Rute 2:1-23
2 Elimeleki mamunace Noemi, akhali na mʼbale wace wakupfuma kakamwe; dzina yace ikhali Bhoazi.+
2 Rute apanga Noemi: “Ndaphata miyendo, nditawiriseni toera ndiende kaphalakatira+ pinafuna siya anyakubvuna mʼminda inafuna kutawiriswa ine.” Natenepa Noemi ampanga: “Ndoko mwananga.”
3 Rute aenda, apita mʼmunda mbatoma kuphalakatira nduli mwa anyakubvuna. Pyacitika kuti munda ukhaphalakatira iye ukhali wa Bhoazi,+ mʼbale wace Elimeleki.+
4 Mu ndzidzi unoyu Bhoazi afika buluka ku nzinda wa Bhetelehemu, mbamwanyika anyakubvuna ace: “Yahova akhale na imwe.” Iwo atawira: “Yahova akupaseni nkhombo.”
5 Buluka penepo Bhoazi abvundza nyakuonera anyakubvuna: “Mwanankazi uyu ndi wa banja ipi?”
6 Nyakuonera anyakubvuna atawira: “Mwanankazi unoyu ndi wa ku Moabhe,+ iye abwera pabodzi na Noemi buluka ku dziko ya Moabhe.+
7 Iye andibvundza: ‘Ndaphata miyendo, munanditawirisambo toera ndiphalakatire+ mbandilokotera sevadha* nduli mwa anyakubvuna?’ Iye ali kuphata basa kutomera macibese mpaka ndzidzi uno. Akhala kwene cincino pano pa nsasa toera apume.”
8 Penepo Bhoazi apanga Rute: “Bvesera mwananga. Leka kuenda kaphalakatira mʼmunda unango, pontho leka kuenda mbuto inango; khala dhuzi na anyabasa anga akazi.+
9 Kunafuna iwo kuenda kabvuna, iwe ndokombo kweneko. Anyabasa anga amuna ndamala kuapanga toera akhonde kukukhondesa.* Ungakhala na nyota, ndoko kamwe madzi ali mʼpitomba, adatungwa na anyabasa anga amuna.”
10 Pidabva iye mafala anewa, agodama, akotamisa nkhope yace mpaka pantsi mbambvundza: “Thangwi yanji musacita pinthu pyenepi pyadidi kuna ine, pontho thangwi yanji musatsalakana ine munthu wa dziko inango?”+
11 Bhoazi antawira: “Ndabva pyonsene pidacitira iwe mebzwalako pidamala kufa mamunako. Pontho ndabva kuti wasiya pai wako, mai wako na dziko yako mbuenda kuna anthu akuti nee ukhaadziwa.+
12 Yahova akupase nkhombo thangwi ya pidacita iwe,+ pontho Yahova Mulungu wa Izraeli akulipe mwakukwana thangwi wasaka citsidzikizo mʼmaphapido mwace.”+
13 Natenepa Rute alonga: “Mwandikomera ntima kakamwe mbuyanga, thangwi mwandibalangaza mbamulonga mafala akundiwangisa, maseze nee ndine mʼbodzi wa anyabasa anu.”
14 Pa ndzidzi wa kudya, Bhoazi ampanga: “Bwera kuno udzadye nkate, pontho kwata phindi yako ya nkate mbupfonda mu vinyu yakudjamuka.” Natenepa Rute akhala pantsi pabodzi na anyakubvuna. Buluka penepo, Bhoazi ampasambo sevadha yakukazinga, penepo iye adya, akhuta mbasiya.
15 Pidalamuka Rute toera kutoma kuphalakatira,+ Bhoazi apanga anyabasa ace amuna: “Nsiyeni aphalakatire sevadha* inasiya anyakubvuna, pontho lekani kunʼkhondesa.+
16 Musafunikambo kudodesa sevadha nduli mwanu toera iye alokotere, pontho lekani kunʼkhondesa.”
17 Natenepa iye apitiriza na kuphalakatira mpaka kumaulo.+ Pidamala iye kububuda pyonsene pidaphalakatira iye, pikhali cifupi na kudzadza efa* mʼbodzi wa sevadha.
18 Buluka penepo, Rute akwata sevadha mbaenda mu nzinda, pontho apangiza mebzwalace pidaphalakatira iye. Rute abulusambo cakudya cidasiya iye+ mbapasa mebzwalace.
19 Penepo mebzwalace ambvundza: “Waphalakatira kupi lero? Ndi kupi kudaphata iwe basa? Mbapaswe nkhombo munthu adakukomera ntima.”+ Natenepa Rute apanga mebzwalace mwanaciro munda udaphalakatira iye kuti: “Dzina ya mwanaciro munda udaphalakatira ine lero ndi Bhoazi.”
20 Noemi pidabva iye mafala anewa apanga nkwenyace: “Iye mbapaswe nkhombo na Yahova, wakuti asapangiza ufuni wace kuna anthu ali mʼmaso na adafa.”+ Noemi apitiriza kulonga: “Mamuna unoyu ndi mʼbale wathu.+ Iye ndi mʼbodzi wa anyakutiombola.”*+
21 Buluka penepo, Rute alonga: “Iye andipangambo kuti: ‘Khala dhuzi na anyabasa anga mpaka kumalisa kwawo basa yakubvuna.’”+
22 Noemi apanga nkwenyace: “Mwananga, mphyadidi uende pabodzi na anyabasa ace akazi, mʼmbuto mwakupwazwa mʼmunda unango.”
23 Natenepa Rute apitiriza kukhala dhuzi na anyabasa akazi a Bhoazi, mbapitiriza kuphalakatira mpaka kumala kubvunwa+ kwa sevadha na tirigu. Pontho iye apitiriza kukhala pabodzi na mebzwalace.+
Pidzindikiro Pyapantsi
^ Munjira inango: “maphukuta.”
^ Fala na Fala: “kukukhuya.”
^ Munjira inango: “maphukuta.”
^ Cifupi na malitru 22. Onani Apendise B14.
^ Peno: “mʼbodzi wa abale athu wakuti ndi wakuthema toera kutiombola.”
