Mwacipapo, Yezu asandika atsogoleri a mauphemberi thangwi iwo nee akhapfundzisa anthu toera alambire Yahova munjira yadidi. Mwacitsandzo, iye asandika Afarisi akuti akhalemedza kakamwe ntemo wakusamba manja m’mbuto mwakulemedza ntemo unalonga pyakutsalakana anyakubala awo. (Mat. 15:1-11) Maseze atsogoleri a mauphemberi aipirwa kakamwe na mafala adalonga Yezu, Yezu nee asiya kulonga undimomwene. Yezu alongambo pakweca uthambi ukhapfundzisa atsogoleri a mauphemberi. Iye nee alonga kuti mauphemberi onsene ndi akutawirika kuna Mulungu. M’mbuto mwace, iye alonga kuti anthu azinji mbadapita na nseu ukulu unatsogolera anthu toera kufudzwa. Mbwenye anthu akucepa mbadapita na nseu ung’ono unatsogolera ku umaso. (Mat. 7:13, 14) Na mafala anewa, Yezu apangiza pakweca kuti anthu anango mbadalonga kuti asatumikira Mulungu, mbwenye mwandimomwene iwo nee asantumikira. Na thangwi ineyi, iye aacenjeza: ‘Citani mphole-mphole na aprofeta authambi anabwera kuna imwe mbabvala nthembe ya bira, mbwenye mwandimomwene, iwo ndi mibindzi yaukali. Imwe munaadzindikira thangwi ya misapo yawo.’​—Mat. 7:15-20. w21.05 tsa. 9 ¶7-8

Yana akhadamanga banja na Mulevi akhacemerwa Elikana wakuti akhanfuna kakamwe. Mbwenye Elikana akhali na nkazi unango akhacemerwa Penina. Elikana akhafuna kakamwe Yana kupiringana Penina. ‘Penina akhali na ana, mbwenye Yana nee akhali na ana.’ Na thangwi ineyi, ndzidzi onsene Penina akhasingirira Yana ‘toera kuntsukwalisa.’ Yana atsukwala kakamwe. ‘Iye akhalira mbacimwana kudya.’ Mbwenye Bhibhlya nee isalonga kuti Yana akhabwezera pyakuipa. M’mbuto mwace, Yana apanga Yahova nyatwa zace, pontho akhanyindira kuti iye mbadam’phedza. (1 Sam. 1:2, 6, 7, 10) Kodi citsandzo ca Yana cisatipfundzisanji? Khala munthu asayesera kucita mapika na imwe, lekani kutowezera pinthu pinacita iye. Pontho lekani kulongezana naye. M’mbuto mwakum’bwezera pinthu pyakuipa pidacita iye, yeserani kukhazikisa ntendere. (Aroma 12:17-21) Maseze iye akhonde kucinja, imwe munakwanisa kukhala wakukhurudzika na wakutsandzaya. w21.07 tsa. 17-18 ¶13-14

Ntima wakufuna pyonsene wacitisa Yuda Iskaryote kucita pinthu pyakuipa kakamwe mbasandukira Yezu. Mbwenye pakutoma iye akhali munthu wadidi. (Luka 6:13, 16) Pontho Yezu anyindira Yuda thangwi ndiye akhakoya kobiri. Mbwenye mukupita kwa ndzidzi Yuda atoma kuba kobiri ineyi, mwakukhonda tsalakana cenjezo ya Yezu inalonga pya kucalira kufuna pyonsene. (Marko 7:22, 23; Luka 11:39) Yuda Iskaryote apangiza kuti akhali na ntima wakufuna pyonsene Yezu mbadzati kuphiwa. Yezu na anyakupfundzace pabodzi na Mariya na Marta akhadacemerwa toera kadya kunyumba kwa Simau wakuti akhadawangiswa utenda wace wa matanya. Mu ndzidzi ukhadya iwo, Mariya akwata ntete wa mafuta akununkhira a ntengo ukulu kakamwe mbatoma kuatsanulira mu nsolo mwa Yezu. Yuda na anyakupfundza anango aipirwa kakamwe na pyenepi. Anyakupfundza anango ankhanyerezera kuti kobiri ineyi mbidaphatisirwa toera kuphedzera basa yakumwaza mphangwa, mbwenye Yuda akhali na maonero akusiyana thangwi iye “akhali mbava,” pontho akhafuna kuba kobiri ineyi.​—Juwau 12:2-6; Mat. 26:6-16; Luka 22:3-6. w21.06 tsa. 18 ¶12-13

Kodi imwe musadzudzumika midzidzi inango thangwi yakukhala na mabasa mazinji akuti nee musakwanisa kuacita onsene? Khala ndi tenepo, imwe munakwanisa kubvesesa pinthu pidacitikirwa na mpostolo Paulu. Iye nee akhadzudzumika basi ene na abale na alongo a mpingo ubodzi, mbwenye a “mipingo yonsene.” (2 Akor. 11:23-28) Kodi muli na utenda wakuti usakucitisani kukhala wakutsukwala? Paulu akhali na nyatwa yakuti ikhanthabusa kakamwe. Panango nyatwa ineyi ikhali utenda, pontho iye akhafuna kuti utenda wace umale. (2 Akor. 12:7-10) Kodi midzidzi inango imwe musatsukwala thangwi ya madodo anacita imwe? Paulu midzidzi inango akhathimbanambo na pyenepi. Iye alonga kuti ndi “munthu wakunentseka” thangwi ndzidzi onsene akhafunika kuwangisira toera kucita pinthu pyadidi. (Aroma 7:21-24) Maseze Paulu akhathimbana na nyatwa zizinji, iye apitiriza kutumikira Yahova. Kodi iye akhakwanisa tani kucita pyenepi? Maseze Paulu akhacita madodo, iye akhali na cikhulupiro cakuwanga thangwi ya ciomboli. w21.04 tsa. 22 ¶7-8

