Pinthu pyonsene pinakhulupira ife na pinapfundzisa ife pisabulukira m’Bhibhlya. Ngakhale tenepo, anthu azinji lero nee asatawira mphangwa zathu thangwi ife nee tisacita maserimonya akupambulika. Kusiyapo pyenepi, iwo nee asakomerwa na kubva pinthu pinapfundzisa ife. Ninji cinafuna kutiphedza toera tikhonde kuluza cikhulupiro cathu? Mpostolo Paulu apanga Akristu a ku Roma kuti: “Munthu asakhala na cikhulupiro thangwi ya pidabva iye. Pontho iye asabva mphangwa zenezi munthu angalonga thangwi ya Kristu.” (Aroma 10:17) Natenepa ife tisawangisa cikhulupiro cathu mukupfundza Bhibhlya, tayu thangwi yakugumanika m’maserimonya auphemberi, ngakhale asaoneka ninga akutsandzayisa. Ife tisafunika kukhala na cidziwiso candimomwene toera tikhale na cikhulupiro cakuwanga thangwi ‘tingasowa cikhulupiro nee tinakwanisa kukomeresa Mulungu.’ (Aheb. 11:1, 6) Natenepa, ife nee tisafunika kuona cidzindikiro cakudzulu toera tikhale na cinyindiro cakuti tagumana undimomwene. Kupfundza mwacidikhodikho pipfundziso pya Bhibhlya pinakwanisa kutiphedza toera tikhonde kupenula. w21.05 tsa. 5-6 ¶11-12

Mpostolo Paulu athimbana na nyatwa zizinji kakamwe. Iye akhafuna kakamwe ciphedzo ca Yahova mu ndzidzi ukhamenywa iye, ukhaikhwa iye nkaidi ngakhale mu ndzidzi ukhafuna iye kuphiwa. (2 Akor. 11:23-25) Pontho iye alonga pakweca kuti midzidzi inango akhathimbanambo na mabvero akuipa. (Aroma 7:18, 19, 24) Kusiyapo pyenepi, iye apirira nyatwa inango yakuti ikhali ninga “munga m’manungo” mwace, pontho iye akhafuna kakamwe kuti Mulungu abuluse munga unoyu. (2 Akor. 12:7, 8) Yahova apasa mphambvu Paulu toera apitirize kucita utumiki wace mwakukhonda tsalakana nyatwa zikhathimbana na iye. Onani pinthu pingasi pidacita iye. Mwacitsandzo, mu ndzidzi ukhali iye nkaidi ku Roma, iye amwazira mphangwa atsogoleri Aciyuda, pontho pisaoneka kuti iye amwazirambo mphangwa akulu a mautongi. (Mabasa 28:17; Afil. 4:21, 22) Kusiyapo pyenepi, iye amwazirambo mphangwa Anyakuonera azinji a Mambo na ale onsene akhabwera kudzamuona. (Mabasa 28:30, 31; Afil. 1:13) Mu ndzidzi unoyu, Yahova aphatisira Paulu toera kulemba matsamba akuti akhaphedza Akristu a mu ndzidzi unoyu, pontho matsamba anewa asaphedzambo Akristu andimomwene lero. w21.05 tsa. 21 ¶4-5

Thangwi yakudzikuza, Mambo Uziya wa ku Yuda akhonda kubvera uphungu udapaswa iye na anango mbacita pinthu pyakuti nee atawiriswa. Mambo Uziya acita pinthu pizinji pyadidi. Mwacitsandzo, iye awina nkhondo zizinji, amanga mizinda mizinji, pontho akhali na minda mizinji. Pyenepi pisapangiza kuti ‘Mulungu wandimomwene amphedza toera pinthu pinfambire mwadidi.’ (2 Kro. 26:3-7, 10) Mbwenye Bhibhlya isalonga kuti: ‘Pidakhala iye wamphambvu, adzakhala wakudzikuza kakamwe, kwakuti kwam’phekesa.’ Yahova akhadalonga kale kuti basi ene anyantsembe ndiwo akhafunika kupereka insenso mu templo. Mbwenye mwakudzikuza Mambo Uziya aenda mu templo toera kupereka ntsembe. Na thangwi ineyi, Yahova aipirwa kakamwe mbacitisa mamuna unoyu wakudzikuza kukhala na matanya. (2 Kro. 26:16-21) Kodi pinakwanisika kuna ife kukhala akudzikuza mbaticita madawo ninga adacita Uziya? Inde, pyenepi pinacitika, tinganyerezera kakamwe pinafuna ife basi. Natenepa tisafunika kukumbuka kuti maluso onsene ali na ife na miyai yonsene yakutumikira iri na ife mu mpingo tapaswa na Yahova. (1 Akor. 4:7) Tingakhala akudzikuza, Yahova nee anatiphatisira. w21.06 tsa. 16 ¶7-8

