CIFUPI na pyaka 1.500 nduli, dzindza ya Izraeli ikhadziwika na dzina ya Yahova Mulungu. Buluka penepo Yahova “atoma kutawira anthu a madzindza anango, mbasankhula anango pakati pawo toera acemerwe na dzina yace.” (Mabasa 15:14) Mbumba yakuti mbidadziwika na dzina ya Yahova mbidacemerwa Mboni zace. Mbumba ineyi isanyerezera, pontho isacita pinthu pibodzi pyene mwakukhonda tsalakana kunakhala iyo pa dziko yapantsi. Mbumba ineyi ya Mulungu mbidakhala yakuphata thangwi ya basa iyi idapasa Yezu atowereri ace: “Natenepa, ndokoni mukacite anyakupfundza kuna anthu a madzindza onsene, mbamuabatiza mu dzina ya Baba, na ya Mwana na ya nzimu wakucena, apfundziseni toera abvere pinthu pyonsene pidakupangani ine.”—Mat. 28:19, 20.

² Pidaperekeka imwe kuna Yahova mbamubatizwa, mwadzakhala nyakupfundza wa Yezu Kristu. Imwe musacita khundu ya mbumba ya Mulungu ya pa dziko yonsene yapantsi yakuti ndi Akristu akuphatana, akuti nkhabe kusankhulana thangwi yakusiyana kwa dziko, dzindza, peno pinthu piri na iwo. (Mas. 133:1) Na thangwi ineyi imwe musafuna, pontho musalemedza abale na alongo mu mpingo. Panango anango a iwo ndi akusiyana na imwe thangwi ya dzindza yawo, dziko yawo peno thangwi  ya pidapfundza iwo, anthu akuti panango kale nee mbamudakwanisa kucita nawo uxamwali thangwi yakusiyana kweneku. Imwe musafuna kakamwe abale anu pa dziko yonsene kupiringana ufuni unakhala na imwe kuna anthu a pacisa, uphemberi, peno acibale.—Marko 10:29, 30; Akol. 3:14; 1 Ped. 1:22.

³ Khala anango asanentseka toera kusiya kusankhulana thangwi ya dzindza, ndale, misambo peno pinthu pinango, asafunika kunyerezera pya Akristu Aciyuda akutoma akuti asiya nsambo wakusankhula anthu a madzindza anango thangwi ya uphemberi wawo. Mwacitsandzo, pidatumwa Pedhru toera aende kunyumba ya Kornelyo, mwaufuni Yahova am’phedza toera akwanirise basa idampasa iye.—Mabasa, kapitulu 10.

⁴ M’masomphenya, Pedhru apangwa kuti aphe na kudya pinyama pyakuti Ayuda akhapiona ninga pyakukhonda cena. Pidakhonda iye, yabuluka fala kudzulu mbilonga: “Pinthu pidaceneswa na Mulungu, leka kupicemera pyakupswipa.” (Mabasa 10:15) Pyenepi pyacitisa Pedhru kucinja manyerezero ace toera akwanise kucita basa ikhafuna iye kupaswa na Mulungu, yakuenda kunyumba kwa munthu wakuti nee akhali Muyuda. Thangwi yakubvera pitsogolero pya Yahova, Pedhru apanga anthu akhadagumanyikana: “Imwe musadziwa mwadidi kuti Ayuda nkhabe kutawiriswa na mwambo toera kufendedzera peno kukhala pabodzi na munthu wa dzindza inango, mbwenye Mulungu andipangiza kuti nee ndisafunika kulonga munthu kuti ndi wakukhonda cena peno wakupswipiswa. Natenepa, pidandicemera imwe, ine ndabwera, nee kupenula.” (Mabasa 10:28, 29) Buluka penepo, Pedhru adzindikira kuti Kornelyo na anthu a panyumba pace akhali akutawirika kuna Yahova.

 ⁵ Saulo wa ku Tarso, wakuti akhali mfarisi wakupfundza kakamwe, akhafunika kucepeseka toera atome kucita uxamwali na anthu akuti kale nee akhabverana nawo. Kusiyapo pyenepi iye akhafunikambo kutowezera pitsogolero pyawo. (Mabasa 4:13; Agal. 1:13-20; Afil. 3:4-11) Tinakwanisa kuona kuti Serjio Paulu, Dhioniziyo, Dhamari, Filimoni, Onesimo na anango, pidatawira iwo mphangwa zadidi acinja manyerezero awo mbakhala anyakupfundza a Yezu Kristu.—Mabasa 13:6-12; 17:22, 33, 34; Filim. 8-20.

