Masalmo 27:1-14
Nyimbo ya Dhavidhi.
27 Yahova ndi ceza canga+ na mpulumusi wanga.
Mbani pontho anafuna ine kugopa?+
Yahova ndi mbuto yanga yakubisalira.+
Mbani anafuna ine kugopa kakamwe?
2 Anyakuipa akuti ndi anyamalwa anga angabwera toera kundifudza,+Iwo ndiwo anafuna kugwegweduka mbagwa.
3 Maseze nsoka wa anyankhondo umange misasa yawo toera kumenyana na ine,Ntima wanga nkhabe kudzagopa.+
Maseze atomese nkhondo toera kumenyana na ine,Ngakhale tenepo, ndinapitiriza kunyindira Mulungu.
4 Ine ndaphemba cinthu cibodzi kuna YahovaCinthu ceneci ndi cinafuna ine,Kukhala panyumba ya Yahova ntsiku zonsene za umaso wanga,+Toera ndione udidi wa YahovaPontho toera ndiyangʼane mwakutsandzaya* templo yace.*+
5 Thangwi pa ntsiku ya nyatwa, iye anadzandibisa pa mbuto yace yakutsidzikizika;+Iye anadzandikoya mu nsasa wace;+Iye anadzandiikha padzulu pamwala.+
6 Cincino ine ndakunda anyamalwa anga adandizungulira;Ine ndinadzapereka ntsembe mu nsasa wace, mbandikhuwa mwakukomerwa;Ndinadzaimba nyimbo zakusimba Yahova.
7 Yahova, ndibvesereni ndingakucemerani;+Ndibvereni ntsisi, pontho nditawireni.+
8 Ntima wanga usandikumbusa matongero anu:
“Sakani nkhope yanga.”
Yahova, ine ndinasaka nkhope yanu toera ndiigumane.+
9 Lekani kundibisira nkhope yanu.+
Mungaipirwa, lekani kukhonda ntumiki wanu.
Imwe ndimwe mʼphedzi wanga;+Lekani kundithawa peno kundisiya, imwe Mulungu mpulumusi wanga.
10 Maseze pai wanga na mai wanga andisiye,+Yahova anadzanditsalakana.+
11 Ndipfundziseni njira zanu Yahova,+Nditsogolereni munjira yaulungami toera nditsidzikizike kuna anyamalwa anga.
12 Lekani kundipereka mʼmanja mwa anyamalwa anga,+Thangwi anthu asandicitira umboni wauthambi,+Pontho iwo asanditsalakana mwausumankha.
13 Mbandidakhonda kukhala na cikhulupiro cakuti ndinaona udidi wa Yahova mu dziko ya anthu ali mʼmaso,*+Ine nee mbandidakwanisa kupirira.
14 Dikhirani Yahova;+Khalani acipapo na amphambvu.*+
Inde, dikhirani Yahova.
Pidzindikiro Pyapantsi
^ Peno: “mwadidi.”
^ Peno: “mbuto yace yakucena.”
^ Munjira inango: “Ine ndiri na cikhulupiro cakuti ndinaona udidi wa Yahova mu dziko ya anthu ali mʼmaso.”
^ Peno: “mitima yanu mbikhale yakuwanga.”
