PA DZIKO yonsene yapantsi, pana misoka mizinji ya uphemberi, ya ndale, ya malonda na misoka inango mizinji kakamwe. Misoka ineyi iri na makhaliro, pifuno na maonero akusiyana. Mbwenye pana nsoka ubodzi wakuti ndi wakusiyana kakamwe na misoka yonsene. Mafala a Mulungu asapangiza pakweca kuti nsoka unoyu ndi wa Mboni za Yahova.

² Mphyakutsandzayisa kakamwe kudziwa kuti imwe muli mu nsoka unoyu peno mu gulu ineyi. Pidadziwa imwe cifuno ca Mulungu mwatoma kucicita. (Mas. 143:10; Aroma 12:2) Cincino ndimwe m’mwazi mphangwa waphinga anatumikira pabodzi na nsoka wa abale aufuni a pa dziko yonsene yapantsi. (2 Akor. 6:4; 1 Ped. 2:17; 5:9) Ninga pinalonga Bhibhlya, kucita pyenepi kunakuphedzani toera mukhale na nkhombo zizinji na kutsandzaya kwandimomwene. (Mis. 10:22; Marko 10:30) Thangwi yakucita kwanu cifuno ca Yahova mwakukhulupirika, mukukhunganyika toera mukhale na umaso wadidi ntsogolo mbamukhala kwenda na kwenda.—1 Tim. 6:18, 19; 1 Juw. 2:17.

³ Pa dziko yonsene yapantsi, Nciti wathu Wankulu ali na gulu ibodzi basi yakuti ndi yakusiyana kakamwe na inango. Gulu ineyi isatsogolerwa na Yahova wakuti ndi Nsolo peno mwanaciro wa pinthu pyonsene. Ife tisan’nyindira kakamwe. Iye ndi Ntongi wathu, Nyakukhazikisa Mitemo yathu, pontho ndi Mambo wathu. (Iza. 33:22) Nakuti  Mulungu asacita pinthu mwakulinganira, iye asatitawirisa toera ‘tiphate basa pabodzi na iye’ mbaticita cifuniro cace.—2 Akor. 6:1, 2.

⁴ Mu ndzidzi wakuti kumala kwa makhaliro akuipa kuli cifupi, ife tisapitiriza kutsogolerwa na Mambo adakhazikiswa, Kristu Yezu. (Iza. 55:4; Apok. 6:2; 11:15) Yezu akhadalongeratu kuti atowereri ace mbadacita pizinji m’basa yakumwaza mphangwa kupiringana pidacita iye pikhali iye pa dziko yapantsi. (Juw. 14:12) Pyenepi mbapidacitikadi, thangwi atowereri ace mbadathimizirika kakamwe, pontho mbadacita basa yakumwaza mphangwa m’mbuto zonsene. Iwo mbadamwaza mphangwa za Umambo pa dziko yonsene yapantsi.—Mat. 24:14; 28:19, 20; Mabasa 1:8.

⁵ Mbwenye mwakubverana na pidalonga Yezu, basa yakumwaza mphangwa inadzamala ndzidzi udakhazikisa Yahova ungafika. Pinthu pinalongwa m’Bhibhlya pyakuti piri kucitika cincino pisapangiza kuti ntsiku ikulu na yakugopswa ya Yahova iri dhuzi.—Yoeli 2:31; Sof. 1:14-18; 2:2, 3; 1 Ped. 4:7.

⁶ Tingadziwa pinafuna Yahova mu ntsiku zino zakumalisa, tisafunika kuwangisira toera kupicita. Toera kucita pyenepi, tisafunika kudziwa mwadidi kuti gulu ya Yahova isaphata tani basa, buluka penepo mbatiphedzera na ntima onsene gulu ineyi. Gulu ya Yahova isaphatisira midida, matongero, miyambo, mitemo na pipfundziso pyonsene pinagumanika m’Mafala a Mulungu.—Mas. 19:7-9.

⁷ Atumiki a Yahova angaphatisira pinalonga Bhibhlya, asaphata basa pabodzi mwakuphatana na mwantendere. (Mas. 133:1; Iza. 60:17; Aroma 14:19) Ufuni usacitisa abale athu a m’mbuto zonsene kukhala akuphatana. Ife tisakulumizwa, pontho tisatsogolerwa na ufuni. (Juw. 13:34, 35; Akol. 3:14) Thangwi yakuphatana kweneko  kunatipasa Mulungu, tisapitiriza kufamba pabodzi na khundu yakudzulu ya gulu ya Yahova.

