MPOSTOLO Paulu atumiza mphangwa izi kuna mpingo wa ku Filipi: “Ine Paulu na Timoti, ndife atumiki a Kristu Yezu, ndiri kulembera anthu akucena onsene ali ku Filipi, akuti ali akuphatana na Kristu Yezu, kuphatanizambo akulu a mpingo pabodzi na atumiki akutumikira.” (Afil. 1:1) Onani kuti iye alonga pya atumiki akutumikira. Pisaoneka kuti amuna anewa akhacita basa yakufunika kakamwe toera kuphedza akulu a mpingo a ndzidzi unoyu. Pyenepi pisacitikambo mu ndzidzi wathu. Atumiki akutumikira asacita mabasa akusiyana-siyana mu mpingo toera kuphedza akulu a mpingo, pontho pyenepi pisacitisa kuti pinthu pifambe mwadidi mu mpingo.

² Kodi imwe musadziwa atumiki akutumikira a mu mpingo mwanu? Musadziwa mabasa anacita iwo toera kuphedza imwe pabodzi na mpingo onsene? Mwakukhonda penula, Yahova asakomerwa kakamwe na mabasa anacita amuna anewa. Paulu alemba: “Amuna anatsogolera mwadidi asawina mbiri ya makhaliro adidi, pontho anakwanisa kulonga na cinyindiro consene pya cikhulupiro cinagumanika mwa Kristu Yezu.”—1 Tim. 3:13.

³ Atumiki akutumikira asafunika kukhala a citsandzo cadidi ca umaso Wacikristu, akunyindirika na akucita mwadidi mabasa awo. Pyenepi pisabverana na pidalonga Paulu  mu tsamba yace kuna Timoti pyakuti ale anafuna kukhala atumiki asafunika kupicita. Iye alonga: “Munjira ibodzi ene, atumiki akutumikira asafunika kukhala akulemedzeka, akukhonda kunyengeza pakulonga, nee asafunika kumwa kakamwe vinyu, nee akufuna kuwina pinthu munjira yakukhonda kulungama. Asafunika kutowezera cibisobiso cakucena ca cikhulupiro, mbakhala na cikumbuntima cakucena. Pontho, pakutoma iwo asafunika kudingwa toera aoniwe khala athema; buluka penepo, mbatumikire ninga atumiki, angasowa mathangwi akupambizirwa nawo. Ntumiki wakutumikira asafunika akhale mamuna wa nkazi m’bodzi basi, pontho atsogolere mwadidi anace na anthu a panyumba pace.” (1 Tim. 3:8-10, 12) Kutowezera mwadidi pitsogolero pyenepi ndi kwakufunika kakamwe mu ndzidzi unakhazikiswa atumiki akutumikira toera mpingo ukhonde kulongwa mwakuipa thangwi ya ale adapaswa miyai ineyi.

⁴ Mwakukhonda tsalakana thunga yawo, atumiki akutumikira asafunika kukhala aphinga m’basa yakumwaza mphangwa miyezi yonsene. Iwo angacita pyenepi asatowezera phinga ya Yezu. Phinga yawo isapangiza kuti Yahova asafuna kuti anthu onsene apulumuswe.—Iza. 9:7.

⁵ Atumiki akutumikira asafunikambo kukhala a citsandzo cadidi munjira inabvala iwo, malongero awo, macitiro awo na makhaliro awo. Iwo asafunika kukhala andzeru zadidi, thangwi pyenepi pinacitisa anango kualemedza. Pontho iwo asafunika kuona uxamwali wawo na Yahova na miyai yakutumikira iri na iwo mu mpingo kukhala yakufunika kakamwe.—Tito 2:2, 6-8.

⁶ Pakutoma, amuna anewa asafunika “kudingwa toera aoniwe khala athema.” Ngakhale mbadzati kukhazikiswa, iwo asafunika kupangiza kuti ndi amuna akuperekeka, asaikha Umambo pa mbuto yakutoma mu umaso wawo,  pontho asawangisira toera akhale akuthema kucita mabasa onsene anafuna kupaswa iwo. Mwandimomwene, iwo ndi citsandzo cadidi kakamwe kuna anango mu mpingo.—1 Tim. 3:10.

⁷ Atumiki akutumikira asacita mabasa akusiyana-siyana toera kuphedza abale na alongo. Pyenepi pisaphedza toera akulu a mpingo akhale na ndzidzi uzinji wakucita mabasa awo akupfundzisa na akutsalakana mabira a Mulungu. Pakuapasa mabasa, nsoka wa akulu a mpingo, usaapasa mwakubverana na maluso awo na pinafunika pa mpingo.

⁸ Mwacitsandzo, ntumiki wakutumikira m’bodzi anakwanisa kuphembwa toera atsalakane mabukhu anakwata ife toera kuapfundza na anaphatisira ife pakumwaza mphangwa. Anango asaphembwa toera atsalakane kobiri ya mpingo peno pisa pya mpingo. Anangombo asatsalakana mikrofoni, mitcini yakugaluza mafala, asakhala akalindi, pontho asaphedza akulu a mpingo munjira zinango. Kusasanyira na kucenesa Nyumba ya Umambo ndi basa ikulu kakamwe, ndi thangwi yace kazinji kene asaphembwa atumiki akutumikira toera kutsalakana mabasa anewa.

