“PAKUTOMA, Mulungu acita kudzulu na dziko yapantsi,” pontho pinthu pyonsene pidacita iye pikhali “mwadidi kakamwe.” (Gen. 1:1, 31) Yahova acita anthu toera akhale na umaso wadidi ntsogolo. Mbwenye kukhonda bvera kwa Adhamu na Eva, kwacitisa anthu kukhonda kukhala akutsandzaya. Ngakhale tenepo cifuniro ca Yahova thangwi ya dziko yapantsi na anthu nee cacinja. Mulungu alonga kuti dzindza yakubvera ya Adhamu mbidapulumuswa, pontho iye mbadakhazikisa ulambiri wandimomwene, mbafudza anthu akuipa pabodzi na mabasa awo. (Gen. 3:15) Pyonsene pinadzakhala pontho “mwadidi kakamwe.” Yahova anaphatisira Mwanace Yezu Kristu toera kucita pyenepi. (1 Juw. 3:8) Natenepa tisafunika kudzindikira basa idapaswa Kristu na Mulungu.—Mabasa 4:12; Afil. 2:9, 11.

² Tinganyerezera pya basa iri na Kristu, tisadzindikira kuti basa yace isaphataniza makhundu mazinji. Yezu asatumikira ninga Mpulumusi wathu, Nyantsembe Wankulu, Nsolo wa mpingo Wacikristu, pontho cincino ndi Mambo wa Umambo wa Mulungu. Kunyerezera mwadidi mabasa anewa, kunatiphedza toera kupereka takhuta thangwi ya masasanyiro a Mulungu, pontho toera kuthimizira ufuni wathu kuna Kristu Yezu. Bhibhlya isafokotoza mabasa ace anango akusiya-siyana.

 ³ Mu utumiki wace pa dziko yapantsi, Kristu apangiza pakweca kuti anthu akubvera anakwanisa kukhala na uxamwali na Mulungu kubulukira mwa iye. (Juw. 14:6) Ninga Mpulumusi, Yezu apereka umaso wace ninga ciomboli toera kupulumusa anthu azinji. (Mat. 20:28) Natenepa Yezu nee ndi citsandzo ca makhaliro adidi basi kuna ife, mbwenye ndi wakufunikambo kakamwe toera cifuniro ca Yahova kuna anthu cikwanirisike. Ndiye basi anatiphedza toera tikhale pontho na uxamwali na Mulungu. (Mabasa 5:31; 2 Akor. 5:18, 19) Kufa kwa Yezu na kulamuswa kwace muli akufa, kwafungula njira toera anthu akubvera akhale na umaso wakukhonda mala mu Umambo wa Mulungu.

⁴ Ninga Nyantsembe Wankulu, Yezu ‘asatibvera ntsisi thangwi yakufewa kwathu,’ pontho apereka ntsembe yakuphimbira madawo a atowereri ace adaperekeka pa dziko yapantsi. Mpostolo Paulu alonga: “Ife nee tiri na nyantsembe wankulu wakuti nee anakwanisa kutibvera ntsisi thangwi yakufewa kwathu, mbwenye tiri na nyantsembe wankulu wakuti ayeserwa m’makhundu onsene ninga ife, mbwenye iye apitiriza kukhala wakusowa madawo.” Buluka penepo, Paulu awangisa anthu akhakhulupira Yezu Kristu kuti abandze mwai ukhali na iwo toera akhale na uxamwali na Mulungu. Iye alonga: “Tendeni tifendedzere ku mpando waumambo wa Mulungu, wakuti asapangiza kukoma ntima kukulu; tiphembere kuna iye na cinyindiro toera atibvere ntsisi, pontho apangize kukoma ntima kukulu kuna ife toera atiphedze pa ndzidzi wakuthema.”—Aheb. 4:14-16; 1 Juw. 2:2.

⁵ Pontho Yezu ndi Nsolo wa mpingo Wacikristu. Ninga pikhacitika mu ndzidzi wa apostolo, ifembo lero nee tisafuna munthu unango toera akhale ntsogoleri wathu. Yezu asaphatisira nzimu wakucena na akumbizi ang’ono akuthema toera kutsogolera mabira ace. Akumbizi anewa  asadziwa kuti anadzatawira pamaso pa Yezu na pa Babace wakudzulu thangwi ya njira inatsalakana iwo mabira a Mulungu. (Aheb. 13:17; 1 Ped. 5:2, 3) Yahova aphatisira profesiya toera kulonga tenepa thangwi ya Yezu: “Onani! Ine ndan’khazikisa ninga mboni wa madzindza.” (Iza. 55:4) Yezu apangiza kukwanirisika kwa profesiya ineyi pidalonga iye kuna anyakupfundzace: “Lekani kucemerwa atsogoleri, thangwi Ntsogoleri wanu ndi m’bodzi basi, Kristu.”—Mat. 23:10.