⁸ Mprofeta Izaiya, Ezekiyeli na Dhanyeli aona masomphenya a khundu yakudzulu ya gulu ya Yahova. (Iza., kapitulu 6; Ezek., kapitulu 1; Dhan. 7:9, 10) Mpostolo Juwau aonambo masomphenya a khundu ineyi, pontho pidalemba iye m’bukhu ya Apokalipse pisatiphedza kudziwa mwadidi kuti pinthu piri tani kudzulu. Iye aona Yahova pa mpando wace waumambo, na aanju akuti akhalonga: “Wakucena, wakucena, wakucena ndi Yahova Mulungu, Wamphambvu Zonsene, wakuti akhalipo, alipo, pontho akubwera.” (Apok. 4:8) Juwau aonambo “mwanabira adalimira pakati-nakati pa mbuto inagumanika mpando waumambo.” Mwanabira wa Mulungu ndi Yezu Kristu.—Apok. 5:6, 13, 14; Juw. 1:29.

⁹ Masomphenya anewa anapangiza Yahova mbali pa mpando wace waumambo asatiphedza kudziwa kuti ndiye anatsogolera gulu yace. Thangwi ya Yahova na utongi wace 1 Kronika 29:11, 12 isalonga: “Imwe Yahova, ukulu, mphambvu, mbiri, kubalika na cilemedzo ndi pyanu; thangwi pinthu pyonsene piri kudzulu na pa dziko yapantsi ndi pyanu. Umambo ndi wanu imwe Yahova. Imwe musakwizika mwekhene mbamukhala nsolo padzulu pa onsene. Mpfuma na mbiri pisabuluka kuna imwe, pontho imwe musatonga pinthu pyonsene. M’manja mwanu muli na mphambvu, pontho djanja yanu inakwanisa kukuza munthu na kupasa mphambvu anthu onsene.”

¹⁰ Yezu Kristu wakuti asaphata basa pabodzi na Yahova, ali pa mbuto yakupambulika kakamwe kudzulu, pontho apaswa mphambvu kakamwe na Yahova. Mwandimomwene, Mulungu “aikhambo pinthu pyonsene pantsi  pa manyalo ace, mbamuikha ninga nsolo wa pinthu pyonsene mu mpingo.” (Aef. 1:22) Mpostolo Paulu alonga thangwi ya Yezu: “Mulungu ankuza mbamuikha pa mbuto yapadzulu kakamwe; pontho, mwakukoma ntima iye ampasa dzina yakuti iri padzulu pa madzina anango onsene, toera mabondo a onsene ali kudzulu, pa dziko yapantsi, na pantsi pa mataka, agodame mu dzina ya Yezu, pontho toera anthu onsene alonge pakweca kuti Yezu Kristu ndi Mbuya, toera kupasa mbiri Mulungu Baba.” (Afil. 2:9-11) Natenepa tinakwanisa kunyindira na ntima onsene kuti Yezu Kristu ndi ntsogoleri waulungami.

¹¹ M’masomphenya, mprofeta Dhanyeli aona wa Ntsiku zizinji mbadakhala pa mpando Wace waumambo, pontho pakhali ‘aanju pikwi pizinji mbakantumikira na aanju mamiliyau mazinji akuti akhadalimira patsogolo pace.’ (Dhan. 7:10) Bhibhlya isalonga kuti aanju anewa ndi ale ‘anaphata basa yakucena, adatumwa na Mulungu toera kuphedza ale anafuna kupulumuswa.’ (Aheb. 1:14) Iwo apaswa ‘pidzo pyakusiyana-siyana mu gulu ya Mulungu.’—Akol. 1:16.

