ALAMBIRI andimomwene a Yahova apaswa ntemo wakugumanyikana toera kupfundziswa na kuwangisana unango na ndzace. (Aheb. 10:23-25) Mbuto yakutoma ikhaphatisira Aizraeli, akuti akhali mbumba yakusankhulwa na Mulungu toera kusonkhana ikhali “tabhernakulo, yakuti ndi nsasa wa nsonkhano.” (Eks. 39:32, 40) Mukupita kwa ndzidzi, Salomoni mwana wa Dhavidhi, amanga nyumba peno templo toera kupasa mbiri Mulungu. (1 Ama. 9:3) Pidafudzwa templo mu caka 607 P.K.K., Ayuda akhasonkhana n’nyumba zikhacemerwa masinagoga toera kulambira Mulungu. Mukupita kwa ndzidzi, templo yamangwa mbitoma pontho kuphatisirwa ninga mbuto yakufunika kakamwe ya ulambiri wandimomwene. Yezu akhapfundzisa anthu m’masinagoga na mu templo. (Luka 4:16; Juw. 18:20) Iye acita nsonkhano ngakhale paphiri.—Mat. 5:1–7:29.

² Pidafa Yezu, Akristu akhasonkhana m’mbuto zapakweca na n’nyumba za anthu toera kupfundzisa Malemba na kuwangisana na Akristu andzawo. (Mabasa 19:8, 9; Aroma 16:3, 5; Akol. 4:15; Filim. 2) Midzidzi inango iwo akhasonkhana m’mbuto zakubisika toera akhonde kumangwa na ale akhaatcinga. Pyenepi pisapangiza kuti Akristu akukhulupirika a Mulungu a mu ndzidzi wakale, akhafuna kakamwe kusonkhana na anango toera ‘apfundziswe na Yahova.’—Iza. 54:13.

³ Lero, misonkhano Yacikristu isacitwambo m’mbuto zapakweca na n’nyumba za anthu. Kazinji kene nyumba za  anthu zisaphatisirwa toera kucita misonkhano ya basa ya m’munda. Ale anatawirisa kuti nyumba zawo zicitirwe misonkhano ineyi, asaona kuti ndi mwai ukulu kakamwe. Azinji asaphedzeka kakamwe mwauzimu angatawirisa nyumba zawo toera ziphatisirwe munjira ineyi.

⁴ Nyumba ya Umambo ndi mbuto inaphatisira kazinji kene Mboni za Yahova toera kucitira misonkhano. Kazinji kene tisagula mbuto toera kumanga Nyumba ya Umambo peno tisagula nyumba yakumangwa kale mbatiisasanyira. Toera tikhonde kubvunga kobiri izinji na kuphatisira mwadidi nyumba zenezi, m’midzidzi inango mipingo mingasi isaphatisira Nyumba ya Umambo ibodzi ene. M’mbuto zinango tisalugari nyumba toera kucitira misonkhano. Ingamangwa Nyumba ya Umambo peno ingasasanyirwa makhundu mazinji kakamwe isafunika kucitwa nkhani yakupereka nyumba ineyi kuna Yahova. Mbwenye khala nee ndi makhundu mazinji adasasanyirwa, nkhabe funika kucitwa nkhani yakupereka nyumba kuna Yahova.

⁵ Nyumba ya Umambo nee isafunika kumangwa na cifuno cakutundusa anthu. Maseze Nyumba ya Umambo isamangwa mwakubverana na makhaliro apacisa, mbwenye ndzidzi onsene cifuniro ndi toera kulambira Yahova. (Mabasa 17:24) Nyumba ya Umambo isafunika kukhala mbuto yakuthema toera kucitiramo misonkhano Yacikristu mwakubverana na makhaliro apacisa.

