PYAKA pyonsene, anthu azinji asabwera panyumba yaulambiri wakucena wa Yahova toera kukwanirisa profesiya ya m’Bhibhlya. (Mik. 4:1, 2) Tisatsandzaya kakamwe thangwi yakutambira anthu anewa pa “mpingo wa Mulungu.” (Mabasa 20:28) Iwo asapereka takhuta thangwi yakutumikira Yahova pabodzi na ife, na mwai wakukhala mwantendere m’paraizu yathu yauzimu. Nzimu wakucena wa Mulungu na uphungu wace wadidi, usatiphedza toera tipitirize kukhala antendere, pontho toera mpingo upitirize kukhala wakucena.—Mas. 119:105; Ezek. 4:6.

² Tingaphatisira mitemo ya m’Bhibhlya, tinabvala “uunthu upswa.” (Akol. 3:10) Tisapwaza madodo mang’ono anaticitira anango, pontho nee tinadzudzumika thangwi yakusiyana maonero. Kuona pinthu ninga munapionera Yahova, kusatiphedza toera tikhonde kutowezera makhaliro a anthu a dziko akuti asacitisa anthu kusankhulana, pontho kusatiphedza toera tiphate basa mwakuphatana pabodzi na abale na alongo pa dziko yonsene yapantsi.—Mabasa 10:34, 35.

³ Ngakhale tenepo, midzidzi inango mu mpingo musacitika pinthu pyakuti pisamalisa ntendere na kuphatana kwathu. Thangwi yanji pyenepi pisacitika? Kazinji kene pyenepi pisacitika thangwi anango nee asabvera pinalonga Bhibhlya. Kusiyapo pyenepi, ndife anthu akusowa  ungwiro, natenepa tonsene tisadodoma. (1 Juw. 1:10) Panango munthu unango anacita pinthu pyakuipa, mbapswipisa mpingo. Panango tinatsukwalisa munthu thangwi yakulonga peno kucita pinthu mwakukhonda nyerezera, panango tinatsukwala thangwi ya pidacita munthu peno pidalonga iye. (Aroma 3:23) Pyenepi pingacitika, tinacitanji toera kumalisa mikandzo ineyi?

⁴ Mwaufuni, Yahova asatitsalakana mwakubverana na pinthu pyenepi pyonsene, pontho kubulukira m’Mafalace, iye asatipasa uphungu wakuti tinacitanji pangaoneka mikandzo. Akulu a mpingo akuti ndi akumbizi auzimu asapereka ciphedzo mwaufuni kuna m’bodzi na m’bodzi. Tingaphatisira uphungu wawo wakubuluka m’Bhibhlya, tinakhala na uxamwali wakuwanga na anango, pontho tinakhala akutawirika kuna Yahova. Tingalangwa peno kusandikwa thangwi ya madodo adacita ife, tinakwanisa kukhala na cinyindiro cakuti Babathu wakudzulu asatifuna.—Mis. 3:11, 12; Aheb. 12:6.

⁵ Midzidzi inango pasaoneka kukhonda kubverana peno mikandzo inango ming’ono pakati pa abale na alongo mu mpingo. Mikandzo ineyi isafunika kumaliswa mwakucimbiza, mwaufuni na munjira yadidi. (Aef. 4:26; Afil. 2:2-4; Akol. 3:12-14) Panango imwe musatawira kuti tinganentsana na Nkristu ndzathu, tinakwanisa kumalisa nkandzo unoyu tingaphatisira uphungu wa mpostolo Pedhru wakuti: “Kupiringana pyonsene, funanani kakamwe unango na ndzace, thangwi ufuni usaphimbira madawo mazinji kakamwe.” (1 Ped. 4:8) Bhibhlya isalonga: “Tonsene tisadodoma kazinji kene.” (Tiya. 3:2) Tingaphatisira pinalonga Bhibhlya, mbaticitira anango pinthu pinafuna  ife kuti iwo aticitire, tinakwanisa kualekerera mbatiduwala madodo mang’ono.—Mat. 6:14, 15; 7:12.

