MAFALA anewa a mpostolo Paulu anagumanika pa Ahebheri 13:7, anakwanisambo kuthumburuzwa tenepa: “Kumbukani ale anakutongani.” Pa Pentekoste ya 33 P.K.K., apostolo akukhulupirika a Mbuya Yezu Kristu akwanirisa basa ineyi ninga mathubo akutonga akuti akhatsogolera na kupereka pitsogolero kuna mpingo Wacikristu wakuti ukhadamala kwene kukhazikiswa. (Mabasa 6:2-4) Cifupi na caka 49 P.K.K., anango akuti nee akhali apostolo a Yezu akhacitambo khundu ya nsoka unoyu wa mathubo akutonga. Pidakhazikiswa mwambo wakusidzwa, mathubo akutonga akhaphatanizambo “apostolo pabodzi na akulu a mpingo” a mu Yerusalemu. (Mabasa 15:1, 2) Iwo akhatsalakana mabasa akuti akhakhuya Akristu a m’mbuto zonsene. Iwo akhatumiza matsamba na mitemo yakuti ikhaphedza mipingo, pontho ikhacitisa anyakupfundza toera akhale akubverana mu pinthu pyonsene. Mipingo ikhabvera pitsogolero pya mathubo akutonga ikhapaswa nkhombo na Yahova, pontho ikhathamburuka.—Mabasa 8:1, 14, 15; 15:22-31; 16:4, 5; Aheb. 13:17.

² Pidamala kufa apostolo, anthu atoma kusandukira Mulungu. (2 Ates. 2:3-12) Ninga pikhadalonga Yezu mu nsangani wace wa tirigu na nyakasongole, nyakasongole (Akristu akusangizira) abzwalwa pakati pa tirigu (Akristu akudzodzwa). Mu pyaka pizinji misoka ineyi miwiri yatawiriswa kukula pabodzi mpaka kufika ndzidzi wakubvuna  wakuti “ndi kumala kwa makhaliro a dziko.” (Mat. 13:24-30, 36-43) Mu ndzidzi unoyu m’bodzi na m’bodzi wa Akristu akudzodzwa apitiriza kutambira ciphedzo ca Yezu Kristu, mbwenye pa dziko yapantsi nee pakhali na mathubo akutonga peno njira inango yakudziwika yakuti Yezu akhaiphatisira toera kupereka pitsogolero kuna atowereri ace. (Mat. 28:20) Mbwenye iye akhadalonga kuti mu ndzidzi wakubvuna mbapadaoneka macinjo.

³ “Mwandimomwene, mbani m’bandazi wakukhulupirika na wandzeru?” Toera kutawira mbvundzo unoyu, Yezu alonga citsandzo peno nsangani wakuti mbudapangiza cidzindikiro “cakumala kwa makhaliro a dziko.” (Mat. 24:3, 42-47) Yezu apangiza kuti m’bandazi wakukhulupirika na wandzeru mbadapereka cakudya cauzimu “pa ndzidzi wakuthema.” Mu ndzidzi wa apostolo, Yezu aphatisira nsoka wa anthu toera kutsogolera mpingo. Munjira ibodzi ene, m’bandazi wakukhulupirika na wandzeru anaphatisirwa na Yezu mu ntsiku zino zakumalisa nee ndi munthu m’bodzi basi.

⁴ Mbani adasankhula Yezu toera kudyesa atowereri ace? Iye asankhula Akristu akudzodzwa ali pa dziko yapantsi. Bhibhlya isalonga kuti anthu anewa ndi ninga “nsoka wa amambo akuti ndi anyantsembe” adapaswa basa ‘yakudziwisa makhaliro akufunika kakamwe a Ule adaacemera toera abuluke ncidima kuti aende mu ceza cace cadidi kakamwe.’ (1 Ped. 2:9; Mal. 2:7; Apok. 12:17) Kodi Akristu onsene akudzodzwa ali pa dziko yapantsi asacita khundu ya m’bandazi wakukhulupirika na wandzeru? Nkhabe. Pidadyesa Yezu mwacirengo mwinji wa amuna akukwana 5.000 kusiyapo akazi na ana, iye apereka cakudya kuna anyakupfundzace, anyakupfundza aciperekambo  kuna mwinji wa anthu. (Mat. 14:19) Iye adyesa azinji kubulukira mwa anthu akucepa. Lero iye asaperekambo cakudya cauzimu munjira ibodzi ene.

⁵ Natenepa “ntumiki wakukhulupirika na wandzeru” ndi nsoka ung’ono wa abale akudzodzwa anakhunganya cakudya cauzimu na kucipereka pa ndzidzi wakuonekera kwa Kristu. (Luka 12:42) Mu ntsiku zino zakumalisa, abale akudzodzwa anacita khundu ya “m’bandazi wakukhulupirika na wandzeru” asatumikira pabodzi ku ofesi ikulu. Lero, abale anewa akudzodzwa ndi Mathubo Akutonga a Mboni za Yahova.