⁶ Mwakukhonda penula, ufuni wa abale na alongo mu mpingo wakuphedzani toera kuwangisa uxamwali wanu na Yahova pabodzi na gulu yace. Imwe mwaona ufuni unapangizwa na anyakupfundza andimomwene a Yezu Kristu, mwakubverana na pidalonga iye: “Ine ndinakupasani matongero mapswa kuti: Funanani unango na ndzace; ninga mudakufunani ine, imwembo mufunane unango na ndzace. Imwe mungafunana unango na ndzace, anthu onsene anadzindikira kuti ndimwe anyakupfundza anga.” (Juw. 13:34, 35) Pontho mwatoma kupereka takhuta kuna Yahova na gula yace, pidaona imwe kuti ufuni unapangiza abale na alongo mu mpingo ndi ubodzi ene unapangizwa na abale pa dziko yonsene yapantsi. Imwe  mukuona kukwanirisika kwa profesiya ya m’Bhibhlya inalonga pya kugumanyikana kwa anthu mu ntsiku zakumalisa toera kulambira Yahova mwantendere na mwakuphatana.—Mik. 4:1-5.

⁷ Nakuti lero pana pinthu pizinji pinacitisa anthu kugawana, anango asanyerezera kuti nkhabe kwanisika kuti anthu “a madziko onsene, a madzindza onsene, a mbumba zonsene na a pilongero pyonsene” akhale akuphatana. (Apok. 7:9) Nyerezerani kusiyana kwa anthu akuti asadziwa kakamwe pya tekinolojiya na anthu akuti asatowezera kakamwe misambo ya ndzidzi wakale. Anthu a dziko ibodzi ene peno a dzindza ibodzi ene nee asabverana thangwi ya uphemberi. Thangwi yakufuna kakamwe dziko yawo, anthu asakhala akugawana mu pinthu pya ndale. Munganyerezera kusiyana kwa anthu thangwi ya pinthu piri na iwo, na pinthu pinango pinaacitisa kugawana, kuphatana kwa anthu a madzindza onsene, a pilongero pyonsene, a mbumba zonsene na anthu a makhaliro akusiyana-siyana mbakhala mwantendere na kufunana unango na ndzace ndi pinthu pyakuti basi ene Mulungu Wamphambvu Zonsene asakwanisa kupicita.—Zak. 4:6.

⁸ Kuphatana kweneku ndi kwandimomwene, pontho pidaperekeka imwe mbamubatizwa ninga m’bodzi wa Mboni za Yahova mwatoma kucita khundu ya kuphatana kweneku. Nakuti kuphatana kweneku kusakuphedzani, imwe musafunika kuwangisira toera kuphatana kweneku kupitirize. Munakwanisa kucita pyenepi mungabvera mafala a mpostolo Paulu anagumanika pa Agalata 6:10: “Mu ndzidzi wakuti tinakwanisa kuphedza anango, tendeni tiphedze anthu onsene, mbwenye makamaka tiphedze anyakukhulupira andzathu.” Ife tisabverambo uphungu uyu: “Lekani kucita pinthu mwamapika peno  mwakudzikuza, mbwenye citani pinthu mwakucepeseka, mbamuona andzanu kukhala akulu kupiringana imwe. Lekani kunyerezera pinafuna imwe basi, mbwenye nyerezeranimbo pinafuna anango.” (Afil. 2:3, 4) Tingaona abale na alongo ninga munaonera Yahova, mbatikhonda kudzudzumika na maonekero awo akunja, tinapitiriza kukhala akutsandzaya, antendere, pontho tinabverana nawo mwadidi.—Aef. 4:23, 24.

⁹ Ninga pidalonga mpostolo Paulu mu nsangani wace, mpingo nee ndi wakugawika, mbwenye anthu ali mwenemu asatsalakanana unango na ndzace. (1 Akor. 12:14-26) Panango ife tisakhala kutali na abale na alongo anthu anango, ngakhale tenepo ife tisapitiriza basi na kuatsalakana. Abale athu anango angatcingwa, ife tisatsukwala kakamwe. Abale athu angafuna ciphedzo thangwi yakugwerwa na cidengwa cacibaliro peno nkhondo, tonsene tisasaka njira toera kuaphedza mwauzimu peno kuapasa pinthu pidasowa iwo.—2 Akor. 1:8-11.

¹⁰ Tonsene tisafunika kucita phembero thangwi ya abale athu ntsiku zonsene. Anango asayeserwa toera kucita pinthu pyakuipa. Anango asatamba nyatwa zakuti panango anthu azinji asazidziwa. Anangombo asatcingwa na andzawo akubasa, peno na anthu apanyumba pawo akuti nkhabe kutumikira Mulungu, mbwenye panango ndi akucepa anadziwa pyenepi. (Mat. 10:35, 36; 1 Ates. 2:14) Pyenepi pingacitika tisadzudzumika kakamwe thangwi ndife ninga banja ibodzi pa dziko yonsene yapantsi. (1 Ped. 5:9) Pakati pathu pana anthu anatumikira Yahova mwaphinga, anatsogolera basa yakumwaza mphangwa na mabasa anango m’mipingo. Pontho pana ale anayang’anira basa yakumwaza mphangwa pa dziko yonsene yapantsi. Ife tisafunika kuphataniza onsene m’maphembero  athu, tingacita pyenepi tinapangiza kuti tisaafuna, pontho tisaatsalakana maseze nee tinakwanisa kucita pizinji toera kuaphedza.—Aef. 1:16; 1 Ates. 1:2, 3; 5:25.