⁶ Mungaona kuti alipo adatsukwala thangwi ya pinthu pidacita imwe peno pidalonga imwe, musafunika kukhazikisa ntendere mwakucimbiza. Kumbukani kuti pyenepi pisakhuyambo uxamwali wanu na Yahova. Yezu apereka uphungu kuna anyakupfundzace: “Mphapo iwe ungabweresa muoni wako pa guwa ya ntsembe, penepo mbukumbuka kuti watsukwalisa m’bale wako, siya muoni wako patsogolo pa guwa. Pakutoma ndoko kakhazikise ntendere na m’bale wako, ungamala, bwerera toera upereke muoni wako.” (Mat. 5:23, 24) Panango munatsukwalisana thangwi ya kukhonda kubvesesa mwadidi pinthu. Pyenepi pingacitika, ndokoni kacedza na munthu unoyu. Anthu mu mpingo angacedza mwakusudzuka pisaphedza toera akhonde kubvesesana mwakuphonyeka, pontho pisaphedza toera kumalisa mikandzo inaoneka thangwi yakusowa ungwiro.

⁷ Midzidzi inango pisakhala pyakufunika kuti akulu a mpingo apase uphungu munthu wakuti ali na manyerezero akuphonyeka. Kucita pyenepi m’midzidzi inango pisanentsa. Mpostolo Paulu alembera Akristu a ku Galasya: “Abale anga, khala munthu atoma kufamba munjira yakuipa, ngakhale mwakukhonda kudziwa, imwe akuti ndimwe akukola mwauzimu yeserani kuphedza munthu unoyu mwakukhurudzika.”—Agal. 6:1.

⁸ Akulu a mpingo angakumbiza mwadidi mabira, anakwanisa kutsidzikiza mpingo ku ngozwi zizinji zauzimu na nyatwa zinango zikulu. Akulu a mpingo asawangisira toera basa inacita iwo ikhale ninga idapikira Yahova  kubulukira kuna Izaiya: “M’bodzi na m’bodzi wa iwo anadzakhala ninga mbuto yakuthawira mphepo, mbuto yakubisalira mu ndzidzi wa condzi, ninga mikulo ya madzi mu dziko yakusowa madzi, ninga n’thundzi wa mwala ukulu mu dziko yakupisa kakamwe.”—Iza. 32:2.

⁹ Mpostolo Paulu acenjeza Akristu andzace kuti acite mphole-mphole na anthu anango a makhaliro akuipa mu mpingo. Paulu alonga: ‘Ife tisakupasani pitsogolero toera mucalire abale onsene akukhonda bvera, peno ale anacita pinthu mwakukhonda bverana na pitsogolero pidatumiza ife kuna imwe.’ Iye abvekesa pyenepi pidalemba iye kuti: “Munthu angakhonda kubvera pinalonga ife mu tsamba iyi, muikheni cidzindikiro, mbamuncalira, toera iye akhale na manyadzo. Ngakhale tenepo, lekani kumuona ninga nyamalwa, mbwenye pitirizani kumpasa uphungu ninga m’bale.”—2 Ates. 3:6, 14, 15.

¹⁰ Panango anaoneka munthu mu mpingo wakuti nee asacita madawo makulu akuti anabuluswa nawo mu mpingo, mbwenye asacita pinthu pyakuti pisapangiza pakweca kuti nee asabvera mitemo ya Mulungu yakuti Akristu asafunika kuibvera. Pinthu pyenepi pisaphataniza kukhala wakupolola kakamwe, wakusumula abale peno wauzende. Panango iye “asadzudzumika na pinthu pyakuti nee ndi [pyace].” (2 Ates. 3:11) Panango iye ndi munthu wakuti asakomerwa kudya pya andzace peno asakomerwa kakamwe na ubalangazi wakuipa. Makhaliro anewa akuipa anakwanisa kupswipisa mpingo, pontho anakwanisa kukhuya Akristu anango.

