NINGA atumiki akuperekeka kuna Mulungu, mafala athu na macitiro athu onsene asafunika kupasa mbiri Mulungu. Mpostolo Paulu alonga cinthu cakufunika kakamwe pidalemba iye kuti: “Mwakukhonda tsalakana khala muli kudya, muli kumwa peno mukucita cinthu cinango, citani pinthu pyonsene munjira yakuti inapasa mbiri Mulungu.” (1 Akor. 10:31) Pyenepi pisaphataniza kutowezera mitemo yakulungama ya Yahova yakuti inatiphedza toera kupangiza makhaliro ace adidi. (Akol. 3:10) Ninga anthu akucena, tisafunika kutowezera Mulungu.—Aef. 5:1, 2.

² Toera kupangiza Akristu kufunika kwa kukhala akucena, mpostolo Pedhru alemba: “Ninga ana akubvera, lekani kutsogolerwa pontho na pinthu pikhasirira imwe kale mu ndzidzi ukhacita imwe pinthu mwakukhonda dziwa, mbwenye ninga Ule adakucemerani ndi Wakucena, khalani akucena m’makhaliro anu onsene, thangwi pyalembwa kuti: ‘Khalani akucena, thangwi ine ndine wakucena.’” (1 Ped. 1:14-16) Ninga Aizraeli, ndzidzi onsene Akristu mu mpingo asafunika kukhala akucena. Pyenepi pisabveka kuti Akristu asafunika kukhala akusowa midonthi, asafunika kucalira madawo mbakhonda kupswipiswa na makhaliro akuipa a dziko ino. Pyenepi pisaacitisa kukhala akuthema kutumikira Mulungu.—Eks. 20:5.

³ Ife tinakwanisa kupitiriza kukhala akucena tingatoweza mitemo na midida ya Yahova inagumanika m’Bhibhlya.  (2 Tim. 3:16) Kupfundza Bhibhlya kwatiphedza toera kudziwa mwadidi Yahova na pinthu pinafuna iye, mbatitoma kukhala axamwali ace. Kwatiphedzambo toera kuikha pa mbuto yakutoma Umambo wa Mulungu na kuona kuti kucita cifuno ca Mulungu ndi cinthu cakufunika kakamwe mu umaso wathu. (Mat. 6:33; Aroma 12:2) Pyenepi pyaticitisa kubvala uunthu upswa.—Aef. 4:22-24.

⁴ Midzidzi inango pisanentsa kubvera mitemo yakulungama ya Yahova. Thangwi nyamalwa wathu, Sathani Dyabo, asafuna kuti tisiye undimomwene. Kusiyapo pyenepi, makhaliro akuipa a dziko ino na cipendamiro cathu cakucita madawo pisatiyeserambo toera kucita pinthu pyakuipa. Natenepa tisafunika kuwangisira toera tipitirize kutumikira Yahova mwaphinga. Bhibhlya isatipanga kuti nee tisafunika kudzudzumika tingatcingwa peno tingayeserwa. Ife tinathabuka thangwi yaulungami. (2 Tim. 3:12) Tisafunika kukhala akutsandzaya tingathimbana na mayesero, thangwi tisadziwa kuti mayesero anewa asapangiza kuti tikucita pinafuna Mulungu.—1 Ped. 3:14-16; 4:12, 14-16.

⁵ Maseze Yezu akhali waungwiro, iye apfundza kukhala wakubvera kubulukira mu nyatwa zidatamba iye. Iye nee atawira mayesero a Sathani peno kufuna pinthu pya dziko. (Mat. 4:1-11; Juw. 6:15) Yezu nee atawirisa kuti cinthu cinango cimpingize kutumikira Mulungu. Iye apitiriza kubvera mitemo yakulungama ya Yahova, maseze kukhala kwace wakukhulupirika kukhacitisa anthu kumuida. Mbadzati kufa, Yezu acenjeza anyakupfundzace kuti dziko mbidaaidambo. Kutomera mu ndzidzi unoyu atowereri a Yezu asatamba nyatwa, mbwenye iwo asakhala acipapo thangwi asadziwa kuti Mwana wa Mulungu akunda dziko.—Juw. 15:19; 16:33; 17:16.

