YAHOVA atipasa citsandzo cadidi kakamwe ca Mwanace, Yezu Kristu, toera ticitowezere. (1 Ped. 2:21) Munthu anakhala ntowereri wa Yezu asamwaza mphangwa zadidi, pontho asakhala ntumiki wa Mulungu. Yezu apangiza kuti pyenepi mbapidakhala pyakuwangisa, thangwi iye alonga: “Bwerani kuna ine imwe monsene adaneta na adalemerwa, ine ndinadzakupumisani. Kwatani goli yanga mbamupfundza kubulukira mwa ine, thangwi ndine wakukhurudzika na wakucepeseka, natenepa munadzagumana ciwangiso.” (Mat. 11:28, 29) Pikiro ineyi isakwanirisika kuna ale anatawira kukhala atowereri ace!

² Ninga Ntumiki Wankulu wa Mulungu, Yezu acemera anthu anango toera akhale atowereri ace. (Mat. 9:9; Juw. 1:43) Iye aapfundzisa kuti anamwaza tani mphangwa, pontho aatuma toera akacite basa ikhacita iye. (Mat. 10:1–11:1; 20:28; Luka 4:43) Mukupita kwa ndzidzi iye atuma anango akukwana 70 toera akaphate basa yakumwaza mphangwa za Umambo wa Mulungu. (Luka 10:1, 8-11) Pidatuma iye anyakupfundza anewa, Yezu aapanga: “Ule anakubveserani, akubvesera ine. Ule anakupwazani, akupwazambo ine. Kusiyapo pyenepi, ule anandipwaza, akupwazambo Ule adandituma.” (Luka 10:16) Pidalonga iye mafala anewa, Yezu apangiza kuna anyakupfundzace kuti apaswa basa ikulu. Iwo akhaimirira Yezu na Mulungu Wankulu Kakamwe! Lero, mafala anewa asaphatambo basa  kuna onsene anatawira ncemerero wa Yezu wakuti: “Bwera ukhale nyakupfundza wanga.” (Luka 18:22; 2 Akor. 2:17) Onsene anatawira ncemerero unoyu ali na basa yakumwaza mphangwa zadidi za Umambo na kucita anyakupfundza.—Mat. 24:14; 28:19, 20.

³ Tingatawira ncemerero wa Yezu wakukhala ntowereri wace, tisakhala na mwai ‘wakudziwa’ Yahova Mulungu na Yezu Kristu. (Juw. 17:3) Tisapfundza kuti tinakomeresa tani Yahova. Na ciphedzo cace, tisakwanisa kucinja manyerezero athu mbatibvala uunthu upswa, pontho tisacita pinthu mwakubverana na midida yace yaulungami. (Aroma 12:1, 2; Aef. 4:22-24; Akol. 3:9, 10) Toera kupangiza kupereka kwathu takhuta, taperekeka kuna Yahova mbatibatizwa m’madzi. Tingabatizwa tisakhala atumiki a Mulungu.

⁴ Ndzidzi onsene tisafunika kukumbuka kuti ale anafuna kutumikira Mulungu nkhabe funika kucita pyakuipa, pontho mitima yawo isafunika kukhala yakucena. (Mas. 24:3, 4; Iza. 52:11; 2 Akor. 6:14–7:1) Tingakhulupira Yezu Kristu, ife tisakhala na cikumbuntima cakucena. (Aheb. 10:19-23, 35, 36; Apok. 7:9, 10, 14) Mpostolo Paulu apanga Akristu toera acite pinthu pyonsene munjira yakuti inapasa mbiri Mulungu mbakhonda kugwegwedusa anango. Mpostolo Pedhru apangiza kuti makhaliro adidi anakwanisa kucitisa anthu anango kupfundza undimomwene. (1 Akor. 10:31, 33; 1 Ped. 3:1) Mphapo tinacitanji toera kuphedza munthu kuti akhalembo wakuthema kumwaza mphangwa zadidi?