¹¹ Pakutoma akulu a mpingo anaphatisira uphungu wa m’Bhibhlya toera kuyesera kuphedza munthu unoyu.  Mbwenye khala acenjezwa kazinji kene mbapitiriza kupwaza uphungu wa m’Bhibhlya udapaswa iye, panango akulu a mpingo anacita nkhani yakucenjeza mpingo. Akulu a mpingo anaphatisira luso yakudzindikira toera kuona khala makhaliro anewa ndi akuipa kakamwe toera kucita nkhani yakucenjeza mpingo. Nyakucita nkhani asafunika kupereka uphungu wadidi thangwi ya makhaliro anewa akuipa, mbwenye nee asafunika kulonga dzina ya munthu anacita pyenepi. Natenepa ale anadziwa pinalongwa mu nkhani ineyi, anacalira kucita uxamwali na munthu unoyu, ngakhale kuti anapitiriza kucita naye mabasa auzimu na “kumpasa uphungu ninga m’bale.”

¹² Akristu mu mpingo angantsalakana munjira ineyi, pinancitisa kukhala na manyadzo mbacinja makhaliro ace akuipa. Munthu unoyu angapangiza kuti asiya kucita pinthu pyakuipa nee asafunikabve kuoniwa ninga munthu adaikhwa cidzindikiro.

¹³ Kupwaza madodo anango na kulekerera nee pisabveka kuti tisakomerwa na pinthu pyakuipa. Nee ndi madawo onsene akuti asacitwa thangwi yakusowa ungwiro, pontho nee tisafunika kupwaza madawo makulu. (Lev. 19:17; Mas. 141:5) Cibverano ca Mwambo cikhapangiza kuti akhalipo madawo makulu kupiringana anango, pyenepi pisacitikambo mu mpingo Wacikristu lero.—1 Juw. 5:16, 17.

 ¹⁴ Yezu alonga pinafunika Akristu kucita toera kumalisa nkandzo wakuti panango unaoneka pakati pawo. Onani pinthu pingasi pidalonga iye. “Khala m’bale wako akudawira, [1] ndoko kampangize cidadawa iye panu mwekha, iwe na iye basi. Iye angakubvesera, wawina m’bale wako. Mbwenye angakhonda kukubvesera, [2] kwata munthu m’bodzi peno awiri, toera pyonsene pikhale pyakutawirika khala pana umboni wa anthu awiri peno atatu. Angakhonda kuabvesera, [3] ndoko kalonge ku mpingo. Angakhondambo kubvesera mpingo, muone pyako ninga munthu wa dziko peno ninga nyakulipisa misonkho.”—Mat. 18:15-17.

¹⁵ Nsangani udalonga Yezu unagumanika pa Mateu 18:23-35, usapangiza kuti madawo anango analongwa pa Mateu 18:15-17 asaphataniza kobiri peno pinthu pyathu ninga kukhonda kulipa mangawa peno kubera anango. Madawo anewa anakwanisambo kukhala uthambi wakuti usaipisa makhaliro a munthu unango.

¹⁶ Khala muli na cinyindiro cakuti munthu unango mu mpingo akucitirani madawo ninga anewa, lekani kucimbiza kuenda kalonga kuna akulu a mpingo toera akuphedzeni kumalisa nkandzo wanu. Mwakubverana na uphungu udapereka Yezu, pakutoma longani na munthu adakudawirani. Yeserani kumalisa nkandzo unoyu uwiri wanu, mbamukhonda kupanga anango. Kumbukani kuti Yezu nee alonga ‘ndoko kabodzi basi kampangize cidadawa iye.’ Munthu angakhonda kutawira madodo ace, pontho mbakhonda kuphemba kulekererwa, panango pinakhala pyadidi kucedza naye pontho ndzidzi unango. Mungakwanisa kumalisa nkandzo munjira ineyi, munthu adakudawirani anapereka takhuta thangwi yakukhonda kupanga anango pinthu pidakucitirani iye peno thangwi yakukhonda kupswipisa makhaliro ace  adidi mu mpingo. Mungacita pyenepi, ‘munawina m’bale wanu.’

