Yahova ndiye adacita masasanyiro akubulusa mu mpingo munthu wakukhonda tcunyuka. Masasanyiro anewa asaphedza anthu onsene, kuphatanizambo nyakudawa. Anthu anango mu mpingo panango analonga kuti nee acita cisankhulo cadidi cakubulusa munthu unoyu mu mpingo, mbwenye kumbukani kuti anthu anewa ndi ale akuti nee akhafuna kulonga madawo akhacita munthu unoyu adabuluswa mu mpingo. Ife nee tisadziwa undimomwene wa pinthu pyenepi pyonsene. Natenepa ndi pyandzeru kunyindira kuti akulu a mpingo adatsalakana nseru unoyu acita pyonsene pidakwanisa iwo toera kuphatisira Malemba, mbatonga “mu dzina ya Yahova.” (2 Kro. 19:6) Mungaphedzera cisankhulo cidacita akulu a mpingo cakubulusa mu mpingo munthu anafuna imwe, imwe munakwanisa kuphedza munthu unoyu toera abwerere kuna Yahova. Elizabeth alonga kuti: “Pikhali pyakunentsa kakamwe kuna ife kucedza na mwana wathu wankulu. Mbwenye pidabwerera iye kuna Yahova, iye akwanisa kubvesesa kuti cisankhulo cakubuluswa mu mpingo cikhali cadidi kuna iye. Mukupita kwa ndzidzi iye alonga kuti apfundza pinthu pizinji pyadidi.” w21.09 tsa. 28-29 ¶11-12

Nyerezerani thangwi ya nkazi unoyu wa nzice. Mwakukhonda penula, iye akhafuna kupereka pizinji kuna Yahova. Mbwenye iye acita pyonsene pidakwanisa iye toera kupereka kobiri ineyi kuna Yahova na ntima onsene. Pontho Yezu akhadziwa kuti cakupereka ceneci cikhali cakufunika kakamwe kuna Babace. Kodi pinthu pyenepi pisatipfundzisanji? Pisatipfundzisa kuti Yahova asakomerwa tingantumikira na ntima wathu onsene. (Mat. 22:37; Akol. 3:23) Yahova asakomerwa kakamwe angaona kuti tisacita pyonsene pinakwanisa ife toera kuntumikira. Pyenepi pisaphataniza ndzidzi na mphambvu zinaphatisira ife toera kumwaza mphangwa, kugumanika pa misonkhano na mabasa anango auzimu. Munaphatisira tani pinthu pidapfundza imwe thangwi ya nkazi unoyu wa nzice? Nyerezerani pya anthu akuti anawangiswa mungaapanga kuti Yahova asakomerwa na pire pinakwanisa iwo kucita kuna iye. Panango mulongo wakugwesera wakuti nee ali na ungumi wadidi, anapasika mulando thangwi nee asakwanisa kucita pizinji mu utumiki. w21.04 tsa. 6-7 ¶17, 19-20

Yahova asadziwa ndzidzi wadidi toera kufudza dziko ino yakuipa. Mbwenye kupirira kwace kusacitisa anthu azinji kupfundza Bhibhlya mbandziwa. Pontho cincino mwinji ukulu wa anthu akupiringana mamiliyau 8 asamulambira. Onsene asapereka takhuta thangwi Yahova apirira mpaka iwo kubalwa, kupfundza toera kunfuna, mbaperekeka kuna iye. Yahova angadzapasa nkhombo pikwi na pikwi pya anthu anafuna kupirira mpaka kunkhomo, pinadzaoneka pakweca kuti iye akhali na mathangwi adidi toera kupirira! Mwakukhonda tsalakana pinthu pyonsene pyakutsukwalisa na nyatwa zidabweresa Sathani, Yahova asapitiriza kukhala “Mulungu wakutsandzaya.” (1 Tim. 1:11) Munjira ibodzi ene, ife tinakwanisambo kupitiriza kukhala akutsandzaya mu ndzidzi unadikhira ife mwakupirira kuti Yahova acenese dzina yace, apangize kuti athema kutonga kudzulu na dziko yapantsi, amalise pinthu pyonsene pyakuipa na nyatwa zinathimbana na ife lero. Natenepa tendeni tipitirize kupirira, mbatibalangazwa thangwi ya kudziwa kuti Babathu wakudzulu asapirirambo. w21.07 tsa. 13 ¶18-19

Anthu azinji a mu ndzidzi wa apostolo akhonda kukhulupira Yezu. Iwo nee akhatawira pikhalonga iye thangwi anyakubalace akhali akutcerenga, pontho akula ku Nazareti, nzinda wakuti anthu azinji akhaupwaza. Ngakhale Natanieli mbadzati kukhala nyakupfundza wa Yezu, iye alonga: “Kodi ku Nazareti kunabulukadi pinthu pyadidi?” Panango iye akhanyerezera kuti mwakubverana na Mikeya 5:2, Mesiya mbadabalwa ku Bhetelehemu tayu ku Nazareti. Mprofeta Izaiya akhadalonga mwanyapantsi kuti anyamalwa a Yezu nee mbadatawira ‘mphangwa zinalonga pya dzindza ya Mesiya.’ (Iza. 53:8) Anthu anewa mbadadinga mphangwa zenezi, mbadadziwa kuti Yezu abalwa ku Bhetelehemu, pontho akhali wa dzindza ya Mambo Dhavidhi. (Luka 2:4-7) Thangwi mbuto idabalwa Yezu ikhadalongwa kale mwanyapantsi mu profesiya ya Mikeya 5:2. Mphapo thangwi yanji anthu nee akhatawira? Iwo akhacimbiza kakamwe na kutonga, pontho nee akhali na undimomwene onsene. Na thangwi ineyi iwo akhonda Yezu. w21.05 tsa. 2-3 ¶4-6