Yezu akhadziwa kuti anyakupfundzace nee anakhala na pyakugumanikana napyo pyadidi ndzidzi onsene m’basa yawo yakumwaza mphangwa. Mwandimomwene, ife nkhabe kupidziwa kuti ndi angasi akuti adzakhaladi Akristu mwa ale adabva mphangwa zidamwaza anyakupfundza. Anyakupfundza akhafunika kutsandzaya tayu basi ene thangwi anthu aabvesera, mbwenye akhafunika kutsandzaya kakamwe thangwi yakudziwa kuti Yahova akhakomerwa thangwi yakuwangisira kukhacita iwo. Tingapirira mu utumiki wathu, tinadzatambira umaso wakukhonda mala. Ife tingacita pyonsene pinakwanisa ife toera kumwaza mphangwa zadidi na kupfundzisa, ‘tisabzwala mukutsogolerwa na nzimu wakucena.’ Tingacita pyenepi tisatawirisa nzimu wa Mulungu toera uphate basa mu umaso wathu. Tingakhonda “kubwerera nduli” peno “kuneta,” Yahova asatipasa cinyindiro cakuti tinadzatambira umaso wakukhonda mala, maseze khala ife nee takwanisa kuphedza munthu mpaka kubatizwa.​—Agal. 6:7-9. w21.10 tsa. 26 ¶8-9

Ndzidzi unango, Yezu na anyakupfundzace akhadaneta kakamwe thangwi yakumwaza mphangwa mwaphinga. Mbwenye pikhaenda iwo kasaka mbuto toera kupuma, anthu azinji aatowera. Natenepa Yezu aabvera ntsisi mbatoma kuapfundzisa “pinthu pizinji.” Yezu akhadziwa nyatwa zikhathimbana na iwo, natenepa iye akhafuna kuaphedza. Lero, anthu asathimbanambo na nyatwa zibodzi zene maseze asaoneka ninga ali na umaso wadidi peno akutsandzaya. Iwo ali ninga mabira akutayika, akuti nee ali na nkumbizi toera kuatsogolera. Mpostolo Paulu alonga kuti anthu anewa ali kutali na Mulungu, pontho nee ali na cidikhiro. (Aef. 2:12) Tingaona makhaliro a anthu a ncisa cathu, ufuni na ntsisi pisatikulumiza toera kuaphedza kuti adziwe Mulungu. Natenepa njira yadidi yakuaphedza ndi kuapfundzisa Bhibhlya. w21.07 tsa. 5 ¶8

Munthu wakudzikuza asanyerezera basi ene pinafuna iye. Munthu wabibvu nee asafuna basi ene pinthu pya anango, mbwenye asafunambo kuapingiza toera akhonde kukhala na pinthu pyenepi. Kusiyapo pyenepi, munthu anacitira bibvu ndzace asamuida. Kudzikuza na bibvu ndi ninga xuju inagwera m’mafuta a ndeka. Xuju ineyi inakwanisa kupingiza mafuta toera akhonde kupita m’motore, pontho pyenepi pinacitisa ndeka kugwa. Munjira ibodzi ene, munthu anakwanisa kutumikira Yahova mu ndzidzi uzinji, mbwenye angakhala wakudzikuza na wabibvu anagwa. (Mis. 16:18) Iye anasiya kutumikira Yahova mbatsukwalisa anango. Ife tinakwanisa kucalira kudzikuza tingaphatisira uphungu udapereka mpostolo Paulu: “Lekani kucita pinthu mwamapika peno mwakudzikuza, mbwenye citani pinthu mwakucepeseka, mbamuona andzanu kukhala akulu kupiringana imwe.”​—Afil. 2:3. w21.07 tsa. 15-16 ¶6-8

Anango asanyerezera kuti uphemberi wandimomwene usafunika kutawira mibvundzo yonsene, ngakhale mibvundzo yakuti matawiro ace nee asagumanika m’Bhibhlya. Kodi pyenepi ndi pyakukwanisika? Onani citsandzo ca mpostolo Paulu. Iye apanga Akristu andzace toera ‘adinge pinthu pyonsene,’ mbwenye iye alongambo kuti pakhali na pinthu pizinji pyakuti nee akhapibvesesa. (1 Ates.  5:21) Iye alonga kuti: “Cidziwiso cathu si cakukwana tayu, tisaona na supeyu ya utale yakuti nkhabe kupangiza mwadidi pinthu.” (1 Akor. 13:9, 12) Paulu nee akhabvesesa pinthu pyonsene, pontho ife nee tisabvesesambo pinthu pyonsene. Mbwenye Paulu akhabvesesa undimomwene unalonga pya cifuno ca Yahova. Iye akhadziwa pinthu pikhampasa cinyindiro cakuti ali na undimomwene. Njira ibodzi yakuti inatiphedza toera kukhala na cinyindiro cakuti tiri mu undimomwene ndi kulandanisa pinthu pikhacita Yezu na pinacita Mboni za Yahova lero. w21.10 tsa. 18-19 ¶2-4

Abale na alongo akukalamba, mwakukhonda tsalakana khala muli m’basa ya ndzidzi onsene peno nkhabe, imwe munakwanisa kucita pizinji toera kuphedza anango. Mphapo munacita tani pyenepi? Komerwani na makhaliro anu mapswa, khazikisani pifuno pipswa, pontho ikhani manyerezero anu ku pinthu pinakwanisa imwe kucita, tayu ku pinthu pinacimwana imwe kucita. Mambo Dhavidhi akhafuna kakamwe kumanga nyumba ya Yahova. Mbwenye pidapangwa iye na Yahova kuti anafuna kumanga nyumba ineyi ndi Salomoni, Dhavidhi atawira cisankhulo ca Yahova, pontho aphedzera na ntima onsene basa yakumanga. (1 Kro. 17:4; 22:5) Dhavidhi nee anyerezera kuti akhali wakuthema kakamwe toera kumanga nyumba ya Yahova thangwi mwanace ndi ‘wakusowa maluso.’ (1 Kro. 29:1) Dhavidhi akhadziwa kuti toera basa ineyi yakumanga ifambe mwadidi pikhanyindira nkhombo za Yahova, tayu thunga peno maluso a anthu akhafuna kuimanga. Ninga Dhavidhi, abale akukalamba lero asapitiriza kukhala aphinga mwakukhonda tsalakana mabasa anacita iwo. Pontho iwo asadziwa kuti Yahova anapasa nkhombo aphale akuti asacita mabasa akhacita iwo kale. w21.09 tsa. 9 ¶4; tsa. 9-10 ¶5, 8