⁵ Kutomera ntsiku inatoma imwe kupfundza Bhibhlya na munthu adapangiza cifuno, musafunika kumuwangisa toera apangembo anango pinapfundza iye. Iye anakwanisa kupanga acibale ace, axamwali ace, andzace a kubasa na  anthu anango. Pyenepi ndi pyakufunika kakamwe pakuphedza anyakupfundza toera atowezere Yezu Kristu ninga atumiki a mphangwa zadidi. (Mat. 9:9; Luka 6:40) Nyakupfundza angathambaruka, mbakwanisa kupereka umboni, mwakukhonda penula iye apangiza cifuno cace cakumwaza mphangwa pabodzi na mpingo.

⁶ Nyakupfundza wanu wa Bhibhlya mbadzati kutoma kumwaza mphangwa nyumba na nyumba, imwe musafunika kuonesesa khala iye athema. Munthu anaenda kamwaza mphangwa pabodzi na ife, asaoniwa ninga m’bodzi wa Mboni za Yahova. Natenepa pakutoma iye asafunika kucinja makhaliro ace toera abverane na pinafuna Yahova, buluka penepo anakwanisa kukhala m’mwazi mphangwa wakuti adzati kubatizwa.

⁷ Mungapfundza na munthu Bhibhlya, mbamucedza naye thangwi ya pinalonga Bhibhlya, imwe munakwanisa kundziwa mwadidi. Panango munaona kuti iye asaphatisira pinapfundza iye. Mbwenye pana pinthu pinango thangwi ya umaso wa nyakupfundza wanu pyakuti akulu a mpingo asafunika kucedza naye pabodzi na imwe.

⁸ Mbveranisi wa nsoka wa akulu a mpingo anacita masasanyiro toera akulu a mpingo awiri (m’bodzi wa komiti yakuyang’anira basa mu mpingo) toera acedze na imwe pabodzi na nyakupfundza wanu wa Bhibhlya. Mipingo yakuti iri na akulu a mpingo akucepa, nkulu wa mpingo m’bodzi anakwanisa kucita pyenepi pabodzi na ntumiki wakutumikira wakuthema. Abale adasankhulwa toera kucita basa ineyi asafunika kuicita mwakucimbiza. Mwacitsandzo, akulu a mpingo angapangwa pa nsonkhano kuti munthu asafuna kukhala mwazi mphangwa, panango anacedza na imwe pabodzi na nyakupfundza wanu pakumala  kwa nsonkhano. Mu ndzidzi wakucedza, citisani kuti onsene akhale akusudzuka. Nyakupfundza mbadzati kukhazikiswa ninga m’mwazi mphangwa wakuti adzati kubatizwa, akulu a mpingo asafunika kukhala na cinyindiro thangwi ya pinthu ipi:

1.  (1) Iye asakhulupira kuti Bhibhlya ndi Mafala a Mulungu.—2 Tim. 3:16.

2.  (2) Iye asadziwa na asakhulupira pipfundziso pyakutoma pya Malemba, pontho angabvundzwa anatawira mwakubverana na pinapfundzisa Bhibhlya, tayu mwakubverana na uphemberi wauthambi peno manyerezero ace.—Mat. 7:21-23; 2 Tim. 2:15.

3.  (3) Iye asabvera pinalonga Bhibhlya kuti atumiki a Yahova asafunika kugumanika pa misonkhano ya mpingo khala mphyakukwanisika kuna iye.—Mas. 122:1; Aheb. 10:24, 25.

4.  (4) Iye asadziwa pinapfundzisa Bhibhlya thangwi ya ulukwali, kuphatanizambo upombo, kupalakanya, kupita m’mabonde kwa mamuna na mamuna na kwa nkazi na nkazi, pontho asacalira makhaliro anewa. Khala iye asakhala na mamuna peno nkazi wakuti nee ndi m’bale wace, uwiri wawo asafunika kulembesa banja yawo.—Mat. 19:9; 1 Akor. 6:9, 10; 1 Tim. 3:2, 12; Aheb. 13:4.

5.  (5) Iye asabvera pinalonga Bhibhlya thangwi yakuledzera, pontho asacalira kuphatisira mitombwe yakuledzeresa khala nee aphembwa kucita pyenepi na dotoro.—2 Akor. 7:1; Aef. 5:18; 1 Ped. 4:3, 4.