Pidadawa Adhamu, iye aluza mwai wakukhala maso kwenda na kwenda kuphatanizambo ana akhafuna bala iye. Nee pakhali na mathangwi toera kulekerera Adhamu thangwi ya pinthu pidacita iye. Thangwi iye adawa mwakufuna. Mphapo ndiye tani anace? Anace nee acita cinthu cakuipa, pontho nee ndiwo adacitisa Adhamu kudawa. (Aroma 5:12, 14) Adhamu athema kufa thangwi ya madawo adacita iye. Mbwenye Yahova acita pinthu toera ana a Adhamu akhale na umaso wakwenda na kwenda. Pidamala kwene Adhamu kudawa, Yahova atoma kupangiza kuti mbadapulumusa tani pikwi na pikwi pya ana a Adhamu ku madawo na kufa. (Gen. 3:15) Thangwi ya ciomboli, ife tinakwanisa kukhala na uxamwali wakuwanga na Yahova maseze ndife anthu akusowa ungwiro. Pontho thangwi ya ciomboli mabasa a Dyabo anadzafudzwa kwenda na kwenda. (1 Juwau 3:8) Kusiyapo pyenepi, thangwi ya ciomboli, cifuno ca Yahova na dziko yapantsi cinadzakwanirisika. Dziko yonsene yapantsi inadzakhala paraizu. w21.04 tsa. 14 ¶1; tsa. 19 ¶17

Mwinji ukulu wa amuna na akazi akuti akhadabuluka m’madziko akusiyana-siyana na pilongero pyakusiyana-siyana akhadagumanyikana mu Yerusalemu. Cinthu cakudzumatirisa kakamwe cacitika pa ntsiku ineyi. Ayuda anango mwakukhonda dikhira atoma kulonga pilongero pya anthu anewa. Iwo adzumatirwa kakamwe na pinthu pyenepi. Mbwenye mphangwa zikhalonga Ayuda anewa na zidalonga mpostolo Pedhru kuna anthu onsene zikhali zakufunika kakamwe. Thangwi zaphedza anthu kubvesesa kuti iwo mbadapulumuswa angakhulupira Yezu Kristu. Mphangwa zenezi zakhuya kakamwe mitima ya anthu anewa. Buluka penepo, iwo abvundza: “Mphapo tisafunika kucitanji?” Pedhru aatawira mbaapanga kuti: “M’bodzi na m’bodzi wa imwe mbabatizwe.” (Mabasa 2:37, 38) Pa ntsiku ineyi anthu cifupi na 3.000 abatizwa mbakhala anyakupfundza a Yezu, pyenepi pikhali pyakudzumatirisa kakamwe. Pontho pyenepi pyapangiza kutoma kwa basa ikulu yakucita anyakupfundza idasiya Yezu kuna atowereri ace. Basa ineyi isacitwa mpaka lero. w21.06 tsa. 2 ¶1-2

Panango ife tisakhala mu cisa cakuti ndi pyakunentsa kutomesa mapfundziro a Bhibhlya. Thangwi panango anthu nee asakomerwa na mphangwa zadidi zinamwaza ife. Ninji cinafuna kutiphedza toera kupitiriza kumwaza mphangwa mu cisa ceneci? Kumbukani kuti makhaliro a anthu anakwanisa kucinja mwakucimbiza mu dziko ino yakuipa, natenepa anthu akuti pakutoma akha­khonda mphangwa zathu anakwanisa kutawira. (Mat. 5:3) Anthu anango akuti kale akhakhonda kutambira mabukhu athu, mukupita kwa ndzidzi iwo atawira kupfundza Bhibhlya. Pontho ife tisadziwa kuti Yahova ndiye Mwanaciro munda. (Mat. 9:38) Iye asafuna kuti tipitirize kubzwala na kuthirira, mbwenye iye ndiye anakulisa. Kusiyapo pyenepi, ife tisafunika kudziwa kuti maseze nee tisakwanisa kucitisa pfundziro ya Bhibhlya cincino, Yahova asapasa nkhombo kuwangisira kwathu tayu thangwi ya numero ya anthu anagawira ife mabukhu peno anapfundzisa ife Bhibhlya. w21.07 tsa. 6 ¶14

Yahova apasa anthu mwai wakubala ana, pontho aapasa basa yakupfundzisa anawo toera afune Yahova na kuntumikira. Maseze aanju apaswa maluso mazinji akudzumatirisa na Yahova, iwo nee apaswa mwai unoyu wakubala ana. Na thangwi ineyi, khala ndimwe nyakubala perekani takhuta thangwi ya mwai unoyu wakubala ana. Kusiyapo pyenepi, anyakubala apaswa basa yakufunika kakamwe yakupfundzisa anawo na ‘kualanga mwakubverana na pinalonga Yahova.’ (Aef. 6:4; Dheu. 6:5-7) Toera kuphedza anyakubala, gulu ya Yahova isapereka pinthu pizinji ninga mabukhu, mavidhyu, nyimbo na mphangwa zinango zinagumanika mu saiti yathu. Mwakukhonda penula, Yahova na Yezu Kristu asafuna kakamwe anang’ono. (Luka 18:15-17) Natenepa anyakubala anganyindira Yahova mbacita pyonsene pinakwanisa iwo toera kutsalakana anawo, Yahova asakomerwa kakamwe. Pontho anyakubala anewa asaphedza anawo toera atumikire Yahova kwenda na kwenda. w21.08 tsa. 5 ¶9

