Anthu anango a mu ntsiku za Yezu nee akhakomerwa na pinthu pikhapfundzisa iye. Mbwenye pidakhonda Yezu kucita cidzindikiro cidaphemba iwo, iwo asiya kuntowera. (Mat. 16:4) Kodi Bhibhlya isalonganji? Mprofeta Izaiya alonga thangwi ya Mesiya kuti: “Iye nee anadzakhuwa peno kugaluza fala yace, pontho iye nee anadzacitisa kuti fala yace ibveke mu nseu.” (Iza. 42:1, 2) Mu ndzidzi ukhacita Yezu basa yace yakumwaza mphangwa na kupfundzisa anthu, iye nee akhasaka mbiri. Iye nee amanga matemplo makulu, nee abvala nguwo zakupambulika, pontho iye nee akhafuna kuti anthu ancemere na madzina a cidzo. Mu ndzidzi ukhathabuswa iye, Yezu akhonda kucita cirengo toera kukomeresa Mambo Herodhi, maseze umaso wace ukhali pangozwi. (Luka 23:8-11) Ndimomwene kuti Yezu acita pirengo pingasi, mbwenye cinthu cakufunika kakamwe kuna iye cikhali kumwaza mphangwa zadidi. Na thangwi ineyi, iye apanga anyakupfundzace: “Ine ndadzera pyenepi.”​—Marko 1:38. w21.05 tsa. 4-5 ¶9-10

Ife tisasaka ale akuti ‘mitima yawo isafuna kutawira undimomwene unapasa umaso wakukhonda mala.’ (Mabasa 13:48) Toera anthu anewa akhale anyakupfundza, ife tisafunika kuaphedza toera (1) abvesese, (2) akhulupire, pontho (3) aphatisire pinthu pinapfundza iwo m’Bhibhlya. (Akol. 2:6, 7; 1 Ates. 2:13) Abale na alongo onsene mu mpingo anakwanisa kuphedza anyakupfundza a Bhibhlya angapangiza ufuni kuna iwo na kuatambira mwadidi pa misonkhano. (Juwau 13:35) Munthu anacitisa pfundziro ya Bhibhlya asamala ndzidzi uzinji toera kuphedza nyakupfundza toera afudze pinthu pikhakhulupira iye peno misambo yace yakuipa. (2 Akor. 10:4, 5) Pasapita miyezi mizinji toera kuphedza munthu unoyu kuti acite macinjo anewa toera akhale wakuthema kubatizwa. Mbwenye kucita macinjo anewa ndi kwakufunika kakamwe. w21.07 tsa. 3 ¶6

Kodi ife ninga Mboni za Yahova tiri na cinyindiro cakuti tisapfundzisa undimomwene, pontho kuti njira inalambira ife Yahova ndiyo basi ene yakutawirika kuna iye? Mpostolo Paulu akhali na cinyindiro cikulu cakuti iye akhali mu undimomwene. (1 Ates. 1:5) Iye nee akhali na cinyindiro ceneci basi ene thangwi pyenepi pikhantsandzayisa. Mbwenye thangwi iye akhapfundza mwadidi Mafala a Mulungu. Iye akhakhulupira kuti “Malemba onsene alembwa mukutsogolerwa na Mulungu.” (2 Tim. 3:16) Kodi iye apfundzanji? M’malemba, Paulu agumana undimomwene unapangiza kuti Yezu akhali Mesiya adapikirwa, pontho pyenepi pikhali pinthu pyakuti atsogoleri auphemberi Aciyuda nee akhapitawira. Atsogoleri a mauphemberi anewa akhalonga kuti akhapfundzisa anthu undimomwene unalonga pya Mulungu, mbwenye iwo akhapfundzisa anthu pinthu pyakuti Mulungu nee asakomerwa napyo. (Tito 1:16) Paulu nee akhali ninga amuna anewa. Iye nee akhasankhula pinthu pikhafuna iye kukhulupira na pinthu pyakuti nee akhafuna kupikhulupira m’Bhibhlya. Paulu akhali wakutonga toera kupfundzisa na kuphatisira ‘uphungu onsene wa Mulungu.’​—Mabasa 20:27. w21.10 tsa. 18 ¶1-2

Maseze ife tisamwaza mphangwa na kupfundzisa, tisafunika kukumbuka kuti anakulisa ndi Mulungu. (1 Akor. 3:6, 7) Yahova asaona anthu onsene ninga akufunika kakamwe. Iye atipasa mwai wakuphata basa pabodzi na Mwanace toera kugumanya anthu a madzindza onsene kumala kwa dziko ino mbakudzati kufika. (Ajeu 2:7) Basa yathu yakumwaza mphangwa isalandaniswa na basa yakupulumusa umaso. Ife tiri ninga nsoka wa anthu adatumwa toera kapulu­musa anthu adagwerwa na n’godhi. Maseze adapulumusa anthu ndi akucepa, onsene adatumwa aphata basa yakufunika kakamwe. Pyenepi ndi sawasawa na pinacita ife m’basa yakumwaza mphangwa. Ife nkhabe kudziwa kuti ndi anthu angasi asafunika kuphedzwa toera kupulumuka mu dziko ino ya Sathani. Mbwenye Yahova anakwanisa kuphatisira m’bodzi na m’bodzi wa ife toera kuphedza anthu anewa. Andreas anakhala ku Bolivia alonga: “Ine ndisadziwa kuti munthu angapfundza undimomwene mpaka kubatizwa ndi thangwi yakuti iye aphedzwa na anthu azinji.” Natenepa ife tisafunika kukhala na maonero adidi thangwi ya basa yathu yakumwaza mphangwa. Tingacita pyenepi, Yahova anatipasa nkhombo, pontho tinakhala akutsandzaya kakamwe m’basa yathu yakumwaza mphangwa. w21.05 tsa. 19 ¶19-20