M’Bhibhlya musagumanikambo pitsandzo pyadidi pya ale adapaswa nkhombo thangwi yakutawira uphungu. Onani citsandzo ca Yobe. Ngakhale kuti iye akhafuna Mulungu, pontho akhafuna kunkomeresa, iye nee akhali wakusowa madawo. Thangwi ya nyatwa zikhathimbana na iye, Yobe alonga pinthu mwakukhonda nyerezera. Na thangwi ineyi iye apaswa uphungu na Eliyu, pontho na Yahova. Yobe atawira tani uphungu unoyu? Mwakucepeseka iye aubvera. Iye alonga: “Ine ndalonga mwakusowa ndzeru, . . . ndisatsumbikika thangwi ya pinthu pidalonga ine, mbandikhala pa pfumbi na pa dotha toera kupangiza kutcunyuka kwanga.” (Yobe 42:3-6, 12-17) Iye apangiza kuti akhali wakucepeseka pidatawira iye uphungu wa Eliyu, ngakhale kuti iye akhali nkulu kakamwe kupiringana Eliyu. (Yobe 32:6, 7) Kucepeseka kunatiphedzambo toera kuphatisira uphungu, ngakhale tisaona kuti nee tathema kupaswa uphungu unoyu peno anatipasa ndi mwana kakamwe. Tonsene tisafunika kukulisa misapo ya nzimu wakucena, na kukhala amwazi mphangwa na apfundzisi adidi kakamwe a mphangwa zadidi. w22.02 tsa. 11 ¶8; tsa. 12 ¶12

Abale na alongo onsene mu mpingo ali na basa yakupangiza ufuni kuna unango na ndzace na kukhazikisa ntendere toera onsene akhale akutsandzaya. Pinthu pinacita ife na pinalonga ife pinakwanisa kuwangisa kakamwe abale athu. Munaphedza tani ale akuti acibale awo nee ali mu undimomwene toera kuona kuti ndi akufunika mu mpingo? Yeserani kucita uxamwali na abale na alongo apswa. Ife tinakwanisa kucita pyenepi tingaatambira mwadidi mu mpingo. (Aroma 15:7) Mbwenye ife tisafunika kucita pizinji kupiringana basi ene kuamwanyika. Thangwi mukupita kwa ndzidzi ife tisafuna kukhala axamwali awo a ponda ndipondembo. Natenepa pangizani kuti musatsalakana kakamwe m’bodzi na m’bodzi wa iwo. Yeserani kubvesesa nyatwa zinathimbana na iwo, mbwenye calirani kuacita mibvundzo yakuti inaapasa manyadzo. Kuna anango pisakhala pyakunentsa kulonga mabvero awo, natenepa lekani kuakakamiza kuti alonge. M’mbuto mwace, aciteni mibvundzo yakuti inaaphedza toera kukhala akusudzuka, pontho bveserani mwakupirira matawiro anapereka iwo. Mwacitsandzo, imwe munakwanisa kuabvundza kuti adziwa tani undimomwene. w21.06 tsa. 11 ¶13-14

Ife tisapereka takhuta kakamwe thangwi yakutumikira Yahova pabodzi na abale na alongo athu ninga “nkumbi ubodzi, na nkumbizi m’bodzi.” Bukhu Organizados para Fazer a Vontade de Jeová, tsamba 165, isalonga: “Nakuti imwe musatsandzaya na kuphatana kweneko na abale na alongo, musafunika kucita khundu yanu toera kuphatana kweneko kupitirize.” Natenepa, tisafunika “kuona abale na alongo athu ninga munaoera Yahova.” Kuna Yahova, ife tonsene ndife ‘anang’ono’ akufunika kakamwe. Kodi imwe musaona abale na alongo anu munjira ineyi? Yahova asaona, pontho asakomerwa na pyonsene pinacita imwe toera kuaphedza na kuatsalakana. (Mat. 10:42) Ife tisafuna abale na alongo athu. Natenepa, ife tisafunika ‘kucita pinakwanisa ife toera tikhonde kuikha mwala wakugwegwedusa peno mpingizo patsogolo pa abale athu.’ (Aroma 14:13) Ife tisafunika kuona abale na alongo athu ninga akulu kupiringana ife, pontho tisafunika kualekerera na ntima onsene. Kusiyapo pyenepi, ife nee tisafunika kutawira kugwegweduswa na anango. M’mbuto mwace, “tendeni ticite pinakwanisa ife toera tikhale muntendere, mbaticita pinthu pyakuti pinatiphedza toera kuwangisana unango na ndzace.”​—Aroma 14:19. w21.06 tsa. 24 ¶16-17

Tingapfundza mwacidikhodikho Mafala a Mulungu na kuphatisira pinapfundza ife na uphungu unatambira ife mu gulu yace, mwapang’ono-pang’ono tinakwanisa kukulisa makhaliro a Kris­tu. Pontho pyenepi pinatiphedza toera kudziwa mwadidi Mulungu. Yezu apha­tisira nsangani toera kufokotoza kuti mphangwa za Umambo wa Mulungu zinamwaza ife ndi ninga mbeu yakuti isakula mwapang’ono na pang’ono m’mitima ya anthu akuti asafuna kucita pinthu pyadidi. Iye alonga: “Mbeu zisamera mbazikula, mbwenye iye nkhabe dziwa kuti pyenepi pisacitika tani. Mwapang’ono-pang’ono, mataka okhene asabala misapo. Unatoma ndi umera, buluka penepo zisabuluka mbeu zitete, pakumalisa mbeu zisakola.” (Marko 4:27, 28) Yezu akhalonga kuti ninga mbeu zakuti zisakula mwapang’ono na pang’ono, munthu anatawira mphangwa za Umambo asakula mwauzimu mwapang’ono na pang’ono. Mwacitsandzo, anyakupfundza athu a Bhibhlya angakhala na uxamwali wakuwanga na Yahova, ife tisatoma kuona macinjo adidi anacita iwo mu umaso. (Aef. 4:22-24) Mbwenye ife tisafunika kukumbuka kuti ndi Yahova anakulisa mbeu ineyi. w21.08 tsa. 8-9 ¶4-5