Anthu anango asalonga kuti kukhala na cikhulupiro pisabveka kukhulupira pinthu pyakusowa umboni. Mbwenye mwakubverana na Bhibhlya, ceneci nee ndi cikhulupiro candimomwene. Bhibhlya isafokotoza kuti cikhulupiro cisafunika kukhala na umboni. Natenepa, maseze ife nee tisakwanisa kuona Yahova, Yezu na Umambo, ife tiri na umboni wakuti iwo alipo, pontho Umambo ndi wandimomwene. (Aheb. 11:3) Siyentista unango wakuti adzakhala Mboni wa Yahova alonga: “Mboni za Yahova ziri na umboni wa pinthu pyonsene pinakhulupira iwo. Mbwenye iwo nee asapokanya pinalonga siyensiya.” Panango ife tinabvundzika: ‘Khala pana umboni unapangiza kuti Mulungu alipo, thangwi yanji anthu azinji asakhonda kukhulupira kuti ndiye adacita pinthu pyonsene?’ Thangwi anango nee asapfundza pinthu pidacita Mulungu. Robert wakuti ndi m’bodzi wa Mboni za Yahova alonga: “Nakuti kuxikola anthu nee asapfundziswa kuti Mulungu ndiye adacita pyonsene, pisakhala pyakunentsa toera kutawira. Mbwenye pikhali ine nkati mwa pyaka 20 ndapfundza kuti Bhibhlya isatipasa mathangwi adidi toera kukhulupira kuti Mulungu ndiye adacita pinthu pyonsene.” w21.08 tsa. 15 ¶4-5

Ife tinakwanisa kudziwa kuti Yahova ndi wadidi mukuleri Bhibhlya, pontho tingabvesera anango angalonga thangwi ya nkhombo zidaapasa Yahova. Mbwenye ife tinakwanisa kubvesesa kuti Yahova ndi wadidi ‘tingayesera’ tekhene udidi wace. Nyerezerani kuti tisafuna kutumikira Yahova m’basa ya ndzidzi onsene, mbwenye toera tikwanise kucita pyenepi tisafunika kululupisa umaso wathu. Ife tisadziwa kuti Yezu apikira kuti tingaikha Umambo wa Mulungu pa mbuto yakutoma, Yahova anadzatipasa pinthu pyakufunika kuna ife. Mbwenye ife cipo taona Yahova mbacita pyenepi kuna ife. (Mat. 6:33) Ngakhale tenepo, ife tisakhulupira mafala a Yezu. Natenepa ife tisagula pinthu pyakucepa, pontho tisapungula ndzidzi wa basa yathu ya kudziko toera tikwanise kukhala na ndzidzi uzinji m’basa yakumwaza mphangwa. ‘Tingayesera’ Yahova munjira ineyi, tinakwanisa kuona kuti mwandimomwene iye asatitsalakana. w21.08 tsa. 26 ¶2

Kodi pyenepi pisacitikambo lero? Inde. Atsogoleri a mauphemberi azinji asakomerwa angaona anthu akupfuma na a cidzo mbaphembera pabodzi na iwo. Atsogoleri anewa a mauphemberi asatawirisa anthu akupfuma na a cidzo toera kucita pinthu pyakuti nee pisakomeresa Mulungu. Mbwenye iwo nee asakomerwa na Mboni za Yahova thangwi anthu azinji asanyerezera kuti ndi akusowa basa. Ninga pidalonga Paulu, Mulungu asasankhula anthu anaoniwa na dziko ninga ‘akusowa basa.’ (1 Akor. 1:26-29) Mbwenye kuna Yahova, atumiki ace onsene ndi akufunika kakamwe. Ninji pinafuna kutiphedza toera tikhonde kudodoma na mafala pakulonga? (Mat. 11:25, 26) Nee tisafunika kutowezera maonero a anthu anapwaza atumiki a Mulungu. Pontho dziwani kuti Yahova asaphatisira basi ene anthu akucepeseka toera kucita cifuno cace. (Mas. 138:⁠6) Kusiyapo pyenepi, nyerezerani pinthu pyonsene pinacita Yahova lero mukuphatisira anthu anewa anaoniwa na dziko ninga akusowa basa. w21.05 tsa. 8 ¶1; tsa. 9 ¶5-6

Mpostolo Paulu apereka takhuta kakamwe thangwi ya ciphedzo cikhapaswa iye na abale. Iye akhali wakucepeseka, pontho akhatawira kuphedzwa na abale na alongo ace. (Afil. 2:19-22) Abale na alongo akukalamba, imwe munakwanisa kupereka takhuta kuna aphale na atsikana mu mpingo mwanu munjira zizinji. Khala iwo asafuna kukupasani bhuleya, kukugulirani pinthu peno kukuphedzani na pinthu pinango, tawirani ciphedzo cawo. Dziwani kuti ciphedzo cawo cisapangiza kuti Yahova asakufunani. Imwe munakwanisa kucita uxamwali wakuwanga kakamwe na ale anakuphedzani. Natenepa, ndzidzi onsene phedzani aphale na atsikana toera akhale na uxamwali wakuwanga na Yahova, pontho apangeni kuti musakomerwa kakamwe na kuona kuwangisira kwawo toera kuphedza mpingo. Kusiyapo pyenepi, khalani na ndzidzi toera kucedza nawo na kuapanga pinthu pidakucitikirani mu umaso wanu. Mungacita pyenepi, imwe munapangiza kuti ‘musapereka takhuta ndzidzi onsene’ kuna Yahova thangwi yakukhala na aphale na atsikana mu mpingo.​—Akol. 3:15; Juwau 6:44; 1 Ates. 5:18. w21.09 tsa. 12 ¶12-13

