Ezekiyeli 27:1-36
-
Nyimbo ya ciliro thangwi ya kulobzweka kwa bote ya Tiro (1-36)
27 Yahova alonga pontho na ine, mbandipanga:
2 “Iwe mwana wa munthu, imba nyimbo yaciliro thangwi ya Tiro,+
3 panga nzinda wa Tiro kuti:‘Iwe wakuti usakhala dhuzi na bara,Nyamalonda wa anthu a ntsuwa zizinji,Ipi ndi pidalonga Yahova, Mbuya Wankulu Kakamwe:
“Iwe Tiro, iwe walonga wekhene kuti: ‘Ine ndine wakubalika kakamwe.’+
4 Pisa pyako piri pakati pa bara,Ale adakumanga akubalikisa kakamwe.
5 Matabwa ako onsene, iwo aacita na miti ya junipero ya ku Seniri,+Iwo akwata muti wa sedhro wa ku Libhano toera kucita nawo mulongoti wako.
6 Ngʼombo zako iwo azicita na miti ya karvalyo ya ku Bhasani,Pontho domu yako ikhali ya matabwa a nʼnjale adakhwazwa nyanga za ndzou za ku ntsuwa za Kitimu.+
7 Nguwo zadidi kakamwe za ku Ejitu za makore akusiyana-siyana ukhaziphatisira toera kufambisa nazo bote,Padzulu pako pakhadaphimbirwa na nguwo yadidi kakamwe ya bhurumu,* pabodzi na maweya a mabira akukhwazwa pinthu pyakufuirira a ku ntsuwa za Elisa.+
8 Anyakucapa ako akhali anthu a ku Sidhoni na a ku Arvadhi,+
Iwe Tiro, anthu ako aluso ndiwo akhafambisa mabote ako.+
9 Amesiri adidi na amuna aluso a ku Jebhali+ ndiwo adafunga mudaphatanizwa matabwa a mabote ako toera akhonde kupita madzi.+
Mabote onsene a mʼbara, pabodzi na anyakufambisa mabote akhabwera kuna iwe toera mugulisirane pinthu.
10 Amuna a ku Persya, a ku Ludhi na a ku Puti+ akhali mu nsoka wa anyankhondo ako.
Iwo akhali anyankhondo ako, akhamanika maxango na pyapeu pyawo pya nkhondo pa mipanda yako, pontho akhakucitisa kukhala wakubvekera.
11 Amuna a ku Arvadhi akuti akhali mu nsoka wako wa anyankhondo, akhali mʼmakhundu onsene padzulu pa mpanda wako,Anyankhondo amphambvu akhaonera nyumba zako za ndzulu.
Iwo akhamanika maxango awo nʼkhundu mwa mpanda wako,Mbathimizira kubalika kwako.
12 “‘“Nzinda wa Tarsi+ ukhacita malonda na iwe thangwi yakunjipa kwa mpfuma zako.+ Iwo akhacinjisana pinthu na iwe; iwo akhakupasa parata, utale, estanyo na ntobve, iwe mbuapasambo pinthu pyako.+
13 Yavani, Tubhali+ na Mezeki+ akhacita malonda na iwe; iwo akhakupasa mabitcu+ na pinthu pya nkuwa, iwe mbuapasambo pinthu pyako.
14 Dzindza ya Togarma+ ikhacinjisana pinthu na iwe, iwo akhakupasa makavalo akuthukula nawo mitolo, makavalo a nkhondo na maburu, iwe mbuapasambo pinthu pyako.
15 Mbumba ya ku Dhedhani+ ikhacita malonda na iwe; iwe ukhali na anthu akuti akhakugulisira pinthu pyako mu ntsuwa zizinji. Anthu a ntsuwa zenezi akhabweresa nyanga za ndzou+ na miti ya mphingwe toera kukupasa ninga nsonkho.
16 Edhomi akhacita malonda na iwe thangwi ya pinthu pyako pizinji. Iwo akhakupasa miyala ya turkeza, maweya a mabira akukhwazwa pinthu pyakufuirira, nguwo zakulukwa za makore akusiyana-siyana, nguwo zadidi kakamwe, miyala ya ntengo ukulu ya korali na ya rubhi.
17 “‘“Dziko ya Yuda na dziko ya Izraeli ikhacita malonda na iwe; iwe ukhaapasa pinthu pyako, iwo mbakupasambo tirigu ya ku Miniti,+ pyakudya pyadidi,+ uci,+ mafuta a azeti na bhalsamu.+
18 “‘“Dhamasku+ akhacita malonda na iwe thangwi yakunjipa kwa pinthu pyako na mpfuma zako zonsene, iye akhakupasa vinyu ya ku Elbhoni na maweya akukhwazwa pinthu pyakufuirira a ku Zaari.
