KUTOMERA mu ndzidzi wakale mpaka lero, mbumba ya Yahova isagumanyikana toera kucita misonkhano. Mu Izraeli wakale, amuna onsene akhafunika kuenda ku Yerusalemu toera agumanike pa maphwando matatu makulu. (Dheu. 16:16) Mu ndzidzi wa apostolo, Akristu akhagumanyikana mwakukhonda phonya, kazinji kene panyumba ya m’bale peno mulongo. (Filim. 1, 2) Lero, ife tiri na misonkhano ya mpingo, ya cisa na ya gawo. Thangwi yanji atumiki a Mulungu asacita misonkhano? Thangwi ikulu ndi yakuti pyenepi pisacita khundu ya kulambira kwathu.—Mas. 95:6; Akol. 3:16.

² Kusiyapo pyenepi, misonkhano isaphedza ale anagumanika penepo. Mwakubverana na pikhacitika pakumala pyaka pinomwe pya Phwando ya Misasa, Aizraeli apangwa: “[Gumanyani] mbumba yonsene pabodzi pene, amuna, akazi na ana pabodzi na anthu a dziko inango anakhala m’mizinda yanu, toera iwo abvesere, apfundze pya Yahova Mulungu wanu toera an’gope, pontho acite mphole-mphole toera abvere mafala onsene a Mwambo uyu.” (Dheu. 31:12) Pyenepi pisapangiza kuti cifuniro cikulu ca misonkhano yathu ndi ‘kupfundziswa na Yahova.’ (Iza. 54:13) Misonkhano isatipasambo mwai wakudziwana mwadidi na anango, kucedza nawo na kuwangisa cikhulupiro ca unango na ndzace.

³ Anyakupfundza adagumanyikana pakumala kwa Pentekoste ya 33 P.K.K. akhabvera pikhapfundzisa apostolo, pontho ‘ntsiku zonsene iwo akhasonkhana mu templo, mbakhala na cifuniro cibodzi cene.’ (Mabasa 2:42, 46) Mukupita kwa ndzidzi, Akristu angagumanyikana toera kulambira, akhaleri matsamba adatsogolerwa na Mulungu toera alembwe, kuphatanizambo matsamba adalembwa na apostolo na anyakupfundza anango a Kristu. (1 Akor. 1:1, 2; Akol. 4:16; 1 Ates. 1:1; Tiya. 1:1) Ninga mpingo, iwo akhacitambo maphembero. (Mabasa 4:24-29; 20:36) Midzidzi inango, akhalonga kuti basa yawo ya umisionaryo ikufamba tani. (Mabasa 11:5-18; 14:27, 28) Pontho iwo akhacedza thangwi ya pinapfundzisa Bhibhlya na kukwanirisika kwa maprofesiya. Akhapaswa pitsogolero pyakuti anakhala tani na makhaliro Acikristu, na pikhafunika iwo kucita toera kupangiza kuti aperekeka kuna Mulungu. Onsene akhawangiswa toera amwaze mphangwa zadidi mwaphinga.—Aroma 10:9, 10; 1 Akor. 11:23-26; 15:58; Aef. 5:1-33.

⁴ Mu ntsiku zino, misonkhano Yacikristu isacitwa ninga mukhacitwa iyo mu ndzidzi wa apostolo. Ife tisabvera uphungu wa Mulungu unagumanika pa Ahebheri 10:24, 25: “Tendeni tinyerezerane unango na ndzace . . . , tikhonde kudjomba misonkhano, ninga pinacita anango akuti ali na nsambo unoyu, mbwenye tiwangisane unango na ndzace, makamaka mu ndzidzi unaona imwe kuti ntsiku ya Mulungu iri kufika.” Mu ntsiku zino zakumalisa na zakunentsa, ife tisafuna kakamwe ciwangiso cinatambira ife tingagumanika pa misonkhano mwakukhonda phonya. Kugumanika pa misonkhano kunatiphedza toera tikhale akukhulupirika mbatiwangisa uxamwali wathu na Yahova. (Aroma 1:11, 12) Ninga Akristu, ife tikukhala mu dziko yakudzala  na anthu akuipa akuti nkhabe kucita pinthu pyakulungama. Natenepa, tisafunika kucalira makhaliro anewa akuipa na pifuno pya dziko ino. (Afil. 2:15, 16; Tito 2:12-14) Nkhabepo mbuto inango yadidi kakamwe kupiringana kukhala pakati pa mbumba ya Yahova. (Mas. 84:10) Pontho nkhabepo cinthu cakufunika kakamwe kupiringana kupfundza na kucedza thangwi ya Mafala a Mulungu. Cincino tendeni tione misonkhano yakusiyana-siyana inacitwa toera kutiphedza.