Tingakhazikisa pifuno m’basa yathu yakutumikira Yahova, tisakhala akutsandzaya, pontho umaso wathu usakhala na cifuniro. Mbwenye cinthu cakufunika kakamwe ndi kukhazikisa pifuno mwakubverana na maluso athu, pontho na makhaliro athu, tayu mwakubverana na maluso a anango peno makhaliro awo. Thangwi tingacita pyenepi, ife tinafewa manungo mbatitsukwala. (Luka 14:28) Nakuti ndimwe ntumiki wa Yahova, imwe ndimwe wakufunika mu mpingo wace, pontho iye nkhabe kukulandanisani na anango. Yahova nee akuphedzani toera mundziwe thangwi imwe mukhali munthu wadidi kupiringana anango. Iye akuphedzani toera mundziwe thangwi aona muntima mwanu kuti ndimwe munthu wakucepeseka, pontho mbamudatawira kupfundziswa na iye mbamucinja makhaliro anu. Khalani na cinyindiro cakuti iye asakomerwa na imwe mungacita pyonsene pinakwanisa imwe toera kuntumikira. Kupirira kwanu na kukhulupirika kwanu pisapangiza kuti imwe muli na “ntima wadidi kakamwe.” (Luka 8:15) Natenepa, pitirizani kucita pyonsene pinakwanisa imwe toera kutumikira Yahova. Mungacita pyenepi, imwe munadzakhala na mathangwi adidi toera kutsandzaya ‘na pinthu pinacita imwe.’​—Agal. 6:4. w21.07 tsa. 24 ¶15; tsa. 25 ¶20

Kazinji kene tisafunika kudikhira mwakupirira tingatsalakanwa mwakusowa ulungami. Akulu a mpingo angadziwa kuti m’bale peno mulongo acita madawo makulu, iwo asacita phembero toera kusaka “udziwisi wakudzulu” kuti akwanise kutsalakana nkhani ineyi mwakubverana na maonero a Yahova. (Tiya. 3:17) Cifuno cawo ndi kuphedza m’bale peno mulongo unoyu toera pingakwanisika “asiye njira yace yakuipa.” (Tiya. 5:19, 20) Pontho iwo asacita pyonsene pinakwanisa iwo toera kutsidzikiza mpingo na kubalangaza ale adatsukwaliswa. (2 Akor. 1:3, 4) Pontho akulu a mpingo angadziwa kuti m’bale peno mulongo acita madawo makulu, iwo asafunika kudziwa unyomonyomo onsene wa pinthu pidacitika. Natenepa pyenepi pisakwata ndzidzi. Buluka penepo iwo asacita phembero na kupereka uphungu mukuphatisira Bhibhlya mbasandika “tayu mwakupiringana midida.” (Yer. 30:11) Akulu a mpingo nee asacita pyenepi mwamangungu. Akulu a mpingo angatowezera pitsogolero pya Yahova pa kutsalakana madawo, abale na alongo mu mpingo asaphindula kakamwe. w21.08 tsa. 11-12 ¶12-13

Thangwi ya njala idaoneka mu Izraeli, Naomi, mamunace na anace awiri afuluka mbaenda ku Moabhe. Pikhali iwo kweneko, mamunace Naomi afa. Anace awiri amanga banja, mbwenye mwakutsukwalisa iwo afambo. (Rute 1:3-5) Nyatwa zenezi zacitisa Naomi kukhala wakutsukwala kakamwe. Iye atsukwala kakamwe mpaka kunyerezera kuti Yahova akhadaipirwa na iye. Onani pidalonga iye toera kupangiza mabvero akhali na iye thangwi ya Mulungu: “Djanja ya Yahova yandithabusa.” “Mulungu andicitisa kukhala wakutsukwala kakamwe.” Iye athimiza: “Yahova Mulungu Wamphambvu Zonsene andizungunukira mbandionesa nyatwa.” (Rute 1:13, 20, 21) Yahova asabvesesa kuti “kupondererwa kusacitisa munthu waudziwisi kukhala dzemwa.” (Ekle. 7:7) Mulungu akulumiza Rute toera kuenda kaphedza Naomi na kumpangiza ufuni wakukhonda mala. Rute apangiza ufuni kuna Naomi, pontho am’phedza munjira yadidi toera kuona kuti Yahova akhapitiriza kunfuna. w21.11 tsa. 9-10 ¶9; tsa. 10-11 ¶10, 13