¹² Tingakhala na ndzidzi wakupfundza mwadidi khundu yakudzulu ya gulu ya Yahova, tinabvesesa kuti Izaiya apibva tani pidaona iye masomphenya anapangiza “Yahova mbali nawa pa mpando waumambo wa cidzo cikulu,” pontho “padzulu pace pakhali na aserafi.” Izaiya alonga: “Dzedze kuna ine! Mwakukhonda penula ine ndinafa, thangwi ndine munthu wa mulomo wakukhonda cena, pontho ndisakhala pakati pa anthu a milomo  yakukhonda cena; thangwi maso anga aona Mambo, Yahova wa anyankhondo!” Mwandimomwene Izaiya adzumatirwa, pontho acepeseka pidaona iye kukula kwa gulu ya Yahova. Pyenepi pyamuwangisa kakamwe, thangwi pidabvundza Yahova kuti ndinatuma ani toera kucita basa yakupambulika yakutonga kwace, Izaiya alonga: “Ndiri pano! Nditumeni!”—Iza. 6:1-5, 8.

¹³ Kudzindikira na kupereka takhuta thangwi ya gulu ya Yahova kusakulumiza ife atumiki ace toera kucita pibodzi pyene. Mu ndzidzi unathambaruka gulu, ife tisafunika kuwangisira toera tifambe nayo pabodzi. Lero, ife tisawangisira toera kupangiza kuti tisanyindira gulu ya Yahova.

¹⁴ Kapitulu 1 ya profesiya ya Ezekiyeli isapangiza Yahova mbakatsogolera ngolo ikulu kakamwe yakudzulu. Ngolo ineyi yakudzumatirisa isaimirira khundu ya gulu yakukhonda kuoneka ya Yahova. Kutsogolera kwace ngolo kusapangiza kuti Iye asatsogolera gulu yace mwaufuni toera icite pinthu mwakubverana na cifuniro cace.—Mas. 103:20.

¹⁵ Roda ibodzi na ibodzi ya ngolo ineyi ikhadapitisirana na inango yakulandana na indzace. Ndi thangwi yace maroda anewa akhakwanisa kuenda “kukhundu ibodzi na ibodzi mwa makhundu manai.” (Ezek. 1:17) Iwo akhakwanisa kuzungunuka mwakucimbiza. Mbwenye ngolo ineyi nee ikhafamba yokha mwakusowa ntsogoleri. Pyenepi pisapangiza kuti Yahova nkhabe tawirisa kuti gulu yace iende konsene kwene kunafuna iyo. Ezekiyeli 1:20 isalonga: “Iwo akhaenda kukhaatsogolera nzimu toera kuenda.” Natenepa, Yahova asaphatisira nzimu wace toera kucitisa kuti gulu yace iende konsene kunafuna iye. Ndi  thangwi yace tisafunika kubvundzika: ‘Ndisafamba pabodzi na gulu ineyi?’

¹⁶ Kufamba pabodzi na gulu ya Yahova kusaphataniza pizinji kusiyapo kugumanika pa misonkhano na kuenda kamwaza mphangwa. Pakutoma, kusaphataniza kuthambaruka na kukula mwauzimu. Ndzidzi onsene tisafunika ‘kudzindikira kuti ndi pinthu pipi pyakufunika kakamwe,’ pontho tisafunika kudya cakudya cauzimu cinapereka gulu Yahova. (Afil. 1:10; 4:8, 9; Juw. 17:3) Kusiyapo pyenepi, tisafunika kukumbuka kuti toera nsoka uthambaruke usafunika kukhala wakubverana na wakuphatana. Natenepa tisafunika kuphatisira mwadidi mpfuma yauzimu na pyonsene pinatipasa Yahova toera tikwanirise basa yace. Tingafamba pabodzi na ngolo ya Yahova, pinacita ife pinabverana na mphangwa zinamwaza ife.

¹⁷ Na ciphedzo ca gulu ya Yahova, ife tisapitiriza kucita cifuniro ca Mulungu. Kumbukani kuti Anatsogolera ngolo ineyi yakudzulu ndi Yahova. Natenepa tingafamba pabodzi na ngolo yace, tinapangiza kuti tisamulemedza, pontho tisan’nyindira ninga pakuthawira pathu. (Mas. 18:31) Bhibhlya isalonga: “Yahova anadzapasa mphambvu mbumba yace. Yahova anadzapasa nkhombo anthu ace toera akhale muntendere.” (Mas. 29:11) Nakuti tisacita khundu ya nsoka wa Yahova, tisapaswa mphambvu, ntendere na nkhombo zinapasa iye atumiki ace. Mwakukhonda penula, mu ndzidzi unapitiriza ife kucita cifuno ca Yahova, iye anatipasa nkhombo cincino mpaka kwenda na kwenda.