Ife tinakwanisa kukhala akutsandzaya. Munthu anakomerwa na “pinaona maso” asatsandzaya na piri na iye. Mbwenye Munthu anapitiriza kusirira pinthu pyakuti nee anakwanisa kukhala napyo nee anatsandzaya. Kodi pyenepi pisatipfundzisanji? Toera tikhale akutsandzaya, ife tisafunika kuikha manyerezero athu ku pinthu piri na ife tayu ku pinthu pyakuti nee tinakwanisa kukhala napyo. Kodi ndi pyakukwanisikadi kuna munthu kukhala wakutsandzaya na pinthu piri na iye? Anthu azinji asanyerezera kuti nee ndi pyakukwanisika thangwi tisapitiriza kukomerwa na kucita pinthu pipswa, mbwenye ndi pyakukwanisika kutsandzaya na pinthu piri na ife. Mphapo tinakwanisa tani kutsandzaya na pinthu piri na ife? Toera kudziwa pyenepi, onani nsangani wa matalento udalonga Yezu unagumanika pa Mateu 25:14-30. Pontho onani kuti tinakhala tani akutsandzaya kakamwe na pinthu piri na ife. w21.08 tsa. 21 ¶5-6

Yahova asatsalakana kakamwe ale ‘anathabuka, na ale a ntima wakucepeseka.’ Kusiyapo akulu a mpingo, ife tonsene tinakwanisa kuwangisa abale na alongo athu akufunika. Njira ibodzi ya kuawangisa ndi kupangiza citsalakano candimomwene kuna iwo. Yahova asafuna kuti tipangize kuna mabira ace kuti iye asaafuna kakamwe. (Mis. 19:17) Tinakwanisambo kuphedza abale athu tingakhala anthu akucepeseka, mbatikhonda kudzikuza thangwi ya maluso athu. Ife nee tisafuna kucita pinthu pyakuti anango angapiona anakhala na bibvu na ife. M’mbuto mwace, ife tisaphatisira maluso athu na cidziwiso cathu toera kuwangisana unango na ndzace. (1 Ped. 4:10, 11) Ife tinakwanisa kupfundza pizinji thangwi yakutsalakana mwadidi anango tingabvesesa kuti Yezu akhatsalakana tani atowereri ace. Iye akhali munthu wakufunika kakamwe mu ndzidzi ukhali iye pa dziko yapantsi. Ngakhale tenepo, iye akhali “wakukhurudzika na wakucepeseka.” (Mat. 11:28-30) Pikhapfundzisa iye anthu, iye akhaphatisira mafala akukhonda nentsa kubvesesa na misangani yakuti ikhakhuya mitima ya anthu akucepeseka.​—Luka 10:21. w21.07 tsa. 23 ¶11-12

Khalani na ndzidzi toera kucedza na abale na alongo akukalamba. Panango iwo nee asakwanisa kuona mwadidi, kufamba mwadidi, kulonga mwadidi, mbwenye iwo asapitiriza na cifuno cakucita pizinji m’basa ya Yahova, pontho iwo acita “dzina yadidi” kuna Yahova. (Ekle. 7:1) Kusiyapo pyenepi, kumbukani kuti thangwi yanji Yahova asaalemedza kakamwe. Natenepa pitirizani kualemedza. Khalani ninga Elizeu. Iye akakamira kukhala na Eliya mpaka pa ntsiku yakumalisa ya umaso wa Eliya. M’maulendo matatu, Elizeu apanga Eliya kuti: “Nee ndinakusiyani.” (2 Ama. 2:2, 4, 6) Pangizani citsalakano kuna abale na alongo akukalamba mukuacita mibvundzo mwacilemedzo. (Mis. 1:5; 20:5; 1 Tim. 5:1, 2) Aciteni mibvundzo ninga na iyi: “Pikhali imwe mwana, ninji cidakupasani cinyindiro cakuti mwagumana undimomwene?” “Pinthu pidakucitikirani mu umaso wanu pyakuphedzani tani toera kukhala na uxamwali wakuwanga na Yahova?” “Ninji pisakuphedzani toera kupitiriza kukhala akutsandzaya m’basa ya Yahova?” (1 Tim. 6:6-8) Buluka penepo abvesereni mu ndzidzi unalonga iwo. w21.09 tsa. 7 ¶14-15

Tingacita pyonsene pinakwanisa ife toera kubvera ntemo wakumwaza mphangwa na kucita anyakupfundza, tinapangiza kuti tisafuna Yahova. (1 Juwau 5:3) Natenepa kufuna kwathu Yahova kusatikulumiza toera kumwaza mphangwa nyumba na nyumba. Kodi pikhali pyakunentsa kuna imwe kubvera ntemo unoyu wakumwaza mphangwa? Panango nkhabe. Kodi pidamwaza imwe mphangwa paulendo wakutoma mwagopa? Inde. Mbwenye imwe mukhadziwa kuti Yezu atipanga toera ticite basa ineyi, na thangwi ineyi imwe mwabvera. Pontho mukupita kwa ndzidzi imwe mwadzolowera kucita basa ineyi. Mphapo ndiye tani basa yakucitisa pfundziro ya Bhibhlya? Kodi musagopa munganyerezera kucitisa pfundziro ya Bhibhlya? Panango. Mbwenye mungacita phembero kuna Yahova toera akupaseni cipapo, iye anakuphedzani toera kucitisa pfundziro ya Bhibhlya. w21.07 tsa. 3 ¶7