⁶ Yezu apangiza kuti ali na ntima wadidi, pontho asafuna kutiphedza, iye alonga: “Bwerani kuna ine imwe monsene adaneta na adalemerwa, ine ndinadzakupumisani. Kwatani goli yanga mbamupfundza kubulukira mwa ine, thangwi ndine wakukhurudzika na wakucepeseka, natenepa munadzagumana ciwangiso. Goli yanga ndi yakukhonda nentsa, pontho ntolo wanga ndi wakululupa.” (Mat. 11:28-30) Yezu Kristu asatsogolera mpingo Wacikristu munjira yadidi na yakubalangaza. Pyenepi pisapangiza kuti iye ndi “nkumbizi wadidi” ninga Babace, Yahova Mulungu.—Juw. 10:11; Iza. 40:11.

⁷ Mu tsamba yace yakutoma kuna Akorinto, Paulu afokotoza khundu inango ya basa ya Yezu Kristu, mbalonga: “Mbwenye pinthu pyonsene pingadzakhala pantsi pace, penepo Mwana anadzabverambo Mulungu adaikha pinthu pyonsene pantsi pace, toera Mulungu akhale Ntongi m’bodzi basi wa pinthu pyonsene.” (1 Akor. 15:25, 28) Mbadzati kubwera pa dziko yapantsi, Yezu akhali “nyabasa waluso” wa Mulungu, pontho ndiye adatoma kucitwa na Mulungu. (Mis. 8:22-31) Pidatumwa Yezu mbabwera pa dziko yapantsi, ndzidzi onsene iye akhacita cifuno ca Mulungu.  Iye apirira mayesero makulu, pontho afa wakukhulupirika kuna Babace. (Juw. 4:34; 15:10) Nakuti Yezu akhali wakhulupirika mpaka kufa, Mulungu amulamusa mbaenda kudzulu, pontho an’khazikisa ninga Mambo wa Umambo wa Mulungu kudzulu. (Mabasa 2:32-36) Ninga mambo, Yezu Kristu apaswa na Mulungu mphambvu yakutsogolera aanju azinji kakamwe toera kubulusa mautongi na kufudza uipi onsene pa dziko yapantsi. (Mis. 2:21, 22; 2 Ates. 1:6-9; Apok. 19:11-21; 20:1-3) Buluka penepo, Umambo wa Mulungu kudzulu, wakuti usatsogolerwa na Kristu unadzatonga dziko yonsene yapantsi.—Apok. 11:15.

⁸ Yezu Kristu wakuti tisafunika kuntowezera ndi waungwiro. Iye apaswa basa yakutitsalakana. Toera titsalakanwe mwaufuni tisafunika kupitiriza kukhala akukhulupirika kuna Yahova, mbatifamba pabodzi na gulu yace yakuti ikupitiriza kuthambaruka.

⁹ Atowereri a Yezu a mu ndzidzi wa apostolo akhadziwa mwadidi basa idapaswa Kristu na Mulungu. Toera kupangiza pyenepi, iwo akhaphata basa mwakuphatana, pontho akhabvera pitsogolero pikhapaswa iwo na Kristu kubulukira mu nzimu wakucena. (Mabasa 15:12-21) Mpostolo Paulu alonga thangwi yakuphatana kwa mpingo wa Akristu akudzodzwa pidalonga iye: “Ife tisafunika kulonga undimomwene, mbatipangiza ufuni, munjira ineyi tinakwanisa kukula mu pinthu pyonsene, mwakubverana na Kristu, wakuti ndi nsolo. Kubulukira mwa iye, manungo onsene asakhala akuphatana mwadidi, khundu ibodzi na ibodzi mbiphedzana na indzace toera kupereka pinafuna manungo. Khundu ibodzi na ibodzi ingaphata basa mwadidi, pisaphedza toera manungo akule, mbakhala akuwanga okhene mwaufuni.”—Aef. 4:15, 16.

 ¹⁰ Munthu m’bodzi na m’bodzi mu mpingo angakhala wakubverana na ndzace mbatsogolerwa na Kristu toera kuphata basa pabodzi, mpingo usathambaruka, pontho usapangiza ufuni wakuti “usaphedza anthu toera kukhala akuphatana kakamwe.”—Juw. 10:16; Akol. 3:14; 1 Akor. 12:14-26.

¹¹ Pinthu pinacitika mu dziko pyakuti pisakwanirisa maprofesiya a m’Bhibhlya, pisapangiza kuti kutomera mu caka 1914 Yezu Kristu apaswa mphambvu ya Umambo. Cincino iye akutonga pakati pa anyamalwa ace. (Mas. 2:1-12; 110:1, 2) Pyenepi pisabvekanji kuna anthu anakhala pa dziko yapantsi? Pisabveka kuti mwakukhonda dembuka Yezu anadzapangiza mphambvu zace ninga Mambo wa amambo, Mbuya wa ambuya pakutonga anyamalwa a Mulungu. (Apok. 11:15; 12:10; 19:16) Pyenepi pingacitika, Yahova anakwanirisa pikiro idacita iye pakutoma yakupulumusa anthu anam’bvera. (Mat. 25:34) Ife tiri akutsandzaya kakamwe thangwi yakudzindikira basa idapaswa Kristu na Mulungu. Natenepa, tendeni tipitirize kukhala akuphatana mu ndzidzi unacita ife basa yakumwaza mphangwa pa dziko yonsene yapantsi, inatsogolerwa na Kristu mu ntsiku zino zakumalisa.