Atongi 13:1-25
13 Aizraeli atoma pontho kucita pinthu pyakuipa pamaso pa Yahova,+ natenepa Yahova aapereka mʼmanja mwa Afilisti+ mu pyaka 40.
2 Pa ndzidzi unoyu, pakhali na mamuna wa ku Zora+ wa dzindza ya Dhani,+ wakuti dzina yace ikhali Manowa.+ Nkazace nee akhabala, pontho nee akhali na mwana.+
3 Ntsiku inango anju wa Yahova aonekera kuna nkazi unoyu mbampanga: “Maseze iwe nee usabala, pontho nee uli na mwana, mbwenye unadzakhala na mimba mbubala mwana wamamuna.+
4 Cita mphole-mphole toera ukhonde kumwa vinyu, peno pyakumwa pinango pyakuledzeresa,+ pontho leka kudya cinthu cakukhonda cena.+
5 Unadzakhala na mimba mbubala mwana wamamuna. Tsisi yace nee isafunika kucingwa,+ thangwi mwana unoyu anadzakhala Nazireu wa Mulungu kutomera uwana wace,* pontho iye anadzapulumusa Aizraeli mʼmanja mwa Afilisti.”+
6 Buluka penepo, nkazi aenda kapanga mamunace kuti: “Munthu wa Mulungu wandimomwene abwera kuna ine, maonekero ace akhali akugopesa kakamwe ninga a anju wa Mulungu wandimomwene. Nee ndambvundzisa kudabuluka iye, pontho iye nee andipanga dzina yace.+
7 Mbwenye iye andipanga: ‘Iwe unadzakhala na mimba mbubala mwana wamamuna. Leka kumwa vinyu, peno pyakumwa pinango pyakuledzeresa, pontho leka kudya cinthu cakukhonda cena, thangwi mwana unoyu anadzakhala Nazireu wa Mulungu kutomera uwana wace* mpaka ntsiku yakufa kwace.’”
8 Manowa adembetera Yahova mbalonga: “Ndaphata miyendo Yahova, tawirisani kuti ntumiki wa Mulungu wandimomwene adatuma imwe abwere pontho toera atipfundzise pinafunika ife kucita na mwana anafuna kubalwa.”
9 Natenepa Mulungu wandimomwene abvesera pidalonga Manowa, mbabwera pontho anju wa Mulungu wandimomwene kuna nkazi mu ndzidzi ukakhala iye kunja kwa nzinda; iye nee akhali pabodzi na mamunace wakuti ndi Manowa.
10 Nkazi aenda nakuthamanga mbapanga mamunace: “Mamuna akhadabwera kuna ine ntsiku ire, abwera pontho.”+
11 Buluka penepo, Manowa alamuka mbaenda pabodzi na nkazace. Iye afika pana mamuna unoyu mbambvundza: “Ndimwe mamuna adalonga na nkazanga?” Iye atawira: “Ndine.”
12 Penepo Manowa alonga: “Mbapicitike mwakubverana na pidalonga imwe. Mphapo mwana unoyu tinadzankuza tani, pontho ninji pinafuna kudzacita iye?”+
13 Anju wa Yahova apanga Manowa: “Nkazako asafunika kucalira pinthu pyonsene pidampanga ine.+
14 Iye nee asafunika kudya cinthu cakucitwa na mauva, nee kumwa vinyu, peno pyakumwa pinango pyakuledzeresa,+ pontho nee asafunika kudya cinthu cakukhonda cena.+ Pinthu pyonsene pidampanga ine asafunika kupibvera.”
15 Manowa apanga anju wa Yahova: “Ndaphata miyendo, dikhirani tikukhunganyireni mwanambuzi.”+
16 Mbwenye anju wa Yahova apanga Manowa: “Ndingadikhira, nee ndinadya cakudya cako; mbwenye ungafuna kupereka ntsembe yakupiswa kuna Yahova, ipereke.” Manowa nee akhadziwa kuti mamuna unoyu akhali anju wa Yahova.
17 Buluka penepo Manowa abvundza anju wa Yahova: “Dzina yanu ndimwe ani,+ toera pidalonga imwe pingacitika tikupaseni mbiri?”
18 Natenepa anju wa Yahova ampanga: “Leka kundibvundza dzina yanga, thangwi dzina yanga ndi yakudzumisa.”
19 Buluka penepo, Manowa akwata mwanambuzi na ntsembe za pyakudya mbapipereka kuna Yahova pamwala. Pontho Iye* acita pinthu pyakudzumisa, Manowa na nkazace mbakaona.
20 Pikhagaka moto paguwa, anju wa Yahova apita pa moto mbakwira kudzulu, mu ndzidzi wakuti Manowa na nkazace akhaona. Penepo iwo agodama mbakotamisa nkhope zawo mpaka pantsi.
21 Anju wa Yahova nee aonekerabve kuna Manowa na nkazace. Natenepa Manowa adzindikira kuti akhali anju wa Yahova.+
22 Buluka penepo, Manowa apanga nkazace: “Mwandimomwene ife tinafa, thangwi taona Mulungu.”+
23 Mbwenye nkazace ampanga: “Yahova mbadafuna kutipha, iye nee mbadatawira ntsembe zathu zakupiswa+ na ntsembe za pyakudya, nee mbadationesa pinthu pyenepi pyonsene, pontho nee mbadatipanga pinthu pyenepi.”
24 Pidapita ndzidzi ungasi, nkazi abala mwana wamamuna mbanʼthula Samisoni;+ pikhakula mwana, Yahova akhapitiriza kumpasa nkhombo.
25 Mukupita kwa ndzidzi, nzimu wa Yahova watoma kuphata basa muna iye+ ku Mane-Dhani,+ pakati pa Zora na Esitaoli.+
Pidzindikiro Pyapantsi
^ Fala na Fala: “kutomera mʼmimba.”
^ Fala na Fala: “kutomera mʼmimba.”
^ Iye unoyu ndi Mulungu.