Mu ndzidzi wakale, mabitcu akhaikhwa cidzindikiro ca kwenda na kwenda toera kupangiza kuti iwo akhali na ambuyawo. Munjira ibodzi ene, anthu lero asadikhira kuti m’bodzi na m’bodzi wa iwo apangize kuti mbani asafunika iye kuphedzera. Iwo asafuna kuti anthu onsene apangize na manyerezero awo na macitiro awo kuti asaphedzera ndale za dziko. Kodi ife tinadzatawira kuikhwa cidzindikiro ceneci cakuphiphirisa mbatiphedzera mautongi a ndale za dziko? Ale anakhonda kuikhwa cidzindikiro ceneci anathabuswa mbakhala pangozwi. Bukhu ya Apokalipse isalonga: “Akhonde kuoneka munthu anafuna kugula peno kugulisa, kusiyapo ale ali na cidzindikiro.” (Apok. 13:17) Mbwenye atumiki a Mulungu asadziwa pinafuna kudzacita Mulungu kuna ale adaikhwa cidzindikiro cinalongwa pa Apokalipse 14:9, 10. Natenepa m’mbuto mwa kuikhwa cidzindikiro ceneci, iwo anadzalemba m’manja mwawo kuti: “Ine ndine wa Yahova.” (Iza. 44:5) Uno ndi ndzidzi wakupangiza kuti cikhulupiro cathu kuna Yahova ndi cakuwanga. Tingacita pyenepi, Yahova analonga mwakutsandzaya kuti ndife atumiki ace. w21.09 tsa. 18 ¶15-16

Toera kukwanirisa basa yathu yakumwaza mphangwa, anango anakwanisa kutiphedza kakamwe. Mpostolo Paulu apfundzisa Timoti njira zakumwaza mphangwa na kupfundzisa, pontho ankulumizambo toera apfundzise anango njira zenezi. (1 Akor. 4:17) Ninga Timoti, ife tisafunika kutawira ciphedzo ca anango mu mpingo. Ife tisafunika kuphemba ciphedzo ca Yahova. Phembani Yahova toera akuphedzeni ndzidzi onsene unamwaza imwe mphangwa. Thangwi ife tisafunika kuphedzwa na nzimu wace wakucena mu pinthu pyonsene pinacita ife. (Mas. 127:1; Luka 11:13) Mungacita phembero kuna Yahova, longani pinthu pinafuna imwe kuti akuphedzeni. Mwacitsandzo, mphembeni toera akuphedzeni kugumana munthu anafuna kubvesera pinthu pinalonga imwe. Ife tisafunikambo kukhala na ndzidzi wakucita pfundziro ya munthu paekha. Bhibhlya isalonga: “Cinjani manyerezero anu toera mukwanise kudziwa mwadidi pinafuna Mulungu.” (Aroma 12:2) Tingacita pfundziro ya munthu paekha, ife tinakwanisa kudziwa mwadidi Yahova. Buluka penepo, tingapanga anango pinthu pidapfundza ife, iwo anakwanisa kuona kuti tisakhulupira pinthu pinalonga ife. w21.05 tsa. 18 ¶14-16

Ndiye tani khala imwe mukuwangisira kakamwe, pontho musacita phembero thangwi ya nyakupfundza wanu wa Bhibhlya mbwenye iye nee akuthambaruka, pontho musanyerezera kusiya kupfundza naye Bhibhlya? Peno, ndiye tani khala imwe cipo mwapfundzisa munthu Bhibhlya mpaka kubatizwa? Kodi imwe musafunika kupasika mulando mbamunyerezera kuti Yahova nee akupasa nkhombo basa yanu yakumwaza mphangwa? Yahova asaona kuwangisira kwathu. Yahova asaona kuwangisira kwathu na kupirira kwathu. Yahova asakomerwa na ife tingamwaza mphangwa mwaphinga thangwi ya ufuni uli na ife kuna iye, mwakukhonda tsalakana khala anthu anatibvesera peno nkhabe. Mpostolo Paulu alemba: “Mulungu nee ndi wakukhonda kulungama toera aduwale basa yanu na ufuni udapangiza imwe kuna dzina yace pakutumikira anthu akucena, mbamupitiriza kuatumikira.” (Aheb. 6:10) Yahova asakumbuka kuwangisira kwathu na ufuni unapangiza ife, maseze tikhonde kukhala na nyakupfundza wa Bhibhlya wakuti asankhula kubatizwa. Imwe munakwanisa kuphatisira mafala adalonga mpostolo Paulu pa lemba ya ntsiku ya lero. w21.10 tsa. 25 ¶4-6