 ⁶ Toera tikhonde kucita khundu ya dziko, tisafunika kubvera mitemo yakulungama ya Yahova, ninga pidacita Mbuyathu, Yezu. Kusiyapo kukhonda kucita khundu ya ndale za dziko na misoka inango, tisafunikambo kucalira makhaliro akuipa a dziko. Tisaona uphungu unagumanika pa Tiyago 1:21 kukhala wakufunika kakamwe: “Siyani makhaliro onsene akunyanyasa, na ntundu onsene wa uipi, mbamutawira mwakucepeseka kuti mafala a Mulungu akuti anakwanisa kukupulumusani abzwalwe muna imwe.” Kupfundza mafala a Mulungu na kugumanika pa misonkhano, pinacitisa kuti ‘Mafala a undimomwene abzwalwe’ m’mitima mwathu na m’manyerezero mwathu mbatikhonda kusirira pinthu pya dziko. Nyakupfundza Tiyago alemba: “Kodi imwe nkhabe dziwa kuti kucita uxamwali na dziko pisabveka kukhala nyamalwa wa Mulungu? Natenepa, munthu onsene anafuna kukhala xamwali wa dziko asakhala nyamalwa wa Mulungu.” (Tiya. 4:4) Na thangwi ineyi, m’Bhibhlya isatipasa uphungu wadidi wakuti usatiphedza kubvera mitemo yakulungama ya Yahova na kukhala akusiyana na dziko.

⁷ Mafala a Mulungu asaticenjeza toera tikhonde kukhala na makhaliro akupasa manyadzo na aulukwali. Bhibhlya isalonga: “Ulukwali na ntundu onsene wa macitiro akunyanyasa peno kusirira, nee pisafunika kulongwa pakati panu, thangwi pinthu pyenepi si pyakuthema tayu kuna anthu akucena.” (Aef. 5:3) Natenepa nee tisafunika kunyerezera pinthu pyaulukwali, pyakupasa manyadzo peno pyakuipa kakamwe, pontho nee tisafunika kupilonga pakucedza. Tingacita pyenepi tinapangiza kuti tisabvera mitemo ya Yahova yakuti ndi yakucena na yakulungama.

⁸ Kusiyapo kukhala akucena mwauzimu na kukhala na makhaliro adidi, Akristu asadziwa kuti asafunika kukhala  aunyai. Kale mu ndzidzi wa Aizraeli, Mulungu wakucena akhafuna kuti misasa yawo ikhale yakucena. Ife tisafunikambo kukhala akucena toera Yahova “akhonde kuona cinthu cakupasisa manyadzo pakati” pathu.—Dheu. 23:14.

⁹ Bhibhlya isapangiza kuti kukhala akucena na kukhala aunyai ndi pinthu pyakulandana. Mwacitsandzo, Paulu alemba: “Abale anga akufunika, . . . tisafunika kuceneseka, mbatisiya pinthu pyonsene pinapswipisa manungo athu na manyerezero athu, pontho tithimize kukhala akucena munjira inapangiza kuti tisagopa Mulungu.” (2 Akor. 7:1) Natenepa Akristu onsene asafunika kuwangisira toera kukhala aunyai. Iwo asafunika kusamba na kufula nguwo zawo. Maseze makhaliro a dziko ibodzi na ibodzi ndi akusiyana, mbwenye kazinji kene tinakwanisa kugumana sabau na madzi toera ife na anathu tipitirize kukhala akucena.