⁵ Khundu yakutoma ya nsonkhano wakumala kwa sumana ndi nkhani yapakweca yakubuluswa m’Bhibhlya inacitirwa anthu onsene, akuti anango mwa iwo akutoma kwene kugumanika pa misonkhano yathu. Nkhani ineyi isaphedza anthu akuti akutoma kwene kusonkhana na amwazi mphangwa onsene toera awangise cikhulupiro cawo.—Mabasa 18:4; 19:9, 10.

⁶ Kristu Yezu, apostolo ace na anthu anango akhacitisa misonkhano yapakweca ninga inacitwa m’mipingo ya mbumba ya Yahova lero. Mwakukhonda penula, Yezu akhali na luso ikulu kakamwe yakucita nkhani pa mwinji kupiringana anthu onsene pa dziko yapantsi, na thangwi ineyi anango akhalonga: “Cipo munthu unango alonga kale ninga iye.” (Juw. 7:46) Yezu akhapfundzisa munjira yakupangiza kuti ali na utongi, ndi thangwi yace anthu akhadzumatirwa kakamwe. (Mat. 7:28, 29) Ale akhatawira mphangwa zace akhaphedzeka kakamwe. (Mat. 13:16, 17) Apostolo atowezera citsandzo cace. Bukhu ya Mabasa 2:14-36, isalonga pya nkhani yakuphata ntima idacita Pedhru pa ntsiku ya Pentekoste ya 33 P.K.K. Anthu azinji kakamwe akulumizika toera kucita pinthu mwakubverana na pidabva iwo. Mukupita kwa ndzidzi, anthu anango ku  Atena adzakhala anyakupfundza thangwi ya pidabva iwo mu nkhani ya Paulu.—Mabasa 17:22-34.

⁷ Munjira ibodzi ene lero, anthu azinji kakamwe asaphedzeka na Nkhani zapakweca zinacitwa masumana onsene m’mipingo, m’misonkhano ya cisa na ya gawo. Nkhani zenezi zisatikumbusa ntsonga zakufunika zinagumanika m’Bhibhlya zakuti zisatiphedza kukhala akukhulupirika m’basa ya Umambo. Tingacemera anyakupfundza athu a Bhibhlya na anthu anango, tisaaphedza toera adziwe pinapfundzisa Bhibhlya.

⁸ Nkhani zapakweca zinacitwa m’misonkhano yathu zisakhala na misolo yakusiyana-siyana. Nkhani zenezi zisalonga thangwi ya pinapfundzisa Bhibhlya, maprofesiya, midida ya m’Bhibhlya, uphungu thangwi ya umaso wa m’banja, pinthu pyakumanungo, nyatwa zinatamba aphale na atsikana, pontho zisalonga thangwi ya makhaliro adidi Acikristu. Zisalongambo thangwi ya pinthu pyakudzumisa pidacita Yahova, cikhulupiro, cipapo na kukhulupirika kwa anthu anango analongwa m’Bhibhlya akuti ife lero tisafunika kutowezera citsandzo cawo.

