Kazinji kene ubatizo usacitwa pa misonkhano ya cisa na ya gawo ya Mboni za Yahova. Kunkhomo kwa nkhani ya ubatizo, nyakucita nkhani asaphemba ale anafuna kubatizwa toera alimire mbatawira mibvundzo iyi miwiri mwakugaluza:

1. Kodi mwatcunyuka madawo anu, mwaperekeka kuna Yahova, pontho mwatawira kuti iye asaphatisira Yezu Kristu toera kutipulumusa?

2. Kodi musadziwa kuti mungabatizwa munadziwika ninga m’bodzi wa Mboni za Yahova, pontho munatoma kucita khundu ya gulu yace?

Kutawira mwakubveka mwadidi mibvundzo ineyi kusapangiza pakweca kuti ale anafuna kubatizwa asakhulupira ntsembe ya ciomboli, pontho aperekeka kuna Yahova na ntima onsene. (Aroma 10:9, 10) Ale anafuna kubatizwa asafunika kucita phembero mbanyerezera mwadidi mibvundzo ineyi mbidzati kufika ntsiku inafuna iwo kubatizwa toera akwanise kutawira mwakubverana na pinakhulupira iwo.

 Imwe mwacita phembero toera kuperekeka kuna Yahova, mbamupikira kuti munalambira iye basi, pontho kuti kucita cifuno cace kunakhala cinthu cakufunika kakamwe mu umaso wanu?

Kodi imwe musafunadi kubatizwa pa nsonkhano unafuna kudza?

Ndi zipi nguwo zakuthema toera kubatizwa nazo? (1 Tim. 2:9, 10; Juw. 15:19; Afil. 1:10)

Ife tisafunika “kubvala nguwo zakuthema” toera kupangiza kuti ‘tisalemedza Mulungu.’ Ale anafuna kubatizwa nkhabe funika kubvala nguwo zakupangiza makhundu anango a manungo akuti nee athema kuoniwa, nkhabe funika kubvala nguwo zakulembwa maletra peno madhezenyo. Iwo asafunika kubvala nguwo zakuthema, zakufulwa mwadidi na za maonekero adidi mwakubverana na ndzidzi unoyu.

Kodi munthu asafunika kupangiza makhaliro api pakubatizwa? (Luka 3:21, 22)

Ubatizo wa Yezu ndi citsandzo kuna ubatizo Wacikristu lero. Iye akhadziwa kuti ubatizo ndi wakufunika kakamwe, pontho manyerezero ace na macitiro ace apangiza pyenepi. Natenepa, pa mbuto ya ubatizo nee tisafunika kulonga pyakusekesa, kusendzeka, kuthubudza peno kucita pinthu pinango pyakuti nee pinapangiza cilemedzo mu ndzidzi wa ubatizo. Nkristu angamala kubatizwa nee asafunika kutsandzaya kakamwe ninga awina pa mapika. Maseze ndzidzi wa ubatizo ndi wakutsandzayisa kakamwe, mbwenye kutsandzaya kweneku kusafunika kupangizwa munjira yadidi na yacilemedzo.

Kodi kugumanika pa misonkhano mwakukhonda phonya na kucita pinthu pabodzi na mpingo kunakuphedzani tani toera kucita pinthu mwakubverana na kuperekeka kwanu kuna Yahova?

Thangwi yanji mungamala kubatizwa musafunika kupitiriza kucita pfundziro ya munthu paekha na kumwaza mphangwa mwaphinga?

 PITSOGOLERO KUNA AKULU A MPINGO

M’mwazi mphangwa wakuti adzati kubatizwa angadziwisa kuti asafuna kubatizwa, asafunika kuphembwa toera adinge “Mibvundzo Kuna Ale Anafuna Kubatizwa” inagumanika pa tsamba 185-207 ya bukhu ino. Asafunikambo kuleri “Mphangwa Kuna Amwazi Mphangwa Akuti Adzati Kubatizwa,” zinatoma pa tsamba 182, zinafokotoza kuti anakhunganyika tani toera kwenda kadingwa na akulu a mpingo. Mwakubverana na mphangwa zenezi, munthu anafuna kubatizwa anakwanisa kuphatisira ntsonga zidalemba iye, pontho anakwanisa kufungula bukhu yace mu ndzidzi unadingwa iye. Mbwenye nee asafunika kudinga mibvundzo ineyi na munthu unango mbadzati kudingwa na akulu a mpingo.

