Samweli Waciwiri 7:1-29
7 Mambo pikakhala iye panyumba pace,+ Yahova mbampasa ntendere kuna anyamalwa ace onsene,
2 mambo apanga mprofeta Natani:+ “Ine ndiri kukhala n’nyumba yakucitwa na miti ya sedhro,+ mbwenye Bokosi ya Mulungu wandimomwene iri mu nsasa wakucitwa na nguwo.”+
3 Natani atawira mambo: “Ndokoni, citani pyonsene piri muntima mwanu, thangwi Yahova ali na imwe.”+
4 Namasiku anewa, Natani atambira mafala awa a Yahova:
5 “Ndoko kapange ntumiki wanga Dhavidhi kuti ‘Yahova alonga tenepa: “Kodi iwe unandimangira nyumba toera ine ndikhalemo?+
6 Ine cipo ndakhala n’nyumba kutomera ntsiku idabulusa ine mbumba ya Izraeli ku Ejitu mpaka lero,+ mbwenye ndisakhala mu nsasa peno mu tabhernakulo.+
7 Ndzidzi onsene udafamba ine na Aizraeli onsene, kodi ine ndabvundza kale atsogoleri a dzindza ya Izraeli adasankhula ine toera akumbize mbumba yanga ya Izraeli kuti: ‘Thangwi yanji nee mwandimangira nyumba na miti ya sedhro?’”’
8 Cincino panga ntumiki wanga Dhavidhi kuti ‘Yahova wa anyankhondo alonga tenepa: “Ine ndakubulusa kukhakumbiza iwe, kule kukhatsalakana iwe mabira+ toera ukhale ntsogoleri wa mbumba yanga ya Izraeli.+
9 Konsene kunafuna kuenda iwe,+ ine ndinadzakhala na iwe, pontho ndinadzapha* anyamalwa ako onsene pamaso pako;+ ndinadzacitisa kuti dzina yako ikhale na mbiri+ ninga madzina a anthu akubvekera a pa dziko yapantsi.
10 Ndinadzasankhula mbuto toera mbumba yanga ya Izraeli ikhale kweneko, iwo anadzakhala kweneko mbakhonda kudzudzumiswa pontho; anthu akuipa nee anadzaapondererabve ninga pikhacita iwo kale,+
11 kutomera ntsiku idakhazikisira ine anyakutonga miseru+ toera atsogolere mbumba yanga ya Izraeli. Ine ndinadzakupumisa kuna anyamalwa ako onsene.+
“‘“Pontho Yahova akupanga kuti Yahova anadzacitisa dzindza yako ikhale ya amambo.*+
12 Ntsiku zako zingafika kunkhomo,+ mbufa ninga pidacita ambuyako, ndinadzacitisa kuti dzindza* yako, mwanako wamamuna* atonge ninga mambo, pontho ine ndinadzawangisa kakamwe umambo wace.+
13 Unoyu ndiye anafuna kudzandimangira nyumba yakuti inadzapasa mbiri dzina yanga,+ pontho ine ndinadzawangisa kakamwe mpando waumambo wace kwenda na kwenda.+
14 Ine ndinadzakhala babace, pontho iye anadzakhala mwananga.+ Angacita pinthu pyakuipa, ine ndinadzansandika,* mbandintcunyusa na mitcamu ninga pinacita ana a anthu.*+
15 Ine nee ndinadzasiya kupangiza kuna iye ufuni wanga wakukhonda mala, ninga pidacita ine kuna Sauli,+ ule adabulusa ine pamaso pako.