⁹ Toera tikwanise kupfundza pizinji mu ndzidzi unacitwa nkhani zapakweca, tisafunika kubvesera mwadidi, kufungula malemba analonga nyakucita nkhani, kuntowezera munaleri iye na kumbvesera mwadidi munaafokotoza iye. (Luka 8:18) Tingakhala na cinyindiro cakuti pinapfundza ife pisabuluka m’Bhibhlya, tinakhala na cifuno cakupitiriza kupfundza, pontho tinasaka njira zakuphatisira pinapfundza ife.—1 Ates. 5:21.

¹⁰ Khala alipo anyakucita nkhani, nkhani zapakweca zisacitwa masumana onsene mu mpingo. Kazinji kene pyenepi pisakwanisika angaphembwa anyakucita nkhani a mipingo iri dhuzi na wanu. Khala anyakucita nkhani ndi akucepa, nkhani zapakweca nee zisacitwa masumana onsene.

 ¹¹ Khundu yaciwiri ya nsonkhano wakumala kwa sumana ndi Pfundziro ya Ncenjezi, yakuti isakhala ya mibvundzo na mitawiro inagumanika mu revista ya Ncenjezi wa pfundziro. Yahova asaphatisira revista ya Ncenjezi toera kutipasa cakudya cauzimu pa ndzidzi wakuthema.

¹² Misolo inapfundza ife, kazinji kene isatiphedza toera kuona kuti tinaphatisira tani pinalonga Bhibhlya mu umaso wathu wa ntsiku na ntsiku. Misolo ineyi isaphedza Akristu toera kucalira “nzimu wa dziko” na makhaliro akunyanyasa. (1 Akor. 2:12) Pinapfundza ife mu Ncenjezi pisatiphedza toera kuthimizira kubvesesa kwathu maprofesiya na undimomwene upswa unagumanika m’Bhibhlya, pontho pisatiphedza toera tipitirize mu undimomwene na munjira za anthu akulungama. (Mas. 97:11; Mis. 4:18) Kugumanika pa Pfundziro ya Ncenjezi na kutawira, kunatiphedza toera tikhale akutsandzaya na cidikhiro cakupita mu dziko ipswa yakulungama ya Yahova. (Aroma 12:12; 2 Ped. 3:13) Nsonkhano unoyu usatiphedza toera kukulisa misapo ya nzimu wakucena na kuthimizira cifuno cathu cakutumikira Yahova mwaphinga. (Agal. 5:22, 23) Ife tisaphedzwa toera tikwanise kupirira mayesero na kuwangisa “citsidzikizo cadidi ca ntsogolo” toera tiphate “na manja mawiri umaso wandimomwene.”—1 Tim. 6:19; 1 Ped. 1:6, 7.

¹³ Tinacitanji toera tiphedzeke kakamwe na cakudya ceneci cauzimu? Ife tisafunika kukhungayika mwadidi tekhene peno ninga banja nsolo unafuna ife kuenda kapfundza, kuleri malemba ali mu ndima, pontho pakutawira pa nsonkhano, tisafunika kuphatisira mafala athu ene. Pyenepi pisatiphedza toera tikhonde kuduwala mphangwa zakufunika zinapfundza ife, pontho anango anaphedzeka angabva mitawiro yathu yakubulukira muntima. Tingabvesera mwadidi mitawiro ya anango, tinaphedzeka na Pfundziro ya Ncenjezi inacitwa masumana onsene.

¹⁴ Masumana onsene tisagumanyikana pa Nyumba ya Umambo toera kucita nsonkhano wa Umaso Wathu Wacikristu na Utumiki. Nsonkhano unoyu uli na makhundu matatu akuti asatiphedza toera tikhale “akuthema” ninga atumiki a Mulungu. (2 Akor. 3:5, 6) Mphangwa zinapfundza ife zisagumanika mu Programu ya Umaso Wathu Wacikristu na Utumiki inatambira ife miyezi yonsene. Mu Programu ineyi musagumanikambo pitsandzo pyakuti tinapiphatisira pakumwaza mphangwa.