Kukoma ntima na ufuni wa Yezu pikhapangizika munjira ikhatsalakana iye anyakupfundzace. Iye akhadziwa kuti maluso awo na makhaliro awo ndi akusiyana. Natenepa, iye akhadziwa kuti onsene nee mbadacita pinthu pibodzi pyene m’mabasa a anango na mu utumiki. Ngakhale tenepo, iye akhakomerwa thangwi yakuwangisira kukhacita m’bodzi na m’bodzi wa iwo. Yezu apangiza pyenepi pidalonga iye nsangani wa matalento. Mu nsangani unoyu, mbuya apasa basa anyabasace, m’bodzi na m’bodzi “mwakubverana na maluso awo.” Anyabasa awiri aphinga awina pinthu pyakusiyana. Mbwenye mbuya wawo aasimba na mafala mabodzi ene: “Wacita mwadidi, ndiwe nyabasa wadidi na wakukhulupirika!” (Mat. 25:14-23) Ndzidzi onsene Yezu asatitsalakana mwakukoma ntima na mwaufuni. Iye asadziwa kuti maluso athu na makhaliro athu ndi akusiyana, pontho iye asakomerwa tingawangisira toera kucita pinakwanisa ife. Ifembo tisafunika kutowezera Yezu. w21.07 tsa. 23-24 ¶12-14

Mambo Dhavidhi nee abvera anango ntsisi ndzidzi onsene. Mwacitsandzo, Nabhale akhali mamuna wakuipa kakamwe wakuti akhatikana Dhavidhi, pontho akhonda kumpasa cakudya pabodzi na anyankhondo ace. Pyenepi pyacitisa Dhavidhi kuipirwa kakamwe mbatonga kupha Nabhale pabodzi na amuna akhali na iye panyumba pace. Mbwenye nkazi wa Nabhale akhacemerwa Abhigaili, akhali wakukoma ntima na wakupirira, natenepa mwakucimbiza aenda kapasa cakudya Dhavidhi. Na thangwi ineyi, Dhavidhi nee aphabve Nabhale pabodzi na amuna akhali na iye panyumba pace. (1 Sam. 25:9-22, 32-35) Onani kuti thangwi yakuipirwa, Dhavidhi akhafuna kupha Nabhale pabodzi na amuna onsene akhali na iye panyumba pace. Pontho mukupita kwa ndzidzi Dhavidhi alonga kuti mamuna adalongwa mu nsangani wa Natani akhafunika kuphiwa thangwi ya pinthu pidacita iye. Mbwenye Dhavidhi akhali mamuna wakukoma ntima, mphapo thangwi yanji atonga kuti mamuna wakupfuma adaba bira ya ndzace akhafunika kuphiwa? Nyerezerani pinthu pikhadacitikira Dhavidhi. Pa ndzidzi unoyu, Dhavidhi nee akhali na cikumbuntima  cadidi. Munthu angatonga mwakuuma ntima asapangiza kuti ali kuduwala mwauzimu. w21.10 tsa. 12 ¶17-18; tsa. 13 ¶20

Kubulukira m’mafala a lemba ya ntsiku ya lero, ife tinapfundza kuti tinatowezera tani Yahova wakuti ndi citsandzo cadidi ca n’khaliro wakucena. Ife tisafunika kukhala akucena, pontho tisafunika kukhala akucena m’makhaliro athu. Kodi pyenepi ndi pyakukwanisika kuna ife anthu akusowa ungwiro? Mpostolo Pedhru acita madodo mazinji, mbwenye citsandzo cace cisapangiza kuti ife tinakwanisa ‘kukhala akucena.’ Anthu azinji anganyerezera pya kukhala wakucena, asanyerezera pya munthu wakuti nkhabe tsandzaya, asabvala nguwo za gereja, pontho ndzidzi onsene asakhala wakuipirwa. Mbwenye kukhala wakucena pyasiyana kakamwe na pyenepi. Yahova ndi wakucena, pontho Bhibhlya isalonga kuti ndi “Mulungu wakutsandzaya.” (1 Tim. 1:11) Ale anantumikira asalongwa kuti ndi ‘akutsandzaya.’ (Mas. 144:15) Yezu asandika ale akhabvala nguwo zakupambulika na ale akhacita pinthu pyadidi basi ene toera kuoniwa na anthu. (Mat. 6:1; Marko 12:38) Ninga Akristu, ife tisadziwa kuti pisabvekanji kukhala akucena kubulukira mu pinthu pidapfundza ife m’Bhibhlya thangwi ya Yahova. Ife tisadziwa kuti Mulungu asatifuna, pontho cipo iye mbadatipasa ntemo wakuti ife nee tinakwanisa kuubvera. w21.12 tsa. 2-3 ¶1, 3

Mulungu atipasa pinthu pizinji. Cibodzi mwa pinthu pyenepi ndi maluso ali na ife toera kumulambira. Ife tinapangiza kuti tisafuna Yahova ‘tingabvera matongero ace.’ (1 Juwau 5:3) Mabodzi mwa matongero anewa ndi ale adalonga Yezu akucita anyakupfundza na kuabatiza. (Mat. 28:19) Kusiyapo pyenepi, iye atipasambo ntemo wakufunana unango na ndzace. (Juwau 13:35) Yahova asatawirisa kuti ale onsene anambvera acite khundu ya alambiri ace pa dziko yonsene yapantsi. (Mas. 15:1, 2) Funani anango. Ufuni ndi n’khaliro wakufunika kakamwe kuna Yahova. (1 Juwau 4:8) Yahova apangiza ufuni kuna ife mbatidzati kundziwa. (1 Juwau 4:9, 10) Ife tinakwanisa kuntowezera tingafunambo anango. (Aef. 5:1) Njira ibodzi yakufunika kakamwe toera kupangiza ufuni kuna anthu ndi kuaphedza toera apfundze pya Yahova ndzidzi mbuciripo. (Mat. 9:36-38) Tingacita pyenepi, ife tinaaphedza toera akwanise kudziwa pinthu pisafunika iwo kucita kuti acite khundu ya atumiki a Mulungu. w21.08 tsa. 5-6 ¶13-14