¹⁰ Nakuti tiri na basa yakumwaza mphangwa, tisadziwika kakamwe pacisa cinakhala ife. Kucenesa mwadidi nyumba yathu nkati na kunja kwene kusaperekambo umboni kuna anthu pacisa cathu. Onsene pabanja anakwanisa kuphedzera basa ineyi. Abale asafunika kuwangisira toera nyumba yawo na kintalo yawo ikhale yakucena, thangwi nyumba ingakhala yakucena isacitisa anango kukomerwa nayo. Abale angacita pyenepi, pontho angatsogolera mwadidi anthu a panyumba pawo mu pinthu pyauzimu, anapangiza kuti asatsogolera mwadidi mabanja awo. (1 Tim. 3:4, 12) Pontho alongo ali na basa yakutsalakana pinthu, makamaka n’nyumba. (Tito 2:4, 5) Ana angapfundziswa mwadidi asadziwa kutsalakanika  okhene, pontho asadziwa kupaka pinthu nkwartu yawo na kuicenesa. Munjira ineyi, banja inapangiza kuti iri kukhunganyika toera kupangiza makhaliro aunyai anafunika mu dziko ipswa inafuna kutongwa na Umambo wa Mulungu.

¹¹ Atumiki azinji a Yahova lero asaphatisira njinga, mota peno karu toera kuenda ku misonkhano. Mbuto zinango asaphatisira makaru toera kuenda kamwaza mphangwa. Makaru anewa asafunika kukhala akucena na akusasanywa mwadidi. Nyumba zathu, njinga zathu, miyota yathu na makaru athu asafunika kupangiza kuti ndife mbumba yakucena ya Yahova. Munjira ibodzi ene, Bhibhlya yathu na pasta inaphatisira ife mu utumiki isafunikambo kukhala yakucena.

¹² Mabvaliro athu na njira inabalikisa ife manungo athu isafunika kubverana na mitemo ya Mulungu. Cipo mbatidanyerezera kubvala nguwo zakukhonda thema mbatienda kaonana na munthu wacidzo. Ndiye tani mu ndzidzi unaimirira ife Yahova m’basa yakumwaza mphangwa peno pa platifomu! Maonekero athu na mabvaliro athu anakwanisa kucitisa anthu kuona ulambiri wa Yahova munjira yadidi peno yakuipa. Nee tisafunika kubalikisa manungo athu mwakupiringana midida mbatikhonda kunyerezera anango. (Mik. 6:8; 1 Akor. 10:31-33; 1 Tim. 2:9, 10) Pakukhunganyika toera kuenda kamwaza mphangwa, kuenda ku misonkhano ya mpingo, misonkhano ya cisa peno ya gawo, tisafunika kunyerezera pinalonga Bhibhlya thangwi yakukhala akucena na a maonekero adidi. Ndzidzi onsene tisafuna kulemedza na kupasa mbiri Yahova.

¹³ Tisafunikambo kuphatisira uphungu ubodzi ene tingaenda kaona ofesi ikulu ya dziko yonsene ya Mboni za Yahova peno ofesi ya filiali. Kumbukani kuti dzina yakuti Bheteli isabveka “Nyumba ya Mulungu.” Natenepa tisafunika  kubvala ninga pinacita ife tingaenda ku misonkhano pa Nyumba ya Umambo.

¹⁴ Ngakhale midzidzi ya ubalangazi, tisafunika kucita mphole-mphole na mabvaliro athu. Tisafunika kubvundzika: ‘Kodi mabvaliro anga anandicitisa kukhala na manyadzo toera kupereka umboni?’

¹⁵ Ife tisafunika kupuma na kucita ubalangazi toera tikhale na ungumi wadidi. Ntsiku inango, Yezu apanga anyakupfundzace kuti aende pabodzi ku mbuto inango toera ‘akapume pang’ono.’ (Marko 6:31) Kupuma na kucita ubalangazi wadidi kunatiphedza toera tikhale akutsandzaya, pontho kunatipasa mphambvu toera tikwanise kupitiriza kuphata mabasa athu a ntsiku na ntsiku.