Cifuno ca nyakusodza ndi kumanga nyama na nsampha wace peno kuipha. Iye asaphatisira misampha yakusiyana-siyana, kuphatanizambo nsampha ninga udalonga m’bodzi wa xamwali authambi a Yobe. (Yobe 18:8-10) Kodi nyakusodza asacitanji toera nyama imangwe na nsampha wace? Pakutoma iye asadziwa mwadidi nyama inasodza iye, mbuto inapita na iyo, pinthu pinakomerwa na iyo kudya na nsampha wakuti anakwanisa kuuphatisira toera kuimanga. Munjira ibodzi ene, Sathani ndi ninga nsodzi unoyu. Iye asatipfundza. Iye asadziwa mbuto zinafamba ife na pinthu pinakomerwa na ife. Buluka penepo, iye asateya nsampha wakuti anakwanisa kutimanga nawo mwakukhonda dziwa. Mbwenye Bhibhlya isatipasa cinyindiro cakuti ife tingamangwa na misampha ya Sathani, ndi pyakukwanisika kusudzuka. Pontho iyo isatipfundzisa kuti tinacalira tani misampha ineyi. Misampha miwiri yakuti Sathani asaiphatisira kakamwe ndi kudzikuza na ntima wakufuna pyonsene. Sathani asaphatisira kakamwe misampha ineyi kutomera kale mpaka lero. Iye ndi ninga nyakusaka mbalame wakuti asateya misampha toera kuzimanga. (Mas. 91:3) Mbwenye ife tinakwanisa kucalira misampha ya Sathani. Thangwi yanji? Thangwi Yahova asatipanga misampha yonsene inaphatisira Sathani.​—2 Akor. 2:11. w21.06 tsa. 14 ¶1-2

Abale na alongo akukalamba ndi akufunika kakamwe. Pontho Bhibhlya isalandanisa imbvi zawo na nthimba. (Mis. 20:29) Mbwenye panango pinakhala pyakukhonda nentsa kupwaza abale na alongo anewa akukalamba. Aphale na atsikana angadzindikira kuti abale na alongo akukalamba ndi akufunika kakamwe, iwo anaphindula kakamwe. Abale na alongo akukalamba ndi akufunika kakamwe kuna Yahova Mulungu. Iye asadziwa mwadidi abale na alongo anewa, pontho asakomerwa kakamwe na makhaliro awo adidi. Kusiyapo pyenepi, Yahova asatsandzaya kakamwe angaona abale na alongo akukalamba mbapanga aphale na atsikana pinthu pinaaphedza toera kupitiriza kutumikira Yahova mwakukhulupirika. (Yobe 12:12; Mis. 1:1-4) Yahova asakomerwambo kakamwe na kupirira kwawo. (Mal. 3:16) Iwo asathimbana na nyatwa zizinji mu umaso wawo, mbwenye asapitiriza kukhala akukhulupirika kuna Yahova. Cidikhiro cawo thangwi ya ntsogolo cisakhala cakuwanga kakamwe kupiringana mu ndzidzi udapfundza iwo undimomwene. Pontho Yahova asaafuna kakamwe thangwi iwo asapitiriza kudziwisa dzina yace “maseze iwo akalambe.”​—Mas. 92:12-15. w21.09 tsa. 2-3 ¶2-3

Ndzidzi onsene ife tisafunika kudinga mathangwi athu. Natenepa tisafunika kubvundzika: ‘Kodi ine ndisapibva kuti ndine wakufunika kakamwe kupiringana anango? Kodi ine ndisaphata basa mwakuwanga kakamwe mu mpingo thangwi ndisafuna kuti anthu andione kuti ndine wakufunika kakamwe kupiringana anango? Kodi ine ndisaphata basa mwakuwanga toera kukomeresa Yahova?’ Bhibhlya isatikhondesa kulandanisana unango na ndzace. Thangwi yanji? Thangwi tingalandanisika na anango mbationa kuti ndife akufunika kakamwe kupiringana abale athu, tinatoma kudzikuza. (Aroma 12:3) Ife tisafunika kukumbuka kuti Yahova aticemera mu gulu yace tayu thangwi ndife akubalika, akudziwa kulonga mwadidi peno kuti tisafuniwa na anthu azinji, mbwenye ndi thangwi yakuti tisanfuna, pontho tisabvera Mwanace.​—Juwau 6:44; 1 Akor. 1:26-31. w21.07 tsa. 14-15 ¶3-4