Nakuti Yezu akhafuna kakamwe Yahova, iye aperekeka thangwi ya Babace na ife. (Juwau 14:​31) Pikhali iye pa dziko yapantsi, Yezu apangiza kuti akhafuna kakamwe anthu. Ntsiku zonsene iye akhapangiza ufuni na ntsisi, ngakhale kuna ale akuti akhantcinga. Thangwi ya ufuni, Yezu apfundzisa anthu pya Umambo wa Mulungu. (Luka 4:​43, 44) Kusiyapo pyenepi, Yezu akhafuna kakamwe Mulungu na anthu. Na thangwi ineyi, iye akhali dzololo toera kuthabuka na kuphiwa na anthu akudawa. Kucita kwace pyenepi kwatifungulira njira toera tonsene tikhale na umaso wakukhonda mala. Ife tisafuna kakamwe Babathu wakudzulu, Yahova. Na thangwi ineyi, taperekeka kuna iye mbatibatizwa. Ninga Yezu, ife tinapangiza kuti tisafuna Yahova tingatsalakana mwadidi anthu. Mpostolo Juwau alemba tenepa: “Ule anakhonda kufuna m’bale wace anaona iye, anacimwana kufuna Mulungu, wakuti iye nkhabe kumuona.”​—1 Juwau 4:20. w22.03 tsa. 10 ¶8-9

Ngakhale ife tisakomerwa kakamwe kucita phembero na kuleri Bhibhlya, m’midzidzi inango pyenepi pisanentsa toera kupicita. Ife tiri na pinthu pizinji toera kucita mu umaso wathu, na thangwi ineyi ndi pyakunentsa kugumana ndzidzi toera kulambira Yahova. Basa yathu, kutsalakana banja yathu na pinthu pinango pyakufunika pisaphemba ndzidzi uzinji, na thangwi ineyi pisanentsa kuna ife kugumana ndzidzi toera kucita phembero, kupfundza Bhibhlya na kunyerezera mwadidi pinapfundza ife. Pana cinthu cinango cakuti cinakwanisa kutikwatira ndzidzi wathu. Tingakhonda kucita mphole-mphole ife tinamala ndzidzi uzinji mbatikacita pinthu pyakuti nee ndi pyakuipa mbwenye pisatikwatira ndzidzi uzinji wakuti mbatidauphatisira toera kuwangisa uxamwali wathu na Yahova. Mwacitsandzo, ndi pyadidi kupambula ndzidzi toera kupuma na kucita ubalangazi. Ubalangazi unasankhula ife panango nee ndi wakuipa. Mbwenye tingamala ndzidzi uzinji kakamwe na ubalangazi unoyu, nee tinakhala na ndzidzi wakukwana toera kulambira Yahova. Ife tisafunika kukumbuka kuti ubalangazi nee ndi cinthu cakufunika kakamwe mu umaso wathu.​—Mis. 25:27; 1 Tim. 4:8. w22.01 tsa. 26 ¶2-3

Pidalonga Yahova kuna Aizraeli kuti iwo akhafunika kufuna andzawo, iye nee akhafuna kulonga kuti iwo akhafunika kufuna basi ene anthu a ntundu wawo peno Aizraeli andzawo. Iye aapangambo toera afune anthu a madziko anango akuti akakhala mu dziko yawo. Mphangwa zenezi zisagumanika pa Levitiko 19:33, 34. Yahova akhafuna kuti Aizraeli atsalakane munthu wakudza ninga ‘wa mu dziko yawo,’ pontho toera anfune ninga mukhafunana iwo. Mwacitsandzo, Aizraeli akhafunika kutawirisa anthu akudza na akutcerenga toera aphalakatire mphendzi m’maminda mwawo. (Lev. 19:9, 10) Ntemo ubodzi ene wakufuna anthu akudza usaphatambo basa kuna Akristu lero. (Luka 10:30-37) Munjira ipi? Pana anthu azinji akuti afuluka mbaenda kakhala m’madziko anango, pontho panango anango a iwo asakhala dhuzi na imwe. Natenepa ndi pyakufunika kakamwe kuna ife kutsalakana anthu anewa mwacilemedzo. w21.12 tsa. 12-13 ¶16

Tinganyindira kakamwe pitsogolero pya Yahova lero, tinakwanisa kukhala na cinyindiro cakuti iye anakwanisa kutipulumusa ntsogolo. Ife tisafunika kukhulupira na kunyindira Yahova toera tiphembe patrau wathu kuti atitawirise kugumanika pa nsonkhano wa cisa peno wa gawo, kuphemba toera kugumanika pa misonkhano ya mpingo na kumala ndzidzi uzinji mu utumiki. Nyerezerani kuti taphemba patrau wathu, mbwenye iye akhonda mbatibulusa basa. Kodi ife tisakhulupira kuti Yahova cipo anatisiya tekhene? (Aheb. 13:5) Azinji akuti ali m’basa ya ndzidzi onsene akwanisa kuona kuti Yahova aaphedza mu ndzidzi ukhafuna iwo kakamwe ciphedzo cace. Mwandimomwene Yahova ndi wakunyindirika. Nakuti Yahova ali na ife, nee tiri na mathangwi toera kugopa pinthu pinafuna kucitika ntsogolo. Mulungu wathu cipo anatiduwala tingaikha Umambo wace pa mbuto yakutoma mu umaso wathu. w22.01 tsa. 7 ¶16-17

