Ezekiyeli 42:1-20
42 Buluka penepo, iye andiendesa kukhundu yakunkwiriro ya thando yakunja.+ Pontho iye andiendesa ku mizera ya masala akudyera, akuti akhali dhuzi na mbuto idakhonda kufungwa,+ kukhundu yakunkwiriro ya nyumba yakuti ikhali cifupi na penepo.+
2 Ulaphi wace, (kwakuti ndi khundu ikhali nsuwo wakunkwiriro) ukhali wa makhono* 100, ugugumi wace ukhali wa makhono 50.
3 Iyo ikhali pakati, uku thando yankati uku thando yakunja idatsindirwa na miyala. Thando yankati ikhali na makhono 20 augugumi.+ Mbuto zace zikhapita na anthu, ibodzi na ibodzi ikhali kutsogolo kwa indzace, pontho cengo cace cikhali ca nyumba zitatu zakusandzikirana.
4 Kutsogolo kwa masala akudyera, nkati mukhali na mbuto ikhapita na anthu,+ ya makhono 10 augugumi na makhono 100 aulaphi,* pontho misuwo ya masala akudyera, ikhadayangʼanira kukhundu yakunkwiriro.
5 Masala akudyera a nzera wapadzulu akhali mangʼono kupiringana masala a nzera wapantsi na masala a nzera wapakati, thangwi mbuto zakupita nazo, ndizo zidakwata mbuto ikulu ya masala anewa akudyera.
6 Thangwi masala anewa akudyera akhali a nzera wacitatu wandzulu, mbwenye iwo nee akhali na mizati mingʼono ninga masala a mʼmathando. Na thangwi ineyi, masala a nzera wapadzulu akhali mangʼono kupiringana masala a nzera wapantsi na wapakati.
7 Mpanda wa miyala wakunja wakuti ukhali dhuzi na masala akudyera ukhali wa makhono 50 aulaphi. Masala anewa akhali pa thando yakunja, pontho akhadayangʼanira kutsogolo kwa masala anango akudyera.
8 Thangwi ulaphi wa masala akudyera akuti akhali pa thando yakunja, ukhali wa makhono 50, mbwenye masala akudyera adayangʼanira kukhundu ya mbuto yakucena, akhali na makhono 100.
9 Masala akudyera akhali na mbuto yakupita nayo kukhundu yakumabulukiro a dzuwa, yakuti anthu mbadakwanisa kupita nayo buluka kuthando yakunja.
10 Masala akudyera akhalipombo kuntsi kwa mpanda wa miyala wa pa thando, wakuti ukhali kukhundu yakumabulukiro a dzuwa, cifupi na mbuto idakhonda kufungwa, pontho cifupi na nyumba ikhali kumabulukiro a dzuwa.*+
11 Patsogolo pawo pakhali na mbuto inapita na anthu ninga ya masala akudyera+ a kukhundu yakunkwiriro; iwo akhali na ulaphi ubodzi ene, na ugugumi ubodzi ene, iwo akhali na mbuto zakubuluka nazo zibodzi zene mʼmakhundu mabodzi ene. Misuwo ya masala anewa,
12 ikhali sawasawa na misuwo ya masala akudyera a kukhundu yakunterero. Padatoma mbuto inapita na anthu kutsogolo kwa mpanda wa miyala kukhali na nsuwo ukhali kukhundu yakumabulukiro a dzuwa, wakuti anthu mbadakwanisa kupita nawo.+
13 Buluka penepo iye andipanga: “Masala akudyera a kunkwiriro na masala akudyera a kunterero, akuti ali pa mbuto idakhonda kufungwa,+ ndi masala akucena; anyantsembe anafendedzera Yahova, asadyera mwenemu ntsembe zakucena kakamwe.+ Mwenemu iwo asaikha ntsembe zakucena kakamwe, ntsembe za pyakudya, ntsembe zinaperekwa thangwi ya madawo na ntsembe zinaperekwa thangwi ya mulando, thangwi mbuto ineyi ndi yakucena.+
14 Anyantsembe angapita, nee asafunika kubuluka mu mbuto yakucena, mbaenda pa thando yakunja mbadzati kudula nguwo zinabvala iwo toera kutumikira,+ thangwi nguwo zenezi ndi zakucena. Iwo asafunika kubvala nguwo zinango toera kuenda kunja, ku mbuto zinatawiriswa anthu toera kupita.”
15 Pidamala iye kupima mbuto yankati mwa templo, iye andibulusa kunja na pansuwo wa kukhundu yakumabulukiro a dzuwa,+ pontho apima mbuto yonsene.
16 Iye apima khundu yakumabulukiro a dzuwa na phindi ya ntete* wakupima nawo. Mwakubverana na phindi ya ntete wakupima nawo, akhali mapindi akukwana 500, buluka kukhundu ibodzi mpaka kukhundu inango.
17 Iye apima khundu yakunkwiriro, mwakubverana na phindi ya ntete wakupima nawo, akhali mapindi 500.
18 Iye apima khundu yakunterero, mwakubverana na phindi ya ntete wakupima nawo, akhali mapindi 500.
19 Iye azungunuka, mbaenda kukhundu yakumadokero a dzuwa, iye apima mbuto ineyi na phindi ya ntete wakupima nawo, mbakwana mapindi 500.
20 Iye apima makhundu manai. Nʼkhundu mwace mukhali mpanda+ wakuti ulaphi wace ukhali wa mapindi 500 a ntete wakupima nawo, pontho ugugumi wace ukhali wa mapindi 500 a ntete wakupima nawo,+ toera kugawa mbuto yakucena na mbuto yakuti anthu asatawiriswa toera kupita.+
Pidzindikiro Pyapantsi
^ Anewa asacemerwa makhono akulapha. Onani Apendise B14.
^ Mwakubverana na Septuajinta Yacigerego, ndi makhono 100 aulaphi. Mafala Acihebheri asalonga kuti ndi mbuto yakupita nayo ya khono ibodzi. Onani Apendise B14.
^ Nyumba ineyi ikhali kuntsi kwa templo.
^ Onani Apendise B14.