19 Vedhani na Yavani wa ku Uzali akhakupasa utale, kasiya* na kalamu,* iwe mbuapasambo pinthu pyako.
20 Dhedhani+ akhakugulisira manta anaikhwa pa misana ya makavalo.
21 Iwe ukhaphatisa basa anthu a ku Arabhya pabodzi na atsogoleri onsene a ku Kedhari,+ akuti akhagulisa anamabira, mabira acimuna na mabokho.+
22 Anyakucita malonda a ku Sabha na a ku Raama+ akhacita malonda na iwe; iwo akhakupasa mitundu yonsene ya mafuta adidi kakamwe akununkhira, miyala ya ntengo ukulu na ouro, iwe mbuapasambo pinthu pyako.+
23 Arani,+ Kane, Edheni,+ anyamalonda a ku Sabha,+ a ku Asuri+ na a ku Kilimadhi akhacita malonda na iwe.
24 Pa mbuto yako yakucitira malonda, iwo akhagulisa nguwo zakubalika, mikumi yakucitwa na nguwo ya kore ya bhurumu, nguwo zakulukwa za makore akusiyana-siyana na nguwo za makore akusiyana-siyana zinathasikwa pantsi nʼnyumba; nguwo zonsene zikhamangwa mwadidi na nkhambala.
25 Mabote a ku Tarsi+ ndiwo akhathukula malonda ako,Natenepa iwe ukhali na pinthu pizinji, pontho ukhadalemerwa kakamwe pakati pa bara.
26 Anyakucapa ako akukwata, mbakuendesa pa madzi akuzika mʼbara;Mphepo yakumabulukiro a dzuwa yakunyedza-nyedza pakati pa bara.
27 Mpfuma zako, pinthu pyako, malonda ako, anyakucapa ako na anyakufambisa mabote ako,Amuna akuti akhafunga mudaphatanizwa matabwa a mabote ako toera mukhonde kupita madzi, anyamalonda ako,+ pabodzi na anyankhondo ako onsene,+Mwinji onsene wa anthu akuti ali muna iwe,Onsene anadzalobzweka pakati pa bara pa ntsiku yakufudzwa kwako.+
28 Anyakufambisa mabote ako angakhuwa, pisa pyonsene piri nʼkhundu mwa bara pinadzatetemera.
29 Anyakucapa onsene, anyakuphata basa mʼmabote na anyakufambisa mabote,Anadzatcita mʼmabote awo, mbakhala kuntunda.
30 Iwo anadzakhuwa, mbalira mwakutsukwala kakamwe thangwi ya iwe,+Mu ndzidzi wakuti anadzaponya pfumbi munsolo mwawo, mbabulumunda pa dotha.
31 Iwo anadzacinga mpala, mbabvala masakala;Iwo anadzakulira mwakutsukwala kakamwe.
32 Mu ndzidzi unakulira iwo, anadzaimba nyimbo yaciliro thangwi ya iwe, mbalonga:
‘Mbani adalandana na Tiro, wakuti cincino amala kufudzwa pakati pa bara?*+
33 Pinthu pyako pikhabwera ipyo buluka pakati pa bara, iwe ukhakhutisa mbumba zizinji.+
Amambo pa dziko yapantsi+ akhapfuma thangwi yakunjipa kwa mpfuma zako na malonda ako.
34 Cincino iwe wanyedzwa-nyedzwa pakati pa bara, pa madzi akuzika,+Pontho, malonda ako onsene na mbumba yako pyalirima pabodzi na iwe.+
35 Anthu onsene anakhala mu ntsuwa anadzakuyangʼana mwakudzumatirwa,+Pontho, amambo awo anadzatetemera thangwi yakugopa,+ nkhope zawo zinadzapangiza kugopa kwawo.
36 Anyamalonda a mbumba zinango anadzaimba ciruzwi thangwi ya pinafuna kukucitikira.
Kufudzwa kwako kunadzakhala kwakututumusa na kwakutsukwalisa,Iwe unadzafudzwa mbukhonda kuoneka pontho, kwenda na kwenda.’”’”+
Pidzindikiro Pyapantsi
^ Peno: “azuli.”
^ Unoyu ndi muti wakununkhira.
^ Muti unoyu walandana na muti wa kanela.
^ Fala na Fala: “wakuti cincino ali noo pakati pa bara?”