Kunyindira kwathu akulu a mpingo kunakwanisa tani kuyeserwa? Nyerezerani kuti munthu adabuluswa mu mpingo ndi wacibale wathu peno xamwali wathu wa ponda ndipondembo. Panango tinadzudzumika khala akulu a mpingo asaka kudziwa undimomwene onsene peno tinabvundzika khala mwandimomwene akulu a mpingo atonga mwakubverana na pinafuna Yahova. Mphapo ninji cinafuna kutiphedza toera tikhale na maonero adidi thangwi ya cisankhulo cidacitwa? Tisafunika kukumbuka kuti kubulusa munthu adacita madawo mu mpingo ndi masasanyiro a Yahova. Pyenepi pinaphedza mpingo, pontho pinaphedzambo munthu adacita madawo. Munthu adacita madawo angapitiriza mu mpingo, anakwanisa kucitisa anango kudawambo. (Agal. 5:9) Kusiyapo pyenepi, iye nee anadzindikira kuti pinthu pidacita iye ndi pyakuipa kakamwe, pontho nee anaona mathangwi toera kucinja manyerezero ace na macitiro ace kuti akhale pontho wakutawirika pamaso pa Yahova. (Ekle. 8:11) Tisafunika kukhala na cinyindiro cakuti akulu a mpingo angacita cisankhulo cakubulusa munthu mu mpingo, iwo asadziwa kuti basa yawo ndi ikulu kakamwe. w22.02 tsa. 5-6 ¶13-14

Kupirira na kukoma ntima ndi kwakufunika makamaka khala munthu pakutoma nee atawira kuphatisira uphungu wa Bhibhlya. Nkulu wa mpingo nee asafunika kuipirwa khala m’bale peno mulongo anapasa iye uphungu nee akutawira kuuphatisira. Natenepa pakucita phembero paekha, nkulu wa mpingo anakwanisa kuphemba Yahova toera aphedze munthu anafuna kupaswa uphungu, kuti abvesese mathangwi a uphungu unapaswa iye na kuuphatisira. M’bale anapaswa uphungu, panango anafuna ndzidzi toera kunyerezera. Khala nkulu wa mpingo asalonga mwakupirira na mwakukoma ntima, pinakhala pyakukhonda nentsa toera m’bale peno mulongo aphatisire uphungu. Mwandimomwene, ndzidzi onsene uphungu usafunika kubuluswa m’Bhibhlya. Kumbukani kuti cifuno cathu nee ndi kupereka uphungu wakuphedza basi, mbwenye tisafunikambo ‘kutsandzayisa ntima.’​—Mis. 27:9. w22.02 tsa. 18 ¶17; tsa. 19 ¶19

Tingacita phembero kuna Yahova toera atipase mphambvu kuti tikwanise kupirira nyatwa peno toera tisiye kucita pinthu pyakuipa, panango tinaona ninga Yahova ali kudembuka kutawira maphembero athu. Thangwi yanji Yahova nee asatawira maphembero athu onsene mu ndzidzi ubodzi ene? Maphembero anacita ife na ntima onsene asapangiza kuna iye kuti ife tisan’khulupira. (Aheb. 11:6) Tingacita phembero kuna Yahova toera atiphedze kuti tinkomerese, iye asafuna kuti ife tiwangisire toera kucita cifuniro cace. (1 Juwau 3:22) Natenepa tingaphemba Yahova toera atiphedze kusiya kucita pinthu pyakuti nee asakomerwa napyo, tisafunika kudikhira mwakupirira mbatiwangisira toera kucita macinjo. Yezu atiphedza toera kubvesesa kuti anango mwa maphembero athu panango nee anatawirwa mu ndzidzi ubodzi ene. Iye alonga: “Pitirizani kuphemba, munadzapaswa; pitirizani kusaka, munadzagumana; pitirizani kugogodza nsuwo, munadzafungulirwa; thangwi munthu anaphemba, anapaswa; munthu anasaka, anagumana; pontho munthu anagogodza nsuwo, anafungulirwa.”​—Mat. 7:7, 8. w21.08 tsa. 8 ¶1; tsa. 10 ¶9-10

Toera muwangise cikhulupiro canu kuna Mulungu musafunika kupitiriza kupfundza Bhibhlya. (Yos. 1:8) Onesesani mwadidi undimomwene wa pinthu pidacitika kale pinalongwa mwenemu. Kusiyapo pyenepi, nyerezerani mwadidi maprofesiya a Bhibhlya na kukwanirisika kwawo, pontho nyerezeranimbo mwadidi kubverana kwa mphangwa za m’Bhibhlya zidalembwa na anthu akusiyana-siyana. Mungacita pyenepi, imwe munakhulupira mwakukwana kuti ife tacitwa na Yahova wakuti ndi Mulungu waufuni na waudziwisi. Pontho munakhulupira kuti Bhibhlya ndi mafala ace. (2 Tim. 3:14; 2 Ped. 1:21) Mungapfundza Bhibhlya imwe munakwanisa kuona kuti iyo iri na uphungu wakufunika kakamwe. Mwacitsandzo, kutomera kale Bhibhlya isacenjeza kuti kufuna kakamwe kobiri kusabweresa “nyatwa zizinji.” (1 Tim. 6:9, 10; Mis. 28:20; Mat. 6:24) Kodi pali na uphungu udaleri imwe m’Bhibhlya wakuti wakuphedzani? Tinganyerezera uphungu onsene wadidi unagumanika m’Bhibhlya, ife tinakwanisa kuona kuti Mulungu ndi waufuni, pontho iye asadziwa pinthu pyakufunika kuna ife. Natenepa, ndzidzi onsene tinakwanisa kunyindira uphungu wace. (Tiya. 1:5) Tingacita pyenepi ife tinakhala akutsandzaya kakamwe.​—Iza. 48:17, 18. w21.08 tsa. 17-18 ¶12-13