¹⁶ Nakuti pana ubalangazi uzinji ntsiku zino, Akristu asafunika kuphatisira udziwisi wa Mulungu pakusankhula ubalangazi. Maseze ubalangazi ukhale wadidi, nee usafunika kukhala wakufunika kakamwe mu umaso wathu. Ife tisacenjezwa kuti “mu ntsiku zakumalisa” anthu “anadzafuna pinakomerwa na iwo basi, mbakhonda kufuna Mulungu.” (2 Tim. 3:1, 4) Ubalangazi uzinji lero ndi wakukhonda thema kuna ale anafuna kubvera mitemo yakulungama ya Yahova.

¹⁷ Akristu akutoma akhafunika kuwangisira toera kucalira makhaliro akuipa a anthu a mu ndzidzi wawo akuti akhafuna kakamwe ubalangazi. N’nyumba za masendzekero za ku Roma, anthu akhatsandzaya angaona anango mbakathabuswa. Anthu azinji akhakomerwa kuona pinthu pyauphanga, pyakuthedzesa ciropa na pyaulukwali, mbwenye Akristu akutoma akhacalira pinthu pyenepi. Mu ntsiku zino, ubalangazi uzinji usapangizambo pinthu pibodzi pyene, basi ene toera kukwanirisa pifuno pyakuipa  pya anthu. Natenepa tisafunika kucita “mphole-mphole” na pinthu pinacita ife mbaticalira ubalangazi wakuipa wakuti usafudza makhaliro adidi. (Aef. 5:15, 16; Mas. 11:5) Maseze ubalangazi ukhale wadidi, mbwenye panango makhaliro na macitiro a anthu anagumanika kweneko ndi akuipa.—1 Ped. 4:1-4.

¹⁸ Pana ubalangazi uzinji wadidi wakuti ndi wakutawirika kuna Akristu. Anthu azinji asaphedzeka thangwi yakutowezera uphungu unagumanika m’Bhibhlya na m’mabukhu athu.

¹⁹ Midzidzi inango mabanja anango asacemera Akristu andzawo toera adzacedze panyumba pawo. Abale anango panango anacemerwa ku phwando yakumanga banja peno toera aende kacedze pabodzi na abale anango. (Juw. 2:2) Pyenepi pingacitika, ule adacemera anthu ndiye anafunika kuyang’anira pinthu pyonsene pinacitika. Mwandimomwene, tisafunika kucita mphole-mphole pangagumanika anthu azinji. Thangwi m’midzidzi ineyi, anango asakhala akusudzuka kakamwe, asaduwala makhaliro adidi Acikristu, mbatoma kudya na kumwa mwakupiringana midida, ngakhale kucita madawo makulu. Natenepa, Akristu akuti ali na luso yakudzindikira asacemera anthu akucepa, pontho asamala ndzidzi wakucepa. Khala panagumanika pyakumwa pyakuledzeresa, anthu nee asafunika kumwa mwakupiringana midida. (Afil. 4:5) Cifuno cakugumanyikana kwanu cingakhala cakuwangisana mwauzimu, pyakudya na pyakumwa nee pinakhala pyakufunika kakamwe.

²⁰ Kutambira alendo ndi kwadidi kakamwe. (1 Ped. 4:9) Tingacemera abale panyumba pathu toera adzadye na kucedza, tisafunikambo kucemera abale na alongo akuti ndi akutcerenga. (Luka 14:12-14) Khala tacemerwa na m’bale, tisafunika kupangiza makhaliro adidi mwakubverana  na uphungu unagumanika pa Marko 12:31. Ndzidzi onsene mphyadidi kupereka takhuta thangwi ya udidi unaticitira anango.