Toera kusasanyira manyerezero athu, tisafunika kucita phembero, kupfundza Bhibhlya na kunyerezera mwadidi pinapfundza ife. Pitirizani kucita pinthu pyenepi, pontho phembani Yahova toera akupaseni mphambvu. Nzimu wakucena wa Mulungu unakuphedzani toera kukunda cipendamiro cakulandanisika na anango. Pontho mungatoma kukhala na bibvu peno kudzikuza muntima mwanu, Yahova anakuphedzani toera kupidzindikira na kupimalisa mwakucimbiza. (2 Kro. 6:29, 30) Yahova asadziwa piri muntima mwathu. Iye asadziwambo kuwangisira konsene kunacita ife toera kukunda nzimu wa dziko na madodo athu. Yahova angaona kuti ife tisawangisira kakamwe toera kukunda pinthu pyenepi, ufuni wace kuna ife usathimizirika. Toera kutiphedza kubvesesa mabvero ali na iye thangwi ya ife, Yahova asaphatisira ufuni unapangiza mai kuna mwanace. (Iza. 49:15) Ndi pyakuntsandzayisa kakamwe kudziwa kuti Yahova asapangiza ufuni ukulu ninga unoyu kuna ife, angationa mbatiwangisira toera kuntumikira na ntima onsene. w21.07 tsa. 24-25 ¶17-19

Ife tinakhala akutsandzaya kakamwe tingacita na ntima onsene mabasa onsene anapaswa ife mu gulu ya Yahova. Phatisirani “ndzidzi” uzinji m’basa yakumwaza mphangwa, pontho citani mabasa onsene anapaswa imwe mu mpingo. (Mabasa 18:5; Aheb. 10:24, 25) Khunganyikani mwadidi misonkhano toera mukwanise kupereka matawiro akuwangisa. Pontho khunganyikani mwadidi makhundu onsene anapaswa imwe pa misonkhano ya pakati pa sumana. Mungaphembwa toera kucita mabasa anango mu mpingo, aciteni nakweru, pontho khalani wakunyindirika. Onani mabasa onsene anapaswa imwe mu mpingo kukhala akufunika kakamwe, pontho lekani nyerezera kuti mungacita mabasa anewa mukubvunga ndzidzi wanu papezi. Wangisirani kakamwe kucita mabasa onsene anapaswa imwe toera kuthimizira maluso anu. (Mis. 22:29) Mungawangisira toera kucita mabasa a Yahova, munakhala na uxamwali wakuwanga na iye, pontho munakhala wakutsandzaya kakamwe. (Agal. 6:4) Kusiyapo pyenepi, imwe munadzakhala wakutsandzaya anango angapaswa miyai yakutumikira mu mpingo yakuti imwe mukhaifunambo.​—Agal. 5:26. w21.08 tsa. 22-23 ¶11

Calirani kudzikuza, pontho tawirisani kuti Yahova akupfundziseni. Ninga utenda wakuti unakwanisa kucitisa ntima kukhonda phata basa mwadidi, kudzikuza kunakwanisambo kuticitisa kukhonda kubvera. Afarisi akhali akudzikuza, na thangwi ineyi akhonda kutawira kuti Yezu akhali na nzimu wakucena, pontho akhali Mwana wa Mulungu. (Juwau 12:37-40) Kudzikuza kwawo kukhali kwakugopswa kakamwe thangwi pyenepi pyaacitisa kuluza umaso wakukhonda mala. (Mat. 23:13, 33) Na thangwi ineyi ndi pyakufunika kakamwe kutawirisa kuti Bhibhlya na nzimu wakucena wa Yahova, picinje makhaliro athu, manyerezero athu, pontho pitiphedze kucita pisankhulo pyadidi. Kucepeseka kwa Tiyago kwancitisa kuti atawire kupfundziswa na Yahova. Thangwi ya kucepeseka kwace iye adzakhala mpfundzisi wadidi kakamwe. w22.01 tsa. 10 ¶7

‘Tingapirira pakucita phembero,’ tinakwanisa kukhala na cinyindiro cakuti Babathu wakudzulu asabva maphembero athu. (Akol. 4:2) Ngakhale tione kuti Yahova ali kudembuka kutawira, iye apikira kuti anatawira maphembero athu “pa ndzidzi wakuthema.” (Aheb. 4:16) Natenepa ife nee tisafunika kupasa mulando Yahova khala iye nee atawira maphembero athu pa ndzidzi ukhanyerezera ife. Mwacitsandzo, anthu azinji asacita maphembero mu pyaka pizinji toera Umambo wa Mulungu ufudze dziko ino yakuipa. Ngakhale Yezu alonga kuti ife tisafunika kuphemba toera Umambo wa Mulungu ucite pyenepi. (Mat. 6:10) Mbwenye pinakhala pyakusowa ndzeru kuna ife tingaluza cikhulupiro basi ene thangwi Mulungu nee amalisa uipi mu dziko ino pa ndzidzi ukhadikhira ife. (Abha. 2:3; Mat. 24:44) Ife tisafunika kupitiriza kudikhira Yahova mbatipitiriza kucita maphembero na cinyindiro cakuti iye anatawira maphembero athu. Kumala kwa dziko ino kunadzafika pa ndzidzi wakuthema, thangwi Yahova asankhula kale ‘ntsiku na ndzidzi.’ Pontho ntsiku ineyi inadzakhala ndzidzi wakuthema kuna anthu onsene.​—Mat. 24:36; 2 Ped. 3:15. w21.08 tsa. 10-11 ¶10-11