6.  (6) Iye asadziwa kufunika kwa kucalira axamwali akuipa.—1 Akor. 15:33.

7.  (7) Iye asiyiratu kucita khundu m’mauphemberi authambi akuti panango akhaaphedzera. Asiya  kuenda ku uphemberi wace wakale peno kuphedzera mabasa anango a uphemberi unoyu.—2 Akor. 6:14-18; Apok. 18:4.

8.  (8) Asiya kuphedzera ndale za dziko m’makhundu onsene.—Juw. 6:15; 15:19; Tiya. 1:27.

9.  (9) Iye asakhulupira, pontho asabvera pinalonga Izaiya 2:4 thangwi yakukhonda kuphedzera nkhondo peno uviyaviya wa madziko.

10.  (10) Iye asafunadi kukhala m’bodzi wa Mboni za Yahova.—Mas. 110:3.

⁹ Akulu a mpingo angakhonda kukhala na cinyindiro cakuti nyakupfundza abvesesa mphangwa zinadinga iwo, anakwanisa kuphatisira Malemba toera kupitiriza kucedza naye. Nyakupfundza asafunika kubvesesa kuti ale anamwaza mphangwa pabodzi na Mboni za Yahova asafunika kucita pinthu mwakubverana na pinalonga Malemba anewa. Mitawiro yace inaphedza akulu a mpingo toera kukhala na cinyindiro cakuti iye asadziwa pinafunika iye kucita ninga m’mwazi mphangwa, pontho khala athema kutoma kumwaza mphangwa pabodzi na mpingo.

¹⁰ Akulu a mpingo asafunika kupanga nyakupfundza unoyu mwakukhonda dembuka khala iye athema peno nkhabe. Kazinji kene, mphyakukwanisika kumpangiratu pakumala kucedza naye. Khala iye athema, akulu a mpingo anakwanisa kucita bweraniko kuna iye ninga m’mwazi mphangwa. (Aroma 15:7) Asafunika kumuwangisa toera akhonde kudembuka kutoma kumwaza mphangwa, pontho asafunika kupereka lipoti yace ya basa ya m’munda pakumala kwa mwezi. Akulu a mpingo asafunika kumpanga kuti munthu angathema kukhala m’mwazi mphangwa wakuti adzati kubatizwa, mbapereka lipoti yace yakutoma ya basa ya m’munda, isafungulwa kartau ya Registo de Publicador de Congregação na dzina yace  mbiikhwa mu arkivo ya mpingo. Akulu a mpingo asakoya mphangwa zinalonga pya umaso wace zidalembwa mu kartau toera gulu ipitirize kutsalakana mabasa anacitwa pa dziko yonsene yapantsi a Mboni za Yahova, pontho toera m’mwazi mphangwa akwanise kuphedzera mabasa mu gulu ya Yahova na kupaswa ciphedzo cauzimu. Kusiyapo pyenepi, akulu a mpingo asafunika kukumbusa m’mwazi mphangwa mupswa kuti mphangwa zace zinango zinaphatisirwa mwakubverana na Política Global de Proteção de Dados ya Mboni za Yahova zinagumanika mu jw.org.

¹¹ Kudziwa mwadidi m’mwazi mphangwa mupswa mbatipangiza kuti tisakomerwa na kuthambaruka kwace pinam’phedza kakamwe. Pyenepi pinam’phedza toera apereke lipoti yace ya basa ya m’munda miyezi yonsene, pontho toera apitirize kutumikira Yahova.—Afil. 2:4; Aheb. 13:2.

¹² Akulu a mpingo angaona kuti nyakupfundza Bhibhlya athema kutoma kumwaza mphangwa, asafunika kumpasa bukhu Gulu Inacita Cifuno ca Yahova. Angapereka lipoti yace yakutoma, mpingo unadziwiswa mwacigwagwa kuti iye ndi m’mwazi mphangwa wakuti adzati kubatizwa.