¹⁷ Khala munthu adakudawirani atawira madodo ace, aphemba kulekererwa mbatoma kucita pinthu toera kucinja makhaliro ace, nkandzo unoyu nee usafunikabve kupitiriza. Maseze madawo akhale makulu, munakwanisa kukhazikisa ntendere na ale adadawirana na imwe.

¹⁸ Mungacimwana kuwina m’bale wanu, ngakhale mwampangiza madodo ace ‘panu mwekha imwe na iye basi,’ munakwanisa kucita pidalonga Yezu, ‘kukwata munthu m’bodzi peno awiri,’ mbamuenda kacedza pontho na m’bale wanu. Anthu anafuna kukwata imwe asafunikambo kukhala na cifuno cakuwina m’bale wanu. Pinakhala mwadidi kukwata anthu anadziwa pidacitika, mbwenye khala nkhabepo, munakwanisa kuphemba munthu m’bodzi peno awiri toera akhale amboni mu ndzidzi unacedza imwe. Panango iwo anadziwa mwadidi pidacitika, pontho anakwanisa kuona khala mwandimomwene munthu unoyu adawa. Mungaphemba nkulu wa mpingo toera akuperekereni, iye nee anaimirira mpingo thangwi nee aphembwa na nsoka wa akulu a mpingo toera kucita pyenepi.

¹⁹ Khala mwacita pidakwanisa imwe toera kumalisa nkandzo unoyu mwekhene mbamucimwana, mwakwata munthu m’bodzi peno awiri mbamucimwana pontho, mbwenye nee musakwanisa kuduwala pidacitika, musafunika kudziwisa akulu a mpingo. Kumbukani kuti cifuno cawo ndi kukhazikisa ntendere na kucenesa mpingo. Mungamala kucedza na akulu a mpingo, siyani nkandzo unoyu m’manja mwawo, pontho nyindirani Yahova. Lekani kutawirisa kuti makhaliro a munthu unango akutsukwaliseni peno akucimwaniseni kutumikira Yahova mwakutsandzaya.—Mas. 119:165.

 ²⁰ Akumbizi a mabira anafufudza pidacitika. Iwo angaona kuti munthu akudawiranidi, nee atcunyuka, pontho nkhabe funa cinja, panango pinakhala pyakufunika kuti komiti yakutonga miseru ibuluse munthu unoyu mu mpingo. Angacita pyenepi anatsidzikiza mabira, pontho mpingo unapitiriza kukhala wakucena.—Mat. 18:17.

²¹ Madawo anango makulu ninga ulukwali, upombo, amuna anagona amuna andzawo peno akazi anagona akazi andzawo, kuxola Mulungu, kusandukira Mulungu, kulambira madzimunthu na madawo anango akunyanyasa ninga anewa, asaphemba pizinji kupiringana kulekerera munthu adadawa. (1 Akor. 6:9, 10; Agal. 5:19-21) Madawo ninga anewa asafunika kupangwa akulu a mpingo toera aatsalakane, thangwi madawo anewa anakwanisa kupswipisa makhaliro adidi a mpingo. (1 Akor. 5:6; Tiya. 5:14, 15) Anango asaenda kalonga kuna akulu a mpingo madawo adacita iwo, peno adacita anthu anango. (Lev. 5:1; Tiya. 5:16) Mwakukhonda tsalakana njira idadziwa akulu a mpingo madawo makulu adacita Nkristu wakubatizwa, pakutoma akulu a mpingo awiri asafufudza pidacitika. Angakhala na cinyindiro cakuti pidabva iwo mphyandimomwene, pontho ali na umboni unapangiza kuti Nkristu unoyu acitadi madawo makulu, nsoka wa akulu a mpingo unakhazikisa komiti yakutonga miseru ya akulu atatu peno kupiringana toera atsalakane madawo anewa.