Kodi kuikha manyerezero athu m’basa inacita ife cincino pisabveka kuti nee tisafunikabve kusaka miyai inango toera kuthimizira utumiki wathu? Nkhabe. Ife tisafunika kukhazikisa pifuno pyakuti pinatiphedza toera kukhala amwazi mphangwa na apfundzisi adidi, pontho toera kuphedza kakamwe abale na alongo athu. Ife tinakwanirisa pifuno pyenepi khala tisapifuna toera kuphedza anango, tayu toera kuphindulisa ife. (Mis. 11:2; Mabasa 20:35) Ndi pifuno pipi pyakuti imwe munakwanisa kupikhazikisa? Phembani Yahova toera akuphedzeni kudziwa pifuno pyakuti imwe munakwanisa kupikhazikisa na kupikwanirisa. (Mis. 16:3) Kodi imwe musayesera kukhazikisa cifuno cakutumikira ninga mpainiya wakuphedza peno mpainiya wa ndzidzi onsene, kutumikira ku Bheteli, peno kuphedzera mabasa akumanga Nyumba za Umambo, Nyumba za Misonkhano na nyumba zakuthumburuzira mabukhu athu? Panango imwe munakwanisa kukhazikisa cifuno cakupfundza cilongero cinango toera mukwanise kumwaza mphangwa kuna anthu a m’mbuto zinango. w21.08 tsa. 23-24 ¶14-15

Yahova asakomerwa kakamwe na ufuni wakukhonda mala. (Oze. 6:6) Kubulukira mwa mprofeta Mikeya, Mulungu wathu asatikulumiza toera kufuna ufuni wakukhonda mala. (Mik. 6:8) Mbwenye mbatidzati kucita pyenepi, ife tisafunika kudziwa kuti ufuni wakukhonda mala ninji. Kodi ufuni wakukhonda mala ninji? Munthu anapangiza ufuni wakukhonda mala asafuna kakamwe ndzace mbapitiriza kunfuna, pontho asakhala wakukhulupirika kuna iye. Yahova ndi citsandzo cadidi kakamwe ca ufuni wakukhonda mala. Ndi thangwi yace Mambo Dhavidhi alonga: “Yahova, ufuni wanu wakukhonda mala wafika mpaka kudzulu. Mulungu, ufuni wanu wakukhonda mala ndi wakufunika kakamwe.” (Mas. 36:5, 7) Ninga Dhavidhi, kodi ife tisapereka takhuta thangwi ya ufuni unoyu wakukhonda mala wa Mulungu? w21.11 tsa. 2 ¶1-2; tsa. 3 ¶4

Atumiki a Yahova asaphataniza Yezu wakuti ndi “mwana wautombo” na mwinji wa aanju. (Akol. 1:15; Mas. 103:20) Pikhali Yezu pa dziko yapantsi, iye aphedza anthu kubvesesa kuti iwo anakwanisa kucemera Yahova ninga Babawo. Pikhacedza iye na anyakupfundzace, iye acemera Yahova ninga “Babanga, wakuti ndi Babanumbo.” (Juwau 20:17) Ife tingaperekeka kuna Yahova mbatibatizwa, tisacita khundu ya abale na alongo akuti asafunana unango na ndzace. (Marko 10:29, 30) Yahova ndi Baba waufuni. Yezu asafuna kuti tione Yahova ninga munamuonera iye. Yezu asaona Yahova ninga Baba waufuni, wakuti tinakwanisa kulonga naye ndzidzi onsene, tayu ninga munthu wakuuma ntima wakuti asatipanga toera kucita basi ene pinthu pinafuna iye. Iye apanga anyakupfundzace toera atome kulonga tenepa pakucita phembero: “Babathu.” Yezu mbadakwanisa kutipanga toera ticemere Yahova “Wamphambvu Zonsene,” “Ule Adacita pinthu pyonsene,” peno “Mambo wakwenda na kwenda.” Pyenepi nee ndi pyakudawika, thangwi Bhibhlya isaphatisira mafala anewa toera kucemera Yahova. (Gen. 49:25; Iza. 40:28; 1 Tim. 1:17) Mbwenye Yezu atipanga kuti ticemere Yahova “Babathu.” w21.09 tsa. 20-21 ¶1, 3

Mambo Manase nee abvera uphungu ukhampasa Yahova mukuphatisira aprofeta Ace. Natenepa, ‘Yahova abweresa ku Yuda atsogoleri a mambo wa ku Asirya, iwo aphata Manase wakuti akhadabisala mu djenje, am’manga na maunyolo mawiri a nkuwa mbaenda naye ku Bhabhilonya.’ Mu ndzidzi ukhali Manase nkaidi ku Bhabhilonya, pisaoneka kuti iye anyerezera mwadidi pinthu pikhadacita iye. Thangwi Bhibhlya isalonga kuti iye “acepeseka na ntima onsene pamaso pa Mulungu wa ambuyace.” Kusiyapo pyenepi, “iye adembetera Yahova Mulungu wace toera ambvere ntsisi.” Mwandimomwene, Manase “apitiriza kuphembera kuna Mulungu.” (2 Kro. 33:10-12) Mukupita kwa ndzidzi, Yahova atawira maphembero a Manase. Iye aona kuti Manase akhadacinja thangwi ya pinthu pikhalonga iye m’maphembero ace. Natenepa Yahova alekerera Manase mbantawirisa toera akhale pontho mambo. Manase acita pyonsene toera kupangiza kuti iye atcunyuka na ntima onsene. w21.10 tsa. 4 ¶10-11