⁶ Mipingo yonsene ya Mboni za Yahova isaphedzera toera kusasanyira na kutsalakana Nyumba ya Umambo inaphatisira iwo. Nkhabe kucitwa nsonkho-nsonkho peno kuphembwa kobiri. Kuna ale anaenda kumisonkhano anakwanisa kucita pyakupereka pyawo m’mabokosi ali n’Nyumba ya Umambo toera kuphedzera kugula pinthu pinafunika pa Nyumba ya Umambo. Iwo asacita pyenepi  mwakufuna, pontho kubulukira pantsi pantima.—2 Akor. 9:7.

⁷ Onsene mu mpingo asaona ninga mwai kucita pyakupereka toera kuphedzera pinthu pinafuna kugulwa pa Nyumba ya Umambo, pontho asaperekeka toera kuicenesa na kuisasanyira. Nkulu wa mpingo peno ntumiki wakutumika asakhazikiswa toera kucita ndandanda ya basa ineyi. Kazinji kene Nyumba ya Umambo isaceneswa na misoka ya basa ya m’munda, pontho muyang’aniri wa nsoka peno m’bale anam’phedza ndiye anatsogolera basa ineyi. Maonekero akunja na ankati mwa Nyumba ya Umambo asafunika kulemedza Yahova na gulu yace.

⁸ Khala Nyumba ya Umambo isaphatisirwa na mipingo mingasi, mipingo ineyi isakhazikisa Komiti Inatsalakana Nyumba ya Umambo toera itsalakane mabasa anacitwa pa Nyumba ya Umambo na pinango. Misoka ya akulu a mpingo isasankhula m’bale m’bodzi toera akhale mbveranisi wa komiti ineyi. Na citsogolero ca misoka ya akulu a mipingo, komiti ineyi isayang’anira basa yakucenesa Nyumba ya Umambo, kusasanyira pinthu pidagudjuka mbikhala na cinyindiro cakuti pinthu pinafuna kuphatisirwa toera kutsalakana Nyumba ya Umambo piripo pyakukwana. Toera basa ineyi ifambe mwadidi, mipingo isafunika kucita pinthu mwakubverana.

⁹ Khala mipingo mingasi isaphatisira Nyumba ya Umambo ibodzi ene, panango iyo inacinjana midzidzi yakucita misonkhano. Pakucita pyenepi akulu a mpingo asafunikambo kunyerezera anango, pontho asafunika kupangiza ufuni na citsalakano. (Afil. 2:2-4; 1 Ped. 3:8) Nee mpingo ubodzi usafunika kucitira pisankhulo mipingo inango. Muyang’aniri wa cisa angacedzera ubodzi mwa mipingo inaphatisira Nyumba ineyi ya Umambo, pingafunika pa sumana ineyi mipingo inango inakwanisa kucinja ntsiku na ndzidzi wa misonkhano.

 ¹⁰ Nyumba ya Umambo inakwanisa kuphatisirwa toera kucitira nkhani yakumanga banja na yaciliro, Komiti Yakuyang’anira Basa mu Mpingo ingatawirisa. Nyumba ya Umambo ingaphembwa, akulu a mpingo asacita cisankhulo mwakubverana na pitsogolero pinabuluka ku ofesi ya filiali.

¹¹ Ale anatawiriswa kuphatisira Nyumba ya Umambo toera kucita pyenepi asafunika kucita pinthu pinapangiza kuti ndi Akristu andimomwene. Pa Nyumba ya Umambo nee pasafunika kucitwa cinthu cakuti cinagwegwedusa abale na alongo, kupswipisa dzina ya Yahova peno mpingo. (Afil. 2:14, 15) Midzidzi inango ofesi ya filiali isatawirisa kuti Nyumba ya Umambo iphatisirwe toera kucitira maprogramu anango auzimu ninga Xikola ya Utumiki wa Umambo na Xikola ya Apainiya.