²¹ Akristu asakomerwa na miyoni inapswa iwo na Mulungu, pontho asadziwa kuti anakwanisa ‘kudya na kumwa mbatsandzaya na basa yawo yakuwanga.’ (Ekle. 3:12, 13) Nyakucemera na ale adacemerwa angacita “pinthu pyonsene munjira yakuti inapasa mbiri Mulungu,” ubalangazi usakhala wakukhonda duwalika, pontho usakhala wakuwangisa mwauzimu.

²² Ana a Mboni za Yahova asaphedzeka kakamwe angapfundza kuxikola. Mu ndzidzi unapfundza iwo xikola, asawangisira toera kupfundza kuleri na kulemba mwadidi. Pinthu pinango pinapfundza iwo kuxikola pinakwanisa kuaphedza mu ndzidzi unakwanirisa iwo pifuno pyawo pyauzimu. Mu ndzidzi unapfundza iwo xikola, asafunika kuwangisira toera kuikha pifuno pyauzimu pa mbuto yakutoma toera kupangiza kuti ‘asakumbuka Nciti wawo Wankulu.’—Ekle. 12:1.

²³ Khala ndimwe Nkristu wa m’phale, pontho mukupfundza xikola, musafunika kucita mphole-mphole toera mukhonde kumala ndzidzi uzinji na andzanu a kuxikola akuti nee asatumikira Mulungu. (2 Tim. 3:1, 2) Yahova asapereka uphungu uzinji wakuti unatitsidzikiza ku makhaliro akuipa a dziko. (Mas. 23:4; 91:1, 2) Natenepa phatisirani mwadidi uphungu onsene unatipasa Yahova toera mukhale akutsidzikizika.—Mas. 23:5.

²⁴ Toera akhale akusiyana na anthu a dziko, kuxikola aphale azinji a Mboni za Yahova asakhonda kucita pinthu pinango pyakuti nee pisacita khundu ya mapfundziro. Panango andzawo na apfundzisi nee anabvesesa mathangwi  ace. Mbwenye cakufunika ndi kutsandzayisa Mulungu. Pyenepi pisabveka kuti musafunika kuphatisira cikumbuntima canu cakupfundziswa na Bhibhlya mbamukhala dzololo toera kukhonda kucita khundu m’mapika a dziko na kusankhulana kwa madzindza. (Agal. 5:19, 26) Mungabvera uphungu wa m’Bhibhlya unakupfundzisani anyakubalanu, mbamukhala na nsambo wakucedza na anthu a citsandzo cadidi mu mpingo, pinakhala pyakukhonda nentsa kubvera midida yakulungama ya Yahova.

²⁵ Bhibhlya isalonga kuti misolo ya mabanja iri na basa yakusaka pinthu pyakufunika kuna mabanja awo. (1 Tim. 5:8) Ngakhale tenepo, ninga atumiki a Mulungu iwo asadziwa kuti basa yawo nee ndi yakufunika kakamwe kupiringana pinthu pya Umambo. (Mat. 6:33; Aroma 11:13) Nakuti ndi akuperekeka kuna Mulungu, iwo asakomerwa angakhala na cakudya na pyakubvala, asacalira kudzudzumika kakamwe, pontho asacalira misampha yakufuna pinthu pizinji pyakumanungo.—1 Tim. 6:6-10.

²⁶ Akristu onsene akuperekeka akuti ali na basa ya ku dziko, ndzidzi onsene asafunika kubvera mitemo ya m’Bhibhlya. Toera kugumana pinthu pinafuna ife tisacalira kucita pinthu pyakuti nee pisabverana na mitemo ya Mulungu peno ya dziko. (Aroma 13:1, 2; 1 Akor. 6:9, 10) Tisafunika kucalira kucita uxamwali na anthu anacita pinthu pyakuipa. Ninga anyankhondo a Kristu nee tisacita malonda akuti nkhabe bverana na matongero a Mulungu, pontho nee tisacita khundu ya ndale za dziko peno kucita pinthu pinango pyakuti pinafudza makhaliro athu auzimu. (Iza. 2:4; 2 Tim. 2:4) Pontho ife nkhabe kubverana na “Bhabhilonya Wankulu,” wakuti ndi mauphemberi onsene authambi anaida Mulungu.—Apok. 18:2, 4; 2 Akor. 6:14-17.