Yahova asafuna abale na alongo athu. Mbwenye kuna ife panango pinakhala pyakunentsa kupangiza ufuni ndzidzi onsene kuna abale na alongo athu, thangwi ife takuzwa munjira yakusiyana, pontho tiri na makhaliro akusiyana. Kusiyapo pyenepi, ife tonsene tisadodoma, na thangwi ineyi tinakwanisa kutsukwalisa anango. Ngakhale tenepo, ife tisafunika kuwangisira toera kufuna kakamwe abale na alongo athu. Tinakwanisa tani kucita pyenepi? Ife tinakwanisa kucita pyenepi mukutowezera Babathu. (Aef. 5:1, 2; 1 Juwau 4:19) Munthu wantsisi asasaka njira toera kuphedza na kubalangaza. Munjira ikhatsalakana Yezu anthu, pisapangiza kuti iye akhatowezera Yahova wakuti asapangiza ntsisi kuna anthu. (Juwau 5:19) Pidaona Yezu mwinji wa anthu, “aabvera ntsisi, thangwi iwo akhapwazwa na kutsalakanwa mwakuipa ninga mabira akusowa nkumbizi.” (Mat. 9:36) Kusiyapo kuabvera ntsisi, Yezu aaphedza mukuwangisa ale akhaduwala na kubalangaza ale “adaneta na adalemerwa.”​—Mat. 11:28-30; 14:14. w21.09 tsa. 22 ¶10-11

Yahova asabvera ntsisi thangwi ndi waufuni. Mpostolo Paulu alemba kuti Mulungu ndi “wantsisi kakamwe.” Pidalemba iye mafala anewa, Paulu akhalonga kuti Mulungu ndi wantsisi thangwi yakupasa cidikhiro atumiki ace akudzodzwa toera kuenda kakhala kudzulu. (Aef. 2:4-7) Mbwenye Yahova nee asabvera ntsisi basi ene atumiki ace akudzodzwa. Nyamasalmo Dhavidhi alemba: ‘Yahova ndi wadidi kuna onsene, pontho mabasace onsene asapangiza ntsisi zace.’ (Mas. 145:9) Nakuti Yahova asafuna anthu, iye asaabvera ntsisi ndzidzi onsene unaona iye kuti ndi pyakufunika toera kucita pyenepi. Kupiringana anthu onsene, Yezu asadziwa kuti Yahova asakomerwa kakamwe na kubvera ntsisi anthu. Yezu akhali pabodzi na Yahova kudzulu mu pyaka pizinji kakamwe mbadzati kubwera pa dziko yapantsi. (Mis. 8:30, 31) Mu ndzidzi unoyu, Yezu akhaona kuti pai wace akhabvera tani ntsisi anthu akudawa. (Mas. 78:37-42) Mu ndzidzi ukhapfundzisa iye, kazinji kene Yezu akhafokotoza n’khaliro unoyu wadidi kakamwe wa pai wace. w21.10 tsa. 8-9 ¶4-5

Yahova atawira phembero ineyi mwakugaluza kubulukira kudzulu, mbapikira kuti mbadapasa mbiri dzina yace. Mu utumiki wace pa dziko yapantsi, Yezu apasa mbiri dzina ya babace. (Juwau 17:26) Natenepa ndi mwai ukulu kakamwe kuna Akristu andimomwene kuphatisira dzina ya Mulungu na kuphedza anango toera adziwembo dzina ineyi. Mu ndzidzi wa apostolo, pidamala kwene kukhazikiswa mpingo Wacikristu, Yahova “atoma kutawira anthu a madzindza anango, mbasankhula anango pakati pawo toera acemerwe na dzina yace.” (Mabasa 15:14) Akristu anewa a mu ndzidzi wa apostolo akhakomerwa na kuphatisira dzina ya Mulungu, pontho akhaphedza anango toera adziwembo dzina ineyi. Apostolo na anyakupfundza a Yezu aphatisira dzina ya Mulungu mu ndzidzi ukhamwaza iwo mphangwa na mu ndzidzi ukhalemba iwo mabukhu a m’Bhibhlya. Munjira ineyi, iwo apangiza pakweca kuti basi ene ndiwo akhaphedza anango toera kudziwa dzina ya Mulungu. (Mabasa 2:14, 21) Munjira ibodzi ene, Mboni za Yahova ndi anthu anadziwika na dzina ya Yahova. w21.10 tsa. 20-21 ¶8-10

Ufuni wakukhonda mala wa Mulungu ndi wakwenda na kwenda. Ufuni unoyu wakukhonda mala walongwa m’maulendo 26 m’bukhu ya Masalmo 136. Vesi yakutoma isalonga: ‘Perekani takhuta kuna Yahova, thangwi iye ndi wadidi; ufuni wace ndi wakukhonda mala.’ (Mas. 136:1) Kutomera vesi 2 mpaka vesi 26, ife tisagumana mafala akuti ‘thangwi ufuni wace ndi wakukhonda mala.’ Mu ndzidzi unaleri ife mavesi anango a kapitulu ineyi, ife tisadzumatirwa na njira zakusiyana-siyana zinapangiza Yahova ufuni wace wakukhonda mala. Mafala akuti ‘thangwi ufuni wace ndi wakukhonda mala’ asatipasa cinyindiro cakuti ufuni wa Mulungu kuna atumiki ace nkhabe cinja. Ndi pyakutsandzayisa kakamwe kudziwa kuti Yahova nkhabe siya mwakucimbiza kufuna atumiki ace. M’mbuto mwace, Mulungu angatoma kupangiza ufuni wace kuna munthu wakuti asantumikira iye asakhala wakuphatana na munthu unoyu, pontho nkhabe kunsiya, makamaka m’midzidzi ya nyatwa. Kudziwa kuti Yahova asapitiriza kukhala na ife kusaticitisa kukhala akutsandzaya, pontho kusatipasa mphambvu zinafuna ife toera kupitiriza kupirira nyatwa mbatipitiriza kufamba munjira inatsogolera ku umaso.​—Mas. 31:7. w21.11 tsa. 4-5 ¶9-10