¹⁵ Khundu yakutoma ya nsonkhano unoyu yakuti Mpfuma za Mafala a Mulungu, isatiphedza kudziwa kuti pinthu pikhali tani mu ndzidzi ukhalembwa Bhibhlya, pontho tinapiphatisira tani mu umaso wathu. Khundu ineyi isaphataniza nkhani, kuleri, pontho anyakubvesera asalonga pidapfundza iwo pakuleri Bhibhlya sumana ineyi. Mu Programu ya Umaso Wathu Wacikristu na Utumiki musagumanikambo mafoto, mavidhyu na pinango toera kutiphedza kubvesesa pinapfundza ife. Kupfundza Bhibhlya munjira ineyi kusatiphedza mu umaso wathu, pontho kusatiphedza pakupfundzisa kuti ‘tikhale akukhunganyika mwadidi toera kuphata mabasa adidi onsene.’—2 Tim. 3:16, 17.

¹⁶ Khundu yaciwiri yakuti Pfundzisani Mwaluso mu Utumiki, isatiphedza toera kuthimizira maluso athu m’basa yakumwaza mphangwa na kupfundzisa. Kusiyapo makhundu anacita anyakupfundza, tisaonambo mavidhyu a mafala toera kutomesa makani. Khundu ineyi isatiphedza toera tikhale na ‘lirimi yakupfundziswa mwadidi’ toera tidziwe kuti ‘tinatawira tani na mafala adidi anthu adaneta.’—Iza. 50:4.

¹⁷ Khundu yacitatu yakuti Kukhala m’Maso Ninga Akristu isatiphedza toera kuona kuti tinaphatisira tani pinalonga  Bhibhlya mu umaso wathu wa ntsiku na ntsiku. (Mas. 119:105) Khundu yakufunika kakamwe ya Kukhala m’Maso Ninga Akristu ndi Pfundziro ya Bhibhlya ya Mpingo. Pa Pfundziro ya Bhibhlya ya Mpingo pasacitwa mibvundzo na mitawiro ninga pinacitwa pa Pfundziro ya Ncenjezi.

¹⁸ Miyezi yonsene ingabwera Programu ya Umaso Wathu Wacikristu na Utumiki, muyang’aniri wa Umaso Wathu Wacikristu na Utumiki peno nkulu unango wa mpingo anam’phedzera, asaidinga mwadidi, buluka penepo asacita ndandanda. Pa sumana ibodzi na ibodzi, nkulu wa mpingo wakuti asapfundzisa mwadidi adasankhulwa na nsoka wa akulu a mpingo anakwanisa kutumikira ninga muimiriri wa nsonkhano wa Umaso Wathu Wacikristu na Utumiki. Basa yace isaphataniza kuonesesa kuti nsonkhano utome, pontho umale pa ndzidzi wakuthema. Kusiyapo pyenepi asafunika kusimba na kupereka uphungu kuna anyakupfundza adacita makhundu.

¹⁹ Ndzidzi onsene tingakhunganyika Nsonkhano wa Umaso na Utumiki, kugumanika pa nsonkhano unoyu, kutawira na kucita makhundu anango, tinadziwa Malemba, tinabvesesa pinalonga Bhibhlya, tinadziwa kumwaza mphangwa munjira yadidi, pontho tinakhala na maluso adidi pakucita anyakupfundza. Ale anagumanika pa nsonkhano unoyu, ngakhale adzati kubatizwa anaphedzekambo na mphangwa zakuwangisa zinapfundzwa, pontho na uxamwali unacita iwo na abale na alongo. Toera kukhunganyika mwadidi nsonkhano unoyu na inango, tinakwanisa kuphatisira Watchtower Library, JW Library^®, BIBLIOTECA ON-LINE da Torre de Vigia^™ (khala asagumanika mu cilongero canu), na bhibhliyoteka ya pa Nyumba ya Umambo. Bhibhliyoteka ya pa Nyumba ya Umambo iri na mabukhu onsene anabuluswa na Mboni za Yahova, Índice das Publicações da Torre de  Vigia peno Bukhu Inaphatisira Mboni za Yahova Pakufufudza, kuphatanizambo Mabhibhlya akusiyana-siyana, dhisionaryo na mabukhu anango anatiphedza pakufufudza. Tonsene tinakwanisa kuphatisira Bhibhliyoteka ineyi misonkhano mbidzati kutoma peno ingamala.