²² Akulu a mpingo asawangisira toera kutsalakana mwadidi mabira na kuatsidzikiza ku ngozwi zonsene zauzimu. Iwo asawangisirambo toera kuphatisira mwadidi Mafala a Mulungu toera kulanga ale anacita madawo  mbaaphedza kuti akhale akuwanga mwauzimu. (Yuda 21-23) Pyenepi pisabverana na uphungu udapereka mpostolo Paulu kuna Timoti: “Ine ndisakupanga pamaso pa Mulungu na Kristu Yezu, ule anafuna kudzatonga anthu ali m’maso na akufa . . . alange, asandike, acenjeze, cita pinthu pyenepi pyonsene mwakukhurudzika kakamwe mbuphatisira luso yakupfundzisa.” (2 Tim. 4:1, 2) Kucita pyenepi kusaphemba ndzidzi uzinji kakamwe kuna akulu a mpingo, mbwenye ineyi isacita khundu ya basa yawo. Abale mu mpingo asapereka takhuta thangwi yakuwangisira kwawo, pontho asaona kuti iwo athema “kulemedzwa kakamwe.”—1 Tim. 5:17.

²³ Ndzidzi onsene munthu angacita madawo, cinthu cakutoma cinacita akulu a mpingo ndi kuphedza munthu unoyu toera akhale pontho wakuwanga mwauzimu. Nyakudawa angaphedzwa, mbapangiza kuti atcunyukadi, kusandikwa kunacitwa iye pace ekha peno pamaso pa ale adapereka umboni mu ndzidzi ukhatongwa iye kunaphedza nyakudawa na anthu anadziwa pidacitika. (2 Sam. 12:13; 1 Tim. 5:20) Ndzidzi onsene munthu angasandikwa na komiti yakutonga miseru asakhondeswa kucita mabasa anango. Pyenepi pinaphedza nyakudawa toera ‘alungamise njira zinafamba’ iye. (Aheb. 12:13) Mukupita kwa ndzidzi iye asatoma pontho kuphatisirwa mu mpingo ninga kale, khala akupangiza kuti akuthambaruka mwauzimu.

²⁴ Khala komiti yakutonga miseru iri na cinyindiro cakuti nyakudawa atcunyukadi mbwenye akuona kuti pidacita iye pinabveka kuna anthu anango mu mpingo, mucisa cinakhala iye peno khala mpingo usafunika kucita mphole-mphole na munthu unoyu, cisafunika kucitwa  cidziwiso cacigwagwa pa Nsonkhano wa Umaso na Utumiki. Cidziwiso cisafunika kucitwa tenepa: “M’bale (mulongo) [Longani dzina yace] asandikwa.”

²⁵ Midzidzi inango nyakudawa asapitiriza kucita madawo mbakhonda kucinja makhaliro ace maseze akulu a mpingo ayesere kum’phedza. Panango nee ‘apangiza kuti atcunyukadi’ mu ndzidzi unatongwa iye. (Mabasa 26:20) Pyenepi pingacitika, akulu a mpingo anacitanji? Nyakudawa angakhonda kutcunyuka asafunika kubuluswa mu mpingo toera akhonde kucita uxamwali na mbumba yakucena ya Yahova. Kubulusa nyakudawa mu mpingo kusaphedza toera mpingo ukhale wakutsidzikiza, ukhale wakucena mbupitiriza na mbiri yadidi. (Dheu. 21:20, 21; 22:23, 24) Pidabva Paulu makhaliro akupasa manyadzo a munthu unango wa mu mpingo wa ku Korinto, iye apanga akulu a mpingo: “Perekani munthu unoyu kuna Sathani toera kubulusa makhaliro akuipa adabweresa iye mu mpingo.” (1 Akor. 5:5, 11-13) Paulu alongambo pya anthu anango a mu ndzidzi wa apostolo adacita pinthu pyakuti nee pisabverana na undimomwene mbabuluswa mu mpingo.—1 Tim. 1:20.

