Masalmo 86:1-17
Phembero ya Dhavidhi.
86 Imwe Yahova, ndibvesereni, pontho tawirani phembero yanga,Thangwi ndatsukwala, pontho ndatcerenga.+
2 Tsidzikizani umaso wanga, thangwi ndine wakukhulupirika.+
Pulumusani ntumiki wanu wakuti asakunyindirani,Thangwi imwe ndimwe Mulungu wanga.+
3 Ndibvereni ntsisi imwe Yahova,+Thangwi ntsiku zonsene ine ndisakucemerani.+
4 Citisani ntumiki wanu* kukhala wakutsandzaya,Thangwi ine ndisathawira kuna imwe Yahova.
5 Thangwi imwe Yahova ndimwe wadidi,+ pontho muli dzololo toera kulekerera;+Ufuni wanu wakukhonda mala ndi ukulu kuna onsene anakucemerani.+
6 Yahova bveserani phembero yanga;Pontho bveserani kudembetera kwanga toera kuphemba ciphedzo.+
7 Pa ntsiku ya nyatwa zanga ine ndinakucemerani,+Thangwi imwe munanditawira.+
8 Pakati pa alungu, nkhabepo unango ninga imwe Yahova,+Nkhabepo unango adacita pinthu ninga pidacita imwe.+
9 Madzindza onsene adacita imweAnadzabwera mbagodama pamaso panu Yahova,+Pontho iwo anadzapasa mbiri dzina yanu.+
10 Thangwi ndimwe wankulu, pontho musacita pinthu pyakudzumisa;+Imwe basi ndimwe Mulungu.+
11 Yahova, ndipfundziseni njira zanu.+
Ndinadzafamba mu undimomwene wanu.+
Ndicitiseni kugopa dzina yanu na ntima onsene.*+
12 Yahova Mulungu wanga, ine ndisakusimbani na ntima wanga onsene,+Pontho ndinadzapasa mbiri dzina yanu kwenda na kwenda,
13 Thangwi ufuni wanu wakukhonda mala ndi ukulu kuna ine,Pontho mwapulumusa umaso wanga Munthumbi,* pantsi kakamwe.+
14 Mulungu, anthu akudzikuza andisandukira;+Nsoka wa anthu akuipa usafuna kundipha,*Pontho pya imwe, iwo nkhabe napyo basa.*+
15 Mbwenye imwe Yahova, ndimwe Mulungu wantsisi na wakukoma ntima,*Wakupirira,* waufuni kakamwe na wakukhulupirika.*+
16 Ndiyangʼaneni mbamundibvera ntsisi.+
Pasani mphambvu ntumiki wanu,+Pontho pulumusani mwana wa ntumiki wanu wankazi.
17 Ndipangizeni cidzindikiro ca udidi wanu,Toera ale anandiida aone pyenepi mbapasika manyadzo.
Thangwi imwe Yahova ndimwe mʼphedzi wanga na mʼbalangazi wanga.
Pidzindikiro Pyapantsi
^ Peno: “ntima wa ntumiki wanu.”
^ Peno: “Ndipaseni ntima wakukhonda gawika.”
^ Peno: “Seoli,” ndi kumasiye kunaikhwa anthu onsene. Onani Mabvekero a Mafala Anango.
^ Peno: “iwo nee akuikhani patsogolo pawo.”
^ Peno: “usasaka umaso wanga.”
^ Peno: “wadidi.”
^ Peno: “Wakukhonda cimbiza kuipirwa.”
^ Peno: “wandimomwene.”