¹³ Anapiana anakwanisambo kukhala amwazi mphangwa zadidi. Yezu acedza na anang’ono mbaapasa nkhombo. (Mat. 19:13-15; 21:15, 16) Maseze basa yakupfundzisa anapiana ndi ya anyakubala, anthu anango mu mpingo anakwanisambo kuphedza anapiana anafuna kumwaza mphangwa za Umambo. Khala ndimwe nyakubala, citsandzo canu cadidi m’basa yakumwaza mphangwa cinaphedza ananu toera akhalembo aphinga m’basa ya Mulungu. Mwana angakhala wa citsandzo cadidi, pontho  angafuna kupangambo anango thangwi ya pinakhulupira iye, ninji pontho pinafunika kucitwa toera kum’phedza?

¹⁴ Mbapidakhala mwadidi kuti pai wace peno mai wace acedze na nkulu wa mpingo m’bodzi wa Komiti Yakuyang’anira Basa mu Mpingo toera kuona khala mwanawo athema kukhala m’mwazi mphangwa. Mbveranisi wa nsoka wa akulu a mpingo anacita masasanyiro toera akulu a mpingo awiri (m’bodzi wa komiti yakuyang’anira basa mu mpingo) acedze na mwana pabodzi na nyakubala peno anyakubala ace akuti ndi Akristu peno munthu anantsalakana wakuti ndi Nkristu. Khala mwana asadziwa pipfundziso pyakutoma pya m’Bhibhlya, pontho asafunadi kumwaza mphangwa, pyenepi pinapangiza kuti akuthambaruka mwadidi. Angamala kucedza pya ntsonga zenezi na zinango zakulandana zinalonga pya anthu akulu, akulu a mpingo anaona khala mwana athema kukhala m’mwazi mphangwa wakuti adzati kubatizwa. (Luka 6:45; Aroma 10:10) Mu ndzidzi unacedza iwo na mwana, akulu a mpingo nee asafunika kulonga pinthu pyakuti basi ene pisalongwa pakucedza na anthu akulu.

¹⁵ Mu ndzidzi unacedza iwo na mwana, akulu a mpingo asafunika kunsimba thangwi yakuthambaruka kwace, pontho asafunika kumuwangisa toera ntsogolo abatizwe. Asafunikambo kusimba anyakubala thangwi yakuwangisira kunacita iwo toera kupfundzisa mwanawo undimomwene. Toera kuphedza anyakubala kuti apitirize kuphedza mwanawo, akulu a mpingo asafunika kuaphemba toera akaleri m’bukhu ino “Mphangwa Kuna Anyakubala Acikristu” zinagumanika patsamba 179-181.

¹⁶ Khala mwadziwa Yahova mbamutoma kunfuna, pontho mwacinja umaso wanu mbamutoma kutowezera pinalonga  Bhibhlya na musacita basa yakumwaza mphangwa, musafunika kupitiriza kuwangisa uxamwali wanu na iye. Munacita tani pyenepi? Mungapereka umaso wanu kuna iye mbamubatizwa m’madzi.—Mat. 28:19, 20.

¹⁷ Kuperekeka kuna Mulungu kusabveka kupikira Yahova mu phembero yakubuluka pantsi pantima kuti munantumikira, pontho munabvera mitemo yace mu umaso wanu onsene. Pyenepi pisabveka kuti nkhabe mulungu unango anafunika imwe kutumikira kusiyapo Yahova. (Dheu. 5:9) Ceneci ndi cisankhulo ca munthu paekha. Nkhabepo munthu unango anafuna kuticitira pyenepi.