Akila na Prisila afuluka mu nzinda wawo, pontho akhafunika kugumana nyumba ipswa na kutoma pontho basa yawo yakucita matenti. Kunyumba yawo ipswa ya ku Korinto, Akila na Prisila atoma kuphedzera mpingo ukhasonkhana iwo mbaphata basa pabodzi na mpostolo Paulu toera kuwangisa abale a kweneko. Mukupita kwa ndzidzi, iwo afuluka mbaenda ku mizinda inango yakuti ikhafunika kakamwe kumwazwa mphangwa. (Mabasa 18:18-21; Aroma 16:3-5) Iwo akhali na mabasa mazinji toera kucita, pontho akhali akutsandzaya. Anyakumanga banja lero anakwanisa kutowezera citsandzo ca Prisila na Akila mukuikha Umambo wa Mulungu pa mbuto yakutoma. Ndzidzi wadidi wakuti anyakumanga banja anakwanisa kulonga pifuno pyawo pyauzimu ndi ndzidzi unabanyirana iwo. Anyakumanga banja angacita pisankhulo pabodzi mbawangisira toera kukwanirisa pifuno pyawo pyauzimu, iwo anakwanisa kuona ciphedzo ca Yahova munjira zakusiyana-siyana mu umaso wawo.​—Ekle. 4:12. w21.11 tsa. 17-18 ¶11-12

Mwandimomwene, ndi pyakufunika kakamwe kubvera uphungu wa Mulungu toera kulemedza anyakubala athu. Kumbukani kuti uphungu unagumanika pa Levitiko 19:3​—wakulemedza anyakubala walongwa pakumala kulonga mafala akuti: “Musafunika kukhala akucena, thangwi ine Yahova Mulungu wanu, ndine wakucena.” (Lev. 19:2) Mwakubverana na uphungu wa Yahova unalonga pyakulemedza anyakubala athu, m’bodzi na m’bodzi wa ife asafunika kubvundzika: ‘Kodi ine ndisalemedza anyakubala anga?’ Mungaona kuti pana khundu inafunika imwe kusasanyira, citani pyenepi mwakucimbiza. Pidacitika nduli imwe nee munakwanisa kupicinja, mbwenye cincino munakwanisa kuwangisira toera kuaphedza na kusaka ndzidzi toera kukhala nawo pabodzi. Pontho imwe munakwanisa kuaphedza toera kugula pinthu pinafuna iwo, kuaphedza toera akhale na uxamwali wakuwanga na Yahova mbapitiriza kuntumikira. Kusiyapo pyenepi, imwe munakwanisa kuawangisa na kuabalangaza. Mungacita pyenepi, imwe munapangiza kuti mukubvera uphungu unagumanika pa Levitiko 19:3. w21.12 tsa. 4-5 ¶10-12

Mambo Dhavidhi akhadacita madawo makulu kakamwe. Mwacitsandzo, iye acita upombo na Bhatisebha, pontho iye acitisa kuti mamunace aphiwe. (2 Sam. 11:2-4, 14, 15, 24) Pyenepi pyabweresa nyatwa, tayu basi kuna Dhavidhi, mbwenye kuna banja yace kuphatanizambo akazace anango. (2 Sam. 12:10, 11) Ntsiku inango Dhavidhi apangiza kuti nee akhanyindira kakamwe Yahova pidalengesa iye nsoka wa anyankhondo mu Izraeli, pinthu pyakuti nee apangwa na Yahova toera kupicita. Ninji pidacitika? Aizraeli cifupi na 70.000 afa na utenda! (2 Sam. 24:1-4, 10-15) Kodi imwe mbamudanyerezera kuti Yahova nee akhafunika kumulekerera? Mbwenye Yahova nee anyerezera tenepo. Iye anyerezera kukhulupirika kudacita Dhavidhi mu umaso wace na kutcunyuka kwace. Na thangwi ineyi, Yahova alekerera madawo makulu a Dhavidhi. Yahova akhadziwa kuti Dhavidhi akhanfuna kakamwe, pontho akhafuna kucita pinthu pyadidi. Ife tisapereka takhuta kakamwe kuna Yahova thangwi iye asaona pinthu pyadidi pinacita ife.​—1 Ama. 9:4; 1 Kro. 29:10, 17. w21.12 tsa. 19 ¶11-13

Yezu abvera ntsisi anthu akulamala. Kumbukani mphangwa zidatumiza iye kuna Juwau M’batizi mbati: ‘Cincino maboliboli ali kuona, anyakulamala miyendo ali kufamba, anyamatanya akuwangiswa, madhrodhro ali kubva, pontho anthu akufa ali kulamuswa.’ Anthu onsene pidaona iwo pirengo pya Yezu, iwo “asimba Mulungu.” (Luka 7:20-22) Akristu asatowezera citsandzo ca Yezu, pontho asabvera ntsisi anthu akulamala. Na thangwi ineyi ife tisapangiza kukoma ntima, citsalakano na kupirira kuna anthu anewa akulamala. Ndimomwene kuti Yahova nee atipasa mphambvu toera kucita pirengo ninga pikhacita Yezu. Mbwenye ife tiri na mwai wakupanga anthu anango kuphatanizambo ale akuti ndi maboliboli mwauzimu mphangwa zadidi zinalonga pya dziko ipswa yakuti anthu onsene anadzakhala aungwiro, pontho anadzakhala na uxamwali wakuwanga na Mulungu. (Luka 4:18) Mphangwa zenezi zadidi ziri kuphedza anthu azinji toera kupasa mbiri Mulungu. w21.12 tsa. 9 ¶5

