TOERA kukwanirisa profesiya ya Yezu thangwi ya ntsiku zakumalisa, Mboni za Yahova zisamwaza mphangwa zadidi “mpaka kunkhomo kwa dziko yapantsi.” (Mabasa 1:8; Mat. 24:14) Toera kucita pyenepi, iwo asaphatisira ndzidzi wawo na mphambvu zawo toera kupanga anango thangwi ya Bhibhlya. Nakuti iwo asakhulupira kuti Mulungu asaphedza ale anaphata na iye basa, iwo asapitiriza kuikha Umambo wa Mulungu pa mbuto yakutoma mu umaso wawo. (Mat. 6:25-34; 1 Akor. 3:5-9) Pyenepi pisacitisa kuti apaswe nkhombo na Yahova, mbakhala akutawirika kuna iye.

² Anthu angaona njira inamwaza ife mphangwa, inagawira ife Mabhibhlya na mabukhu mbatikhonda kuphemba kobiri, anango asabvundza: “Pyenepi pisakwanisika tani?” Ndimomwene kuti kucita na kudhinda Mabhibhlya na mabukhu kusaphemba kobiri. Kumanga na kutsalakana Mabheteli akuti ndi mbuto zinakhala atumiki anaphata basa ya kudhinda mabukhu, ale anayang’anira basa yakumwaza mphangwa na anacita mabasa anango toera kuphedzera basa yakumwaza mphangwa zadidi pisaphembambo kobiri. Kusiyapo pyenepi, ayang’aniri a cisa,  amisionaryo, apainiya akupambulika na atumiki anango a basa yakupambulika ya ndzidzi onsene asapaswa kobiri yakucepa toera akwanise kupitiriza kuphata mabasa awo. Mwandimomwene basa yakumwaza mphangwa inacitwa mu ntsiku zino, mu dziko yathu peno pa dziko yonsene isaphemba kobiri izinji kakamwe. Mphapo kobiri ineyi yonsene isabuluka kupi?

³ Anthu azinji anakomerwa na basa yakupfundzisa Bhibhlya inacita Mboni za Yahova asakomerwa na kucita pyakupereka toera kuphedzera basa inacitwa pa dziko yonsene. Mbwenye basa ineyi isaphedzerwa makamaka na Mboni za Yahova. Anango a iwo asatumiza pyakupereka ku ofesi ya Filiali ya dziko yawo. Iwo asapangiza nzimu wakupasa ninga udapangiza atumiki a Mulungu akale akuti apereka pinthu pyawo toera kuphedzera kumangwa kwa mbuto yakulambira Yahova. (Eks. 35:20-29; 1 Kro. 29:9) Pyakupereka pinango ndi pya abale adalongeratu kuti angafa pinthu pyawo pisafunika kuperekwa ku ofesi ya filiali. Pinango pisacitwa na anthu, mpingo peno cisa.Pyakupereka pyenepi pingagumanywa pisaphedzera basa yakumwaza mphangwa.

⁴ Mboni za Yahova zisaona kuti ndi mwai kuphatisira kobiri yawo na pinthu pyawo pinango toera kuphedzera basa yakumwaza mphangwa. Yezu na anyakupfundzace akhali na bokosi ikhakoyera iwo kobiri toera kugula pinthu pikhafuna iwo. (Juw. 13:29) Bhibhlya isalonga pya akazi akhaphedza Yezu na anyakupfundzace. (Marko 15:40, 41; Luka 8:3) Mpostolo Paulu akhapereka takhuta thangwi ya ciphedzo cikhatambira iye kubulukira kuna anthu akhafuna kuphedzera basa yakumwaza mphangwa zadidi na utumiki wace. (Afil. 4:14-16; 1 Ates. 2:9) Mboni za Yahova zisapitiriza kutowezera pitsandzo pyenepi pyakuphata basa mwaphinga na kupasa mwakudzala manja. Pyenepi  pisaphedza toera anthu a mitima yadidi pa dziko yonsene apaswe “mwakukhonda lipa madzi akupasa umaso.”—Apok. 22:17.

⁵ Pinthu pinafunika pa mpingo pisalipwa peno pisagulwa na kobiri ya pyakupereka pinacita anthu mwakufuna. Pa misonkhano nkhabe kucitwa nsonkho-nsonkho peno kukhazikiswa ntengo wa kobiri inafunika kupereka munthu. Asaikha mabokosi m’mbuto zinacitirwa misonkhano toera munthu anafuna acite pyakupereka mwakubvera na “mudanyerezera iye muntima mwace.”—2 Akor. 9:7.