⁶ Kristu asaphatisira Mathubo anewa toera kufokotozera anthu maprofesiya a m’Bhibhlya anakwanirisika na kupereka pitsogolero pa ndzidzi wakuthema pyakuti anaphatisira tani uphungu wa m’Bhibhlya mu umaso wawo wa ntsiku na ntsiku. Cakudya ceneci cisagawizwa kubulukira m’mipingo ya Mboni za Yahova. (Iza. 43:10; Agal. 6:16) Mu ndzidzi wakale, ntumiki peno bitcu, akhanyindirwa mpaka kukhala nyakuonera nyumba. Munjira ibodzi ene, m’bandazi wakukhulupirika na wandzeru akhazikiswa toera kuyang’anira basa ya Kristu pa dziko yapantsi. Natenepa m’bandazi wakukhulupirika na wandzeru ali na basa yakuyang’anira kobiri, basa yakumwaza mphangwa, maprogramu a misonkhano ya cisa na ya gawo, kukhazikisa ayang’aniri toera kutumikira m’mbuto zakusiyana-siyana mu gulu na basa yakucita mabukhu. Munjira ineyi, ‘anyabasa a panyumba’ asaphedzeka na pyenepi.—Mat. 24:45.

⁷ Mphapo, mbani ‘anyabasa a panyumba’? Ntawiro wacigwagwa, ndi ale anadyeswa. Pakutoma anyabasa onsene  a panyumba akhali Akristu akudzodzwa. Mukupita kwa ndzidzi ‘anyabasa a panyumba’ adzaphatanizambo mwinji ukulu wa “mabira anango.” (Juw. 10:16) Misoka miwiri ene isadya cakudya cauzimu cinaperekwa na m’bandazi wakukhulupirika.

⁸ Mu ndzidzi wa nyatwa ikulu, Yezu angabwera toera kutonga dziko ino yakuipa, anadzapasa m’bandazi wakukhulupirika basa ya “kuonera pinthu pyace pyonsene.” (Mat. 24:46, 47) Mu ndzidzi unoyu, ale anacita khundu ya m’bandazi wakukhulupirika pabodzi na Akristu onsene akudzodzwa anadzatambira muoni wakuenda kudzulu, iwo onsene akukwana 144.000, anadzatonga pabodzi na Kristu kudzulu. Natenepa pa dziko yapantsi nee panadzakhalabve m’bandazi wakukhulupirika na wandzeru, mbwenye Yahova na Yezu anadzapereka pitsogolero kuna ale anafuna kukhala pantsi pa Umambo Waumesiya kubulukira kwa ale adakhazikiswa toera kutumikira ninga “atsogoleri.”—Mas. 45:16.

⁹ Tiri na mathangwi mazinji toera ‘kukumbuka ale anatsogolera pakati pathu’ na kuanyindira. Thangwi yanji kucita pyenepi kusatiphedza? Mpostolo Paulu alonga: “Iwo asakuonerani ninga kuti anadzatawirira mulando. Mungacita pyenepi, iwo anaphata basa yawo mwakukomerwa, tayu mwakudungunya, thangwi pyenepi mbapidabweresa nyatwa kuna imwe.” (Aheb. 13:17) Natenepa tisafunika kubvera pitsogolero pya ale anatitsogolera thangwi iwo asatiyang’anira toera tikhale akutsidzikizika, pontho toera pinthu pitifambire mwadidi mwauzimu.

¹⁰ Pa 1 Akorinto 16:14, Paulu alonga: “Pinthu pyonsene pinacita imwe, piciteni mwaufuni.” Natenepa, pisankhulo pinacitwa na ale anatsogolera atumiki a Mulungu pisacitwa  mwakubverana na n’khaliro wakufunika kakamwe, ufuni. Thangwi ya ufuni, 1 Akorinto 13:4-8 isalonga: “Ufuni ndi wakupirira na wakukoma ntima. Ufuni nkhabe ntcanje. Nkhabe kugaya, nkhabe kudzikuza, nkhabe kucita pinthu pyakukhonda thema, nkhabe kucita pinafuna iwo basi, nkhabe kuipirwa mwakucimbiza. Nkhabe kukoya pinthu pyakuipa muntima. Nkhabe komerwa na pinthu pyakuipa, mbwenye usakomerwa na undimomwene. Usaphimbira pinthu pyonsene, usakhulupira pinthu pyonsene, usadikhira pinthu pyonsene, usapirira pinthu pyonsene. Ufuni nkhabe kumala.” Nakuti ufuni ndi unatsogolera pisankhulo pyonsene pinacitwa toera kuphedza atumiki a Yahova, nee tisapenula kuti kutowezera pitsogolero pya ale anatitsogolera kusatiphedza. Kusiyapo pyenepi, pitsogolero pyenepi ndi cipangizo ca ufuni wa Yahova.