Kodi imwe midzidzi inango musadzudzumika munganyerezera thangwi ya pinthu pinafuna kucitika, ninga kufudzwa kwa mauphemberi authambi, kupomokerwa kwa Goge na Magoge na nkhondo ya Armajedhoni? Midzidzi inango imwe musabvundzika: ‘Kodi ine ndinapitiriza kukhala wakukhulupirika pinthu pyenepi pyakugoswa pingadzacitika?’ Khala imwe mwanyerezera thangwi ya pyenepi, mafala adalonga Yezu anagumanika pa lemba ya ntsiku ya lero anakuphedzani kakamwe. Iye apanga anyakupfundzace: “Lekani kunentseka m’mitima yanu. Khulupirani Mulungu.” Cikhulupiro cakuwanga cinatiphedza toera kupirira nyatwa zinafuna kuthimbana na ife ntsogolo. Ife tinakwanisa kuwangisa cikhulupiro cathu toera kupirira nyatwa za ntsogolo tinganyerezera mwadidi nyatwa zinayesera cikhulupiro cathu lero. Ife tinadzindikira pinthu pinafunika ife kucita toera kuwangisa cikhulupiro cathu. Ndzidzi onsene unapirira ife pinentso cikhulupiro cathu cisakhala cakuwanga kakamwe. Pyenepi pinatiphedza toera kupirira nyatwa zinafuna kuthimbana na ife ntsogolo. w21.11 tsa. 20 ¶1-2

Mpostolo Paulu akulumiza Timoti kuphatanizambo Akristu onsene toera acite mwakukwana utumiki wawo. (2 Tim. 4:5) Mbwenye m’midzidzi inango pisakhala pyakunentsa. Mwacitsandzo, nyerezerani abale na alongo athu akuti asakhala mu dziko yakuti basa yathu isatcingwa peno isakhondeswa. Atumiki a Yahova asathimbana na nyatwa zizinji zakuti panango zisaafewesa. Mwacitsandzo, anango asaphata basa m’midzidzi mizinji toera akwanise kutsalakana mabanja awo. Iwo asafunambo kucita pizinji m’basa yakumwaza mphangwa, mbwenye nee asakhala na mphambvu zizinji pakumala kwa sumana. Anango nee asakwanisa kucita pizinji m’basa yakumwaza mphangwa thangwi ya utenda, kukalamba peno nee asakwanisa kubuluka panyumba. Pontho anango asapibva kuti nee ndi akufunika kuna Yahova. Mwakukhonda tsalakana nyatwa zinathimbana na ife, Yahova anatipasa mphambvu toera tipitirize kuntumikira mwakubverana na makhaliro athu. w21.05 tsa. 20 ¶1-3

Midzidzi inango anthu anango panango anatikakamiza kucita pinthu pyakuti nee pisabverana na pinafuna Yahova. Pyenepi pingacitika, ife tisafunika kucita cisankhulo cakufunika kakamwe. Onani uphungu wakufunika kakamwe unagumanika pa Levitiko 19:19. Khundu yakumalisa ya vesi ineyi isalonga tenepa: ‘Lekani kubvala nguwo zakulukwa na usalu wa mitundu miwiri yakusiyana.’ Mwambo unoyu ukhaphedza Aizraeli toera akhale akusiyana na madzindza anango akuti akhali cifupi na iwo. Nakuti lero nee tisatongwabve na mwambo wa Mose, nee ndi pyakuipa kuna Nkristu kubvala nguwo zakulukwa na usalu wa mitundu miwiri yakusiyana. Mbwenye tisafunika kucalira kukhala ninga anthu akuti pinthu pinakhulupira iwo na pinacita iwo nee pisabverana na pinapfundzisa Bhibhlya. Mwandimomwene, ife tisafuna acibale athu, pontho tisafuna anthu anango. Pyenepi ndi pyakufunika kakamwe thangwi tingafuna kukhala anthu akucena, tisafunika kukhala kukhundu ya Mulungu.​—2 Akor. 6:14-16; 1 Ped. 4:3, 4. w21.12 tsa. 5 ¶14; tsa. 6 ¶16