⁶ Kobiri inaperekwa isaphatisirwa makamaka toera kugula pinthu pyakufunika toera kutsalakana na kusasanyira Nyumba ya Umambo. Nsoka wa akulu a mpingo unacita cisankhulo khala kobiri inango inatumizwa ku ofesi ya filiali ya dziko yawo toera iphedzere basa inacitwa pa dziko yonsene. Toera kucita pyenepi, mpingo usabverana ntengo wa kobiri inafunika iwo kutumiza. Munjira ineyi, mipingo mizinji ndzidzi onsene isakwanisa kucita pyakupereka toera kuphedzera basa inacitwa pa dziko yonsene. Khala mpingo onsene usadziwa kuti pasafunika kugulwa pinthu, nkhabe funika kucita pidziwiso mwakubwereza-bwereza kuti pasafunika kucitwa pyakupereka.

⁷ Nsonkhano ungamala, abale awiri asabulusa kobiri idaikhwa m’mabokosi a pyakupereka mbalemba ntengo wace. (2 Ama. 12:9, 10; 2 Akor. 8:20) Nsoka wa akulu a mpingo usacita masasanyiro toera kobiri ineyi ikoyiwe mwadidi mpaka kutumizwa ku ofesi ya filiali peno kuphatisirwa pa mpingo. M’bale anatsalakana pya kobiri mu mpingo miyezi yonsene asacita lipoti toera kudziwisa mpingo, pontho pangapita miyezi mitatu mbveranisi wa nsoka wa  akulu a mpingo asacita masasanyiro toera makonta a mpingo aoniwe kuti akufamba tani.

⁸ Kobiri inaphatisirwa toera kulipa pinthu pinafunika pa misonkhano ya cisa na pinthu pinango pinafunika mucisa, ndi pyakupereka pinacitwa na Mboni za Yahova za cisa ceneci. Pa misonkhano ya cisa pasagumanika mabokosi toera anthu acite pyakupereka. Kusiyapo pyenepi, midzidzi inango mipingo isacita pyakupereka toera kugula pinthu pinango pinafunika mucisa.

⁹ Pisakhala mwadidi cisa cibodzi na cibodzi cingakwanisa kulipa pinthu pyonsene pinafunika mucisa cawo, pontho kobiri ingasala isafunika kutumizwa toera kuphedzera basa inacitwa pa dziko yonsene. Konta ya cisa ingakhonda kukhala na kobiri yakukwana toera kugula pinafunika pa nsonkhano peno toera kutoma kukhunganya nsonkhano wa cisa unafuna kudza, muyang’aniri wa cisa anapereka maonero akuti mipingo isafunika kucita pidziwiso pya mwai wakucita pyakupereka. Nsoka wa akulu a mpingo ubodzi na ubodzi usafunika kubverana kuti mpingo wawo unakwanisa kubulusa konta yanji. Mpingo usafunika kudziwiswa mbuperekambo maonero khala kobiri ineyi inakwanisika peno nkhabe.

¹⁰ Pangaoneka nkandzo wa kobiri wakuti usafunika kutsalakanwa na akulu a mpingo a mucisa, onsene asafunika kucedza pabodzi pene pa ntsiku ya nsonkhano wa cisa. Kobiri ya cisa ingafuna kuphatisirwa toera kucita pinthu pinango, kusiyapo kuphatisirwa toera kugula pinthu pinafunika ungafika ndzidzi wa nsonkhano, akulu a mipingo yonsene ya cisa ceneci asafunika kudziwiswa. Kobiri inaphatisirwa isafunika kulembwa mwadidi, pontho ndzidzi onsene mbidzati kuphatisirwa munjira ineyi, pakutoma akulu a mipingo yonsene ya cisa canu asafunika kubvundziswa.

 ¹¹ Ndzidzi wace ungakwana, asacitwa masasanyiro toera makonta a cisa aoniwe kuti akufamba tani.

¹² Kobiri ya m’bokosi ikhali na Yezu na anyakupfundzace ikhaphatisirwambo toera kuphedza anyakutcerenga. (Marko 14:3-5; Juw. 13:29) Basa ineyi Yacikristu ikupitiriza mpaka lero, thangwi Yezu alonga: “Anyakutcerenga muli nawo pabodzi ndzidzi onsene.” (Marko 14:7) Mphapo Mboni za Yahova zisacita tani basa ineyi lero?