¹⁸ Mbwenye pana pinthu pinango pinafunika imwe kucita, kusiyapo kupanga Yahova kuti musafuna kukhala ntumiki wace. Musafunika kupangiza pakweca kuna anango kuti imwe mwaperekeka kuna Mulungu. Munacita pyenepi mungabatizwa m’madzi, ninga pidacita Yezu. (1 Ped. 2:21; 3:21) Khala mwasankhula kutumikira Yahova, pontho musafuna kubatizwa, musafunika kucitanji? Musafunika kupanga mbveranisi wa nsoka wa akulu a mpingo cifuno canu. Iye anacita masasanyiro toera akulu a mpingo angasi acedze na imwe kuti aone khala musacita pinafuna Mulungu. Toera kudziwa pizinji, lerini m’bukhu ino “Mphangwa Kuna Amwazi Mphangwa Akuti Adzati Kubatizwa” zinagumanika pa tsamba 182-184 na “ ” zinagumanika pa tsamba 182-184 na “ ” zinagumanika pa tsamba 182-184 na “Mibvundzo Kuna Ale Anafuna Kubatizwa” inagumanika pa tsamba 185-207.

¹⁹ Mu pyaka pizinji, malipoti anapangiza kuthambaruka kwa ulambiri wandimomwene, asawangisa kakamwe mbumba ya Yahova. Kutomera mu ndzidzi udapanga Yezu Kristu anyakupfundzace kuti mphangwa zadidi zinadzamwazwa pa dziko yonsene yapantsi, Akristu  andimomwene akhafuna kakamwe kuona kukwanirisika kwa mafala anewa.—Mat. 28:19, 20; Marko 13:10; Mabasa 1:8.

²⁰ Atowereri a Yezu akutoma akhatsandzaya kakamwe pikhabva iwo malipoti a kuthambaruka kwa basa yakumwaza mphangwa. (Marko 6:30) Bukhu ya Mabasa isatipanga kuti pakhali anthu cifupi na 120 mu ndzidzi udatsanulirwa anyakupfundza nzimu wakucena pa Pentekoste ya 33 P.K.K. Mwakukhonda dembuka numero ya anyakupfundza yathimizirika mbifika cifupi na 3.000, buluka penepo mbifika cifupi na 5.000. Lipoti ikhapangiza kuti “Yahova akhapitiriza kuthimizira anthu pakati pawo ntsiku zonsene, akuti akhapita munjira ya cipulumuso,” pontho “anyantsembe azinji kakamwe atoma kukhulupira.” (Mabasa 1:15; 2:5-11, 41, 47; 4:4; 6:7) Mwakukhonda penula, malipoti anewa awangisa kakamwe anyakupfundza, pontho aaphedza toera apitirize kuphata basa maseze akhatcingwa na atsogoleri auphemberi Waciyuda!

²¹ Cifupi na caka 60-61 P.K.K., mu tsamba idalemba Paulu kuna Akolose, iye alonga kuti mphangwa zadidi zikhabala “misapo mbazithimizirika pa dziko yonsene,” pontho zikhamwazwa “kuna anthu onsene pa dziko yapantsi.” (Akol. 1:5, 6, 23) Akristu akutoma akhabvera Mafala a Mulungu, pontho nzimu wakucena waaphedza kucita basa ikulu yakumwaza mphangwa makhaliro Aciyuda mbadzati kufudzwa mu caka 70 P.K.K. Mwandimomwene Akristu anewa akukhulupirika akhatsandzaya kakamwe kubva malipoti a kuthambaruka kwa basa yakumwaza mphangwa.

²² Munjira ibodzi ene, gulu ya Yahova mu ntsiku zathu zino isawangisira toera kukoya malipoti analonga kuti basa yakumwaza mphangwa ikufamba tani toera kukwanirisa lemba ya Mateu 24:14. Iyo isalonga: “Mphangwa  zadidi za Umambo zinadzamwazwa pa dziko yonsene yapantsi toera zikhale umboni kuna anthu a madzindza onsene, buluka penepo kumala kunadzafika.” Ninga atumiki adaperekeka kuna Mulungu, ife tiri na basa toera kuicita mwakucimbiza. Natenepa, ife tisafunika kumwaza mphangwa mwaphinga kumala mbakudzati kufika. Yahova anadzacitisa kuti basa ineyi icitwe mwakukwana, pontho tingaphedzera basa ineyi tinadzakhala akutawirika kuna iye.—Ezek. 3:18-21.

²³ Ninji pinafunika ife kulemba pa lipoti? Formularyu ya Relatório de Serviço de Campo inaperekwa na gulu, isapangiza pinthu pinafunika ife kulemba. Ntsonga zinatowera zinakuphedzani kakamwe.