Tiyago akhaphatisira Malemba toera kupfundzisa. Iye aphatisira Mafala a Mulungu toera kuphedza anthu kubvesesa kuti Yahova, ndzidzi onsene asaphedza ale akuti ndi akukhulupirika ninga Yobe. Tiyago akhaphatisira mafala akukhonda nentsa, pontho akhafokotoza pinthu munjira yakukhonda nentsa kubvesesa. Natenepa, iye nee akhapasika mbiri, mbwenye akhapasa mbiri Yahova. Tisapfundzanji: Pfundzisani munjira yakukhonda nentsa, pontho phatisirani Bhibhlya. Pakupfundzisa anthu, nee tisafunika kuyesera kuapangiza kuti tisadziwa pinthu pizinji kakamwe, mbwenye tisafunika kuapangiza kuti ndi Yahova anadziwa pinthu pizinji kakamwe, pontho kuti asaatsalakana. (Aroma 11:33) Tinakwanisa kucita pyenepi tingaphatisira Bhibhlya ndzidzi onsene unamwaza ife mphangwa. Mwacitsandzo, m’mbuto mwakupanga anyakupfundza Bhibhlya kuti ife mbatidacitanji, tisafunika kuapanga pitsandzo pya m’Bhibhlya pyakuti pinaaphedza kubvesesa manyerezero na mabvero a Yahova. Buluka penepo, iwo anaphatisira pidapfundza iwo toera kukomeresa Yahova tayu toera kukomeresa ife. w22.01 tsa. 11 ¶9-10

Mulungu asafuna kuti ticite pinthu pizinji kupiringana basi ene kukhonda kucitira anango pinthu pyakuipa. Kufuna kakamwe ndzathu ninga ife ene mphyakufunika kakamwe kuna Akristu toera kukomeresa Mulungu. Yezu apangiza kuti ntemo unagumanika pa Levitiko 19:18 ndi wakufunika kakamwe. Ntsiku inango Nfarisi abvundza Yezu kuti: “Ndi api matongero makulu kakamwe a Mwambo?” Yezu antawira kuti “matongero makulu kakamwe na akutoma” ndi kufuna Yahova na ntima wathu onsene, umaso wathu onsene na ndzeru zathu zonsene. Buluka penepo Yezu alonga mafala anagumanika pa Levitiko 19:18 akuti: “Aciwiri akulandana na anewa ndi awa: ‘Funa ndzako ninga iwe ene.’” (Mat. 22:35-40) Pana njira zizinji zakuti tinakwanisa kupangiza ufuni kuna anango. Njira ibodzi ndi kuphatisira uphungu unagumanika pa Levitiko 19:18. Lemba ineyi isalonga: “Leka kubwezera pyakuipa, pontho leka kukoya kuipirwa muntima.” w21.12 tsa. 10-11 ¶11-13

Yezu afuthula nkono wace mbampulumusa. Onani kuti mpostolo Pedhru afamba padzulu pa madzi mu ndzidzi ukhapitiriza iye kuyang’ana Yezu. Mbwenye Pedhru pidayang’ana iye condzi, iye agopa mbapenula, buluka penepo atoma kulirima. (Mat. 14:24-31) Ife tinakwanisa kupfundza kubulukira mu citsandzo ca Pedhru. Pidabuluka Pedhru m’mwadiya mbaenda m’madzi, nee akhadikhira kuti mbadadzudzumika mbatoma kulirima. Iye akhafuna kufamba padzulu pa madzi mpaka kufika kuna Yezu. Mbwenye iye acimwana kupitiriza kuyang’ana Yezu mbadzudzumika na condzi. Ninga Pedhru wakuti akhafunika kukhala na cikhulupiro toera afambe padzulu pa madzi, lero ife tisafunikambo kukhala na cikhulupiro toera tikwanise kupirira nyatwa. Tingakhonda kupitiriza kunyindira Yahova na mapikiro ace, cikhulupiro cathu cinafewa mbatikhala ninga tikulirima thangwi ya nyatwa zathu. Maseze tithimbane na nyatwa zizinji, tisafunika kupitiriza kukumbuka kuti Yahova anatiphedza. w21.12 tsa. 17-18 ¶6-7

Phembero, kupfundza Bhibhlya na kunyerezera mwadidi pinapfundza ife kusacita khundu ya ulambiri wathu. Tingacita phembero ife tiri kulonga na Babathu wakudzulu, wakuti asatifuna kakamwe. Tingapfundza Bhibhlya, ife tiri kupfundza kubulukira kwa Mulungu, wakuti ndi waudziwisi kakamwe kupiringana anthu onsene. (Mis. 2:1-5) Tinganyerezera mwadidi pinapfundza ife thangwi ya Yahova, ife tisanyerezera thangwi ya makhaliro ace adidi kakamwe, pontho tisakumbuka pinthu pyadidi pinafuna kuticitira iye. Ineyi ndi njira yadidi kakamwe yakuphatisira ndzidzi wathu. Mphapo ninji cinafuna kutiphedza toera kucita pyenepi? Pingakwanisika, sankhulani mbuto yakusowa dzumbi. Onani pidacita Yezu. Mbadzati kutoma utumiki wace pa dziko yapantsi, Yezu amala ntsiku 40 n’thando. (Luka 4:1, 2) Pa mbuto ineyi yakusowa dzumbi, Yezu mbadakwanisa kucita phembero kuna Yahova na kunyerezera mwadidi cifuniro ca Babace kuna iye. Mwakukhonda penula, pyenepi pyaphedza Yezu toera kuthimbana na mayesero akhafuna kugumanikana na iye ntsogolo. w22.01 tsa. 27-28 ¶7-8