¹³ Midzidzi inango, abale na alongo akukhulupirika mu mpingo anafuna ciphedzo thangwi yakukalamba, utenda peno nyatwa zinango zakuti iwo nee anakwanisa kuzitsalakana okhene. Pyenepi pingacitika, panango abale awo na anango anafuna kuaphedza. Pyenepi pisabverana na mafala a mpostolo Juwau: “Munthu angakhala na pinthu pyakukwana toera kutsalakana napyo umaso wace, mbaona kuti m’bale wace asafuna ciphedzo, mbwenye mbakhonda kumbvera ntsisi, kodi munthu unoyu anakwanisa tani kulonga kuti iye asafuna Mulungu? Ananga akufunika, ife tisafunika kufunana, tayu na mafala basi peno na lirimi, mbwenye tisafunika kupangiza ufuni wandimomwene kubulukira mu pinthu pinacita ife.” (1 Juw. 3:17, 18; 2 Ates. 3:6-12) Ulambiri wandimomwene usaphataniza kutsalakana anthu akukhulupirika akuti panango asafuna ciphedzo.—Tiya. 1:27; 2:14-17.

¹⁴ Mu tsamba yace yakutoma kuna Timoti, mpostolo Paulu alonga kuti tinaphedza tani ale adathema kuphedzwa.  Munakwanisa kuleri uphungu udapereka iye pa 1 Timoti 5:3-21. Nkristu m’bodzi na m’bodzi ali na basa yakutsalakana pyakufuna pya anthu a panyumba pace. Anyakukalamba na atenda asafunika kuphedzwa na anawo, adzukulu awo peno abale awo anango. Panango mautongi peno misoka inango inapereka ciphedzo kuna anthu ninga anewa, natenepa abale awo peno anthu anango anakwanisa kuaphedza toera iwo apaswembo ciphedzo ceneci. Midzidzi inango mpingo usafunika kuona khala pinathema kuphedza abale na alongo akuti asatumikira Mulungu mwakukhulupirika mu pyaka pizinji. Khala iwo nkhabe ana peno acibale anango toera kuaphedza, pontho khala mautongi nkhabe pereka ciphedzo cakukwana, nsoka wa akulu a mpingo usafunika kuona kuti unaphedza tani abale anewa. Akristu asakomerwa kakamwe kupasa pinthu piri na iwo ale anafuna ciphedzo.

¹⁵ Abale na alongo azinji panango anafuna ciphedzo thangwi yakutcingwa, nkhondo, piteketeke, kudzala kwa madzi, njala peno nyatwa zinango zinacitika m’midzidzi ino yakunentsa. (Mat. 24:7-9) Panango mipingo yapacisa nee isakhala na pinthu toera kupereka ciphedzo, na thangwi ineyi Mathubo Akutonga asadziwisa abale a mbuto zinango toera kupereka ciphedzo. Pyenepi ndi ninga pidacita Akristu a ku Azya Menori, adapereka cakudya kuna abale a ku Yudeya mu ndzidzi wa njala. (1 Akor. 16:1-4; 2 Akor. 9:1-5) Tingatowezera citsandzo cawo, tinapangiza ufuni kuna abale na alongo athu, pontho tinapangiza kuti ndife anyakupfundza andimomwene a Yezu Kristu.—Juw. 13:35.

¹⁶ Mabhibhlya na mabukhu athu ndi akufunika kakamwe pakumwaza mphangwa za Umambo. Kazinji kene nsoka wa akulu a mpingo usasankhula ntumiki wakutumikira toera  atsalakane mabukhu. Abale anapaswa basa ineyi asaiona kukhala yakufunika kakamwe. Iwo asalemba mabukhu adatambira iwo na anafuna iwo toera ndzidzi onsene pa mpingo pakhonde kusoweka mabukhu.

¹⁷ Ninga Akristu akuperekeka, ife tisadziwa kuti ndzidzi wathu, ndzeru zathu, maluso athu, pinthu pyathu pyakumanungo , ngakhale umaso wathu ndi miyoni idabuluka kuna Mulungu, yakuti tisafunika kuiphatisira m’basa yace. (Luka 17:10; 1 Akor. 4:7) Tingaphatisira mwadidi pinthu piri na ife, tinapangiza kuti tisafuna kakamwe Yahova. Ife tisafunika kumulemedza na pinthu pyathu pyakufunika kakamwe, mbatidziwa kuti iye asakomerwa na ntundu onsene wa miyoni inapereka ife na ntima onsene. (Mis. 3:9; Marko 14:3-9; Luka 21:1-4; Akol. 3:23, 24) Yezu alonga: “Imwe mwapaswa pezi, pasanimbo pezi.” (Mat. 10:8) Tingaperekeka mbatitumikira Yahova na pinthu piri na ife, tinakhala akutsandzaya kakamwe.—Mabasa 20:35.