²⁰ Midzidzi yakusiyana-siyana pakati pa sumana na pakumala kwa sumana, misoka ya amwazi mphangwa isagumanyikana toera kucita misonkhano ya cigwagwa ya basa ya m’munda. Kazinji kene misonkhano ineyi isacitwa n’nyumba za abale peno mbuto zinango zakuthema. Nyumba ya Umambo inakwanisambo kuphatisirwa toera kucitira misonkhano ineyi. Kukhala na misoka ing’ono m’mbuto zakusiyana-siyana kusaphedza amwazi mphangwa toera kugumanika pa nsonkhano wa basa ya m’munda na kuenda kamwaza mphangwa mwakukhonda nentsa. Amwazi mphangwa angakhala akucepa, pisakhala pyakukhonda nentsa kuagawa mbatoma kumwaza mphangwa mwakukhonda dembuka. Pisakhalambo pyakukhonda nentsa kuna muyang’aniri kuphedza amwazi mphangwa onsene a nsoka wace. Maseze pisaphedza kuti misoka icite misonkhano m’mbuto zakusiyana, mbwenye midzidzi inango pisakhala pyakufunika kuti misoka mingasi igumanyikane pabodzi pene toera kucita nsonkhano unoyu. Mwacitsandzo, khala amwazi mphangwa anabuluka m’basa ya m’munda pakati pa sumana ndi akucepa, pinakhala mwadidi kubvungaza misoka mingasi  peno mpingo onsene pa Nyumba ya Umambo peno pa mbuto inango. Kucita pyenepi kunaphedza amwazi mphangwa kugumana ndzawo wakumwaza naye mphangwa. Mipingo inakwanisambo kuona khala mphyadidi kugumanyikana onsene pa Nyumba ya Umambo toera kuenda kamwaza mphangwa pa ntsiku za mafiriyadu. Panango anango anasankhula kucita nsonkhano wa basa ya m’munda pakumala kwa Pfundziro ya Ncenjezi.

²¹ Khala misoka isagumanyikana m’mbuto zakusiyana, muimiriri wa nsoka ndiye anatsogolera nsonkhano wa basa ya m’munda. Midzidzi inango muimiriri anakwanisa kuphemba nyakuphedza wace peno m’bale unango wakuthema toera kutsogolera misonkhano ya basa ya m’munda. Ule anatsogolera asafunika kulonga mphangwa zakuti zinaphedza m’basa yakumwaza mphangwa. Angamala kugawa abale na alongo na kulonga cisa cinafuna kumwazwa mphangwa, m’bodzi wa mu nsoka anacita phembero. Buluka penepo, mwakukhonda dembuka nsoka usafunika kuenda kamwaza mphangwa. Misonkhano ineyi isafunika kucitwa m’mphindi 5 peno 7 mbwenye isafunika kukhala yacigwagwa kakamwe ingacitwa pakumala kwa nsonkhano wa mpingo. Iyo isafunika kuwangisa, kupereka maonero akufunika na pitsogolero kuna ale anafuna kuenda kamwaza mphangwa. Amwazi mphangwa apswa peno ale akuti asafuna ciphedzo asafunika kuphata basa na amwazi mphangwa akuti ali na maluso toera akwanise kuaphedza.

²² Nakuti anthu azinji ali kupfundza undimomwene, numero ya mipingo isathimizirika. Kazinji kene muyang’aniri wa cisa ndiye anacita phembo toera mpingo upswa ukhazikiswe. Mbwenye midzidzi inango, misoka ming’ono  panango inaona kuti mphyadidi kusonkhana na mpingo wa padhuzi.

