Tsamba Kuna Filimoni 1:1-25
1 Ine Paulu, nyankaidi+ thangwi ya Kristu Yezu, pabodzi na Timoti+ mʼbale wathu, ndiri kulembera iwe Filimoni nyabasa ndzathu wakufunika,
2 ndiri kulemberambo Apiya mʼbale wathu wankazi na Arkipo+ nyankhondo ndzathu, pabodzi na mpingo onsene unasonkhana panyumba pako:+
3 Mulungu Babathu pabodzi na Mbuya Yezu Kristu mbapangize kukoma ntima kukulu kuna imwe, pontho akupaseni ntendere.
4 Ndzidzi onsene ndisapereka takhuta kuna Mulungu ndingalonga pya iwe mʼmaphembero anga,+
5 thangwi ndisapitiriza kubva anthu mbakalonga pya cikhulupiro cako na ufuni unapangiza iwe kuna Mbuya Yezu na kuna anthu akucena onsene.
6 Ndisacita phembero toera cikhulupiro ciri na iwe pabodzi na ife cikuphedze toera udzindikire pinthu pyadidi pyonsene piri na ife kubulukira mwa Kristu.
7 Ine ndakomerwa kakamwe, mbandibalangazwa pidabva ine kulonga pya ufuni wako, thangwi mitima ya anthu akucena yabalangazwa kubulukira mwa iwe mʼbale wanga.
8 Na thangwi ineyi, maseze ine ndiri na ufulu onsene mwa Kristu toera kukupanga cinthu cakuthema cinafunika iwe kucita,
9 ndisaona kuti mphyadidi kakamwe kukudembetera toera ucite pyenepi thangwi yakukulumizwa na ufuni wako, thangwi ine Paulu ndakalamba, pontho cincino ndiri nkaidi thangwi ya Kristu Yezu.
10 Ine ndisakudembetera thangwi ya Onesimo,+ wakuti adzakhala ninga mwananga+ mu ndzidzi ukhali ine nkaidi.*
11 Kale iye akhali munthu wakusowa basa kuna iwe, mbwenye cincino iye ndi wakufunika kuna iwe na kuna ine.
12 Ine ndiri kumʼbweza kuna iwe, inde, iye wakuti ndisanfuna na ntima wanga onsene.*
13 Ine ndikhafuna kuti iye apitirize kukhala na ine kuno toera andicitire pinthu pikhafunika iwe kundicitira mu ndzidzi unapitiriza ine nkaidi thangwi ya mphangwa zadidi.+
14 Mbwenye nee ndisafuna kucita cinthu mwakukhonda kutawiriswa na iwe, toera pinthu pyadidi pinacita iwe, ukhonde kupicita mwakukakamizwa, mbwenye upicite mwakufuna kwako.+
15 Panango ndi pyenepi pidancitisa kukhala kutali na iwe mu ndzidzi wakucepa,* toera angabwerera kuna iwe, akhale na iwe kwenda na kwenda,
16 tayu ninga bitcu,+ mbwenye ninga munthu wakupiringana bitcu, ninga mʼbale wakufunika,+ makamaka kuna ine, mbwenye wakufunikambo kakamwe kuna iwe, ninga bitcu, pontho ninga mʼbale mwa Mbuya.
17 Natenepa, khala iwe usandiona ninga xamwali,* ntambire mwaufuni ninga ukutambira ine pano.
18 Kusiyapo pyenepi, khala iye akucitira cinthu cakuipa peno ciripo cinakufiyari iye, ine ndinadzakubwezera.
19 Ine Paulu ndiri kulemba pyenepi na manja anga: Ine ndinadzakubwezera. Kusiyapo pyenepi, iwembo uli na mangawa na ine thangwi ya umaso wako.
20 Inde mʼbale wanga, ine ndisafuna ciphedzo ceneci kubulukira mwa iwe thangwi yakukhala kwathu akuphatana na Mbuya; balangaza ntima wanga thangwi yakukhala kwako wakuphatana na Kristu.
21 Ndisanyindira kuti iwe unacita pidakuphemba ine. Na thangwi ineyi, ine ndiri kukulembera, thangwi ndisadziwa kuti iwe unacita pizinji kupiringana pidalonga ine.
22 Mbwenye kusiyapo pyenepi, ndikhunganyire mbuto yakufikira, thangwi ndisadikhira kuti kubulukira mʼmaphembero anu, ine ndinasudzulwa toera ndibwere kuna imwe.+
23 Epafra,+ ndzanga wa nkaidi thangwi ya Kristu Yezu, akupereka mwanyikiro kuna iwe.
24 Marko, Aristarko,+ Dhema+ na Luka,+ akuti ndi anyabasa andzanga, akuperekambo mwanyikiro kuna iwe.
25 Kukoma ntima kukulu kwa Mbuya Yezu Kristu mbakukhale na imwe thangwi ya makhaliro adidi anapangiza imwe.*
Pidzindikiro Pyapantsi
^ Fala na Fala: “wakumangwa na maunyolo.”
^ Peno: “iye wakuti ndi ntima wanga.”
^ Fala na Fala: “ndzidzi ubodzi.”
^ Fala na Fala: “ndzako.”
^ Peno: “thangwi ya nzimu unapangiza imwe.”
