Masomphenya Adaoneswa Juwau 6:1-17
-
Mwanabira afungula pidzindikiro pitanthatu pyakutoma (1-17)
-
Nyakukunda ali pa kavalo yakucena (1, 2)
-
Ule adakwira pa kavalo yakufuira ninga moto asabulusa ntendere (3, 4)
-
Ule adakwira pa kavalo yakupswipa asabweresa njala (5, 6)
-
Ule adakwira pa kavalo yakuumbuka dzina yace ndi Kufa (7, 8)
-
Ale adaphiwa aoniwa pantsi pa guwa ya ntsembe (9-11)
-
Citeketeke cikulu (12-17)
-
6 Ine ndaona Mwanabira+ mbakafungula cibodzi mwa pidzindikiro pinomwe,*+ pontho ndabva mʼbodzi wa aanju anai+ mbakalonga na fala ninga kudhima kwa njazi: “Bwera!”
2 Buluka penepo, ine ndaona kavalo yakucena.+ Ule akhali pa kavalo ineyi akhali na uta; pontho apaswa nthimba,+ iye abuluka mbaenda kakunda anyamalwa ace, toera kumalisa kuwina kwace.+
3 Pidafungula iye cidzindikiro* caciwiri, ndabva anju waciwiri+ mbakalonga: “Bwera!”
4 Yabuluka kavalo inango yakufuira ninga moto. Ule akhali pa kavalo ineyi atawiriswa toera kubulusa ntendere pa dziko yapantsi, toera anthu aphane unango na ndzace, pontho iye apaswa supada ikulu.+
5 Pidafungula iye cidzindikiro cacitatu,+ ine ndabva anju wacitatu+ mbakalonga: “Bwera!” Penepo ndaona kavalo yakupswipa. Ule akhali pa kavalo ineyi akhali na bhalansa* mʼmanja mwace.
6 Ine ndabva fala ikhabuluka pakati pa aanju anai ikhalonga kuti: “Kilu ibodzi ya tirigu ntengo wace ndi dhenaryo* ibodzi;+ makilu matatu a sevadha ntengo wace ndi dhenaryo ibodzi. Leka kubvunga mafuta* na vinyu.”+
7 Pidafungula iye cidzindikiro cacinai, ine ndabva fala ya anju wacinai+ mbakalonga: “Bwera!”
8 Penepo ine ndaona kavalo yakuumbuka.* Ule akhali pa kavalo ineyi dzina yace ndi Kufa. Nthumbi* akhali nduli mwace. Iwo apaswa mphambvu pa khundu yacinai ya dziko yapantsi toera aphe anthu na supada yakulapha, na njala,+ na utenda wakugopswa, na pikala pya pa dziko yapantsi.+
9 Pidafungula iye cidzindikiro cacixanu, ndaona kuti pantsi pa guwa ya ntsembe+ pakhali na umaso*+ wa ale adaphiwa thangwi ya mafala a Mulungu, pontho thangwi ya umboni udapereka iwo.+
10 Iwo akhuwa mwakugaluza, mbati: “Mbuya Wankulu Kakamwe, wakucena na wandimomwene,+ mpaka lini munapitiriza nee kutonga ale anakhala pa dziko yapantsi, mbamukhonda kuatcunyusa thangwi ya ciropa cathu cidacucisa iwo?”+
11 Mʼbodzi na mʼbodzi wa iwo apaswa nguwo yakucena yakulapha,+ mbapangwa toera athimize kudikhira pangʼono, mpaka ukwane nsoka wa atumiki andzawo na abale awo, akuti akhali cifupi toera kuphiwa ninga pidacitwa iwo.+
12 Ine ndaona pikhafungula iye cidzindikiro cacitanthatu. Penepo pacitika citeketeke cikulu; pontho dzuwa yacinja mbikhala yakupswipa ninga nguwo yakupswipa,* mwezi onsene mbukhala wakufuira ninga ciropa,+
13 pontho nyenyezi zakudzulu zagwa pa dziko yapantsi ninga munagwa masambvu mawisi a muti wa nsambvu ungatekenyeswa na mphepo ikulu.
14 Pontho kudzulu kwabuluka pa mbuto yace ninga munafendedza bukhu,*+ mapiri onsene na ntsuwa zonsene pyabuluswa pa mbuto zapyo.+
15 Penepo, amambo a pa dziko yapantsi, akulu, akadamu a anyankhondo, anyakupfuma, anyamphambvu, mabitcu onsene na anthu onsene aufulu, abisala mʼmadzimba na pakati pa miyala ya mʼmapiri.+
16 Iwo akhapanga mapiri na miyala: “Tigwereni pyathu,+ mbamutibisa pamaso pa Ule adakhala pa mpando waumambo,+ pontho toera tikhonde kuona ukali wa Mwanabira,+
17 thangwi yafika ntsiku ikulu yakuipirwa kwawo,+ mphapo mbani anafuna kwanisa kulimira pamaso pawo?”+
Pidzindikiro Pyapantsi
^ Peno: “maselo manomwe.”
^ Peno: “selo.”
^ Peno: “cakupima naco.”
^ Kobiri yaparata Yaciroma yakuti munthu mbadaitambira angaphata basa ntsiku ibodzi. Onani Apendise B14.
^ Peno: “mafuta a azeiti.”
^ Peno: “Hadhe,” ndi kumasiye kunaikhwa anthu onsene. Onani Mabvekero a Mafala Anango.
^ Peno: “yakucenerera; yakuthunduwala.”
^ Panango pyenepi pisaimirira ciropa ca anthu adaphiwa pa guwa ya ntsembe.
^ Ntundu unoyu wa nguwo yakupswipa, ukhacitwa na maweya a mbuzi.
^ Fala na Fala: “mpukutu.” Phindi yakulapha ya nthembe peno tsamba yakuti isapyangirirwa pa cimuti.