Abale na alongo akukalamba akuti ndi akucepeseka asadziwa kuti iwo nee anakwanisabve kucita pizinji ninga pikhacita iwo kale. Mwacitsandzo, onani pinacitika na abale anatumikira ninga ayang’aniri a cisa. Iwo angafikisa pyaka 70 pyakubalwa, asaphembwa toera kusiya basa ineyi mbacita mabasa anango. Pyenepi panango pinakhala pyakunentsa. Mbwenye iwo asabvesesa kuti ndi pyakufunika kakamwe kuti aphale acite basa ineyi. Iwo asapangiza makhaliro mabodzi ene ninga akhali na Alevi a mu Izraeli akuti angafikisa pyaka 50, iwo akhaphembwa toera kusiya kucita mabasa a pa tabhernakulo. Alevi anewa akuti akhasiya kutumikira pa tabhernakulo thangwi yakukalamba akhakomerwa na mabasa anango akhacita iwo. Iwo akhacita pyonsene pikhakwanisa iwo toera kuphedza aphale. (Num. 8:25, 26) Lero, abale akuti asiya kutumikira ninga ayang’aniri a cisa thangwi yakukalamba nee asacedzerabve mipingo mizinji, mbwenye iwo asaphedza kakamwe na kuwangisa m’mipingo yawo. w21.09 tsa. 8-9 ¶3-4

Yezu alonga nsangani wakuwangisa kakamwe thangwi ya mwana wakutayika unagumanika pa Luka 15:11-32. M’phale unango apandukira pai wace mbabuluka panyumba, pontho aenda “ku dziko yakutali.” Kweneko, iye akhali na makhaliro akuipa kakamwe. Mbwenye mu ndzidzi ukhathabuka iye, m’phale unoyu atoma kunyerezera thangwi ya pinthu pidacita iye. Iye adzindikira kuti umaso wace ukhali wadidi kakamwe mu ndzidzi ukhali iye panyumba ya pai wace. Yezu alonga kuti m’phale unoyu ‘atoma kunyerezera mwadidi.’ Iye atonga kubwerera kunyumba, mbaphemba pai wace toera amulekerere. Cinthu cakufunika kakamwe ndi cakuti iye adzindikira kuti akhadacita pisankhulo pizinji pyakuipa. Mbwenye pyenepi nee pikhali pyakukwana. Iye akhafunikambo kucinja makhaliro ace. Mwana wakutayika apangiza kuti akhadatcunyuka na ntima onsene kubulukira mu pinthu pidacita iye. Nsangani unoyu ndi wakufunika kakamwe kuna akulu a mpingo. Thangwi iwo unaaphedza mu ndzidzi unayesera iwo kuona khala munthu adacita madawo makulu atcunyuka na ntima onsene peno nkhabe. w21.10 tsa. 5-6 ¶14-15

Ndi cinthu cipi cakuti nee cinadzatekenyeswa peno kufudzwa? Mpostolo Paulu alemba: “Nakuti tinadzatambira Umambo wakuti nkhabe kudzatekenyeswa, tendeni tipitirize . . . kutumikira Mulungu munjira yakutawirika, ticite pyenepi mwakugopa Mulungu na mwacilemedzo cikulu.” (Aheb. 12:28) Mwandimomwene, citeketeke ceneci cikulu cingamala, basi ene Umambo wa Mulungu ndiwo unafuna kudzakhala kwenda na kwenda. (Mas. 110:5, 6; Dhan. 2:44) Ndzidzi uli kumala. Anthu asafunika kucita cisankhulo, khala iwo anasankhula kupitiriza kuphedzera dziko ino, anadzafudzwa. Mbwenye iwo angasankhula kutumikira Yahova, mbacita macinjo akufunika mu umaso wawo anadzatambira umaso wakukhonda mala. (Aheb. 12:25) Tingamwaza mphangwa kuna anthu anewa, ife tinakwanisa kuaphedza toera kucita cisankhulo ceneci cakufunika kakamwe. Pontho tendeni tipitirize kukumbuka mafala adalonga Mbuyathu Yezu kuti: “Mphangwa zadidi za Umambo zinadzamwazwa pa dziko yonsene yapantsi toera zikhale umboni kuna anthu a madzindza onsene, buluka penepo kumala kunadzafika.”​—Mat. 24:14. w21.09 tsa. 19 ¶18-20

Akulu a mpingo, imwe muli na basa yakupambulika yakubalangaza acibale a munthu adasiya kutumikira Yahova. (1 Ates. 5:14) Natenepa khalani na ndzidzi toera kuawangisa misonkhano ya mpingo mbidzati kutoma, peno pakumala kwa misonkhano. Acedzereni m’manyumba mwawo mbamucita phembero pabodzi na iwo, bulukani pabodzi na iwo m’basa ya m’munda, pontho m’midzidzi inango aphembeni toera kudzakhala na imwe pabodzi pakulambira kwanu kwa banja. Akulu a mpingo asafunika kutsalakana ale akuti ali akutsukwala, pontho asafunika kuabvera ntsisi na kupangiza ufuni kuna iwo. (1 Ates. 2:7, 8) Yahova “nee asafuna kuti munthu afudzwe, mbwenye asafuna kuti anthu onsene atcunyuke.” (2 Ped. 3:9) Maseze munthu acite madawo makulu, umaso wace usapitiriza kukhala wakufunika kuna Mulungu. Kumbukani kuti Yahova apereka Mwanace wakufunika ninga ntsembe wakuti ndi ntengo ukulu kakamwe toera kuombola ife tonsene. Natenepa, mwaufuni, Yahova asayesera kuphedza anthu anewa adasiya kuntumikira toera abwerere kuna iye. Ninga nsangani udalonga Yezu wa mwana wakutayika, Yahova asadikhira kuti ale adasiya kuntumikira anabwerera kuna iye.​—Luka 15:11-32. w21.09 tsa. 30-31 ¶17-19