¹² Ndzidzi onsene mpingo usafunika kutsalakana mwacilemedzo mbuto inasonkhana iwo. Mabvaliro athu, makhunganyiro athu na makhaliro athu asafunika kupangiza kuti tisalambira Yahova. (Ekle. 5:1; 1 Tim. 2:9, 10) Tingaphatisira uphungu unoyu, tinapangiza kuti tisapereka takhuta thangwi ya misonkhano yathu Yacikristu.

¹³ Calirani pinthu pyakuti pinadzudzumisa mu ndzidzi wa misonkhano. Natenepa anapiana asafunika kukhala na anyakubalawo. Anyakubala akuti ali na anang’ono anakwanisa kuphembwa toera akhale pa mbuto yakuti nee anadzudzumisa anango angafuna kubuluka kunja toera kuenda kasandika anawo peno kuatsalakana.

¹⁴ Abale akuthema asasankhulwa toera atumikire ninga akalindi n’Nyumba ya Umambo mu ndzidzi wa misonkhano. Iwo asafunika kuona mwadidi pinacitika, asafunika kukhala auxamwali, pontho pangacitika pinthu mwakukhonda dikhira asafunika kudziwa pinafunika iwo kucita. Basa yawo isaphataniza kutambira mwadidi anthu anatoma kwene  kubwera pa misonkhano, kusakira mbuto ale anadembuka, kulengesa anthu adagumanika na kuonesesa khala n’Nyumba ya Umambo mukupita mphepo yadidi. Pingakhala pyakufunika, akalindi asafunika kupanga anyakubala kuti aonere mwadidi anawo toera akhonde kusendzeka ku platifomu peno kuthamanga-thamanga n’Nyumba ya Umambo misonkhano mbidzati kutoma peno ingamala. Mwana angazunguza kalindi asafunika kuphemba nyakubala munjira yadidi na yacilemedzo kuti abuluke naye kunja toera akhonde kudzudzumisa anango. Basa inacita akalindi isaphedza kakamwe toera anthu abvesere mwadidi misonkhano. Mphyadidi kuti akalindi akhale akulu a mpingo na atumiki akutumikira.

¹⁵ Mu ndzidzi wa apostolo, Akristu anango akhali na pinthu pizinji pyakumanungo kupiringana anango, na thangwi ineyi mpostolo Paulu alemba: “Kunjipa kwa pinthu piri na imwe, kuaphedze mu pinthu pidasowa iwo, toera kunjipa kwa pinthu pyawo kukuphedzenimbo mu pire pidasowa imwe; natenepa, monsene munakhala sawasawa.” (2 Akor. 8:14) Lero tisawangisira toera tikhalembo “sawasawa.” Pyakupereka pinacita mipingo pa dziko yonsene yapantsi pisagumanywa mbapiphatisirwa toera kumanga na kusasanyira Nyumba za Umambo. Gulu yathu na mipingo inaphedzeka na pyakupereka pyenepi isapereka takhuta kakamwe thangwi ya kupasa mwakudzala manja kunacita abale na alongo pa dziko yonsene yapantsi.

 ¹⁶ Ofesi ya filiali isasankhula mipingo inafuna kuphatisira Nyumba ya Umambo mwakubverana na makhaliro apacisa. Pontho ndi ofesi ya filiali inasankhula kuti ndi kupi kunafunika kumangwa peno kusasanyirwa Nyumba za Umambo ziri mu dziko inayang’anirwa na filiali yawo. Pangacitika cidengwa, masasanyiro asacitwa toera Nyumba za Umambo zidagudjuka zisasanyirwe, pontho pingakhala pyakufunika nyumba za abale zisasasanyirwambo.