¹¹ Ninga pikhacitika mu ndzidzi wa apostolo, anthu anaphatisira Yahova toera kutsogolera atumiki ace ndi akusowa ungwiro. Natenepa Yahova asaphatisira anthu akusowa ungwiro toera kukwanirisa cifuno cace. Nowa acita arka, pontho amwaza mphangwa zakuti Mulungu anafudza anthu akuipa. (Gen. 6:13, 14, 22; 2 Ped. 2:5) Mose akhazikiswa ninga ntsogoleri toera kubulusa mbumba ya Yahova mu Ejitu. (Eks. 3:10) Anthu akusowa ungwiro aphatisirwa toera kulemba Bhibhlya. (2 Tim. 3:16; 2 Ped. 1:21) Maseze Yahova asaphatisira anthu akusowa ungwiro toera kutsogolera basa yakumwaza mphangwa na kupfundzisa, ife tisapitiriza kunyindira gulu ya Mulungu. Tisacita pyenepi thangwi tisadziwa kuti mwakusowa ciphedzo ca Yahova gulu nee mbidakwanisa kucita pinthu pyonsene pinacita iyo cincino. M’bandazi wakukhulupirika asapangiza kuti asatsogolerwa na nzimu wa Mulungu thangwi yakupirira pinentso pyonsene. Lero, gulu ya Yahova isatambira nkhombo zizinji. Ndi thangwi yace ife tisaphedzera na kunyindira na ntimathu onsene gulu yace.

¹² Onsene ali na mabasa mu mpingo asapangiza kuti asanyindira m’bandazi angatawira mbacita mwadidi mabasa anapaswa iwo. (Mabasa 20:28) Ninga amwazi mphangwa a Umambo, tisamwaza mphangwa mwaphinga nyumba na nyumba, tisacita maulendo akubwereza na kucitisa mapfundziro a Bhibhlya. (Mat. 24:14; 28:19, 20) Toera kuphedzeka na cakudya cauzimu cinaperekwa na m’bandazi wakukhulupirika, ife tisakhunganyika na kugumanika pa misonkhano masumana onsene kuphatanizambo misonkhano ya cisa na ya gawo. Tisaphedzeka na ciwangiso cinatambira ife kuna unango na ndzace tingagumanyikana na abale na alongo athu pa misonkhano ineyi.—Aheb. 10:24, 25.

¹³ Tingaphedzera gulu na pyakupereka pyathu tisapangiza kuti tisainyindira. (Mis. 3:9, 10) Tingaona kuti abale athu asafuna ciphedzo, ife tisaaphedza mwakucimbiza. (Agal. 6:10; 1 Tim. 6:18) Tisacita pyenepi thangwi tisafuna abale athu, pontho ndzidzi onsene tisasaka njira toera kupangiza kuna Yahova na kuna gulu yace kuti tisapereka takhuta thangwi ya pinthu pyonsene pyadidi pinacitirwa ife.—Juw. 13:35.

¹⁴ Njira inango inapangiza ife kuti tisanyindira gulu ndi kuphedzera pisankhulo pinacitwa. Pyenepi pisaphataniza kubvera mwakucepeseka ale anatsogolera ninga ayang’aniri a cisa na akulu a mpingo. Abale anewa ali mu nsoka wa ‘ale anatitsogolera’ akuti tisafunika kuabvera. (Aheb. 13:7, 17) Ngakhale tikhonde kubvesesa mwadidi pisankhulo pinango pinacitwa, mbwenye tisadziwa kuti kuphedzera pisankhulo pyenepi kunatiphedza. Pontho Yahova asatipasa nkhombo thangwi yakubvera Mafalace na gulu yace. Kusiyapo pyenepi tisapangiza kuti tisabvera Mbuyathu, Yezu Kristu.

 ¹⁵ Mwandimomwene, ife tiri na mathangwi adidi toera kunyindira m’bandazi wakukhulupirika na wandzeru. Sathani, wakuti ndi mulungu wa makhaliro akuipa a dziko ino, akucita pyonsene pinakwanisa iye toera kupswipisa dzina ya Yahova na gulu yace. (2 Akor. 4:4) Mbwenye ife tisafunika kucalira misampha ya Sathani. (2 Akor. 2:11) Iye asadziwa kuti “ndzidzi wace wasala pang’ono basi” toera aponywe mu djenje, ndi thangwi yace asacita pyenepi toera kupeusa anthu azinji. (Apok. 12:12) Mbwenye, mu ndzidzi unacita Sathani pyenepi, tisafunika kucita pyonsene pinakwanisa ife toera kuwangisa uxamwali wathu na Yahova. Pontho tisafunika kunyindira kakamwe Yahova na njira inaphatisira iye toera kutsogolera atumiki ace mu ntsiku zino. Kucita pyenepi kunaticitisa kukhala akuphatana na abale athu pa dziko yonsene yapantsi.