Masalmo 103:1-22
Nyimbo ya Dhavidhi.
103 Umaso wanga mbusimbe Yahova;Makhundu onsene a manungo anga mbasimbe dzina yace yakucena.
2 Umaso wanga mbusimbe Yahova;Ine nkhabe kufunika kuduwala pyonsene pidacita iye.+
3 Iye asalekerera madawo ako onsene,+Pontho asawangisa utenda wako onsene;+
4 Iye asaombola umaso wako nʼdjenje+Pontho iye asakupangiza ufuni wakukhonda mala na ntsisi.+
5 Mu umaso wako onsene iye asakupasa pinthu pyadidi,+Natenepa unapitiriza kukhala mʼphale na wamphambvu ninga capungu.+
6 Yahova asacita pinthu pyadidi+ na pyakulungamaToera kuphedza anthu onsene anapondererwa.+
7 Iye apangiza Mose njira Zace,+Pontho adziwisa Aizraeli mabasace.+
8 Yahova ndi wantsisi na wakukoma ntima,*+Wakupirira* na waufuni kakamwe.*+
9 Ndzidzi onsene iye nkhabe kusaka madodo,+Nee kuipirwa na ife kwenda na kwenda.+
10 Iye nee asatitsalakana mwakubverana na madawo athu,+Peno kutitcunyusa mwakubverana na madodo athu.+
11 Thangwi ninga kudzulu ndi kutali kakamwe na dziko yapantsi,Munjira ibodzi ene, ufuni wace ndi ukulu kakamwe kuna ale ananʼgopa.+
12 Ninga kumabulukiro a dzuwa ndi kutali kakamwe na kumadokero a dzuwa,Munjira ibodzi ene, iye asaikha madawo athu kutali kakamwe na ife.+
13 Ninga baba wakuti asabvera ntsisi anace,Yahova asabverambo ntsisi ale ananʼgopa.+
14 Thangwi iye asadziwa mwadidi kuti aticita tani,+Iye asakumbuka kuti ndife pfumbi.+
15 Umaso wa munthu ndi ninga tsanga iwisi;+Iye asaphukira ninga maluwa a ntsanga.+
16 Mphepo ingapepesa, iwo asazambazika,Mbakhonda kuoneka pontho pa mbuto ikhali iwo.*
17 Mbwenye ufuni wakukhonda mala wa Yahova usakhala kwenda na kwendaKuna ale ananʼgopa,+Pontho ulungami wace usakhala kwenda na kwenda kuna ana a anawo,+
18 Kuna ale anakoya cibverano cace+Na kuna ale anawangisira toera kubvera matongero ace.
19 Yahova akhazikisa mwakuwanga mpando wace waumambo kudzulu;+Pontho umambo wace usatonga pinthu pyonsene.+
20 Simbani Yahova, imwe monsene aanju ace+ akuwanga na amphambvu,Akuti musacita pinalonga iye mbamubvera mafalace.*+
21 Simbani Yahova, imwe anyankhondo ace onsene,+Imwe atumiki ace akuti musacita pinafuna iye.+
22 Simbani Yahova, imwe mabasace onsene,Mʼmbuto zonsene zinatonga iye.*
Umaso wanga onsene mbusimbe Yahova.
Pidzindikiro Pyapantsi
^ Peno: “wadidi.”
^ Peno: “wakukhonda cimbiza kuipirwa.”
^ Peno: “wakudzala na ufuni; waufuni wakukhonda mala.”
^ Fala na Fala: “pontho mbuto yace nkhabe dziwikabve.”
^ Fala na Fala: “mbamubvesera fala ya mafalace.”
^ Peno: “mʼmbuto zinakuzwa iye.”