Munthu angafuna kubatizwa asafunika kudziwisa mbveranisi wa nsoka wa akulu a mpingo. Angamala kuleri “Mibvundzo Kuna Ale Anafuna Kubatizwa,” mbveranisi wa nsoka wa akulu a mpingo anambvundza khala acita phembero yakuperekeka kuna Yahova toera kucita cifuno Cace. Khala munthu aperekeka, mbveranisi wa nsoka wa akulu a mpingo anacita masasanyiro toera akulu a mpingo awiri adinge naye “Mibvundzo Kuna Ale Anafuna Kubatizwa.” Nkulu wa mpingo m’bodzi anaphembwa toera adinge naye khundu yakutoma, unango khundu yaciwiri. Nkhabe funika kudikhira cidziwiso ca nsonkhano wa cisa peno wa gawo toera kudinga makhundu anewa.

Khundu ibodzi na ibodzi isafunika kudingwa nkati mwa ndzidzi ubodzi, mbwenye pingafunika anakwanisa kuthimizira ndzidzi. Khundu ibodzi na ibodzi isafunika kutoma na kumalisa na phembero. Nyakufuna kubatizwa  peno akulu a mpingo nee asafunika kuthamanga kakamwe pakudinga mibvundzo. Akulu a mpingo angapaswa basa ineyi, asafunika kuiikha pa mbuto yakutoma.

Kazinji kene mphyadidi kudinga m’bodzi na m’bodzi wa ale anafuna kubatizwa m’mbuto mwakuadinga ninga nsoka. Munthu anafuna kubatizwa angatawira mibvundzo yonsene, pisaphedza akulu a mpingo toera kuona kuti ndi undimomwene upi unadziwa iye, pontho khala athema kubatizwa peno nkhabe. Kusiyapo pyenepi, kudinga munthu anafuna kubatizwa paekha pinam’phedza toera akhale wakusudzuka. Mamuna na nkazi akumanga banja anakwanisa kudingwa pabodzi pene.

Nkulu wa mpingo angakhala ekhene pakucita mibvundzo ya ubatizo na mulongo, iwo asafunika kukhala pa mbuto yakuti anakwanisa kuoniwa na anango, mbwenye mbakhonda kubva pinalonga iwo. Angafuna kuperekerwa na munthu unango, asafunika kukhala nkulu wa mpingo peno ntumiki wakutumikira, mwakubverana na khundu inadinga iwo ninga pinalonga ndima inatowera.

M’mipingo yakuti iri na akulu a mpingo akucepa, atumiki akutumikira akuthema akuti asapangiza luso yadidi yakunyerezera na yakudzindikira anakwanisa kuphatisirwa toera kudinga munthu anafuna kubatizwa “Khundu 1: Pinakhulupira Akristu.” “Khundu 2: Umaso Wacikristu,” basi ene isafunika kudingwa na akulu a mpingo. Khala mu mpingo nkhabe abale azinji akuthema, munakwanisa kupita ncibverano na muyang’aniri wa cisa toera aphembe akulu a mpingo a mpingo uli dhuzi toera kuphedzera.

Khala anafuna kubatizwa ndi mwana, anyakubalace Acikristu uwiri wawo ene peno m’bodzi asafunika kugumanika mu ndzidzi unadingwa mwana. Khala  anyakubalace nee anakwanisa, asafunika kugumanika akulu a mpingo awiri peno nkulu wa mpingo na ntumiki wakutumikira, (mwakubverana na khundu inafuna iwo kudinga).

Akulu a mpingo asafunika kukhala na cinyindiro cakuti munthu anafuna kubatizwa asadziwa pipfundziso pyakutoma pya m’Bhibhlya. Kusiyapo pyenepi, iwo asafunika kuona khala iye asakomerwa na undimomwene, pontho asalemedza kakamwe gulu ya Yahova. Khala munthu anafuna kubatizwa nee asabvesesa pipfundziso pyakutoma pya m’Bhibhlya, akulu a mpingo asafunika kucita masasanyiro kuti aphedzwe toera atheme kubatizwa paulendo unango. Anango panango anakwata ndzidzi uzinji toera kupangiza kuti asabvesesa kufunika kwa basa ya m’munda peno toera kubvera pitsogolero pya gulu. Mu ndzidzi ubodzi peno wakupiringana unaphatisira akulu a mpingo pakudinga munthu, iwo asafunika kuphatisira luso yakudzindikira toera kuona khala munthu athema kubatizwa. Maseze kuti mibvundzo inango munaphatisira ndzidzi uzinji inango ndzidzi wakucepa, mbwenye musafunika kudinga mibvundzo yonsene.