Nkulu wa mpingo peno m’bale unango wakuti ali na uxamwali wakuwanga na Yahova panango anatipanga cinthu cakuti tisafunika kucisasanyira. Khala munthu asatifuna mpaka kutipasa uphungu wakubuluka m’Bhibhlya, tisafunika kuwangisira toera kuuphatisira. Mwandimomwene, panango pinakhala pyakunentsa kubvera na kuphatisira uphungu unapaswa ife. Pontho pyenepi panango pinatitsukwalisa. Thangwi yanji? Thangwi ngakhale tisadziwa kuti ndife akusowa ungwiro, panango pinakhala pyakunentsa kutawira uphungu munthu angatipanga kuti tacita madodo. (Ekle. 7:9) Panango tinasaka mathangwi toera tikhonde kutawira uphungu. Peno tinasaka kudziwa mathangwi adancitisa kutipasa uphungu peno kutsukwala thangwi ya njira idatipasa iye. Panango tinayesera kusaka madodo a munthu adatipasa uphungu mbatilonga: ‘Iye nee akhafunika kundipasa uphungu. Iye asacitambo madodo.’ Pontho khala nee takomerwa na uphungu udapaswa ife panango tinaukhonda peno tinasaka munthu unango thangwi tisadikhira kuti anatipasa uphungu unafuna ife kubvesera. w22.02 tsa. 8-9 ¶2-4

Kodi mu dziko ipswa munagumanika pinthu pyakuti pinadzayesera kunyindira kwathu Yahova? Onani pidacitika pidamala Aizraeli kubuluswa ku ubitcu mu Ejitu. Anango atoma kudungunya thangwi yakutsuwa cakudya cadidi cikhali na iwo ku Ejitu, pontho akhapwaza cakudya cikhaapasa Yahova cikhacemerwa mana. (Num. 11:4-6; 21:5) Kodi ife tinakhalambo na manyerezero mabodzi ene nyatwa ikulu ingamala? Ife nee tisadziwa basa yonsene inafunika ife kucita toera kucenesa dziko yapantsi, pontho nee tisadziwa kuti tinamala ndzidzi ungasi toera kucitisa dziko yapantsi kuti ikhale paraizu. Tisadziwa kuti tinadzakhala na basa izinji toera kucita, pontho pakutoma panango umaso unakhala wakunentsa. Kodi ife tinadungunya thangwi ya pinthu pinafuna kutipasa Yahova pa ndzidzi unoyu? Undimomwene ndi wakuti tingapereka takhuta thangwi ya pinthu pinatipasa Yahova cincino tinaperekambo takhuta kakamwe na pinthu pinafuna kutipasa iye ntsogolo. w22.02 tsa. 7 ¶18-19

Profesiya inagumanika pa Zakariya 8:23, Mafala akuti ‘Muyuda’ na ‘imwe’ asalonga pya nsoka ubodzi ene, anyakudzodzwa akuti aciri pa dziko yapantsi. (Aroma 2:28, 29) Amuna ‘khumi a pilongero pya madzindza onsene’ asaimirira mabira anango. Iwo ‘asaphata basa mwakuwanga’ peno asacita khundu mu ulambiri wakucena pabodzi na anyakudzodzwa. Munjira ibodzi ene, toera kukwanirisa profesiya inagumanika pa Ezekiyeli 37:15-19, 24, 25, Yahova acitisa kuti anyakudzodzwa na mabira anango aphate basa pabodzi mwakuphatana. Profesiya ineyi isalonga pya pimiti piwiri. Ale akuti ali na cidikhiro ca kukhala kudzulu ndi ninga cimuti ‘kuna Ayuda’ (dzindza idasankhulwa amambo a Izraeli), pontho ale ali na cidikhiro ca kukhala pa dziko yapantsi ndi ninga cimuti ‘ca Efraimu’. Yahova mbadaphataniza misoka miwiri ene mbidzakhala ‘cimuti cibodzi.’ Pyenepi pisabveka kuti iwo mbadatumikira pabodzi mwakuphatana mbatsogolerwa na Mambo wawo Kristu Yezu.​—Juwau 10:16. w22.01 tsa. 22 ¶9-10

Yezu alonga thangwi ya anthu akhapasa miyoni anyakutcerenga. Mbwenye iwo akhacita pyenepi toera anthu anango aaone, pontho aapase mbiri. Na thangwi ineyi, ngakhale kuti mabasa anewa akhali adidi, Yahova nee akomerwa nawo. (Mat. 6:2-4)Tinakwanisa kukhala anthu adidi, basi ene tingacita pinthu pyadidi na mathangwi adidi. Natenepa bvundzikani: ‘Kodi basi ene ndisadziwa pinthu pyadidi pinafunika ine kucita peno ndisawangisira toera kupicita? Ndi api mathangwi anandicitisa kucita pinthu pyadidi?’ Yahova ndi Mulungu wa mabasa, pontho nzimu wace wakucena ndi mphambvu. (Gen. 1:2) Natenepa tisafunika kucita mabasa. Mwacitsandzo, mpostolo Tiyago alemba: “Cikhulupiro cakusowa mabasa ndi cakufa.” (Tiya. 2:26) Tinakwanisambo kulonga kuti makhaliro a nzimu wa Mulungu angasowa mabasa ndi akufa. w22.03 tsa. 11-12 ¶14-16

