo mamuna wa ku Kusi agodamira Yoabhe, pidamala iye atoma kuthamanga.
22 Akimazi mwana wa Zadhoke apanga pontho Yoabhe: “Ndaphata miyendo, mwakukhonda tsalakana pinafuna kucitika, nditawirisenimbo toera ndithamangire mamuna wa ku Kusi.” Mbwenye Yoabhe ambvundza: “Mwananga, nakuti nkhabe mphangwa toera iwe ukalonge, thangwi yanji usafuna kuendambo?”
23 Akimazi akakamira mbalonga: “Mwakukhonda tsalakana pinafuna kucitika, ndisiyeni ndiende.” Natenepa Yoabhe ampanga: “Ndoko!” Akimazi aenda na njira ya ku dhistritu ya Yordani,* pontho iye asiya nduli mamuna wa ku Kusi.
24 Dhavidhi akhali nawa pakati pa misuwo mikulu miwiri ya nzinda,+ pontho nyakuonera+ akwira padzulu pansuwo ukulu wa mpanda. Iye ayang’ana mbaona mamuna m’bodzi ali kuthamanga ekhene.
25 Natenepa nyakuonera acemera mambo mbampanga pyenepi. Mambo alonga: “Khala iye ali ekhene, ali kubweresa mphangwa.” Pikhafika iye dhuzi,
26 nyakuonera aona mamuna unango mbakabwera nakuthamanga. Penepo iye acemera nyakuonera nsuwo mbampanga: “Ona! Mamuna unango akubwera mbakathamanga!” Mambo alonga: “Iye akubwerambo na mphangwa.”
27 Nyakuonera alonga: “Kuthamanga kwa mamuna wakutoma kusakhala ninga kwa Akimazi+ mwana wa Zadhoke.” Natenepa mambo alonga: “Iye ndi munthu wadidi, pontho ali kubweresa mphangwa zadidi.”
28 Akimazi akhuwa kuna mambo: “Pyonsene piri mwadidi!” Penepo iye agodamira mambo mbakotamisa nkhope yace mpaka pantsi. Buluka penepo alonga: “Mbasimbwe Yahova Mulungu wanu, ule adapereka kuna imwe mbuyanga mambo+ amuna adakusandukirani!”*
29 Mbwenye mambo mbvundza: “Abhisaloni ali mwadidi?” Akimazi atawira: “Ine ndaona uviyaviya ukulu Yoabhe pidatuma iye ntumiki wa mambo na ine ntumiki wanu, mbwenye nee ndisadziwa kuti ninji pikhacitika.”+
30 Natenepa mambo alonga: “Dikhira pakhundu apa pang’ono.” Penepo iye alimira pakhundu mbadikhira.
31 Buluka penepo afika+ mamuna wa ku Kusi mbalonga: “Mbuyanga mambo, ndakubwereserani mphangwa izi: Lero Yahova akucitirani ulungami thangwi akusudzulani m’manja mwa anthu onsene adakusandukirani.”+
32 Mbwenye mambo abvundza mamuna wa ku Kusi: “Abhisaloni ali mwadidi?” Mamuna wa ku Kusi atawira: “Anyamalwa onsene a mbuyanga mambo na onsene adakusandukirani toera kukucitani pinthu pyakuipa mbakhale ninga Abhisaloni!”+
33 Pyenepi pyatsukwalisa mambo, pontho iye aenda nkwartu yandzulu yakuti ikhali padzulu pansuwo ukulu wa mpanda, iye akhalira mu ndzidzi ukhafamba iye mbalonga: “Mwananga Abhisaloni, mwananga, mwananga Abhisaloni! Mbidafa pyanga ndine m’mbuto mwa iwe mwananga Abhisaloni, mwananga!”+
Pidzindikiro Pyapantsi
^ Fala na Fala: “ukhali m’manja mwa.”
^ Fala na Fala: “nee anaikha ntima wawo kuna.”
^ Fala na Fala: “mbandidapimirwa m’manja mwanga.”
^ Munjira inango: “miomba; madipa.” Fala na Fala: “mipswimbo.”
^ Fala na Fala: “ku dhistritu.”
^ Fala na Fala: “adalamusa manja awo.”