¹¹ Na nyatwa zonsene zinaoneka pa dziko mu ntsiku zino zakumalisa, mbumba ya Yahova isafunika kukhala yakukhunganyika toera kuphedzana unango na ndzace. M’midzidzi inango, pidengwa pyacibaliro ninga piteketeke na kudzala kwa madzi, pisacitisa kukhala kwafunika kukhunganya pinthu pizinji kakamwe toera kupasa abale na alongo. Akristu a mu ndzidzi wa apostolo apangiza citsandzo cadidi kukhundu ineyi. Thangwi yakukumbuka uphungu udapereka Yezu, mwakutsandzaya anyakupfundza a ku Antiyokiya atumiza pinthu kuna abale a ku Yudeya. (Mabasa 11:27-30; 20:35) Mukupita kwa ndzidzi mpostolo Paulu apanga Akristu a ku Korinto toera aphedzere masasanyiro adacitwa toera kuphedza abale munjira yadidi. (2 Akor. 9:1-15) Lero, abale angatamba nyatwa mbafuna ciphedzo, gulu ya Yahova na Nkristu m’bodzi na m’bodzi asacita pinthu mwakucimbiza toera kuapasa pinafuna iwo.

¹² Abale na alongo akuphatana pa dziko yonsene yapantsi ali akukhunganyika toera kucita cifuno ca Yahova. Lero, Yahova asafuna kuti mphangwa zadidi za Umambo zimwazwe pa dziko yonsene yapantsi toera zikhale umboni kuna anthu a madzindza onsene. (Mat. 24:14) Yahova asafuna kuti mu ndzidzi unacita ife basa ineyi, tikhale m’maso mwakubverana na mitemo yace inalonga pya makhaliro adidi. (1 Ped. 1:14-16) Ife tisafunika kubvera andzathu, mbatiwangisira toera kumwaza mphangwa zadidi. (Aef. 5:21) Uno nee ndi ndzidzi wakudzudzumika kakamwe na pinthu pyathu, mbwenye ndi ndzidzi wakuikha Umambo wa Mulungu pa mbuto yakutoma mu  umaso wathu. (Mat. 6:33) Tingakumbuka pyenepi mu ndzidzi unamwaza ife mphangwa mwakuphatana, tinakhala akutsandzaya kakamwe cincino, pontho ntsogolo tinadzakhala na nkhombo zakukhonda mala.

¹³ Ninga Mboni za Yahova ndife anthu akupambulika, tasankhulwa pakati pa anthu anango ninga mbumba yakucena na yaphinga m’basa ya Mulungu wathu. (Tito 2:14) Kulambira kwathu Yahova kusaticitisa kukhala akusiyana na anango. Kusiyapo kuphata basa pabodzi na abale pa dziko yonsene yapantsi, tisalonga cilongero cibodzi cene ca undimomwene, pontho tisacita pinthu mwakubverana na undimomwene unoyu. Yahova aphatisira mprofeta Sofoniya toera kulonga profesiya ineyi. Iye alonga: “Ndinadzacinja cilongero ca mbumba zonsene kudza cilongero cakucena, toera iwo onsene asimbe dzina ya Yahova, mbakwanisa kuntumikira phewa na phewa.”—Sof. 3:9.

¹⁴ Buluka penepo Yahova atsogolera mprofeta Sofoniya toera kufokotoza kuphatana kwathu ninga abale pa dziko yonsene yapantsi lero. Iye alonga: “Ale adasalikira mu Izraeli nee anadzacita pinthu pyakuipa; iwo nee anadzalonga uthambi, pontho nee anadzanyengeza anthu na lirimi yawo; iwo anadzadya mbagona, pontho nkhabe munthu anafuna kuagopesa.” (Sof. 3:13) Ife tisakwanisa kuphata basa mwakuphatana thangwi tisabvesesa undimomwene wa Mafala a Yahova, pontho tacinja manyerezero athu na macitiro athu mwakubverana na pinalonga Yahova. Tisacita pinthu pyakuti pamaso pa anthu pisaoneka ninga nkhabe kukwanisika. Mwandimomwene ndife mbumba yakupambulika, mbumba ya Mulungu yakuti isamulemedza pa dziko yonsene yapantsi.—Mik. 2:12.