Ife panango tinalambira Yahova na kucita pinthu pyadidi kuna anango. Mbwenye Pedhru asatikulumiza toera kucita cinthu cinango cakufunika kakamwe. Mbadzati kulonga kuti tisafunika kukhala akucena m’makhaliro athu onsene, Pedhru alonga kuti: “Khunganyani manyerezero anu toera kuphata basa mwaphinga.” (1 Ped. 1:13) Kodi basa ineyi ndi ipi? Pedhru apanga Akristu akudzodzwa kuti akhafunika ‘kudziwisa makhaliro akufunika kakamwe a Ule adaacemera.’ (1 Ped. 2:9) Pontho Akristu onsene lero ali na mwai wakucita basa ineyi yakufunika kakamwe yakuti isaphedza anthu azinji kupiringana mabasa anango anacita ife. Ndi mwai ukulu kakamwe kuna ife ninga atumiki a Mulungu kuphata basa ineyi mwaphinga yakumwaza mphangwa na kupfundzisa anthu. (Marko 13:10) Tingawangisira kucita pyenepi, ife tinapangiza pakweca kuti tisafuna Mulungu na andzathu. Pontho ife tinapangiza kuti tisafuna ‘kukhala akucena’ m’makhaliro athu onsene. w21.12 tsa. 13 ¶18

Mpostolo Paulu akhali na maonero adidi thangwi ya abale na alongo ace. Iye akhadziwa kuti munthu angacita madodo, nee pisabveka kuti iye ndi munthu wakuipa. Iye akhafuna kakamwe Akristu andzace, pontho akhanyerezera pya makhaliro awo adidi. Iwo angacimwana kucita pinthu pyadidi, iye akhadzindikira kuti iwo akhafuna kupicita, pontho toera kucita pyenepi akhafuna ciphedzo. Onani kuti Paulu aphedza tani alongo awiri a ku mpingo wa ku Filipi. (Afil. 4:1-3) Panango Evodhiya na Sintike akhadatsukwalisana mbasiya kukhala axamwali. Paulu nee aipirwa nawo peno kuatsalakana mwakuipa. M’mbuto mwace, iye akhaona makhaliro awo adidi. Alongo anewa akukhulupirika akhatumikira Yahova mu pyaka pizinji. Iye akhadziwa kuti Yahova akhaafuna. Paulu akhali na maonero adidi thangwi ya alongo anewa. Natenepa, iye aawangisa toera akhazikise ntendere pakati pawo. Nakuti Paulu akhaona makhaliro adidi a anango, pyenepi pikham’phedza toera kukhala wakutsandzaya na kukhala na uxamwali wakuwanga na abale na alongo mu mpingo. w22.03 tsa. 30 ¶16-18

Ntendere unatipasa Yahova usaticitisa kukhala akukhurudzika, pontho usatiphedza toera tikhale na manyerezero adidi. Ndi pyenepi pidacitikira mulongo m’bodzi anacemerwa Luz. Iye alonga: “Kazinji kene ndisapibva kuti ndiri ndekhene. M’midzidzi inango mabvero anewa asandicitisa kunyerezera kuti Yahova nee asandifuna. Mbwenye pyenepi pingacitika, mwakukhonda dembuka ndisapanga Yahova mabvero anga. Phembero isandiphedza toera kukhala na mabvero adidi.” Pidacitikira mulongo Luz pisapangiza kuti phembero inatiphedza toera tigumane ntendere. (Afil. 4:6, 7) Ife tisadziwa kuti Yahova na Yezu anatiphedza tingaferwa na acibale athu. Ife tisafunika kubvera anthu ntsisi pakumwaza mphangwa na pakupfundzisa, thangwi Yahova Mulungu na Yezu Kristu asapangizambo nkhaliro unoyu wadidi kakamwe. Kusiyapo pyenepi, kudziwa kuti Yahova na Mwanace asadziwa kufewa kwathu, pontho asafuna kutiphedza toera tikwanise kupirira, pisatibalangaza. Tisadikhira ntsiku yakuti Yahova ‘anadzapukuta misozi yonsene m’maso mwathu.’​—Apok. 21:4. w22.01 tsa. 15 ¶7; tsa. 19 ¶19-20

Yezu alonga pya misuwo miwiri yakusiyana inatsogolera ku miseu miwiri yakusiyana, nseu “ukulu” na nseu “ung’ono.” (Mat. 7:14) Nkhabepo nseu wacitatu. M’bodzi na m’bodzi wa ife asafunika kusankhula nseu unafuna iye kufamba. Cisankhulo ceneci ndi cakufunika kakamwe kuna ife, thangwi cidikhiro cathu ca umaso wakukhonda mala cisanyindira cisankhulo ceneci. Anthu azinji asaona kuti ndi pyakukhonda kunentsa kufamba mu nseu unoyu “ukulu.” Mbwenye pyakutsukwalisa ndi pyakuti iwo asapitiriza mu nseu unoyu mbacita pinacitambo anthu ali mwenemo. Iwo nee asadzindikira kuti anacitisa anthu kupita mu nseu unoyu ndi Sathani Dyabo, pontho iwo nee asadzindikira kuti ale ali mu nseu wace ali kuenda kafudzwa. (1 Akor. 6:9, 10; 1 Juwau 5:19) Mwakusiyana na nseu “ukulu” pana nseu unango “ung’ono,” pontho Yezu alonga kuti anaugumana ndi akucepa. Thangwi yanji? Thangwi pa vesi 15 Yezu acenjeza atowereri ace thangwi ya aprofeta authambi.​—Mat. 7:15. w21.12 tsa. 22-23 ¶3-5