Akulu a mpingo adapaswa basa ineyi angamala kudinga khundu yaciwiri asafunika kugumanyikana toera kuona khala munthu athema kubatizwa peno nkhabe. Akulu a mpingo asafunika kuona njira idakuzwa munthu, maluso ace na pinthu pinango pinacimwana iye kucita. Cinthu cakufunika kakamwe ndi kuona khala munthu unoyu ali na uxamwali wakuwanga na Yahova, pontho khala asabvesesa undimomwene wakufunika wa m’Bhibhlya. Na ciphedzo cathu caufuni, ale anafuna kubatizwa anadzakhala akukhunganyika toera kucita basa yakufunika kakamwe yakumwaza mphangwa zadidi.

 Buluka penepo, nkulu wa mpingo m’bodzi peno awiri mwa ale adacita mibvundzo asafunika kugumanyikana na munthu toera kumpanga khala athema kubatizwa peno nkhabe. Khala athema akulu a mpingo asafunika kugumanyikana pontho na munthu unoyu toera kudinga naye khundu yakuti “ Mafala Akumalisa Kuna Ale Anafuna Kubatizwa,” inagumanika pa tsamba 206-207. Khala nyakufuna kubatizwa adzati malisa kupfundza bukhu Tsandzayani na Umaso Kwenda na Kwenda!, akulu a mpingo asafunika kumuwangisa toera apitirize kupfundza pakumala kubatizwa. Nyakufuna kubatizwa asafunika kudziwiswa kuti ntsiku yace ya ubatizo inalembwa mu Registro de Publicador de Congregação. Nkumbuseni kuti akulu a mpingo asakoya mphangwa zinalonga pya umaso wace toera gulu ipitirize kutsalakana mabasa anacitwa pa dziko yonsene yapantsi a Mboni za Yahova, pontho toera iye akwanise kuphedzera mabasa mu gulu ya Yahova na kupaswa ciphedzo cauzimu. Kusiyapo pyenepi, akulu a mpingo asafunika kukumbusa m’mwazi mphangwa mupswa kuti mphangwa zace zinango zinaphatisirwa mwakubverana na Política Global de Proteção de Dados ya Mboni za Yahova inagumanika mu jw.org. Kazinji kene nsonkhano unoyu usafunika kumala basi ene mphindi khumi peno zakucepa.

Pangapita caka cibodzi m’mwazi mphangwa mbadamala kale kubatizwa, akulu a mpingo awiri asafunika kucedza naye toera kumuwangisa na kumpasa maonero adidi. M’bodzi mwa akulu anewa asafunika kukhala muyang’aniri wa nsoka wace wa basa ya m’munda. Khala iye ndi mwana, anyakubalace Acikristu uwiri wawo ene peno m’bodzi asafunika kukhalapo. Nsonkhano unoyu usafunika kucitwa munjira yadidi na yakuwangisa. Akulu a mpingo analonga pya kuthambaruka  kwace, pontho anapereka maonero akuti anam’phedza toera apitirize kucita pfundziro ya munthu paekha, kuleri Bhibhlya ntsiku zonsene, kucita kulambira kwa banja masumana onsene, kugumanika na kutawira pa misonkhano, pontho kubuluka m’basa ya m’munda masumana onsene. (Aef. 5:15, 16) Khala iye adzati kumalisa kupfundza bukhu Tsandzayani na Umaso Kwenda na Kwenda!, akulu a mpingo asafunika kucita masasanyiro toera iye apitirize kupfundza. Akulu ampingo asafunika kupangiza ufuni mbansimba na ntima onsene. Pakupereka uphungu na maonero, kazinji kene kulonga ntsonga ibodzi peno ziwiri pyakwana.