Ninga nyakubala, imwe muli na cifuno cakuphedza ananu toera afune Yahova na kuperekeka kuna iye. Munacitanji toera kuphedza ananu kukhunganyika toera kubatizwa? Munadziwa tani kuti iwo ali akukhunganyika toera kubatizwa?

Yezu apanga anyakupfundzace: “Ndokoni mukacite anyakupfundza kuna anthu a madzindza onsene, mbamuabatiza.” (Mat. 28:19) Mwakubverana na lemba ineyi, cinthu cakufunika kakamwe toera munthu abatizwe ndi kukhala nyakupfundza wa Yezu. Pyenepi pisabveka kuti munthu unoyu asafunika kubvesesa na kukhulupira pipfundziso pya Kristu mbapitowezera mwadidi. Ngakhale anang’ono anakwanisa kucita pyenepi.

Khalani citsandzo cadidi kuna ananu, pontho apfundziseni pya Yahova. (Dheu. 6:6-9) Pyenepi pisaphataniza kuphatisira bukhu Tsandzayani na Umaso Kwenda na Kwenda! toera kuapfundzisa pipfundziso pyakutoma pya m’Bhibhlya na kukhunganya manyerezero awo toera acite pinthu mwakubverana na pinalonga Bhibhlya. Phedzani ananu toera akwanise kulonga pinakhulupira iwo. (1 Ped. 3:15) Cidziwiso na ciwangiso cinatambira iwo kuna imwe na pfundziro ya munthu paekha, kulambira kwa banja, misonkhano ya mpingo na axamwali adidi pinaaphedza toera athambaruke mpaka  kubatizwa, mbapitiriza kuthambaruka. Ndzidzi onsene aphedzeni toera akhale na pifuno pyauzimu.

Lemba ya Misangani 20:11 isalonga: “Mwana asadzindikirwa na macitiro ace, khala makhaliro ace ndi akucena na akulungama.” Ndi pinthu pipi pyakuti mwana asafunika kupicita toera kupangiza kuti ndi nyakupfundza wa Yezu Kristu, pontho athema kubatizwa?

Mwana wakuti akuthambaruka toera kubatizwa asafunika kubvera anyakubalace. (Mabasa 5:29; Akol. 3:20) Bhibhlya isalonga kuti pikhali Yezu na pyaka 12, ‘apitiriza kubvera anyakubalace.’ (Luka 2:51) Ndimomwene kuti nee musafunika kudikhira kuti mwananu akhale waungwiro. Mbwenye ninga munthu anafuna kubatizwa, asafunika kuwangisira toera kutowezera citsandzo ca Yezu, pontho asafunika kudziwika ninga mwana wakuti asabvera anyakubalace.

Asafunikambo kupangiza cifuno cakupfundza undimomwene wa m’Bhibhlya. (Luka 2:46) Kodi mwananu asakomerwa kugumanika pa misonkhano na kupereka mitawiro? (Mas. 122:1) Kodi mwananu asakomerwa na kuleri Bhibhlya ntsiku zonsene na kucita pfundziro ya munthu paekha?—Mat. 4:4.

Mwana anathambaruka toera kubatizwa asafunika kuwangisira toera kuikha Umambo pa mbuto yakutoma. (Mat. 6:33) Iye asadziwa kuti ali na basa yakupanga anango pinakhulupira iye. Asamwaza mphangwa munjira zakusiyana-siyana, pontho nee asakhala na manyadzo toera kupanga apfundzisi ace na andzace a kuxikola kuti iye ndi m’bodzi wa Mboni za Yahova. Angakhala na khundu toera kuicita pa Nsonkhano wa Umaso na Utumiki asakhunganyika mwadidi.

 Iye asawangisirambo toera kukhala na makhaliro adidi, mbacalira axamwali akuipa. (Mis. 13:20; 1 Akor. 15:33) Pyenepi pisapangizika mu ndzidzi unasankhula iye nyimbo, mavidhyu, maprogramu a televizau, mavidhyu game na njira inaphatisira iye Interneti.

Pana ana azinji adaphedzeka thangwi yakuwangisira kwa anyakubala awo, pontho iwo apfundza undimomwene, mbathema toera kubatizwa mbaciri ang’ono. Yahova mbakupaseni nkhombo mu ndzidzi unaphedza imwe ananu toera kubatizwa thangwi pyenepi ndi pyakufunika kakamwe toera kuwangisa uxamwali wawo na Yahova.

Ndi mwai ukulu kutumikira mu mpingo ninga m’mwazi mphangwa wakuti adzati kubatizwa. Imwe mwathema kusimbwa thangwi yakuthambaruka kwanu mwauzimu. Kupfundza Bhibhlya kwakuphedzani toera kudziwa Mulungu na kukhulupira mapikiro ace.—Juw. 17:3; Aheb. 11:6.

Mbamudzati kupfundza Bhibhlya na Mboni za Yahova, panango mukhacita khundu mu uphemberi unango, peno nee mukhali na uphemberi. Panango mukhacita pinthu pyakuti nee pikhabverana na pinapfundzisa Bhibhlya. Mbwenye cincino mwapangiza cikhulupiro canu thangwi mwatcunyuka mbamucinja. Kutcunyuka kusabveka kutsukwala thangwi ya pinthu pyakuipa pikhacita imwe kale. Kucinja kusabveka kusiya pinthu pyakuipa pikhacita imwe kale mbamukhala akutonga toera kucita pinthu pyadidi pamaso pa Mulungu.—Mabasa 3:19.

