Dhanyeli 8:1-27
8 Mu caka cacitatu ca utongi wa Mambo Bhelsazari,+ ine Dhanyeli ndaona masomphenya, kusiyapo ale adaona ine kale.+
2 Ine ndikhali ku Suza+ panyumba ya mambo yakuti iri mʼprovinsya ya Elami,+ kweneko ndaona masomphenya pikhali ine dhuzi na nkulo wa Ulai.
3 Pikhayangʼana ine, ine ndaona bira+ iri dzololo dhuzi na nkulo wa madzi, pontho iyo ikhali na nyanga ziwiri.+ Nyanga ziwiri zene zikhali zakulapha, mbwenye ibodzi ikhali yakulapha kakamwe kupiringana inango, pontho yakulapha ndiyo idamalisira buluka.+
4 Ine ndaona bira ineyi mbikathamanga kuenda kumadokero a dzuwa, kunkwiriro na kunterero toera kumenyana na anyamalwa ayo, nee cikala cibodzi cikhakwanisa kumenyana nayo, pontho nee mʼbodzi akhakwanisa kupulumusa cinthu cikhali mʼmanja mwayo.+ Iyo ikhacita pikhafuna iyo, pontho ikhacita pinthu mwakudzikuza.
5 Pikhapitiriza ine kuyangʼana, ndaona bokho+ mbikabwera kubulukira kumadokero a dzuwa, iyo ikhagwanda na pa dziko yonsene yapantsi, mbwenye nee ikhaponda mataka. Pontho bokho ineyi ikhali na nyanga ikulu pakati pamaso ace.+
6 Bokho ineyi ikhaenda kuna bira ya nyanga ziwiri, idaona ine dzololo dhuzi na nkulo wa madzi; iyo ikhabwera kuna bira mbikathamanga na ukali ukulu.
7 Ine ndaona bokho mbikafendedzera bira, pontho iyo ikhadaipirwa kakamwe thangwi ya bira. Iyo yadhima bira, mbikhumula nyanga zace ziwiri, pontho bira yadzasoweratu mphambvu toera kumenyana nayo. Bokho yagwisa bira pantsi mbaiponda-ponda, pontho nkhabe adakwanisa kuipulumusa mʼmanja mwayo.
8 Buluka penepo, bokho ikhacita pinthu mwakudzikuza kakamwe, mbwenye pidakhala iyo yamphambvu, nyanga yace ikulu yakhumuka. Natenepa pa mbuto ya nyanga ineyi zamera nyanga zinai zakulapha zakuti zikhathonya mbuto zinai zinabuluka mphepo.*+
9 Pa nyanga ibodzi padzabuluka inango ingʼono, pontho iyo yadzakhala ikulu kakamwe mbikathonya kunterero, kumabulukiro a dzuwa na ku dziko Yakubalika.+
10 Nyanga ineyi yadzakula kakamwe mbifika ku nsoka wa anyankhondo kudzulu, mbigwisa anango mwa anyankhondo anewa pantsi, mbigwisa nyenyezi zinango, pontho iyo yaponda-ponda pidagwiswa pantsi.
11 Ngakhale pamaso pa Ntsogoleri wa anyankhondo, iyo ikhali yakudzikuza kakamwe. Iyo yapokosera ntsogoleri wa anyankhondo ntsembe zikhaperekwa kuna iye ndzidzi onsene, pontho mbuto yace yakucena yafudzwa.+
12 Thangwi ya madawo, nyanga yapaswa nsoka wa anyankhondo na ntsembe zikhaperekwa ndzidzi onsene, pontho iyo yapitiriza kugwisa pantsi undimomwene, yacita pikhafuna iyo mbiwina.
13 Ine ndabva wakucena mʼbodzi mbakalonga, pontho wakucena unango abvundza ule akhalonga: “Kodi masomphenya a ntsembe zakuti zisaperekwa ndzidzi onsene na a madawo anacitisa kufudzwa, mbacitisa mbuto yakucena na nsoka wa anyankhondo kupondwa-pondwa anapitiriza mpaka lini?”+
14 Natenepa iye andipanga: “Mpaka ziperekwe ntsembe zakukwana 2.300 zinacitwa namacibese na zinacitwa namaulo; buluka penepo mbuto yakucena inadzasasanyirwa mbikhala ninga mukhali iyo kale.”