Mphapo ndiye tani khala imwe nee musakwanisa kucita pizinji m’basa ya kumwaza mphangwa na kupfundzisa anthu Bhibhlya thangwi ya ungumi wanu peno thangwi yakusowa mphambvu? Ngakhale tenepo, imwe munakwanisa kukhala wakutsandzaya thangwi ya pinakwanisa imwe kucita. Onani pidacita Mambo Dhavidhi pidaenda iye na anyankhondo ace kamenyana na Amaleki toera kuombola mabanja awo na pinthu pyawo. Anyankhondo ace 200 akhadaneta kakamwe mbacimwana kumenya nkhondo, natenepa iwo asala nduli toera kuonera mitolo. Pidamala iwo kumenya nkhondo mbawina, Dhavidhi apereka ntemo wakuti pinthu pidakwata iwo kunkhondo pisafunika kugawiwa sawasawa kuna anyankhondo onsene. (1 Sam. 30:21-25) Pyenepi pisatipfundzisa cinthu thangwi ya basa yathu yakucita anyakupfundza. Panango imwe nee munakwanisa kucita pizinji m’basa yakumwaza mphangwa na kucita anyakupfundza. Mbwenye mungawangisira, munakwanisa kutsandzaya kakamwe mungaona munthu adziwa Yahova mbabatizwa. Yahova asaona kuwangisira kwathu na ufuni unapangiza ife kuna iye, pontho asatipasa nkhombo. Kusiyapo pyenepi, iye asatipfundzisa toera kukhala akutsandzaya na pire pinakwanisa ife kucita m’basa ineyi yakumwaza mphangwa. (Juwau 14:12) Ife tiri na cinyindiro cakuti tingakhonda kubwerera nduli Mulungu anakomerwa na ife! w21.10 tsa. 27-28 ¶15-17

Tingakalamba, panango tinatoma kudzudzumika mbatinyerezera kuti ine nee ndine wakufunikabve kuna Yahova ninga pikhali ine m’phale peno ntsikana. Mwandimomwene, panango mu ndzidzi unoyu tinasowa mphambvu zakukwana, mbwenye ife tinakwanisa kuphatisira udziwisi wathu na maluso athu toera kuphedza aphale na atsikana kuti acite mwadidi mabasa awo. Abale na alongo akukalamba asafunika kukhala akucepeseka toera akwanise kuphedza aphale na atsikana. Munthu wakucepeseka asaona anango kukhala akulu kupiringana iye. (Afil. 2:3, 4) Abale na alongo akukalamba anapangiza n’khaliro unoyu asabvesesa kuti kazinji kene anakwanisa kucita pinthu munjira zakusiyana-siyana mwakubverana na pinalonga Bhibhlya. Natenepa, iwo nee anadikhira kuti anthu onsene acite pinthu ninga munjira ikhacita iwo. (Ekle. 7:10) Maseze abale na alongo akukalamba asapanga aphale pinthu pizinji pidapfundza iwo mu undimomwene, iwo asadziwambo kuti “makhaliro a dziko ali kucinja.” Natenepa, iwo asatawira macinjo onsene anacitika mu gulu.​—1 Akor. 7:31. w21.09 tsa. 8-9 ¶1, 3

Yahova cipo asafuna kuti atumiki ace acite pinthu pyakukhonda cena. Iye ndi wakucena kakamwe. Toera kukumbusa Aizraeli kufunika kwa kukhala akucena, nthimba ya ouro ya nyantsembe wankulu ikhadalembwa mafala akuti: “Yahova ndi wakucena.” (Eks. 28:36-38) Mafala akhali pa nthimba ineyi akhapasa cinyindiro anthu onsene akhaona mafala anewa kuti mwandimomwene Yahova ndi wakucena. Mphapo ndiye tani Muizraeli wakuti nee akhakwanisa kufendedzera dhuzi nyantsembe wankulu toera kuona mafala anewa? Kodi iye mbadaluza mphangwa zenezi zakufunika? Nkhabe. Aizraeli onsene abva mphangwa zenezi mu ndzidzi ukhalerwi Mwambo kuna amuna, akazi na anapiana. (Dheu. 31:9-12) Mbamudakhala penepo, imwe mbamudakwanisa kubva mafala akuti: “Ine ndine Yahova Mulungu wanu. Musafunika kukhala akucena, thangwi ine Yahova ndine wakucena.” “Khalani akucena, thangwi ine Yahova ndine wakucena.”​—Lev. 11:44, 45; 20:7, 26. w21.12 tsa. 3 ¶6-7

Panango anango anadzudzumika kuti anagumana tani cakudya, cakubvala na mbuto yakukhala. Panango iwo akukhala mu dziko yakuti anthu azinji ndi akutcerenga, pontho mphyakunentsa kugumana basa. Pyenepi pinacitisa kukhala pyakunentsa kuna iwo kugumana kobiri toera kutsalakana banja yawo. M’mbuto mwakudzudzumika na nyatwa zathu, ife tisafunika kunyindira Yahova. Kumbukani kuti Yahova asapikira kuti anadzatipasa pinafuna ife tingaikha pinthu pyauzimu pa mbuto yakutoma. (Mat. 6:32, 33) Iye asakwanirisa pikiro ineyi ndzidzi onsene. (Dheu. 8:4, 15, 16; Mas. 37:25) Khala Yahova asatsalakana mbalame na maluwa, ife nee tisafunika kukhala akudzudzumika kuti tinadyanji peno tinabvalanji! (Mat. 6:26-30; Afil. 4:6, 7) Ninga ufuni usakulumiza anyakubala toera kupasa anapiana awo pinafuna iwo kuti apitirize kukhala na umaso, ufuni usakulumizambo Babathu wakudzulu toera kupasa atumiki ace pyonsene pinafuna iwo. w21.12 tsa. 17 ¶4-5; tsa. 18 ¶8