¹⁷ Ofesi ya filiali isatsogolera basa inacita anthu anaperekeka toera kuphedzera kugula mbuto, kulemba kuti Nyumba ya Umambo inakhala tani, kucitisa madhukumentu, kumanga na kuisasanyira. Nakuti m’madziko mazinji musafunika Nyumba za Umambo, pasafunikambo anyakuperekeka azinji. Amwazi mphangwa onsene akubatizwa akuti athema kucita basa ineyi, pontho asafuna kuphedzera, anakwanisa kulemba petisau mbaipereka kuna Komiti Yakuyang’anira Basa mu Mpingo. Amwazi mphangwa akuti adzati kubatizwa anakwanisa kuphedzerambo kumanga peno kusasanyira Nyumba yawo ya Umambo.

¹⁸ Akristu akutoma kazinji kene akhasonkhana m’misoka ming’ono. Mbwenye midzidzi inango “mwinji ukulu wa anthu” ukhasonkhana pabodzi. (Mabasa 11:26) Munjira ibodzi ene, lero mbumba ya Yahova isagumanyikana toera kucita misonkhano ya gawo na ya cisa. Kazinji kene abale asalugari mbuto toera kucitira misonkhano ineyi, mbwenye khala nkhabepo mbuto yadidi peno yakuthema asacitwa masasanyiro toera kumanga nyumba inacemerwa Nyumba Inacitirwa Misonkhano ya Gawo na ya Cisa.

¹⁹ Midzidzi inango abale asagula nyumba, mbaisasanyira toera ikhale Nyumba Inacitirwa Misonkhano ya Gawo na ya Cisa. Mbwenye kazinji kene iwo asagula mbuto  mbamanga nyumba. Nyumba Zinacitirwa Misonkhano ya Gawo na ya Cisa zisasiyana kukula kwazo mwakubverana na mbuto zinagumanika izo. Ofesi ya filiali ingafuna kugula peno kumanga Nyumba Inacitirwa Misonkhano ya Gawo na ya Cisa pakutoma isaona kobiri inafuna kuphatisirwa, pontho kuti nyumba ineyi inaphatisirwa kangasi pacaka.

²⁰ Ofesi ya filiali isasankhula abale toera kutsalakana na kusasanyira Nyumba Inacitirwa Misonkhano ya Gawo na ya Cisa. Asacitwa masasanyiro toera mipingo yapacisa icenese mbuto ineyi pakumala kwa nsonkhano, icenese mwadidi kawiri pacaka na kusasanyira pinthu toera pikhonde kugudjuka mwakucimbiza. Pisakhala mwadidi kakamwe abale na alongo angaperekeka toera kucita basa ineyi. Ndi thangwi yace, mipingo isawangiswa toera kuphedzera basa ineyi na ntima onsene.—Mas. 110:3; Mal. 1:10.

²¹ Midzidzi inango Nyumba Inacitirwa Misonkhano ya Gawo na ya Cisa isaphatisirwa toera kucitira maxikola akupfundzisa Bhibhlya na misonkhano yakupambulika ya ayang’aniri a cisa. Ninga Nyumba ya Umambo, cifuniro ca Nyumba Inacitirwa Misonkhano ya Gawo na ya Cisa ndi toera kulambira Yahova. Tingagumanyikana pa Nyumba Inacitirwa Misonkhano ya Gawo na ya Cisa, makhaliro athu, mabvaliro athu na makhunganyikiro athu asafunika kukhala acilemedzo ninga tiri pa misonkhano pa Nyumba ya Umambo.

²² Kunkhomo kwa ntsiku zino zakumalisa, anthu azinji apswa asapita mu gulu ya Mulungu. Pyenepi pisapangiza kuti Yahova akutipasa nkhombo. (Iza. 60:8, 10, 11, 22) Ndi thangwi yace, tisafunika kuphedzera basa yakumanga, yakusasanyira na yakucenesa nyumba zinaphatisirwa toera kulambira Mulungu. Tingacita pyenepi tinapangiza kuti nyumba zenezi ndi zakufunika kakamwe thangwi zisatiphedza toera kuwangisana unango na ndzace makamaka mu ndzidzi unaona ife kuti ntsiku ya Yahova ikufika.