²³ Midzidzi inango m’mipingo ming’ono munagumanika alongo basi. Pyenepi pingacitika, mulongo anacita phembero peno kutsogolera misonkhano asafunika kuphimbira nsolo wace mwakubverana na pinalonga Malemba. (1 Akor. 11:3-16) Kazinji kene, iye asafunika kukhala pantsi mbakayang’ana nsoka. Alongo nkhabe kucita nkhani mbadalimira ninga pinacita abale pa misonkhano. Basi ene iwo asaleri mbafokotoza mphangwa zinaleri iwo, peno angafuna kucinja, anakwanisa kucita ninga akucedza na anyakubvesera, peno kucita citsandzo. Ofesi ya filiali inasankhula mulongo m’bodzi toera atsalakane matsamba anabuluka ku ofesi na kuphedzera toera misonkhano ifambe mwadidi. Mukupita kwa ndzidzi angagumanika abale akuthema ndiwo anafuna kudzacita mabasa anewa.

²⁴ Pyaka pyonsene masasanyiro asacitwa toera mipingo ya mucisa cibodzi cene icite misonkhano miwiri ya cisa ya ntsiku ibodzi. Misonkhano ineyi isapasa mwai ale anagumanika toera ‘kufungula mwakukwana mitima yawo’ pakucedza na Akristu andzawo. (2 Akor. 6:11-13) Gulu ya Yahova isaphatisira Bhibhlya toera kusankhula misolo ya nsonkhano, pontho isakhunganya nkhani zakusiyana-siyana mwakubverana na pinafuna anthu. Nkhani zinango analonga ndi munthu m’bodzi basi mpaka kunkhomo, zinango zisakhala na citsandzo, zinango na munthu mbakalonga ekhene mwakugaluza, pontho zinango na mibvundzo na mitawiro. Pyenepi pisawangisa onsene anagumanika. Misonkhano ineyi ya cisa isapasa mwai anyakupfundza apswa toera kubatizwa ninga cipangizo cakuperekeka kwawo kuna Yahova.

²⁵ Kabodzi pacaka usacitwa nsonkhano ukulu. Kazinji kene nsonkhano unoyu usakhala wa ntsiku zitatu, pontho penepo pasagumanika mipingo ya pisa pyakusiyana-siyana. Mafiliali mang’ono panango anaona kuti mphyadidi mipingo yonsene ya pisa pya filiali yawo igumanyikane pa mbuto ibodzi ene. M’madziko anango masasanyiro a misonkhano ineyi asacitwa mwakubverana na makhaliro awo peno mwakubverana na pitsogolero pinapaswa iwo na gulu. Midzidzi inango, m’madziko anango musacitwa Misonkhano ya dziko yonsene peno misonkhano yakupambulika, pontho Mboni za Yahova zizinji za m’madziko akusiyana-siyana zisabwera pa misonkhano ineyi. Mu pyaka pizinji, njira inaphatisira anthu toera kudziwisa misonkhano ineyi yaphedza anthu azinji toera kubva mphangwa zadidi za Umambo.

²⁶ Kuna mbumba yakuperekeka ya Yahova, misonkhano ineyi ya gawo ndi yakutsandzayisa toera kulambira Mulungu mwakuphatana. Iyo isatipasa mwai wakupangiza ceza ca undimomwene. Pa misonkhano inango ya gawo, asabuluswa mabukhu toera tiaphatisire pa pfundziro ya munthu paekha, pa mpingo peno pakumwaza mphangwa. Khundu yakufunika kakamwe pa misonkhano ya gawo ndi ubatizo. Misonkhano ineyi ndi yakufunika kakamwe thangwi isatiphedza toera kukhala na uxamwali wakuwanga na Yahova. Iyo isapangiza kuti Mboni za Yahova ndi Akristu akuperekeka na akuphatana anagumanika pa dziko yonsene yapantsi, pontho ali na cidzindikiro cinapangiza kuti ndi anyakupfundza a Yezu Kristu.—Juw. 13:35.