²⁶ Komiti yakutonga miseru ingaona kuti nyakudawa nee atcunyuka, pontho asafunika kubuluswa mu mpingo isafunika kumpanga cisankhulo cidacita iwo mbanfokotozera mwadidi thangwi peno mathangwi adancitisa kubuluswa mu mpingo mwakubverana na Malemba. Angamala kumpanga pya cisankhulo ceneci, komiti yakutonga miseru isafunika kumpanga kuti angaona kuti nee atongwa mwadidi asafunika kulemba tsamba mbafokotoza mathangwi ace. Iye anakwanisa kucita pyenepi  nkati mwa ntsiku zinomwe kutomera pa ntsiku idapangwa iye cisankhulo cidacita komiti yakutonga miseru. Akulu a mpingo angatambira tsamba inapangiza kuti iye asafuna kuti nseru wace utongwe pontho, iwo asafunika kupita ncibverano na muyang’aniri wa cisa. Iye anasankhula akulu a mpingo akuthema toera akhale komiti inafuna kutonga pontho nseru unoyu. Iwo asafunika kuwangisira toera kutonga nseru unoyu nkati mwa sumana ibodzi kutomera pa ntsiku idatambira iwo tsamba. Munthu angaphemba kutongwa pontho, akulu a mpingo nkhabe funika kucita cidziwiso mu mpingo mpaka adziwe cisankhulo ca komiti yaciwiri. Mu ndzidzi unadikhira iye kuti atongwe pontho, nee asafunika kutawira pa misonkhano, kucita phembero, peno kupaswa miyai inango yakutumikira.

²⁷ Nyakudawa asapaswa mwai wakulemba tsamba toera kuphemba kutongwa pontho ninga cipangizo caufuni kuna iye. Mbwenye nyakudawa angakhonda kugumanikana pa komiti ineyi yaciwiri, akulu a mpingo asafunika kucita pyonsene pinakwanisa iwo toera agumanikane naye, pingacimwanika asafunika kucita cidziwiso cakuti iye abuluswa mu mpingo.

²⁸ Khala nyakudawa nee asafuna kulemba tsamba toera kutongwa pontho, komiti yakutonga miseru isafunika kumpanga kufunika kwa kutcunyuka na pinthu pinafunika iye kucita toera abwezereswe ntsogolo. Ingacita pyenepi inam’phedza, inapangiza kuti isanfuna, pontho iri na cidikhiro cakuti iye anacinja makhaliro ace mbabwerera mu gulu ya Yahova.—2 Akor. 2:6, 7.

²⁹ Nyakudawa angakhonda kutcunyuka, iye asafunika kubuluswa mu mpingo, pontho cidziwiso ici cacigwagwa  cisafunika kucitwa: “[Dzina ya munthu] asiya kukhala m’bodzi wa Mboni za Yahova.” Cidziwiso ceneci cinacenjeza abale na alongo akukhulupirika mu mpingo toera asiye kucedza na munthu unoyu.—1 Akor. 5:11.

³⁰ Fala yakuti “kubulusika mu mpingo” isaphatisirwa kuna m’bodzi wa Mboni za Yahova wakubatizwa wakuti mwakufuna kwace, asalonga ekhene kuti nkhabe funabve kukhala Nkristu, peno kudziwika ninga m’bodzi wa Mboni za Yahova. Panango iye asacita pinthu pinapangiza kuti nkhabe funabve kukhala mu mpingo Wacikristu, peno asaphedzera nsoka wakuti nee ndi wakutawirika kuna Yahova Mulungu thangwi usapfundzisa pinthu pyakuti nee pisabverana na pinalonga Bhibhlya.—Iza. 2:4; Apok. 19:17-21.