Kodi imwe mwatsukwaliswa kale na m’bale peno mulongo? Onani citsandzo ca Zuze wakuti atsalakanwa mwakuipa na abale ace. Iye apitiriza kuwangisira kutumikira Yahova, pontho Yahova ampasa nkhombo thangwi yakupirira kwace. Mukupita kwa ndzidzi, Zuze akwanisa kulekerera ale adantsukwalisa, pontho akwanisa kuona nkhombo zidampasa Yahova. (Gen. 45:5) Ninga Zuze ife tinakwanisa kukhala akukhurudzika tingafendedzera Yahova mbatisiya pyonsene m’manja mwace. (Mas. 7:17; 73:28) Khala imwe musathabuka thangwi yakutsalakanwa mwakusowa ulungami peno pinthu pinango, dziwani kuti Yahova ali dhuzi na ale ‘anatamba nyatwa.’ (Mas. 34:18) Iye asakufunani thangwi yakupirira kwanu, pontho thangwi yakusiya nyatwa zanu kuna iye. (Mas. 55:22) Iye ndi ntongi wa dziko yonsene yapantsi. Iye asaona pinthu pyonsene pinacitika. (1 Ped. 3:12) Natenepa khala imwe musathimbana na nyatwa yakuti nee musakwanisa kuimalisa, kumbukani kuti ndi pyakufunika kakamwe kudikhira Yahova. w21.08 tsa. 12 ¶14; tsa. 13 ¶16

Ndi pyandzeru kuphatisira ndzidzi wathu toera kucita pinthu pinakomeresa Yahova. Ife tisafunika kuikha pa mbuto yakutoma pinthu pyakufunika. Toera tiphatisire mwadidi ndzidzi wathu, panango tinafunika kusankhula cibodzi mwa pinthu piwiri pyakuti nee ndi pyakuipa. Ife tisakwanisa kuona pyenepi kubulukira mu pinthu pidacitikira Mariya na Marta mu ndzidzi udaenda Yezu panyumba pawo. Marta akomerwa kakamwe na kutambira Yezu, na thangwi ineyi aphika cakudya cadidi kakamwe. Mbwenye Mariya akhala pantsi mbabvesera Yezu mu ndzidzi ukhalonga iye. Pidacita Marta nee pikhali pyakuipa, mbwenye Mariya “asankhula cinthu cadidi kakamwe.” (Luka 10:38-42) Mukupita kwa ndzidzi, Mariya panango aduwala cakudya cidaphikwa ntsiku ineyi, mbwenye ife tinakwanisa kukhala na cinyindiro cakuti iye cipo aduwala pinthu pidapfundziswa iye na Yezu. Ninga pidacita Mariya wakuti aphatisira mwadidi ndzidzi ukhacedza iye na Yezu, ife tisafunika kuphatisirambo mwadidi ndzidzi unalambira ife Yahova. w22.01 tsa. 27 ¶5-6

Maseze Akabu akhadacepeseka pamaso pa Yahova, pinthu pidacita iye mukupita kwa ndzidzi pyapangiza kuti mwandimomwene iye nee akhadatcunyuka. Thangwi iye nee abulusa ulambiri wa Bhaale mu umambo wace, pontho nee akulumiza anthu toera alambire Yahova. Pidafa Akabu, Yahova apangiza pakweca njira ikhaona iye mambo unoyu wakuipa. Jeu wakuti akhali mprofeta wa Mulungu alonga kuti iye akhali “wakuipa.” (2 Kro. 19:1, 2) Nyerezerani basi: Mbidakhala kuti Akabu akhadatcunyuka na ntima onsene, mprofeta Jeu nee mbadalonga kuti iye akhali munthu wakuipa, pontho akhaida Yahova. Mwandimomwene, pyenepi pisapangiza kuti Akabu nee akhadatcunyuka na ntima onsene. Tinapfundzanji na citsandzo ca Akabu? Pidalonga Eliya kuna Akabu mphangwa zakuti banja yace mbidatcunyuswa, pakutoma Akabu acepeseka. Unoyu ukhali n’khaliro wadidi. Mbwenye pinthu pidacita iye mukupita kwa ndzidzi nee pyapangiza kuti iye akhadatcunyuka na ntima onsene. Natenepa, toera kupangiza kuti tatcunyuka tisafunika kucita pinthu pizinji kupiringana basi ene kulonga kuti ndiri wakutsukwala thangwi ya madawo adacita ine. w21.10 tsa. 3-4 ¶4-5, 7-8