²⁴ Padalembwa “Publicações (Impressas e Eletrônicas),” lembani mabukhu, marevista, mabhruxura na matratadho adagawira imwe peno adatumizira imwe munthu wakuti nee ndi m’bodzi wa Mboni za Yahova wakubatizwa. Padalembwa “Vídeos Mostrados,” lembani maulendo adapangiza imwe mavidhyu athu.

²⁵ Padalembwa “Revisitas,” lembani maulendo adacedza imwe pontho na munthu adapangiza cifuno wakuti nee ndi m’bodzi wa Mboni za Yahova toera kuthimizira cifuno cace. Tinakwanisa kucita ulendo wakubwereza kuna munthu tingacedza naye pontho nkhope na nkhope, tingamulembera tsamba, tingam’menyera ntokodzi, tingantumizira mphangwa na ntokodzi peno e-mail, peno tingampasa ibodzi mwa mabukhu athu. Ndzidzi onsene unacitisa imwe pfundziro ya Bhibhlya, musafunika kulengesa ulendo wakubwereza. Khala panyumba pana mwana wakukhonda kubatizwa, nyakubala anakwanisa kulengesa ulendo wakubwereza masumana onsene angatsogolera kulambira kwa banja.

 ²⁶ Khala ife tisapfundza Bhibhlya masumana onsene na munthu m’bodzi, kunkhomo kwa mwezi tisafunika kulemba pfundziro ibodzi basi. Amwazi mphangwa asafunika kulemba mapfundziro a Bhibhlya akusiyana-siyana adacitisa iwo pa mwezi. Mapfundziro a Bhibhlya anewa asaphataniza ale anacitisa imwe na anthu akuti adzati kuperekeka mbabatizwa ninga m’bodzi wa Mboni za Yahova, peno ale anacitisa imwe na anthu adabatizwa cincino akuti adzati kumalisa bukhu Tsandzayani na Umaso Kwenda na Kwenda!. Pontho mungaphembwa na m’bodzi wa komiti inayang’anira basa mu mpingo toera kucitisa pfundziro ya Bhibhlya kuna munthu wakuti akhadasiya kutumikira Yahova, munakwanisambo kulengesa pfundziro ineyi.

²⁷ Mphyakufunika kakamwe kulemba “Maora” andimomwene. Kazinji kene, unoyu ndi ndzidzi unaphatisira ife pakumwaza mphangwa nyumba na nyumba, pakucita maulendo akubwereza, pakucitisa mapfundziro a Bhibhlya, pakupereka umboni wantsusukano peno umboni wapakweca kuna anthu akuti nee aperekeka mbabatizwa ninga m’bodzi wa Mboni za Yahova. Amwazi mphangwa awiri angaphata basa pabodzi, uwiri wawo anakwanisa kulengesa ndzidzi, mbwenye m’bodzi na m’bodzi analengesa maulendo ace akubwereza na mapfundziro a Bhibhlya adacitisa iye. Anyakubala angaphedzana kupfundzisa anawo pa Kulambira Kwa Banja namaulo uwiri wawo anakwanisa kulengesa ora ibodzi pasumana. Abale anakwanisa kulengesa ndzidzi unacita iwo nkhani yapakweca. Abale peno alongo anathumburuza nkhani yapakweca anakwanisambo kulengesa ndzidzi. Mbwenye pana mabasa anango akuti nee tisafunika kulengesa ndzidzi,  ninga kukhunganyika toera kuenda kamwaza mphangwa, kugumanika pa nsonkhano wa basa ya m’munda na pakutsalakana mabasa anango.

