Amwazi Mphangwa Andzathu Akufunika a Mphangwa Zadidi:

Ndi mwai ukulu kakamwe kukhala akuphatana mu ulambiri wa Mulungu m’bodzi basi wandimomwene, Yahova! “Tisaphata basa pabodzi na Mulungu,” pontho iye atipasa basa yakupambulika yakupulumusa umaso wa anthu, yakuti ndi kupfundzisa na kumwaza mphangwa zadidi za Umambo wace. (1 Akor. 3:9; Mat. 28:19, 20) Toera kucita basa ineyi pa dziko yonsene yapantsi mwantendere na mwakuphatana, tisafunika kukhala akukhunganyika mwadidi.—1 Akor. 14:40.

Bukhu ino inakuphedzani toera kubvesesa kuti mpingo Wacikristu usaphata tani basa lero. Iyo isalonga thangwi ya miyai na mabasa ali na imwe ninga m’bodzi wa Mboni za Yahova. Mungalemedza miyai iri na imwe mbamukwanirisa mabasa ali na imwe munadzakhala na ‘cikhulupiro cakuwanga.’—Mabasa 16:4, 5; Agal. 6:5.

Natenepa, tisakuphembani toera mupfundze mwadidi bukhu ino. Sakani njira zakuphatisira pinaleri imwe mu umaso wanu. Mwacitsandzo, khala mwakhazikiswa kwene cincino ninga m’mwazi mphangwa wakuti adzati kubatizwa, munacitanji toera mubatizwe ninga m’bodzi wa Mboni za Yahova? Khala ndimwe wakubatizwa munacitanji  toera muthambaruke mwauzimu, mbamucita pizinji m’basa ya Yahova? (1 Tim. 4:15) Munaphedzera tani mpingo toera ukhale muntendere? (2 Akor. 13:11) Imwe munagumana mitawiro ya mibvundzo ineyi m’bukhu ino.

Khala ndimwe m’bale wakubatizwa, munacitanji kuti mukhale wakuthema kutumikira ninga ntumiki wakutumikira buluka penepo ninga nkulu wa mpingo? Nakuti anthu azinji apswa asapitiriza kubwera mu gulu ya Mulungu, asafunika abale azinji mwakucimbiza toera kutsogolera. Bukhu ino inakuphedzani kudziwa kuti ‘kuwangisira’ toera kukwanirisa pifuno pyenepi pyauzimu kusaphatanizanji.—1 Tim. 3:1.

Tisacita phembero toera bukhu ino ikuphedzeni kudziwa basa iri na imwe mu gulu ya Yahova mbamukomerwa nayo. Khalani na cinyindiro cakuti ife tisakufunani kakamwe, pontho tisacita phembero toera mupitirize kukhala pabodzi na ale anatsandzaya na kulambira Babathu wakudzulu, Yahova.—Mas. 37:10, 11; Iza. 65:21-25.