Izaiya akhali mprofeta, pontho pisaoneka kuti nkazace akhacitambo basa ibodzi ene, thangwi iye akhacemerwa “mprofeta wankazi.” (Iza. 8:1-4) Ninga banja, cinthu cakufunika kakamwe kuna Izaiya pabodzi na nkazace cikhali kulambira Yahova. Anyakumanga banja lero anakwanisambo kutowezera citsandzo ca Izaiya na nkazace angacita pyonsene pinakwanisa iwo m’basa ya Yahova. Iwo anakwanisa kuwangisa cinyindiro cawo kuna Yahova mukupfundza pabodzi maprofesiya a Bhibhlya na kuona kuti akukwanirisika tani. (Tito 1:⁠2) Iwo anakwanisa kunyerezera pinthu pinafunika iwo kucita toera kuphedzera kukwanirisika kwa maprofesiya anango a Bhibhlya. Mwacitsandzo, iwo anakwanisa kuphedzera kukwanirisika kwa profesiya idalonga Yezu kuti mphangwa zadidi zinadzamwazwa pa dziko yonsene yapantsi kumala mbakudzati kufika. Banja ingaona kukwanirisika kwa profesiya ya Bhibhlya, pyenepi pinathimizira cifuno cawo ca kuwangisira toera kucita pizinji m’basa ya Yahova. w21.11 tsa. 16-17 ¶9-10

Yezu akhadzudzumika kakamwe na mai wace wakuti akhali nzice. Iye aphemba Juwau toera atsalakane mai wace thangwi akhadziwa kuti iye mbadam’phedza toera apitirize kutumikira Yahova. Kutomera ntsiku ineyi, Juwau adzakhala ninga mwana wa Mariya, pontho Mariya adzakhala ninga mai wa Juwau. Pyenepi pisapangiza kuti Yezu akhafuna kakamwe mai wace wakuti akhantsalakana kutomera uwana wace mpaka cifupi na kufa kwace. Tisapfundzanji na mafala a Yezu? Uxamwali wathu na abale na alongo athu usafunika kukhala wakuwanga kakamwe kupiringana acibale athu akuti nee asatumikira Yahova. Panango acibale athu anatitcinga peno kutithawa, mbwenye ninga pidapikira Yezu, ife tingakhala na uxamwali wakuwanga na Yahova pabodzi na gulu Yace tinadzatambira pinthu “pizinji kupiringana 100,” pontho pyenepi pinakhala pyakusiyana kakamwe na pire pidaluza ife. Mu gulu ya Yahova ife tinakwanisa kugumana ana amuna na akazi, amai peno apai athu. (Marko 10:29, 30) Ndi pyakutsandzayisa kakamwe kukhala na abale na alongo akuti ndi akuphatana thangwi yacikhulupiro cawo, pontho thangwi ya ufuni wawo kuna Yahova na kuna unango na ndzace.​—Akol. 3:14; 1 Ped. 2:17. w21.04 tsa. 9-11 ¶7-8

Tingakhala na ufuni wakukhonda mala, ife tinawangisira toera kuphedza anango. Ninga kale, lero abale na alongo azinji asankhula kupangiza ufuni wakukhonda mala kuna Akristu andzawo, ngakhale kuna ale akuti nee asaadziwa. Mwacitsandzo, iwo angabva kuti kwacitika cidengwa cacibaliro, mwakukhonda dembuka asasaka kudziwa kuti anapereka tani ciphedzo. Mu mpingo mungaoneka m’bale peno mulongo wakuti ali na nkandzo wakusowa kobiri, iwo asacita pinthu mwakucimbiza toera kudziwa pidasowa iye mbam’phedza. Ninga Akristu a ku Masedhonya, abale na alongo lero asawangisira kakamwe toera kuphedzana. Iwo ‘asacita pizinji kupiringana makhaliro awo’ toera kuphedza abale awo akuti asafuna ciphedzo. (2 Akor. 8:3) Lero, akulu a mpingo asasimba abale na alongo mu mpingo angaona ciphedzo cinapereka iwo kuna anango mwakukoma ntima. Abale na alongo anewa angasimbwa, asakhala na mphambvu yakucitira anango pinthu pyadidi.​—Iza. 32:1, 2. w21.11 tsa. 11 ¶14; tsa. 12-13 ¶21

Midzidzi inango tonsene tisafunika kupaswa uphungu. Midzidzi inango panango tinaphemba uphungu kuna munthu analemedza ife. Panango m’bale anatipanga kuti tiri kutoma “kufamba munjira yakuipa” peno tiri kucita cinthu cakuti cinatibweresera nyatwa. (Agal. 6:1) Kusiyapo pyenepi, panango tinapaswa uphungu tingacita madodo makulu. Mwakukhonda tsalakana kuti thangwi yanji tapaswa uphungu tisafunika kuutawira. Kucita pyenepi ndi kwadidi, pontho kunakwanisa kupulumusa umaso wathu. (Mis. 6:23) Lemba ya ntsiku ya lero, isalonga toera ‘tibvesere mafala a anthu audziwisi.’ Nkhabe munthu anadziwa pinthu pyonsene. Ndzidzi onsene tinagumana munthu wakuti asadziwa pinthu pizinji peno ali na maluso mazinji kupiringana ife. (Mis. 12:15) Natenepa, tingabvera uphungu tisapangiza kuti ndife akucepeseka. Pontho pisapangiza kuti ife tisadzindikira pinthu pinacimwana ife kucita. Kusiyapo pyenepi, pisapangizambo kuti tisafuna ciphedzo ca anango toera tikwanirise pifuno pyathu. Mambo waudziwisi Salomoni Alemba tenepa: “Pangakhala na mapungu mazinji pinthu pisafamba mwadidi.”​—Mis. 15:22. w22.02 tsa. 8 ¶1-2