²⁷ Tingasonkhana pabodzi na Akristu andzathu pa misonkhano ya mpingo, ya cisa na ya gawo tinawangiswa toera kucita cifuno ca Yahova. Pontho iyo inatitsidzikiza m’makhaliro akuipa a dziko ino akuti anafewesa  cikhulupiro cathu. Misonkhano ineyi yonsene isatipasa mwai toera kupasa mbiri Yahova na kunsimba. (Mas. 35:18; Mis. 14:28) Tisafunika kupereka takhuta kuna Yahova thangwi yakutipasa kwace misonkhano ineyi yakuti isatiwangisa mu ntsiku zino zakumalisa.

²⁸ Kabodzi pa caka, Mboni za Yahova zisagumanyikana toera kucita nsonkhano wakukumbuka kufa kwa Yezu Kristu. Nsonkhano unoyu usadziwikambo na Cakudya Cancidodo ca Mbuya. (1 Akor. 11:20, 23, 24) Kuna atumiki a Yahova unoyu ndi nsonkhano wakufunika kakamwe kupiringana misonkhano inango yonsene inacita iwo pacaka. Yezu Kristu atipanga toera kucita Cikumbuso ceneci.—Luka 22:19.

²⁹ Ntsiku ya Cikumbuso isabverana na ntsiku ya Paskwa inalongwa m’Bhibhlya. (Eks. 12:2, 6; Mat. 26:17, 20, 26) Paskwa ikhacitwa kabodzi pacaka toera kukumbuka kupulumuswa kwa Aizraeli ku Ejitu mu caka 1513 K.M.K. Pa ndzidzi unoyu, Yahova asankhula ntsiku 14 ya mwezi wakutoma wa kalendaryo yawo toera kudya mwanabira wa Paskwa, buluka penepo acite ulendo wakubuluka mu ubitcu ku Ejitu. (Eks. 12:1-51) Toera kudziwa ntsiku ya Cikumbuso, akhalengesa ntsiku 13 kutomera pa ntsiku ikhaoneka mwezi mu Yerusalemu dhuzi na kunkhomo kwa mwezi wa Março peno kumatomero a mwezi wa Abril. Kazinji kene, Cikumbuso cisacitwa pa ntsiku yakutoma inaoneka mwezi wakudzala.

³⁰ Mafala a Yezu anagumanika pa Mateu 26:26-28 asapangiza kuti Cikumbuso cisafunika kucitwa tani. Pidzindikiro pinaphatisirwa nkhabe cinja kudza manungo andimomwene peno ciropa candimomwene, basi ene ipyo ndi pidzindikiro, pontho anthu anadya pinthu pyenepi ndi ale anafuna kutonga pabodzi na Yezu Kristu mu Umambo  wakudzulu. (Luka 22:28-30) Akristu onsene pabodzi na anthu anango asawangiswa toera agumanike pa Cakudya Cancidodo ca Mbuya. Kugumanika kwawo kusapangiza kuti asapereka takhuta kuna Yahova Mulungu thangwi ya masasanyiro adacita iye akutuma Mwanace Yezu Kristu toera kudzapulumusa anthu onsene. Cikumbuso mbacidzati kucitwa, isacitwa nkhani yakupambulika yakuti isatiphedza toera kuthimizira cifuno cathu cakugumanika pa cikumbuso na cakupfundza Bhibhlya.

³¹ Mboni za Yahova zisadikhira mwakutsandzaya ntsiku yakusonkhana pabodzi, yakuti isaacitisa ‘kunyerezerana unango na ndzace, mbawangisana toera kupangiza ufuni na kuphata mabasa adidi.’ (Aheb. 10:24) M’bandazi wakukhulupirika na wandzeru asakhunganya misonkhano ineyi toera kutiphedza kuti tiwangise uxamwali wathu na Yahova. Atumiki onsene a Yahova, kuphatanizambo ale akuti ali na cifuno cakupfundza undimomwene asawangiswa toera agumanike pa misonkhano ineyi yonsene. Tingapereka takhuta kuna Yahova thangwi ya pyonsene pinatipasa iye kubulukira mu gulu yace, tinakhala akuphatana kakamwe. Cakufunika kakamwe ndi cakuti pa misonkhano ineyi tisapasa mbiri Yahova na kunsimba.—Mas. 111:1.