Nseu unatsogolera ku umaso nkhabe nentsa toera kuugumana. Yezu alonga: “Imwe mungapitiriza m’mafala anga, mwandimomwene ndimwe anyakupfundza anga, imwe munadzadziwa undimomwene, pontho undimomwene unadzakusudzulani.” (Juwau 8:31, 32) Pyakutsandzayisa ndi pyakuti imwe nee mwatowerera mwinji, mbwenye mwatowezera undimomwene. Imwe mwatoma kupfundza mwadidi Mafala a Mulungu toera kudziwa pinafuna iye kuna ife, pontho mwabvera pipfundziso pya Yezu. Imwe mwadzindikira kuti Yahova asafuna kuti ife ticalire pipfundziso pya mauphemberi authambi, pontho mwapfundza kuti nee musafunikabve kucita maphwando akuti asacita khundu ya mauphemberi authambi. Kusiyapo pyenepi, mwapfundzambo kuti kucita pinafuna Yahova na kusiya pinthu pyakuti nee asakomerwa napyo m’midzidzi inango pinakhala pyakunentsa. (Mat. 10:34-36) Panango pyakhala pyakunentsa kuna imwe kucita macinjo anewa. Mbwenye imwe mwacita macinjo anewa thangwi musafuna Babanu wakudzulu. Mwakukhonda penula, iye asakomerwa kakamwe na pinacita imwe.​—Mis. 27:11. w21.12 tsa. 22 ¶3; tsa. 23 ¶5

Mose ndi citsandzo cadidi ca munthu adatawira uphungu pidamala iye kucita madodo makulu. Ntsiku inango iye aipirwa mbakhonda kupasa mbiri Yahova. Na thangwi ineyi, Mose nee atawiriswa kupita mu Dziko Yakupikirwa. (Num. 20:1-13) Mose pidapanga iye Yahova toera acinje cisankhulo cace, Yahova ampanga: ‘Leka kulonga pontho na ine thangwi ya pinthu pyenepi.’ (Dheu. 3:23-27) Ngakhale tenepo, Mose nee aipirwa. M’mbuto mwace, iye atawira cisankhulo ca Yahova, pontho Yahova apitiriza kumphatisira toera kutsogolera Aizraeli. (Dheu. 4:1) Mose atawira uphungu, pontho iye ndi citsandzo cadidi kuna ife toera kuntowezera. Mose apangiza kuti atawira uphungu wa Yahova thangwi yakupitiriza kukhala wakukhulupirika ngakhale pidamala iye kuluza mwai wakuti akhaufuna ­kakamwe. Tinaphedzeka kakamwe tingatowezera citsandzo ca amuna akukhulupirika ninga Yobe na Mose. (Mis. 4:10-13) Abale na alongo azinji atowezera pitsandzo pyawo, pontho abvera uphungu. w22.02 tsa. 11 ¶9-10

Mu caka 32, Lazaro xamwali wa Yezu, aduwala mpaka kufa. (Juwau 11:3, 14) Iye akhali na anakazi awiri, Mariya na Marta, pontho Yezu akhakomerwa kakamwe na banja yawo. Pidabva Marta kuti Yezu ali kubwera, iye athamanga toera aonane naye. Iye akhali wakutsukwala kakamwe, pontho alonga: “Mbuya, mbamudakhala pano, m’bale wanga mbadafa tayu.” (Juwau 11:21, 32, 33) Mwandimomwene, kuona Mariya na Marta mbakatsukwala thangwi yakufa kwa m’bale wawo kwacitisa Yezu kulira. Khala imwe mwaferwa na nyakufunika wanu, Yahova asabvesesa mabvero anu. Yezu ndi “cipangizo candimomwene” ca Babace. (Aheb. 1:3) Pidalira Yezu, iye apangiza kuti Yahova asapibva tani tingaferwa. (Juwau 14:9) Khala imwe mwaferwa na nyakufunika wanu, khalani na cinyindiro cakuti Yahova asadziwa kutsukwala kwanu, pontho asatsukwalambo. Iye asafuna kumalisa kutsukwala kwanu.​—Masal. 34:18; 147:3. w22.01 tsa. 15 ¶5-7

Kusaka ndzidzi toera kulonga na Yahova, kumbvesera na kunyerezera mwadidi thangwi ya iye pinatiphedza kakamwe. Cakutoma, imwe munacita pisankhulo pyadidi kakamwe. Bhibhlya isatipanga kuti ‘ule anafamba na anthu audziwisi, anadzakhalambo waudziwisi.’ (Mis. 13:20) Caciwiri, imwe munakhala mpfundzisi wadidi kakamwe. Tingapfundzisa munthu Bhibhlya, cinthu cakufunika kuna ife ndi kumphedza toera awangise uxamwali wace na Yahova. Tingacita phembero kazinji kene kuna Yahova, pontho tingapfundza thangwi ya iye, ufuni wathu kuna iye unathimizirika, pontho tinakhala na maluso mazinji akupfundzisa nyakupfundza wathu toera afunembo Yahova. Ndi pyenepi pidacita Yezu. Iye alonga thangwi ya Yahova munjira yadidi na yaufuni toera anyakupfundzace afunembo Yahova. (Juwau 17:25, 26) Cacitatu, munawangisa cikhulupiro canu. Onani pinacitika mungaphemba citsogolero, cibalangazo peno ciphedzo ca Mulungu. Ndzidzi onsene unatawira Yahova maphembero athu, cikhulupiro cathu cisakhala cakuwanga.​—1 Juwau 5:15. w22.01 tsa. 30 ¶15-17