³¹ Thangwi ya Akristu adasiya kukhulupira Mulungu mu ntsiku zace, mpostolo Juwau alemba: “Iwo abuluka pakati pathu, mbwenye nee akhali a mu nsoka wathu; thangwi mbadakhala a mu nsoka wathu, iwo mbadapitiriza kukhala pabodzi na ife.”—1 Juw. 2:19.

³² Munthu angabulusika mu mpingo, Yahova asaona kuti makhaliro ace ndi akusiyana kakamwe na a Nkristu adasiya kumwaza mphangwa. Panango munthu anasiya kumwaza mphangwa thangwi yakukhonda kupfundza mafala a Mulungu ntsiku zonsene. Panango iye anasiya kukhala waphinga m’basa ya Yahova thangwi ya nyatwa zinatamba iye peno kutcingwa. Akulu a mpingo na anango asafunika kupitiriza kuphedza Akristu adasiya kumwaza mphangwa toera akhale pontho akuwanga mwauzimu.—Aroma 15:1; 1 Ates. 5:14; Aheb. 12:12.

³³ Kusiyapo pyenepi, Nkristu angasankhula kubulusika mu mpingo, cidziwiso ici cacigwagwa cisafunika kucitwa:  “[Dzina ya munthu] asiya kukhala m’bodzi wa Mboni za Yahova.” Munthu unoyu asafunika kutsalakanwa ninga ule adabuluswa mu mpingo.

³⁴ Munthu adabuluswa mu mpingo peno adabulukisa ekhene anakwanisa kubwezereswa angacita pinthu pinapangiza kuti atcunyuka, pontho angapangiza mu ndzidzi ungasi kuti iye asiyadi makhaliro ace akuipa. Angacita pyenepi anapangiza kuti asafuna kukhala na uxamwali wadidi na Yahova. Akulu a mpingo asafunika kudikhira ndzidzi wathunga ene, panango miyezi mizinji, caka cibodzi peno kupiringana toera akhale na cinyindiro cakuti nyakudawa atcunyukadi. Nsoka wa akulu a mpingo ungatambira tsamba ya munthu wakuti ali kuphemba kubwezereswa, komiti yakubwezeresa isafunika kucedza na munthu unoyu. Komiti yakubwezeresa inaona khala munthu unoyu ali kucita “pinthu pinapangiza kuti atcunyukadi,” pontho inaona khala iye athema kubwezereswa mu ndzidzi unoyu peno nkhabe.—Mabasa 26:20.

³⁵ Khala munthu anaphemba kubwezereswa abuluswa ku mpingo unango, komiti yakubwezeresa ya mpingo unasonkhana iye cincino isafunika kucedza naye mbadinga phembo yace. Komiti yakubwezeresa ya mpingo unasonkhana iye cincino ingaona kuti iye athema kubwezereswa, isafunika kutumiza maonero awo kuna nsoka wa akulu a mpingo udabuluswa iye. Makomiti anewa mawiri anaphata basa pabodzi toera pyonsene pinafuna iwo kucita pikhale pyakubverana na pitsogolero. Mbwenye komiti ya mpingo udatsalakana nseru unoyu pakutoma, ndiyo inafuna kucita cisankhulo cakubwezeresa munthu unoyu.

³⁶ Khala komiti yakubwezeresa iri na cinyindiro cakuti munthu adabuluswa mu mpingo peno adabulusika ekhene atcunyukadi, pontho athema kubwezereswa, cidziwiso cisafunika kucitwa mu mpingo udatsalakana nseru unoyu pakutoma. Munthu unoyu angacinja mpingo, cidziwiso cisafunikambo kucitwa mu mpingo uli na iye cincino. Cidziwiso cisafunika kucitwa tenepa: “[Dzina ya munthu] abwezereswa ninga m’bodzi wa Mboni za Yahova.”