Mbwenye panango imwe musadziwa malemba akucena ‘kubulukira mu uwana wanu.’ Na thangwi ineyi mwacalira makhaliro akuipa, pontho nee mwacita madawo makulu. (2 Tim. 3:15) Imwe mwapfundza kuti munacalira tani kucita pinthu pyakuipa pinacita andzanu, pontho munacitanji iwo angakukakamizani toera kucita pinthu pyakuipa pamaso pa Yahova. Imwe musapangiza cikhulupiro thangwi musatsidzikiza ulambiri wandimomwene, musapanga anango pinakhulupira imwe, pontho mwapfundziswa kucita utumiki Wacikristu. Cincino mwasankhula mwekhene toera kutumikira Yahova ninga m’mwazi mphangwa wakuti adzati kubatizwa.

 Mwakukhonda tsalakana khala mwapfundza pya Yahova muli nkulu kale peno pikhali imwe mwana, panango cincino imwe mukunyerezera kucita pinthu piwiri pyakufunika kakamwe pyakuti pinakuphedzani kuthambaruka mwauzimu: kuperekeka na kubatizwa. Imwe munaperekeka kuna Yahova mungacita phembero mbamulonga cisankhulo canu cakutumikira iye basi kwenda na kwenda. (Mat. 16:24) Kubatizwa kwanu m’madzi kusapangiza kuperekeka kweneku. (Mat. 28:19, 20) Mungaperekeka na kubatizwa musakhala na mwai ukulu kakamwe, kukhala ntumiki wa Yahova Mulungu.

Ninga pidapfundza imwe m’Bhibhlya, panango munathimbana na mayesero mazinji. Kumbukani kuti pidamala iye kwene kubatizwa, “Yezu atsogolerwa na nzimu wakucena mbaenda kuthando, kweneko iye ayeserwa na Dyabo.” (Mat. 4:1) Imwe mungamala kubatizwa ninga nyakupfundza wa Kristu, panango munayeserwambo. (Juw. 15:20) Mayesero anewa anabwera munjira zakusiyana-siyana. Panango imwe munatcingwa na anthu a panyumba panu. (Mat. 10:36) Panango imwe munasingirirwa na andzanu akuxikola, akubasa peno axamwali anu akale. Ndzidzi onsene kumbukani mafala a Yezu anagumanika pa lemba ya Marko 10:29, 30: “Mwandimomwene ine ndinakupangani, ule adasiya nyumba yace, abale ace amuna peno akazi, pai wace, mai wace, anace, peno munda wace thangwi ya ine na thangwi ya mphangwa zadidi, anadzatambira pizinji kupiringana 100 mu ndzidzi uno—nyumba, abale amuna na akazi, amama, ana na minda, kubulukira mu kutcingwa, pontho ntsogolo anadzagumana umaso wakukhonda mala.” Natenepa, pitirizani kuwangisira toera mukhale na uxamwali wakuwanga na Yahova mbamukhala m’maso mwakubverana na pinalonga Bhibhlya.

 Mungafuna kubatizwa, longani na mbveranisi wa nsoka wa akulu a mpingo. Akulu a mpingo anadinga na imwe mibvundzo inatowera toera kuona khala mwathema kubatizwa. Munakwanisa kukhunganyika mibvundzo ineyi pa pfundziro yanu ya munthu paekha inacita imwe masumana onsene.

Pakukhunganyika toera kadingwa na akulu a mpingo, lerini Malemba onsene adaikhwa pa mibvundzo mbamuanyerezera mwadidi. Panango munalemba ntsonga zakufunika m’bukhu ino peno pa mbuto inango. Mu ndzidzi unadingwa imwe na akulu a mpingo munakwanisa kuphatisira pidalemba imwe, pontho munakwanisa kufungula bukhu yanu. Khala pana mbvundzo wakuti nee mukuubvesesa mwadidi, phembani ciphedzo ca munthu anakupfundzisani Bhibhlya, peno ca akulu a mpingo.

Pakudingwa na akulu a mpingo, lekani kunyerezera kuti musafunika kupereka mitawiro yakulapha peno yakunentsa. Mphyadidi kakamwe ntawiro wanu ungakhala wakukhonda nentsa, wacigwagwa mbamuphatisira mafala anu ene. Pakupereka mitawiro, kazinji kene mphyadidi kulonga lemba ibodzi peno mawiri anapangiza kuti ntawiro wanu usabverana na pinalonga Bhibhlya.

Akulu a mpingo angaona kuti nee muli na cidziwiso cakukwana thangwi ya pipfundziso pyakutoma pya m’Bhibhlya, iwo anacita masasanyiro toera mupitirize kupfundza Bhibhlya kuti mukwanise kulonga na mafala anu ene pinapfundza imwe m’Malemba toera mukupita kwa ndzidzi mukhale wakuthema kubatizwa.

[Cidzindikiro kuna akulu a mpingo: Pitsogolero toera kudinga na ale anafuna kubatizwa, pisagumanika pa tsamba 208-212.]