Yahova asatipanga kuti tisafunika kusiya manyerezero na misambo yakuipa thangwi iye asatifuna kakamwe, pontho asafuna kuti tikhale na umaso wadidi. (Iza. 48:17, 18) Iye asadziwa kuti anthu anakhonda kuwangisira toera kusiya pifuno pyakuipa, asaikha umaso wawo na wa anango pangozwi. Yahova asatsukwala kakamwe angaona anthu mbakacita pyenepi. Axamwali na abale athu akuti nee asatumikira Yahova, panango anatisingirira thangwi ya kuwangisira kwathu toera kucinja makhaliro athu. (1 Ped. 4:3, 4) Panango analonga kuti ife tiri na ufulu wakucita pinthu pyonsene pinafuna ife, pontho kuti nee tisafunika kutawirisa kuti anango atipange pinthu pinafunika ife kucita. Mbwenye anthu anapwaza mitemo ya Yahova, nee ali na ufulu wandimomwene. Mwakukhonda penula, iwo ali kutawira kutsogolerwa na dziko inatongwa na Sathani. (Aroma 12:1, 2) Tonsene tisafunika kusankhula cinthu cibodzi: Kupitiriza na uunthu wakale, wakuti usatsogolerwa na madawo, pontho na dziko ya Sathani, peno kutawira kucinjwa na Yahova toera tikhale munthu wadidi kakamwe.​—Iza. 64:8. w22.03 tsa. 3 ¶6-7

Tinganyerezera mwacidikhodikho pinaleri ife m’Bhibhlya, pinatiphedza toera kukhala na maonero adidi thangwi ya nyatwa zinathimbana na ife. Onani kuti Bhibhlya yaphedza tani mulongo unango pidaferwa iye na mamunace. Nkulu wa mpingo unango am’phemba kuti aleri bukhu ya Yobe. Pidaleri iye bukhu ineyi, pakutoma anyerezera kuti Yobe akhali na maonero akuphonyeka. Thangwi Yobe akhanyerezera basi ene pya nyatwa zace. Mbwenye buluka penepo, mulongo unoyu adzindikira kuti iye akhali na manyerezero mabodzi ene ninga a Yobe. Pyenepi pyamphedza toera kucinja manyerezero ace, pontho pyampasa mphambvu toera kupirira nyatwa yakuferwa na mamunace. Njira inango inaphatisira Yahova toera kutipasa mphambvu ndi kubulukira kwa abale na alongo athu. Paulu alemba kuti iye akhafuna kakamwe kuti ‘awangisane cikhulupiro’ na abale na alongo ace.​—Aroma 1:11, 12. w21.05 tsa. 22 ¶10-11; tsa. 24 ¶12

Aizraeli akale apangwa: ‘Katatu pa caka, amuna onsene asafunika kubwera pamaso pa Yahova Mulungu wako pa mbuto inafuna iye kusankhula.’ (Dheu. 16:16) Iwo akhafunika kubuluka mbakhonda kusiya munthu toera kuonera nyumba zawo na minda yawo. Mbwenye Yahova aapanga: ‘Nee munthu m’bodzi anafuna kusirira dziko yanu mu ndzidzi unaenda imwe katatu pa caka toera kuonekera pamaso pa Yahova Mulungu wanu.’ (Eks. 34:24) Nakuti Aizraeli akhanyindira Yahova, iwo akhagumanika m’maphwando onsene akhacitwa pa caka. Thangwi yakucita pyenepi, iwo akhaphedzeka munjira zizinji. Mwacitsandzo, iwo akhapfundza pizinji thangwi ya Mwambo wa Mulungu, akhanyerezera pinthu pyadidi pikhaacitira Yahova, pontho akhatsandzaya thangwi yakukhala pabodzi na atumiki anango a Yahova. Ife tisaphedzekambo munjira ibodzi ene tingawangisira toera kugumanika pa misonkhano Yacikristu. Pontho Yahova asatsandzaya kakamwe tingakhunganyika toera kupereka mitawiro yadidi mu ndzidzi wakucepa. w22.03 tsa. 22 ¶9

Yahova akhakhunganya Yezu thangwi ya basa ikhafuna kucita iye ntsogolo ninga Nyantsembe wathu Wankulu. Yezu asadziwa kuti ndi pyakunentsa kakamwe kubvera Mulungu tingathimbana na mayesero. Iye athabuka kakamwe mpaka kuphemba ciphedzo kuna Mulungu “mwakugaluza mbagwisa misozi.” Nakuti Yezu athabuka kakamwe, iye asabvesesa pinafuna ife, pontho ‘anakwanisa kutiphedza tingayeserwa.’ Ife tisapereka takhuta kakamwe kuna Yahova thangwi yakutipasa Nyantsembe Wankulu wakuti “anakwanisa kutibvera ntsisi thangwi yakufewa kwathu.” (Aheb. 2:17; 4:14-16; 5:7-10) Yahova atawirisa Yezu kuthabuka kakamwe toera kutawira mbvundzo uyu wakufunika kakamwe: Kodi anthu anakwanisa kupitiriza kukhala akukhulupirika kuna Yahova angathimbana na mayesero makulu? Sathani asalonga kuti nkhabe. Iye asalonga kuti anthu asatumikira Mulungu basi ene toera apaswe pinthu, pontho kuti anthu nee asafuna Yahova. (Yobe 1:9-11; 2:4, 5) Yezu apitiriza kukhala wakukhulupirika mbapangiza kuti Sathani ndi nyauthambi. w21.04 tsa. 16-17 ¶7-8