³⁷ Anang’ono akubatizwa angacita madawo makulu, akulu a mpingo asafunika kudziwiswa. Akulu a mpingo angatsalakana madawo makulu a mwanang’ono, mphyadidi kuti anyakubalace akubatizwa agumanikembo. Anyakubala asafunika kuphedzera komiti yakutonga miseru, tayu kutsidzikiza mwanawo toera akhonde kulangwa. Komiti yakutonga miseru isawangisira toera kupereka uphungu wadidi wakuti unaphedza mwana kucinja makhaliro ace, ninga pinacita iwo anthu akulu angadawa. Mbwenye mwana angakhonda kutcunyuka, asafunika kubuluswa mu mpingo.

³⁸ Akulu a mpingo anacitanji amwazi mphangwa akuti adzati kubatizwa angacita madawo makulu? Nakuti iwo adzati kubatizwa ninga m’bodzi wa Mboni za Yahova, nkhabe funika kubuluswa mu mpingo. Mbwenye asafunika kupaswa uphungu wadidi wakuti unaaphedza kusasanyira ‘njira zinafamba iwo na manyalo awo, thangwi  panango adzati kubvesesa mwadidi pipfundziso pya m’Bhibhlya.—Aheb. 12:13.

³⁹ Nyakudawa wakuti adzati kubatizwa angakhonda kutcunyuka pakumala kucedza na akulu a mpingo awiri adayesera kum’phedza, mpingo usafunika kudziwiswa. Cidziwiso ici cacigwagwa cisafunika kucitwa: “[Dzina ya munthu] asiya kukhala m’mwazi mphangwa wakuti adzati kubatizwa.” Mpingo usafunika kuona nyakudawa unoyu ninga munthu wa dziko. Maseze iye nee abuluswa mu mpingo, Akristu asafunika kucita mphole-mphole toera akhonde kucita naye uxamwali. (1 Akor. 15:33) Iye nee asafunika kupereka lipoti ya m’munda.

⁴⁰ Mukupita kwa ndzidzi, munthu wakuti adzati kubatizwa adasiya kukhala m’mwazi mphangwa panango anafuna pontho kukhala m’mwazi mphangwa. Pyenepi pingacitika, akulu a mpingo awiri anacedza naye toera kuona kuthambaruka kwace mwauzimu. Iye angathema kukhala pontho m’mwazi mphangwa, cidziwiso ici cacigwagwa cisafunika kucitwa: “[Dzina ya munthu] akutumikira pontho ninga m’mwazi mphangwa wakuti adzati kubatizwa.”

⁴¹ Anthu onsene anasonkhana mu mpingo wa Mulungu lero, anakwanisa kutsandzaya na nkhombo zauzimu zinapereka Yahova kuna mbumba yace. Ife tiri na cakudya cauzimu cakuti bwerani mudzaone, pontho tiri na madzi mazinji akutonthola aundimomwene. Kusiyapo pyenepi, Yahova asaphatisira akulu a mpingo akuti asatsogolerwa na Kristu toera kutitsidzikiza. (Mas. 23; Iza. 32:1, 2) Kukhala m’paraizu yauzimu mu ntsiku zino zakumalisa na zakunentsa, kusatiphedza toera kukhala akutsidzikizika.

 ⁴² Tingakhala anthu akucena na antendere mu mpingo, ife tinapitiriza kupangiza ceza ca undimomwene wa Umambo. (Mat. 5:16; Tiya. 3:18) Na ciphedzo ca Mulungu, tinakwanisa kukhala akutsandzaya thangwi yakuona anthu azinji mbakapfundza pya Yahova mbacita cifuno cace pabodzi na ife.