Yoswa 9:1-27
9 Amambo onsene akakhala kuntunda unango wa Yordani+ kupisa pya mapiri, ku Sefela, nʼkhundu mwa Bara Ikulu*+ na ale akakhala kutsogolo kwa Libhano abva mphangwa zenezi. Anewa akhali amambo a Aeti, Aamori, Akanani, Aperesi, Aeveu na Ayebusi.+
2 Natenepa, iwo abverana toera amenyane na Yoswa pabodzi na Izraeli.+
3 Anthu a ku Jibheyoni+ abvambo pidacita Yoswa ku Yeriko+ na ku Ai.+
4 Na thangwi ineyi, iwo acita pinthu mwakucenjera, aikha pyakudya mʼmasakha akusakala mbaakwiza pa maburu awo, akwatambo vinyu mʼmabudu a nthembe akuphoka, pontho akumala kusonwa;
5 iwo abvalambo masandalya akusakala, pontho akusonwa-sonwa, mbabvalambo nguwo zakusakala. Mikate yonsene idakwata iwo ikhali yakuuma na yakufumbwa.
6 Buluka penepo, iwo aenda kaonana na Yoswa mʼmisasa ya ku Jiligale+ mbapanga iye pabodzi na amuna a Izraeli kuti: “Ife tabuluka ku dziko yakutali. Taphata miyendo, citani cibverano na ife.”
7 Mbwenye amuna a Izraeli apanga Aeveu*+ kuti: “Panango imwe musakhala dhuzi na ife. Mphapo pinakwanisika tani kuti ife ticite cibverano na imwe?”+
8 Iwo atawira Yoswa: “Ndife atumiki* anu.”
Penepo Yoswa aapanga: “Ndimwe ani, pontho mwabuluka kupi?”
9 Natenepa iwo antawira: “Atumiki anu abuluka ku dziko yakutali kakamwe+ thangwi ya dzina ya Yahova Mulungu wanu. Ife tabva mbiri yace na pinthu pyonsene pidacita iye ku Ejitu,+
10 pontho tabva pyonsene pidacita iye kuna amambo awiri a Aamori akakhala kuntunda* unango wa Yordani, Mambo Sihoni+ wa ku Esibhoni na Mambo Ogi+ wa ku Bhasani, wakuti akakhala ku Asitaroti.
11 Natenepa akulu athu na anthu onsene anakhala mu dziko yathu, atipanga: ‘Kwatani pyakudya toera mudye nʼnjira, pontho ndokoni mukaonane nawo. Kaapangeni kuti: “Ife tinadzakhala atumiki anu;+ taphata miyendo, citani cibverano na ife.”’+
12 Mikate iyi iri na ife, ikhali yakupisa pidabuluka ife kunyumba kwathu toera kubwera kuno. Cincino onani, iyo yauma mbifumbwa.+
13 Mabudu athu awa a nthembe akhali mapswa mudaadzadza ife na vinyu, mbwenye cincino amala kuphoka.+ Pontho nguwo zathu na masandalya athu pyamala kusakala thangwi yakulapha kwa ulendo.”
14 Penepo amuna a Izraeli akwata pangʼono pyakudya pyawo toera kupiona, mbwenye nee abvundzisa Yahova.+
15 Natenepa Yoswa acita cibverano ca ntendere na iwo+ mbapikira kuti nee anaapha. Pontho atsogoleri a mbumba ya Izraeli adumbira kuti anacita pidapikira iwo.+
16 Pidapita ntsiku zitatu, pakumala kucita cibverano na iwo, Aizraeli abva kuti iwo nee akhali anthu akutali, mbwenye akakhala dhuzi na iwo.
17 Natenepa Aizraeli abuluka mbafika ku mizinda yawo pa ntsiku yacitatu; mizinda yawo ikhali Jibheyoni,+ Kefira, Bheroti na Kiriyati-Jearimu.+
18 Mbwenye Aizraeli nee aapha thangwi atsogoleri a mbumba ya Izraeli akhadadumbira kuna iwo pamaso pa Yahova,+ Mulungu wa Izraeli. Natenepa, mbumba yonsene yatoma kudungunya thangwi ya atsogoleri.
19 Penepo atsogoleri onsene alonga kuna mbumba kuti: “Nakuti ife tadumbira kuna iwo pamaso pa Yahova Mulungu wa Izraeli, ife nee tisafunika kuacita cinthu cakuipa.
20 Pinafuna kucita ife ndi ipi: Ife nee tinaapha, toera Mulungu akhonde kuipirwa na ife thangwi ya dumbiro idacita ife kuna iwo.”+
21 Atsogoleri a mbumba athimiza kulonga: “Mbatilekeni kuapha, mbwenye tendeni tiasiye toera akhale anyakusaka nkhuni na anyakutungira madzi mbumba yonsene.” Ndi pyenepi pidapikira atsogoleri a mbumba kuna Ajibheyoni.
22 Natenepa, Yoswa aacemera mbaabvundza: “Imwe musakhala dhuzi na ife, mphapo thangwi yanji mwatinyengeza mbamulonga kuti: ‘Tabuluka kutali kakamwe?’+
23 Kutomera lero imwe muli na dzedze,+ pontho ndzidzi onsene munadzakhala mabitcu akusaka nkhuni na akutunga madzi panyumba ya Mulungu wanga.”
24 Iwo atawira Yoswa: “Ndi thangwi yakuti ife atumiki anu tabva kuti Yahova Mulungu wanu apanga ntumiki wace Mose toera akupaseni dziko ino, pontho toera muphe anthu onsene anakhala mwenemu.+ Natenepa ife tacita pyenepi+ thangwi tikhagopa kuphiwa na imwe.+
25 Cincino ife tiri mʼmanja mwanu. Citani kuna ife pyonsene pinaona imwe kuti ndi pyadidi na pyakulungama.”
26 Pyenepi ndipyo pidacita Yoswa kuna iwo; iye aatsidzikiza mbakhonda kutawirisa kuti Aizraeli aaphe.
27 Natenepa, pa ntsiku ineyi Yoswa aapanga toera akhale anyakusaka nkhuni na anyakutungira madzi mbumba+ na guwa ya Yahova pa mbuto ikhafuna Iye kusankhula,+ pontho iwo asapitiriza kucita pyenepi mpaka lero.+
Pidzindikiro Pyapantsi
^ Ineyi ndi Bara ya Medhiteraneo.
^ Aeveu ndi anthu akuti akakhala mu nzinda wa Jibheyoni.
^ Peno: “mabitcu.”
^ Pyenepi pisabveka, kumabulukiro a dzuwa.