Nyakupfundza Bhibhlya mbadzati kubatizwa, iye asafunika kuphatisira pinthu pinapfundza iye m’Bhibhlya. Nyakupfundza Bhibhlya angaphatisira pinapfundza iye, asakhala ninga “munthu wandzeru” adalonga Yezu mu nsangani wace adamanga nyumba yace pa mwala. (Mat. 7:24, 25; Luka 6:47, 48) Phedzani nyakupfundza wanu toera acite macinjo. (Marko 10:17-22) Yezu akhadziwa kuti mbipidakhala pyakunentsa kuna mamuna wakupfuma toera kugulisa pinthu pyace pyonsene. (Marko 10:23) Ngakhale tenepo, Yezu apanga mamuna unoyu toera acite pinthu pyenepi pyakuti pikhali pyakunentsa kakamwe mu umaso wace. Mphapo thangwi yanji Yezu ampanga toera kucita pyenepi? Thangwi iye akhanfuna. Midzidzi inango, panango ife tinanyinyirika kuphedza nyakupfundza kuti aphatisire pinapfundza iye thangwi yakunyerezera kuti nee ali dzololo toera kucita macinjo (Akol. 3:9, 10) Mbwenye mungaphedza mwakucimbiza nyakupfundza wanu toera acite macinjo, iye anakwanisambo kucita macinjo anewa mwakucimbiza. Mungacita pyenepi munapangiza kuti musatsalakana mwadidi nyakupfundza wanu.​—Mas. 141:5; Mis. 27:17. w21.06 tsa. 2-4 ¶3, 5

Mpostolo Pedhru asalonga pya citsandzo cadidi cidakhazikisa Yezu thangwi yakupirira nyatwa. Mbwenye pana pinthu pinango pizinji pidacita Yezu pyakuti tinakwanisa kupitowezera. (1 Ped. 2:18-25) Mwandimomwene, ife tisafunika kutowezera pinthu pyonsene pidalonga iye na pidacita iye. Ninga anthu akusowa ungwiro, kodi ife tinakwanisadi kutowezera citsandzo ca Yezu? Inde, tinakwanisa. Kumbukani kuti Pedhru atikulumiza ‘toera kutowezera manyalo’ a Yezu ‘mwakukhulupirika,’ tayu mwaungwiro. Natenepa tingacita pyonsene pinakwanisa ife toera kutowezera manyalo a Yezu, tinapangiza kuti tisabvera mafala adalonga mpostolo Juwau: ‘Pitirizani kufamba ninga mudafambira iye.’ (1 Juwau 2:6) Tingatowezera manyalo a Yezu, pinatiphedza toera kukhala na uxamwali wakuwanga na Yahova. Thangwi yanji tisalonga tenepa? Yezu akhazikisa citsandzo cadidi kakamwe cakucita pinthu pinakomeresa Mulungu. (Juwau 8:29) Natenepa, tingatowezera manyalo a Yezu tinakomeresa Yahova. Pontho tinakwanisa kukhala na cinyindiro cakuti Babathu wakudzulu anafendedzerambo ale anawangisira toera kukhala axamwali ace.​—Tiya. 4:8. w21.04 tsa. 3 ¶4-6

Yahova asaona makhaliro athu adidi, pontho iye asaona kuti tinakwanisa kucita pinthu pyadidi. Kusiyapo pyenepi, iye anakwanisa kutiphedza toera tikhale axamwali ace. Natenepa tingapitiriza kukhala akukhulupirika kuna Yahova, iye anapitiriza kukhala cifupi na ife kwenda na kwenda. (Juwau 6⁠44) Tingakhala na cinyindiro cakuti Yahova asatifuna, pinatiphedza toera kuntumikira na ntima onsene mwakukhonda tsalakana pinentso pinathimbana na ife. Mbwenye tingapenula kuti Yahova nee asatifuna, ‘mphambvu zathu zinacepa.’ (Mis. 24:10) Pontho tingatsukwala mbatitoma kunyerezera kuti Mulungu nee asatifuna, ife nee tinakwanisa kupirira mayesero a Sathani. (Aef. 6:16) Abale na alongo athu anango atoma kunyerezera kuti nee asafuniwa na Yahova, natenepa cikhulupiro cawo cadzafewa. Tisafunika kucitanji tingatoma kupenula kuti nee tisafuniwa na Mulungu? Mwakucimbiza ife tisafunika kusiya kunyerezera pyenepi. Phembani Yahova toera akuphedzeni kubulusa manyerezero anewa mbakupasani ‘ntendere wa Mulungu toera utsidzikize ntima wanu na manyerezero anu.’ (Mas. 139:23; Afil. 4:6, 7) Pontho kumbukani kuti nee ndimwe basi anathimbana na manyerezero anewa. w21.04 tsa. 20 ¶1; tsa. 21-22 ¶4-6

Kodi imwe mwakwanisa tani kukhala m’bodzi wa Mboni za Yahova? Panango  imwe mwabva “mphangwa zadidi” na anyakubala anu, andzanu akubasa peno andzanu akuxikola, panango Mboni za Yahova zabwera kudzamwaza mphangwa panyumba panu. (Marko 13:10) Buluka penepo, m’bale peno mulongo amala ndzidzi uzinji toera kupfundza na imwe Bhibhlya. Mu ndzidzi unoyu ukhapfundza imwe Bhibhlya, imwe mwatoma kufuna Yahova, pontho imwe mwapfundza kuti iye asakufunanimbo. Yahova akubweresani mu undimomwene, natenepa cincino ndimwe nyakupfundza wa Yezu Kristu, pontho muli na cidikhiro cakukhala na umaso wa kwenda na kwenda. (Juwau 6:44) Mwakukhonda penula, imwe musapereka takhuta kakamwe kuna Yahova thangwi Iye atumiza munthu toera kukupfundzisani undimomwene, pontho cincino asakuonani ninga ntumiki Wace. Nakuti cincino tadziwa undimomwene, ife tiri na basa yakuphedzambo anango toera akhale pabodzi na ife mu nseu unatsogolera ku umaso. Panango pinakhala pyakukhonda nentsa kwa ife kumwaza mphangwa kuna anthu, mbwenye mbatinentseka toera kutomesa mapfundziro a Bhibhlya. w21.07 tsa. 2 ¶1-2