 ²⁷ Tingabvera mitemo yakulungama ya Mulungu, nee tinaphatisira ndzidzi wa misonkhano yathu Yacikristu toera kulonga pya malonda na pinthu pyathu pinango. Cifuniro cakugumanika pa misonkhano ya mpingo, misonkhano ya cisa na ya gawo ndi toera kulambira Yahova. M’midzidzi ineyi, ife tisadya cakudya cauzimu, pontho ‘tisawangisana unango na ndzace.’ (Aroma 1:11, 12; Aheb. 10:24, 25) Natenepa, pa ndzidzi unoyu tisafunika kucedza pinthu pyauzimu.

²⁸ Mitemo yakulungama ya Yahova isalonga kuti atumiki ace asafunika ‘kukoya kuphatana kwawo kubulukira mu nzimu wakucena, mbakhala akuphatana muntendere.’ (Aef. 4:1-3) M’mbuto mwakuwangisira toera kucita pinthu pinakomerwa na iwo basi, onsene asawangisira toera kukomeresa anango. (1 Ates. 5:15) Mwakukhonda penula musaona pyenepi mu mpingo mwanu. Mwakukhonda tsalakana dzindza yathu, dziko, khala ndife akupfuma peno akutcerenga, khala tapfundza kakamwe peno nkhabe, tonsene tisakhala akuphatana thangwi tisabvera mitemo yakulungama ya Mulungu. Ngakhale anthu akuti nee ndi Mboni za Yahova, asaona makhaliro anewa kuna mbumba ya Yahova.—1 Ped. 2:12.

²⁹ Toera kugomezera pinacitisa Akristu kukhala akuphatana, mpostolo Paulu alemba: “Alipo manungo mabodzi basi na nzimu wakucena ubodzi basi, munjira ibodzi ene, ciripo cidikhiro cibodzi basi cidacemererwa imwe; alipo Mbuya m’bodzi basi, cikhulupiro cibodzi basi, ubatizo ubodzi basi; na Mulungu m’bodzi basi wakuti ndi Baba wa anthu onsene. Iye ali padzulu pa anthu onsene, pontho kubulukira mwa anthu onsene, iye asacita pinthu mwa onsene.” (Aef. 4:4-6) Pyenepi pisatiphedza kubvesesa munjira ibodzi ene pipfundziso pyakutoma pya  m’Bhibhlya na pipfundziso pinango pyakufunika kakamwe toera kupangiza kuti tisalemedza utongi ukulu wa Yahova. Mwandimomwene, Yahova asaphedza mbumba yace toera ilonge cilongero cakucena ca undimomwene cakuti cisaaphedza kuntumikira mwakuphatana.—Sof. 3:9.

³⁰ Onsene analambira Yahova asawangiswa na ntendere na kuphatana kunagumanika mu mpingo. Tisaona kukwanirisika kwa pikiro ya Yahova yakuti: “Ine ndinadzakucitisani kuti mukhale pabodzi pene, ninga mabira n’thanga.” (Mik. 2:12) Toera kukhala antendere na akuphatana, tisafunika kupitiriza kubvera mitemo yakulungama ya Yahova.

³¹ Anyakutsandzaya ndi ale anacita khundu mu mpingo wakucena wa Yahova! Kudziwika na dzina ya Yahova ndi cinthu cakufunika kakamwe kupiringana pinthu pinango. Natenepa, mu ndzidzi unakhala ife na uxamwali na Yahova tisafunika kuwangisira toera kubvera mitemo yace yakulungama na kupanga anango thangwi ya pyenepi.—2 Akor. 3:18.