15 Mu ndzidzi wakuti ine Dhanyeli ndikhaona masomphenya mbandisaka kudziwa mabvekero awo, penepo pene ndaona munthu kutsogolo kwanga akhaoneka ninga mamuna.
16 Buluka penepo ine ndabva fala ya mamuna pakati pa nkulo wa Ulai,+ iye akhuwa: “Gabhriyeli,+ mpange mabvekero a pidaona iye.”+
17 Natenepa iye andifendedzera dhuzi, mbwenye ine ndagopa kakamwe, ndagodama mbandikotamisa nkhope yanga mpaka pantsi. Iye andipanga: “Iwe mwana wa munthu, usafunika kudziwa kuti masomphenya anewa anadzakwanirisika mu ndzidzi wakumalisa.”+
18 Mbwenye mu ndzidzi ukhalonga iye na ine, ndaphatwa na citulo cikulu kakamwe mbandigona na pfufu ya mimba. Natenepa iye andiphata mbandilimirisa pa mbuto ibodzi ene.+
19 Buluka penepo iye andipanga: “Ine ndinakupanga pinafuna kucitika kunkhomo kwa ndzidzi wa kuipirwa kwa Mulungu, thangwi masomphenya anewa anadzakwanirisika pa ndzidzi udakhazikiswa wakuti ndi ndzidzi wakumalisa.+
20 “Bira ya nyanga ziwiri idaona iwe isaimirira amambo a ku Medhya na Persya.+
21 Bokho ya maweya mazinji isaimirira mambo wa ku Gresya;+ pontho nyanga ikulu ikhali pakati pamaso ace isaimirira mambo wakutoma.+
22 Nyanga ineyi pidakhumuka iyo pa mbuto payo pamera zinango zinai,+ mu dzindza yace munadzaoneka maumambo manai, mbwenye nee anadzakhala na mphambvu ninga zace.
23 “Pontho kunkhomo kwa maumambo anewa, madawo a anyakucita pyakuipa angadzatekera kakamwe, panadzaoneka mambo mʼbodzi wa maonekero akugopswa wakuti anadzakhala na luso yakubvesesa pinthu pyakunentsa.
24 Iye anadzakhala wamphambvu kakamwe, tayu kubulukira mʼmphambvu zace zene, iye anadzafudza pinthu pizinji kakamwe, pontho pinthu pinafuna kudzacita iye pinadzanfambira mwadidi. Iye anadzafudza anthu amphambvu kuphatanizambo mbumba ya anthu akucena.+
25 Thangwi yakucenjera kwace, iye anadzaphatisira uthambi toera pinthu pinfambire mwadidi; iye anakhala wakudzikuza muntima mwace; pontho mu ndzidzi wacitsidzikizo,* iye anadzafudza azinji. Iye anadzamenyana na Ntsogoleri wa atsogoleri, mbwenye iye anadzagwandwa-gwandwa, tayu na manja a munthu.
26 “Pinthu pidalongwa mʼmasomphenya thangwi ya ntsembe zinaperekwa ntsiku zonsene namacibese na zinaperekwa namaulo ndi pyandimomwene, mbwenye masomphenya anewa, iwe usafunika kuakoya ncibisobiso thangwi asalonga pya ntsiku za ntsogolo kakamwe.”+
27 Mbwenye ine Dhanyeli ndikhadaneta kakamwe, pontho ndabva kupha mu ntsiku zingasi.+ Buluka penepo ndalamuka mbandienda kacita basa ya mambo;+ ine ndikhadzudzumika kakamwe na masomphenya adaona ine, mbwenye nkhabe akhakwanisa kuabvesesa.+
Pidzindikiro Pyapantsi
^ Fala na Fala: “mphepo zinai zakudzulu.”
^ Munjira inango: “pontho mwakukhonda cenjeza.”