Kutcunyuka kwandimomwene kusaphataniza pinthu pizinji kupiringana basi ene kulonga kuti tiri akutsukwala thangwi ya pinthu pyakuipa pidacita ife. Munthu wakuti atcunyuka asafunika kucinja manyerezero ace na mabvero ace. Iye asafunika kusiya makhaliro ace akuipa mbabvera midida ya Yahova. (Ezek. 33:14-16) Cinthu cakufunika kakamwe cinafuna kucita munthu adacita madawo ndi kuwangisira toera akhale pontho na uxamwali wakuwanga na Yahova. Tisafunika kucitanji tingadziwa kuti xamwali wathu wapantima acita madawo makulu? Ife nee tinapangiza kuti tisafuna xamwali wathu tingabisa madawo ace. Ife nee tinakwanisa kubisa madawo thangwi Yahova asaona pinthu pyonsene. (Mis. 5:21, 22; 28:13) Imwe munaphedza xamwali wanu mungampanga kuti akulu a mpingo anakwanisa kum’phedza. Xamwali wanu angakhonda kulonga madawo ace kuna akulu a mpingo, imwe musafunika kudziwisa akulu a mpingo. Pyenepi pinapangiza kuti mwandimomwene imwe musafuna kum’phedza. w21.10 tsa. 7 ¶19-21

Ife tonsene tisafunikambo kucita pyenepi. Bhibhlya isalonga kuti ‘Yezu akhala ninga bitcu.’ (Afil. 2:7) Bitcu wadidi peno ntumiki wadidi asasaka miyai toera kukomeresa mbuyace. Ninga mabitcu a Yahova na atumiki a abale anu, mwakukhonda penula musafuna maningi kuphatisirwa na Yahova na kutumikira abale anu. Bvundzikani: ‘Ndisakhala dzololo toera kuphatisira ndzidzi wanga na mphambvu zanga toera kuphedza anango? Kodi ine ndisaperekeka toera kuphedzera kucenesa mbuto inacitwa misonkhano ya gawo peno kusasanyira Nyumba ya Umambo?’ Imwe mungadzindikira kuti nee musaikha pifuno pya anango pa mbuto yakutoma, pontho pisakunentsani toera kucita pyenepi, musafunika kucita phembero kuna Yahova na ntima wanu onsene. Longani undimomwene onsene. Longani mabvero anu kuna Yahova, pontho mphembeni kuti akupaseni “cifuno na mphambvu toera mucite pinafuna iye.”​—Afil. 2:13. w22.02 tsa. 22-23 ¶9-11

Yezu apangiza kuti ndi wakukoma ntima thangwi ya kutsalakana mwadidi anthu, pontho thangwi ya kukhala dzololo toera kuaphedza, maseze midzidzi inango pikhakhala pyakunentsa. (Mat. 11:29, 30) Mwacitsandzo, pidaphembwa iye na nkazi wa ku Fenisya toera awangise mwanace, pakutoma Yezu nee atawira. Mbwenye pidaona iye kuti nkazi unoyu akhali na cikhulupiro cakuwanga, mwakukoma ntima Yezu awangisa mwanace. (Mat. 15:22-28) Maseze akhali wakukoma ntima, iye nee akhacalira kupasa uphungu. Midzidzi inango iye akhapangiza kukoma kwace ntima thangwi yakupasa uphungu anthu akhafuna iye. Mwacitsandzo, pidalonga Pedhru kuti Yezu nee akhafunika kufa, Yezu ampasa uphungu patsogolo pa anyakupfundza anango. (Marko 8:32, 33) Yezu nee acita pyenepi toera kupasa manyadzo Pedhru, mbwenye toera kumpfundzisa na kucenjeza anyakupfundza anango kuti asafunika kucalira kukhala akudzikuza. Mwakukhonda penula, Pedhru akhala na manyadzo, mbwenye aphedzeka na uphungu unoyu. Toera kupangiza kuti ndife akukoma ntima kuna anthu anafuna ife, tisafunika kulonga undimomwene kuna iwo. Pakucita pyenepi, towezerani citsandzo ca Yezu mbamupereka uphungu wakubuluswa m’Bhibhlya kuna iwo. w22.03 tsa. 11 ¶12-13

Tisalambira Yahova mu ndzidzi unansimba ife. (Mas. 34:1) Ife tisasimba Yahova tingapanga anango kuti tisanfuna kakamwe, pontho tisadzumatirwa na makhaliro ace na mabasa ace. Tingakhala anthu akupereka takhuta tinakhala na pinthu pizinji pyadidi toera kulonga thangwi ya Yahova. Pontho tinganyerezera pinthu pyadidi pidaticitira Yahova, tinakhala na mathangwi mazinji toera kunsimba. Basa yakumwaza mphangwa isatipasa mwai ukulu kakamwe toera ‘kupereka ntsembe kuna Mulungu, yakuti ndi misapo ya milomo yathu.’ Ninga pinacita ife mbatidzati kulonga na Yahova m’phembero, ife tisafunika kunyerezera mwadidi mafala anafuna longa ife mbatidzati kulonga na anthu anafuna ife kumwazira mphangwa. Tisafuna kuti ‘ntsembe yathu yakusimba’ Mulungu ikhale yadidi kakamwe. Na thangwi ineyi, tisamwaza mphangwa mwakugalamuka. w22.03 tsa. 21 ¶8