Masalmo 69:1-36
Kuna nyakutsogolera nyimbo; inalonga pya “Maluwa.” Nyimbo ya Dhavidhi.
69 Ndipulumuseni Mulungu, thangwi madzi asafuna kundipha.+
2 Ine ndalirima mʼmatope akuzika akuti nkhabemo mataka akuuma.+
Ndabira mʼmadzi akuzika,Pontho ndakwekwetwa na madzi akuthamanga.+
3 Ine ndaneta na kukhuwa;+Fala yanga yafa.
Maso anga aneta mu ndzidzi unadikhira ine Mulungu wanga.+
4 Ale anandiida mwakusowa mathangwi,+Ndi azinji kakamwe kupiringana tsisi ya munsolo mwanga.
Ale anafuna kundipha,Anyamalwa adandisandukira,* adzakhala azinji kakamwe.
Ndisakakamizwa toera kubweza pinthu pidakhonda ine kuba.
5 Mulungu, imwe musadziwa udzemwa wanga,Pontho mulando wanga nee wabisika kuna imwe.
6 Ale anakudikhirani, mbaleke kupaswa manyadzo thangwi ya ine,Imwe Mbuya Wankulu Kakamwe, Yahova wa anyankhondo.
Ale anakusakani, mbaleke kupwazwa thangwi ya ine,Imwe Mulungu wa Izraeli.
7 Ine ndisatikanwa thangwi ya imwe;+Manyadzo aphimbira nkhope yanga.+
8 Ndadzakhala wakusiyana kakamwe na abale anga,Ndadzakhala ninga munthu wa dziko inango kuna ana a mai wanga.+
9 Phinga iri na ine thangwi ya nyumba yanu ndi ninga moto wakugaka muntima mwanga,+Kutikana kwa ale anakutikanani, kwagwera ine.+
10 Pidapwazika ine mbandicita jejuu,*Ndatikanwa thangwi ya pyenepi.
11 Pidabvala ine sakha,Ndadzakhala ninga cinthu cakusekesa* kuna iwo.
12 Anthu anakhala pansuwo ukulu wa nzinda asalonga pya ine,Nyimbo za anyakuledzera zisalonga pya ine basi.
13 Mbwenye phembero yanga mbifike kuna imweYahova, pa ndzidzi wakuthema.+
Imwe Mulungu, thangwi yakunjipa kwa ufuni wanu wakukhonda mala,Nditawireni mbamupangiza kuti ndimwe mpulumusi wandimomwene.+
14 Ndibuluseni mʼmatope;Lekani kundisiya toera ndilirime.
Ndipulumuseni kuna ale anandiidaPontho ndibuluseni mʼmadzi akuzika.+
15 Lekani kutawirisa kuti madzi akuthamanga andikwekwete,+Peno ndibizwe na madzi akuzika,Lekani kutawirisa kuti djenje* indifikire.+
16 Nditawireni Yahova, thangwi ufuni wanu wakukhonda mala ndi wadidi.+
Ndiyangʼaneni thangwi ya ntsisi zanu zikulu,+
17 Lekani kubisa nkhope yanu kuna ntumiki wanu.+
Nditawireni mwakucimbiza thangwi ndiri pa nyatwa.+
18 Bwerani dhuzi na ine, pontho ndipulumuseni;Ndiomboleni thangwi ya anyamalwa anga.
19 Imwe musadziwa kuti ndisapwazwa, ndisathabuswa, pontho ndisapaswa manyadzo.+
Imwe musaona anyamalwa anga onsene.
20 Ntima wanga waphekeka thangwi yakupwazwa, pontho cironda cace nkhabe kuwanga.*
Ndikhadikhira kubverwa ntsisi, mbwenye nee mʼbodzi andibvera ntsisi,+Ndikhadikhira kubalangazwa, mbwenye nee mʼbodzi andibalangaza.+
21 Mʼmbuto mwakundipasa cakudya, iwo andipasa venenu,*+Toera kumalisa nyota yanga, iwo andipasa vinyu yakudjamuka toera ndimwe.+
22 Meza yawo mbikhale nsampha kuna iwo,Pontho kuthambaruka kwawo kukhale nsampha.+
23 Maso awo mbakhale na cidima toera akhonde kuona,Pontho citisani kuti ndzidzi onsene miyendo yawo itetemere.
24 Pangizani kuipirwa kwanu kuna iwo,Pontho mbagwerwe na ukali wanu ukulu.+
25 Nyumba zawo* mbazikhale madembe;Misasa yawo mbikhale yakusowa anthu.+
26 Iwo asatcinga munthu adatcunyusa imwe,Pontho iwo asapitiriza kulonga pya anthu adatcunyusa imwe.
27 Pa milando yawo, thimizirani milando inango,Pontho lekani kuaona ninga akulungama.
28 Mbafudzwe madzina awo mʼbukhu ya anthu ali mʼmaso,*+Pontho madzina awo mbaleke kulembwa pabodzi na anthu akulungama.+
29 Ndikunentseka, pontho ndikubva kupha.+
Imwe Mulungu, nditsidzikizeni na mphambvu zanu zakupulumusa.
30 Ndinaimba nyimbo toera kusimba dzina ya Mulungu,Ndinakusimbani, pontho ndinapereka takhuta kuna imwe.
31 Yahova anakomerwa kakamwe na pyenepi kupiringana kumpasa ngʼombe imuna,Kupiringana ngʼombe imuna ingʼono yakuti iri na nyanga na nyondo.+
32 Anthu akupfulika anadzaona pyenepi mbakomerwa.
Imwe munasaka Mulungu, mitima yanu mbitsandzaye.
33 Thangwi Yahova asabvesera anthu akutcerenga,+Pontho iye nee anadzapwaza mbumba yace yakuti iri ku ubitcu.+
34 Kudzulu na dziko yapantsi mbapisimbe iye,+Mabara na pinthu pyonsene pinakhala mwenemo.
35 Thangwi Mulungu anadzapulumusa Sioni+Iye anadzamanga pontho mizinda ya ku Yuda,Pontho iwo anadzakhala mwenemo mbikhala yawo.*
36 Ana a atumiki ace anadzaitambira ninga unthaka,+Pontho ale anakomerwa na dzina yace+ anadzakhala mwenemo.
Pidzindikiro Pyapantsi
^ Peno: “anandiida mwakusowa mathangwi.”
^ Munjira inango: “Pidalira ine mbandicita jejuu.”
^ Fala na Fala: “ninga nsangani.”
^ Peno: “ncera.”
^ Peno: “ndiri wakusowa cidikhiro.”
^ Peno: “muti wa venenu.”
^ Peno: “Nyumba zawo za mu mpanda.”
^ Peno: “bukhu ya umaso.”
^ Pyenepi pisabveka kukwata dziko mbikhala yawo.