⁹ M’mipingo inango, panango pisakwanisika kuti ntumiki wakutumikira apaswe basa ibodzi basi. Mbwenye m’mipingo inango, ntumiki wakutumikira m’bodzi asapaswa mabasa mazinji. M’midzidzi inango, atumiki akutumikira angasi asacita basa ibodzi ene. Khala mu mpingo nkhabemo atumiki akutumikira akukwana toera kucita anango mwa mabasa anewa, nsoka wa akulu a mpingo unasankhula abale akubatizwa a citsandzo cadidi toera kucita mabasa anewa akufunika. Munjira ineyi, iwo anadzakhala na maluso akuti anaaphedza angadzakhazikiswa ninga atumiki akutumikira. Khala  nkhabepo abale, mulongo wacitsandzo cadidi anakwanisa kuphembwa toera aphedzere mabasa anango, maseze iye nee anakhazikiswa ninga ntumiki wakutumikira. Munthu wacitsandzo cadidi ndi ule wakuti anthu anakwanisa kutowezera makhaliro ace na njira yace yakulambira Mulungu. Kugumanika kwace pa misonkhano, m’basa yakumwaza mphangwa, kutsalakana kwace banja, kusankhula kwace ubalangazi, mabvaliro ace na makhundu anango a umaso wace, asafunika kukhala citsandzo cadidi kuna anango.

¹⁰ Mipingo yakuti nkhabe akulu a mpingo azinji, atumiki akutumikira akuthema anakwanisa kuphatisirwa toera kucita mibvundzo thangwi ya pinalonga Bhibhlya kuna ale anafuna kubatizwa. Mibvundzo ineyi isagumanika mu Apendise “Khundu 1: Pinakhulupira Akristu.” Nakuti “Khundu 2: Umaso Wacikristu” isagomezera pya umaso wathu ene, khundu ineyi isafunika kucitwa na nkulu wa mpingo.

¹¹ Midzidzi inango, nsoka wa akulu a mpingo ungakhala na mathangwi adidi, unakwanisa kucinja basa ikhacita ntumiki wakutumikira m’bodzi mbaipasa unango. Mbwenye pisakhala mwadidi kakamwe abale angacita basa ibodzi ene mu ndzidzi uzinji, thangwi asaidzolowera, pontho maluso awo akucita basa ineyi asathimizirika.

¹² Mwakubverana na makhaliro a mpingo wanu, atumiki akutumikira akuti kuthambaruka kwawo kusaoneka “pakweca kuna anthu onsene,” anakwanisa kupaswa mabasa anango. (1 Tim. 4:15) Khala akulu a mpingo ndi akucepa,  ntumiki wakutumikira anakwanisa kuphembwa toera aphedzere muyang’aniri wa nsoka wa basa ya m’munda, peno m’midzidzi inango, kukhazikiswa ninga ntumiki wakuyang’anira nsoka wa basa ya m’munda mbakatsogolerwa na akulu a mpingo. Atumiki akutumikira anakwanisa kuphembwa toera kucita makhundu anango pa Nsonkhano wa Umaso Wathu Wacikristu na Utumiki, kuphatanizambo kutsogolera Pfundziro ya Bhibhlya ya Mpingo pingakhala pyakufunika, na kucita nkhani zapakweca. Khala pa mpingo pana basa yakuti kazinji kene isacitwa na akulu a mpingo, mbwenye nkhabepo akulu toera kuicita, atumiki akutumikira akuthema anakwanisa kuphedzera. (1 Ped. 4:10) Atumiki akutumikira asafunika kuperekeka na ntima onsene mu ndzidzi unaphedza iwo akulu a mpingo.

¹³ Maseze mabasa a atumiki akutumikira ndi akusiyana na a akulu a mpingo, mbwenye asaphedzera toera mpingo ufambe mwadidi, pontho asacita khundu ya mabasa akucena a Mulungu. Mukupita kwa ndzidzi, atumiki akutumikira anacita mwadidi mabasa awo, mbatsalakana mabira a Mulungu na kuapfundzisa, anakwanisa kukhazikiswa ninga akulu a mpingo.

¹⁴ Khala ndimwe m’bale wam’phale, peno mwabatizwa kwene cincino, kodi musawangisira toera kukhala wakuthema kutumikira ninga ntumiki wakutumikira? (1 Tim. 3:1) Pyaka pyonsene, anthu azinji kakamwe asatawira undimomwene, na thangwi ineyi pasafunika amuna akukola mwauzimu toera atsalakane mabasa mu mpingo. Toera kukwanisa pyenepi, musafunika kukhala na cifuno cakuphedza anango. Njira ibodzi yakucita pyenepi ndi kunyerezera mwadidi citsandzo ca Yezu. (Mat. 20:28; Juw. 4:6, 7; 13:4, 5) Cifuno canu cinathimizirika mu ndzidzi unakhala imwe wakutsandzaya thangwi yakupasa anango. (Mabasa 20:35) Natenepa, perekekani toera kuphedza  anango, kusasanyira Nyumba ya Umambo, peno kucita khundu pa Nsonkhano wa Umaso Wathu Wacikristu na Utumiki mwanaciro wace angakhonda bwera. Kuwangisira toera kukhala ntumiki wakutumikira kusaphatanizambo kucita pfundziro ya munthu paekha toera kukulisa makhaliro auzimu. (Mas. 1:1, 2; Agal. 5:22, 23) Kusiyapo pyenepi, m’bale anawangisira kucita pyenepi, asapangiza kuti ndi wakukhulupirika na wakunyindirika angapaswa mabasa mu mpingo.—1 Akor. 4:2.

¹⁵ Atumiki akutumikira asakhazikiswa na nzimu wakucena toera aphedzere mu mpingo. Anthu onsene mu mpingo anapangiza kuti asapereka takhuta na basa inacitwa na atumiki akutumikira angaaphedzera mu ndzidzi unacita iwo mabasa awo. Munjira ineyi, mpingo unapangiza kuti usapereka takhuta thangwi ya masasanyiro adacita Yahova toera pinthu pifambe mwadidi mu gulu yace.—Agal. 6:10.