Misangani 27:1-27
27 Leka kugaya thangwi ya ntsiku ya mangwana,Thangwi iwe nkhabe dziwa pinafuna kucitika pa ntsiku ibodzi na ibodzi.+
2 Leka kusimbika wekhene na mulomo wako,+ mbwenye usimbwe na anango;Usimbwe na ndzako, tayu kusimbika wekhene.
3 Mwala usalemera, pontho matcetca ndi ntolo,Mbwenye nyatwa inasoswa na dzemwa ndi yakulemera kakamwe kupiringana piwiri pyene.+
4 Kuipirwa ndi kwakuipa, pontho ukali ndi ninga madzi akudzala,Mbwenye mbani anakwanisa kupirira ntcanje?+
5 Mphyadidi kusandika munthu pakweca kupiringana kunfuna mbukhonda kupangiza kuti usanfuna.+
6 Pironda pyakuphekeswa na xamwali wakukhulupirika+ ndi pyadidi,Mbwenye nyamalwa asakumpswompswona kazinji kene.*
7 Munthu adakhuta asakhonda uci wa mu khana,Mbwenye ule ali na njala, ngakhale cinthu cakuwawa ndi cakutapira kuna iye.
8 Munthu wakuti ali kutali na kunyumba kwace,Ndi ninga mbalame yakuti iri kutali na* ntsandza yace.
9 Mafuta na insenso pisatsandzayisa ntima;Ninga uxamwali wadidi unatoma pakumala kupereka uphungu na ntima onsene.+
10 Leka kuthawa xamwali wako peno xamwali wa pai wako,Pontho leka kuenda kunyumba kwa mʼbale wako ungagwerwa na nyatwa;Munthu anakhala na iwe pacisa wakuti ali dhuzi ndi wadidi kakamwe kupiringana mʼbale wako ali kutali.+
11 Mwananga, khala wandzeru, pontho komeresa ntima wanga,+Toera ndikwanise kutawira ule anandixola.*+
12 Munthu wandzeru angaona cinthu cakugopswa, asabisala;+Mbwenye anthu akusowa maluso asapitiriza kuenda kutsogolo, mbaona nyatwa.*
13 Khala munthu alonga kuti anabwezera mangawa a munthu anakhonda iye kudziwa, nkwatire nguwo yace;Phatira cinthu cace khala iye acitira pyenepi nkazi waulukwali.+
14 Munthu angapasa ndzace nkhombo mwakugaluza namacibese kakamwe,Ule anapaswa nkhombo anaona ninga akupaswa dzedze.
15 Nkazi wanthonga ndi ninga ntsoi ya nyumba yakuti isapitiriza kucuca pa ntsiku inabvumba madzi.+
16 Ule anakwanisa kumpfulikisa anakwanisambo kupfulikisa mphepo,Pontho anakwanisa kuphata mafuta na djanja yace yamadyo.
17 Ninga utale* usanoza utale undzace,Munjira ibodzi ene, munthu asanoza xamwali wace.*+
18 Ule anatsalakana misambvu anadzadya misapo yace,+Ntumiki anatsalakana mbuyace anadzalemedzwa.+
19 Ninga madzi asapangiza nkhope ya munthu,Munjira ibodzi ene, ntima wa munthu usapangiza ntima wa ndzace.
20 Nthumbi* na mbuto yakufudzira pinthu* cipo pisakhuta,+Munjira ibodzi ene, maso a munthu nkhabe neta na kuona.
21 Parata na ouro+ pisanyunguluswa na moto toera kuceneswa,Munjira ibodzi ene, munthu asayeserwa na kusimbwa kunacitwa iye.
22 Maseze unyedze-nyedze dzemwa,Ninga munasindzwa njera mʼbanda,Iye cipo anasiya udzemwa wace.
23 Usafunika kudziwa mwadidi makhaliro a mikumbi ya pifuyo pyako.Tsalakana mwadidi* mabira ako,+
24 Thangwi mpfuma nkhabe kukhala kwenda na kwenda,+Pontho nthimba ya umambo nee inapitiriza mu dzindza yako kwenda na kwenda.
25 Tsanga iwisi isazambazika mbimera inango,Pontho tsanga ya mʼmapiri isagumanywa.
26 Maweya a anamabira ndi toera kucita nguwo zako,Mabokho unakwanisa kugula nawo munda.
27 Pontho pali na nkaka wakukwana wa mbuzi toera kudyesa iwe,Kudyesa anthu a panyumba pako pabodzi na atumiki ako akazi.
Pidzindikiro Pyapantsi
^ Munjira inango: “mwaciphamaso; mwakukakamizika.”
^ Peno: “idathawa.”
^ Peno: “anandilonga mwakuipa.”
^ Peno: “mbathabuka.”
^ Peno: “fero.”
^ Fala na Fala: “asanoza nkhope ya xamwali wace.”
^ Peno: “Seoli,” ndi kumasiye kunaikhwa anthu onsene. Onani Mabvekero a Mafala Anango.
^ Peno: “Abhadhoni.”
^ Peno: “Ikha ntima wako pa; Onera mwadidi.”
