Masomphenya Adaoneswa Juwau 20:1-15
20 Ine ndaona anju akhatcita buluka kudzulu, iye akhali na xavi ya djenje yakuzika kakamwe,+ pontho akhali na unyolo mʼmanja mwace.
2 Iye aphata nyoka ikulu,+ nyoka yakale ire,+ yakuti ndi Dyabo+ na Sathani,+ mbamʼmanga mu pyaka 1.000.
3 Iye amponya nʼdjenje yakuzika kakamwe,+ afunga djenje ineyi mbaikha cidzindikiro* padzulu pace, toera akhonde kunyengeza pontho anthu mpaka kumala kwa pyaka 1.000. Buluka penepo, iye anadzasudzulwa mu ndzidzi wakucepa.+
4 Ine ndaona mipando yaumambo, ale akhali mʼmipando ineyi apaswa mphambvu toera kutonga. Inde, ine ndaona umaso wa ale adaphiwa* thangwi yakupereka umboni unalonga pya Yezu, pontho thangwi yakulonga pya Mulungu, ndaona ale adakhonda kulambira cikala na dzimunthu ya cikala, akuti nee aikhwa cidzindikiro ca cikala pa nkhope pawo na nʼdjanja yawo.+ Iwo adzakhala pontho mʼmaso mbatonga na Kristu+ mu pyaka 1.000.
5 (Anyakufa anango+ nee adzakhala pontho mʼmaso mpaka kumala kwa pyaka 1.000.) Kweneku ndi kulamuswa muli akufa kwakutoma.+
6 Anyakutsandzaya na akucena ndi onsene anafuna kulamuswa muli akufa pakutoma;+ kwa iwo kufa kwaciwiri+ nkhabe mphambvu toera kuakunda,+ mbwenye iwo anadzakhala anyantsembe+ a Mulungu na a Kristu, pontho anadzatonga pabodzi na iye mu pyaka 1.000.+
7 Pyaka 1.000 pingamala, mwakukhonda dembuka Sathani anadzasudzulwa nkaidi yace,
8 iye anadzabuluka toera kunyengeza madzindza a anthu mʼmakhundu* manai a dziko yapantsi, akuti ndi Goge na Magoge, iye anaagumanya toera amenye nkhondo. Kunjipa kwawo ndi ninga tcetca ya ku bara.
9 Iwo amwazika pa dziko yonsene yapantsi, azungulira nsasa wa anthu akucena na nzinda unafuniwa na Mulungu. Mbwenye moto wabuluka kudzulu mbuafudza.+
10 Dyabo wakuti akhaanyengeza aponywa mu thawala ya moto na enxofre,* mwakuti cikala+ na mprofeta wauthambi akhali mwenemu;+ pontho iwo anadzathabuswa* masiku na masikati, kwenda na kwenda.
11 Penepo ine ndaona mpando ukulu wakucena waumambo na Ule adaukhalira.+ Dziko yapantsi na kudzulu pyathawa pamaso pace,+ pontho mbuto yapyo nee ikhalipobve.
12 Ine ndaona anyakufa, akulu na angʼono ene, akhali dzololo patsogolo pa mpando waumambo, penepo afungulwa mabukhu.* Mbwenye yafungulwa bukhu inango; ineyi ikhali bukhu ya umaso.+ Anyakufa atongwa mwakubverana na pidalembwa mʼmabukhu anewa, mwakubverana na macitiro awo.+
13 Bara yapereka anyakufa akhali mwenemo, kufa na Nthumbi* apereka anyakufa akhali mwenemo, pontho mʼbodzi na mʼbodzi wa anthu anewa atongwa mwakubverana na macitiro awo.+
14 Kufa na Nthumbi,* pyaponywa mu thawala ya moto.+ Thawala ya moto+ isaimirira kufa kwaciwiri.+
15 Kusiyapo pyenepi, munthu wakuti dzina yace nee yalembwa mʼbukhu ya umaso,+ aponywa mu thawala ya moto.+
Pidzindikiro Pyapantsi
^ Peno: “selo.”
^ Fala na Fala: “adaphiwa na macado.”
^ Fala na Fala: “nkhomo.”
^ Peno: “safuli.”
^ Peno: “anadzafungirwa.”
^ Fala na Fala: “mipukutu.” Phindi yakulapha ya nthembe peno tsamba yakuti isapyangirirwa pa cimuti.
^ Peno: “Hadhe,” ndi kumasiye kunaikhwa anthu onsene. Onani Mabvekero a Mafala Anango.
^ Peno: “Hadhe,” ndi kumasiye kunaikhwa anthu onsene. Onani Mabvekero a Mafala Anango.
