Masalmo 147:1-20
147 Simbani Yahova!*
Ndi pyadidi kuimba nyimbo toera kusimba Mulungu wathu;Ndi pyakutsandzayisa kakamwe, pontho iye athema kusimbwa.+
2 Yahova akumanga Yerusalemu;+Iye akugumanya anthu adabalalika a Izraeli.+
3 Iye asawangisa anthu akusweka ntima;Iye asamanga pironda pyawo.
4 Iye asadziwa kuti nyenyezi ziripo zingasi;Iye asacemera ibodzi na ibodzi na dzina yace.+
5 Mbuyathu ndi wankulu, pontho ndi wamphambvu kakamwe;+Ndzeru zace nkhabe madire.+
6 Yahova asalamusa anthu akupfulika,+Mbwenye anyakucita pyakuipa iye asaaponya pantsi.
7 Imbirani Yahova nyimbo zakupereka takhuta;Phatisirani arpa toera kuimba nyimbo zakusimba Mulungu wathu,
8 Ule anaphimbira kudzulu na makole,Ule anabvumbisa madzi pa dziko yapantsi,+Ule anameresa tsanga+ mʼmapiri.
9 Iye asapasa cakudya pinyama,+Pontho asapasa cakudya ana a makhungubwe akuti asalira thangwi ya njala.+
10 Iye nkhabe kudzumatirwa na mphambvu ya makavalo;+Pontho iye nkhabe kudzumatirwa na kuthamanga mwakucimbiza kwa miyendo ya munthu.+
11 Yahova asakomerwa na ale ananʼgopa,+Ale anadikhira ufuni wace wakukhonda mala.+
12 Iwe Yerusalemu, pasa mbiri Yahova.
Iwe Sioni, simba Mulungu wako.
13 Iye asacitisa mipiringanyo ya misuwo mikulu ya nzinda wako kukhala yakuwanga;Iye asapasa nkhombo anako.
14 Iye asabweresa ntendere mu dziko yako;+Iye asakukhutisa na tirigu yadidi kakamwe.*+
15 Iye asapereka ntemo pa dziko yapantsi;Mafalace asathamanga mwakucimbiza.
16 Iye asatumiza neve* mbikhala ninga maweya;+Iye asamwaza bume ninga dotha.+
17 Iye asagwisa matalala* ninga manyedzwa a nkate.+
Mbani anakwanisa kupirira kuthondola kwace?+
18 Iye asatumiza mafalace, iwo mbanyunguluka.
Iye asacitisa mphepo yace kupepesa,+ madzi mbafamba.
19 Iye asalonga mafalace kuna Yakobe,Asalonga mitemo yace na matongero ace kuna Izraeli.+
20 Iye nee acita pinthu pyenepi kuna madzindza anango;+Iwo nkhabe cinadziwa iwo thangwi ya matongero ace.
Simbani Yahova!*+
Pidzindikiro Pyapantsi
^ Peno: “Aleluya!” Fala na Fala: “Yah.” Yah ndi dzina ya Yahova ingalembwa mwacigwagwa.
^ Fala na Fala: “na mafuta a tirigu.”
^ Peno: “cinewi.”
^ Peno: “jelo.”
^ Peno: “Aleluya!” Fala na Fala: “Yah.” Yah ndi dzina ya Yahova ingalembwa mwacigwagwa.