Khala imwe muli kukalamba, khalani na cinyindiro cakuti Yahova asakumbuka mabasa onsene adacita imwe nduli. Imwe mwamwaza mphangwa mwaphinga kakamwe. Imwe mwapirira nyatwa zizinji, kuphatanizambo nyatwa zakuti zakutsukwalisani kakamwe. Imwe musabvera na kutsidzikiza midida yakulungama ya Bhibhlya, pontho musaphedzera mwakukhulupirika mabasa anacitwa mu gulu ya Yahova. Imwe musacita pyonsene pinakwanisa imwe toera kudzolowera macinjo mazinji anacitika mu gulu ya Yahova. Imwe musaphedza anango toera apitirize m’basa ya ndzidzi onsene. Yahova asakufunani kakamwe thangwi yakukhulupirika kwanu. Iye apikira kuti “nkhabe kudzasiya anthu ace akukhulupirika.” (Mas. 37:28) Kusiyapo pyenepi, iye asakupasani cinyindiro ici: ‘Mpaka imwe mubuluke imbvi, ine ndinapitiriza kukutsalakanani.’ (Iza. 46:4) Natenepa, lekani kunyerezera kuti nakuti imwe mwakalamba, nee ndimwe wakufunika kakamwe mu gulu ya Yahova. Imwe ndimwe wakufunika kakamwe. w21.09 tsa. 3 ¶4

Yahova asabvera ntsisi thangwi iye ndi waudziwisi kakamwe. Bhibhlya isalonga kuti “udziwisi wakudzulu” ndi “wakudzala na ntsisi pabodzi na misapo yadidi.” (Tiya. 3:17) Ninga nyakubala waufuni, Yahova asadziwa kuti ntsisi zace zinaphedza atumiki ace. (Iza. 49:15) Nakuti Yahova asabvera ntsisi atumiki ace, iwo ali na cidikhiro cadidi ca ntsogolo maseze ndi akusowa ungwiro. Natenepa, nakuti Yahova ndi waudziwisi kakamwe, ndzidzi onsene iye asabvera ntsisi khala ndi pyakufunika toera kucita pyenepi. Mbwenye Yahova asadziwambo ndzidzi wakuti nee asafunika kubvera ntsisi. Nakuti iye ndi waudziwisi, iye nee asalekerera pinthu pyakuipa basi ene toera kubvera ntsisi. Nyerezerani kuti ntumiki wa Mulungu asankhula ekhene kucita madawo mu umaso wace. Kodi ife tisafunika kucitanji? Yahova apumira mpostolo Paulu toera kulemba kuti: ‘Lekani kucita uxamwali na munthu’ unoyu. (1 Akor. 5:11) Anthu anacita madawo mbakhonda  tcunyuka asabuluswa mu mpingo. Pyenepi ndi pyakufunika toera kutsidzikiza abale na alongo athu akukhulupirika, pontho toera kupangiza kuti tisaphedzera midida ya Yahova. w21.10 tsa. 9-10 ¶7-8

Tisalambira Yahova tingaphedzera basa ya Umambo na pyakupereka pyathu. Aizraeli nee akhafunika kuenda pa maphwando cimanja-manja. (Dheu. 16:16) Iwo akhafunika kupereka miyoni mwakubverana na pire pikhakwanisa iwo. Munjira ineyi, Aizraeli akhapangiza kuti akhapereka takhuta kuna Yahova thangwi ya pinthu pikhaacitira iye. Tinapangiza tani ufuni na kupereka takhuta kuna Yahova thangwi ya pinthu pyonsene pinaticitira iye? Njira ibodzi ndi kucita pyakupereka toera kuphedzera mpingo na basa yakumwaza mphangwa pa dziko yonsene yapantsi, mwakubverana na pinthu piri na ife. Mpostolo Paulu alonga tenepa: “Muoni ndi wakutawirika khala munthu asafuna kupereka. Thangwi munthu asafunika kupereka mwakubverana na piri na iye, tayu kupiringana piri na iye.” (2 Akor. 8:4, 12) Yahova asatsandzaya kakamwe na pyakupereka pyathu, maseze pikhale pyakucepa.​—Marko 12:42-44. w22.03 tsa. 24 ¶13

Akulu a mpingo nee anakwanisa kumalisa nyatwa zonsene zinathimbana na atumiki a Yahova. Ngakhale tenepo, Yahova asafuna kuti akulu a mpingo acite pyonsene pinakwanisa iwo toera kuwangisa na kutsidzikiza mabira ace. Nakuti akulu a mpingo anango ali na pizinji toera kucita, kodi iwo anakwanisa tani kugumana ndzidzi toera kuwangisa abale na alongo awo? Towezerani citsandzo ca mpostolo Paulu wakuti akhali dzololo toera kusimba na kuwangisa anango. Akulu a mpingo asafunikambo kutowezera citsandzo ca Paulu cakutsalakana atumiki a Yahova mwaufuni na mwakukoma ntima. (1 Ates. 2:7) Paulu apasa cinyindiro abale na alongo kuti iye akhaafuna, pontho Yahova akhaafunambo. (2 Akor. 2:4; Aef. 2:4, 5) Paulu akhaona anthu mu mpingo ninga axamwali, pontho akhamala ndzidzi uzinji mbakacedza nawo. Iye apangiza kuti akhaanyindira mukuapanga madodo ace na pinthu pikhandzudzumisa. (2 Akor. 7:5; 1 Tim. 1:15) Mbwenye Paulu nee akhanyerezera nyatwa zace basi. M’mbuto mwace, iye akhafuna kuphedza Akristu andzace. w22.03 tsa. 28 ¶9-10