²⁸ M’mwazi mphangwa m’bodzi na m’bodzi asafunika kucita pinthu mwakubverana na cikumbuntima cace cakupfundziswa na Bhibhlya pakulengesa maora a basa ya m’munda. Amwazi mphangwa anango asamwaza mphangwa mucisa cakuti ciri na anthu azinji, anangombo asamwaza mphangwa mucisa cakuti nee ciri na anthu azinji, pontho asafamba nsindzo wakulapha toera kugumana anthu. Nakuti pisa pisasiyana, amwazi mphangwa asakhala na maonero akusiyana thangwi yakulengesa ndzidzi pakumwaza mphangwa. Mathubo akutonga asafuna kuti abale na alongo a mipingo pa dziko yonsene yapantsi atsogolerwe na cikumbuntima cawo pakulengesa ndzidzi wa basa ya m’munda, pontho nkhabe munthu anafunika kukhazikisa mitemo thangwi ya pyenepi.—Mat. 6:1; 7:1; 1 Tim. 1:5.

²⁹ Pa lipoti yathu tisafunika kulemba basi ene maora, tayu mphindi. Basi ene m’mwazi mphangwa anakwanisa kulengesa mphindi khala nee asakwanisabve kucita pizinji thangwi yakukalamba, nee asakwanisa kubuluka panyumba, asakhala panyumba inatsalakanwa anthu akukalamba peno asathabuka na nyatwa zinango. M’mwazi mphangwa unoyu anakwanisa kupereka mphindi 15. Maseze amwaze mphangwa m’mphindi 15 basi pa mwezi, iye asafunika kuzilemba pa lipoti. Natenepa iye anaoniwa ninga m’mwazi mphangwa wakuti asapereka maora miyezi yonsene. Masasanyiro anewa asaphatisirwambo kuna m’mwazi mphangwa wakuti nkati mwa mwezi ubodzi peno mingasi iye nkhabe kwanisa kufamba thangwi ya utenda peno cidengwa. Masasanyiro anewa acitwa basi ene toera kuphedza ale akuti asanentseka kakamwe  toera kumwaza mphangwa. Komiti yakuyang’anira basa ndiyo inafuna kusankhula m’mwazi mphangwa adathema kupereka lipoti ninga ineyi.

³⁰ Lipoti ya basa ya m’munda inapereka imwe miyezi yonsene, isalembwa pa kartau ya Registo de Publicador de Congregação. Kartau ineyi ndi ya mpingo. Mungafuna kucinja mpingo, musafunika kudziwisa akulu a mpingo wanu. Mulembi wa mpingo anacita pyonsene toera kartau yanu itumizwe ku mpingo wanu upswa. Pyenepi pinacitisa kuti akulu a mpingo akutambireni mwadidi mbapitiriza kukuphedzani mwauzimu. Khala munabulukapo, mbwenye nee munamala miyezi yakupiringana mitatu, pitirizani kupereka lipoti yanu ku mpingo wanu.

³¹ Kodi midzidzi inango imwe musaduwala kupereka lipoti yanu ya basa ya m’munda? Midzidzi inango, ife tonsene tisafunika kukumbuswa. Mbwenye tingadziwa kuti thangwi yanji lipoti yathu ndi yakufunika kakamwe, pinakhala pyakukhonda nentsa kukumbuka kuti tisafunika kuipereka.

³² Anango asabvundza: “Nakuti Yahova asadziwa pinacita ine m’basa yace, thangwi yanji ndisafunika kupereka lipoti yanga mu mpingo?” Ndimomwene kuti Yahova asadziwa pinacita ife, pontho asadziwa khala tisapicita na ntima onsene peno mwakukakamizika. Mbwenye kumbukani kuti Yahova alemba ntsiku zidakhala Nowa mu arka, pontho alemba pyaka pidakhala Aizraeli n’thando. Mulungu alemba numero ya anthu akukhulupirika na ale adakhonda kumbvera. Alembambo pya kuwina kwa Aizraeli pakumenya nkhondo na Akanani, pontho alemba  pinthu pidacita atongi akukhulupirika a mu Izraeli. Mwandimomwene, iye alemba pinthu pizinji pidacita atumiki ace. Iye acitisa kuti mphangwa zenezi zilembwe toera kupangiza maonero ace thangwi yakukoya lipoti yandimomwene ya pinthu pidacitika.