16 Nyumba yako na umambo wako pinakhala pyakutsidzikizika kuna iwe kwenda na kwenda; mpando wako waumambo unadzalikhiswa kwenda na kwenda.”’”+
17 Natani apanga Dhavidhi mafala anewa onsene na masomphenya anewa onsene.+
18 Natenepa Mambo Dhavidhi akhala pantsi pamaso pa Yahova mbalonga: “Yahova Mbuya Wankulu Kakamwe, ndine ani ine? Pontho banja* yanga ninji toera mundifikise mpaka pano?+
19 Yahova Mbuya Wankulu Kakamwe, kusiyapo pyenepi imwe mwalongambo kuti nyumba ya ntumiki wanu inadzakhala mu ndzidzi uzinji ntsogolo; Yahova Mbuya Wankulu Kakamwe, unoyu ndi ntemo* udapereka imwe kuna anthu onsene.
20 Yahova Mbuya Wankulu Kakamwe, ndinalonganji pontho ine ntumiki wanu Dhavidhi nakuti imwe musandidziwa mwadidi?+
21 Thangwi ya mafala anu, pontho mwakubverana na piri muntima mwanu,* imwe mwacita pinthu pyenepi pikulu pyonsene mbamupipangiza kuna ine ntumiki wanu.+
22 Na thangwi ineyi, imwe ndimwedi wankulu,+ Yahova Mbuya Wankulu Kakamwe. Nkhabepo unango ninga imwe,+ pontho ndimwe basi Mulungu wandimomwene;+ pyonsene pidabva ife na makutu athu pisapangiza pyenepi.
23 Ndi ipi mbumba inango pa dziko yapantsi idalandana na mbumba yanu Izraeli?+ Mulungu aaombola ninga mbumba yace,+ mbapasika dzina ekhene+ thangwi yakucita pinthu pikulu na pyakudzumisa kuna iwo.+ Mwathamangisa madzindza anango na alungu awo thangwi ya mbumba yanu, idaombola imwe ku Ejitu toera ikhale yanu.
24 Imwe mwacitisa kuti Aizraeli akhale mbumba yanu kwenda na kwenda;+ pontho imwe Yahova mwadzakhala Mulungu wawo.+
25 “Cincino imwe Yahova Mulungu, ndzidzi onsene citani pidapikira imwe kuti munacitira ntumiki wanu na anthu a panyumba pace, pontho citani mwakubverana na pidapikira imwe.+
26 Dzina yanu mbikuzwe kwenda na kwenda+ toera anthu alonge: ‘Yahova wa anyankhondo ndi Mulungu wa Izraeli,’ pontho nyumba ya ntumiki wanu Dhavidhi mbikhazikiswe mwakuwanga pamaso panu.+
27 Thangwi imwe Yahova wa anyankhondo, Mulungu wa Izraeli mwapangiza masomphenya ntumiki wanu, mbamulonga: ‘Ndinadzakumangira nyumba.’*+ Na thangwi ineyi ntumiki wanu akhala na cipapo* cakucita phembero ineyi kuna imwe.
28 Yahova Mbuya Wankulu Kakamwe, ndimwe Mulungu wandimomwene, mafala anu ndi andimomwene,+ pontho imwe mwapikira pinthu pyenepi pyadidi kuna ntumiki wanu.
29 Natenepa komerwani na kupasa nkhombo nyumba ya ntumiki wanu, pontho mbipitirize pamaso panu kwenda na kwenda,+ thangwi imwe Yahova Mbuya Wankulu Kakamwe mwapikira pyenepi. Nyumba ya ntumiki wanu mbipaswe nkhombo na imwe kwenda na kwenda.”+
Pidzindikiro Pyapantsi
^ Fala na Fala: “ndinadzafudza.”
^ Peno: “Yahova anadzakumangira nyumba.”
^ Fala na Fala: “mbeu.”
^ Fala na Fala: “munthu anafuna kubuluka m’mimba mwako.”
^ Munjira inango: “Adhamu.”
^ Fala na Fala: “ndinadzansandika na ndodo ya anthu.”
^ Fala na Fala: “nyumba.”
^ Peno: “mwambo.”
^ Peno: “mwakubverana na cifuno canu.”
^ Fala yakuti “nyumba” isabveka ndandanda ya amambo.
^ Fala na Fala: “agumana ntima wace.”