³³ Pinthu pyakale pidalembwa m’Bhibhlya pisapangiza kuti atumiki a Yahova akhakoya malipoti andimomwene a pinthu pidacitika. Bhibhlya mbidakhonda kulonga numero yandimomwene ya pinthu pidacitika, mphangwa zinango nee mbazidakhala zakudzumatirisa. Onani pitsandzo ipi: Genesi 46:27; Eksodho 12:37; Atongi 7:7; 2 Amambo 19:35; 2 Kronika 14:9-13; Juwau 6:10; 21:11; Mabasa 2:41; 19:19.

³⁴ Maseze malipoti athu nee asapangiza pyonsene pidacita ife pakulambira kwathu Yahova, mbwenye iwo ndi akufunika mu gulu yace. Mu ndzidzi wakale, pidabwerera apostolo m’basa yakumwaza mphangwa, iwo apanga Yezu pinthu “pyonsene pidacita iwo na pidapfundzisa iwo.” (Marko 6:30) Midzidzi inango malipoti asapangiza makhundu anango a utumiki wathu akuti asafunika kusasanyirwa. Malipoti anakwanisa kupangiza makhundu a basa yathu akuti asafamba mwadidi, mbwenye makhundu anango nkhabe, thangwi amwazi mphangwa nee akuthimizirika maka. Malipoti anakwanisa kupangiza khala amwazi mphangwa asafunika kuwangiswa peno khala piripo pinafunika kutsalakanwa. Ayang’aniri angadinga malipoti anewa anawangisira toera kumalisa pinacitisa abale na alongo anango peno mpingo onsene kukhonda kuthambaruka.

³⁵ Malipoti asaphedzambo gulu ya Mulungu toera kudziwa mbuto zinafunika amwazi mphangwa azinji. Ndi pisa pipi pyakuti basa ikuthambaruka kakamwe? Ndi pisa pipi pyakuti basa nee ikuthambaruka maka? Ndi mabukhu  api anafunika toera kuphedza anthu kupfundza undimomwene? Malipoti asaphedza gulu toera kudziwa mabukhu anafunika m’basa yakumwaza mphangwa m’mbuto zakusiyana-siyana pa dziko yapantsi.

³⁶ Azinji a ife, tisawangiswa kakamwe na malipoti. Kodi nee tisakomerwa tingabva pinacita abale athu m’basa yakumwaza mphangwa pa dziko yonsene yapantsi? Malipoti analonga pya kuthimizirika asatiphedza kuona kuthambaruka kwa gulu ya Yahova. Malipoti a amwazi mphangwa andzathu asatitsandzayisa, pontho asatiphedza toera tikhalembo aphinga m’basa yakumwaza mphangwa. (Mabasa 15:3) Kupereka lipoti yathu ya basa ya m’munda ndi kwakufunika, pontho kusapangiza kuti tisatsalakana abale athu pa dziko yonsene. Natenepa tingacita pyenepi, tinapangiza kuti tisabvera gulu ya Yahova.—Luka 16:10; Aheb. 13:17.

³⁷ Ife nkhabe mathangwi toera kulandanisa lipoti yathu ya basa ya m’munda na ya munthu unango. (Agal. 5:26; 6:4) Makhaliro athu ndi akusiyana. Natenepa ife tinaphedzeka kakamwe tingakhazikisa pifuno pyakuti tinapikwanirisa toera kuona kuthambaruka kudacita ife m’basa yakumwaza mphangwa. Kukwanirisa pifuno pyenepi kunatiphedza toera tikhale akutsandzaya kakamwe.

³⁸ Pisaoneka pakweca kuti Yahova akucimbizisa basa yakugumanyiza anthu anafuna kupulumuswa pa “nyatwa ikulu.” Tiri kukhala mu ndzidzi unakwanirisika profesiya iyi ya Izaiya: “Ing’ono inadzakhala 1.000, pontho yakucepa inadzakhala dzindza yamphambvu. Ine Yahova ndinadzacimbizisa pyenepi pa ndzidzi wace.” (Apok. 7:9, 14; Iza. 60:22) Ndi nkhombo ikulu kakamwe kukhala atumiki akuti asamwaza mphangwa zadidi mu ntsiku zino zakumalisa!—Mat. 24:14.