PIDAFIKA ndzidzi toera Yezu atume anyakupfundzace kuti aende kamwaza mphangwa za Umambo, iye aapanga: “Basa yakubvuna ndi ikulu, mbwenye anyabasa ndi akucepa.” Nakuti pakhali na basa izinji toera kuicita, iye athimiza: “Natenepa, phembani Mwanaciro munda kuti atumize anyabasa toera kubvuna.” (Mat. 9:37, 38) Yezu apanga anyakupfundzace kuti anacita tani basa ineyi yakumwaza mphangwa. Mafalace akhapangiza kuti basa ineyi ikhafunika kucitwa mwakucimbiza. Iye alonga: “Nee munadzamalisa kupakasa mizinda yonsene ya Izraeli, Mwana wa munthu mbadzati kufika.”—Mat. 10:23.

² Lero, ifembo tiri na pizinji toera kucita m’basa yakumwaza mphangwa. Mphangwa zadidi za Umambo zisafunika kumwazwa kumala mbakudzati kufika, pontho ndzidzi ukumala. (Marko 13:10) Mu ntsiku zino, basa yakumwaza mphangwa iri na ife ndi ikulu kakamwe kupiringana ikhali na Yezu pabodzi na anyakupfundzace, thangwi munda ndi dziko yonsene yapantsi. Tingalandanisika na anthu azinji anagumanika pa dziko yapantsi, ndife akucepa kakamwe, mbwenye tinakwanisa kukhala na cinyindiro cakuti Yahova anatiphedza. Mphangwa zadidi za Umambo, zinadzamwazwa pa dziko yonsene yapantsi pa ndzidzi udakhazikisa Yahova, buluka penepo kumala kunadzafika. Kodi tinaikha Umambo wa Mulungu pa mbuto yakutoma mu umaso wathu toera timwaze mphangwa mwaphinga? Tisafunika kukhazikisa pifuno pipi toera tikwanise kucita mwadidi basa ineyi?

 ³ Yezu apangiza pinafuna Yahova kuna atumiki Ace akuperekeka, pidalonga iye: “Funa Yahova Mulungu wako na ntima wako onsene, na umaso wako onsene, na ndzeru zako zonsene na mphambvu zako zonsene.” (Marko 12:30) Ife tisafunika kutumikira Mulungu na ntima wathu onsene. Pyenepi pisabveka, kucita pyonsene pinakwanisa ife m’basa ya Yahova, mbatipangiza kuti taperekeka na ntima onsene kuna iye. (2 Tim. 2:15) Tonsene tinakwanisa kutumikira Mulungu na ntima onsene mwakubverana na makhaliro athu peno maluso athu. Cincino tendeni tione pinthu pingasi pyakuti munakwanisa kupicita, buluka penepo wangisirani toera kukhazikisa pifuno pyakucita pizinji mu utumiki wanu.

⁴ Onsene anatawira undimomwene ali na mwai wakumwaza mphangwa zadidi. Ineyi ndi basa yakufunika kakamwe idapasa Yezu anyakupfundzace. (Mat. 24:14; 28:19, 20) Kazinji kene nyakupfundza wa Yezu Kristu angabva mphangwa zadidi, mwakukhonda dembuka asatomambo kupanga anango. Ndi pyenepi pidacita Andreya, Filipi, Kornelyo na anango. (Juw. 1:40, 41, 43-45; Mabasa 10:1, 2, 24; 16:14, 15, 25-34) Kodi pyenepi pisabveka kuti munthu anakwanisa kumwaza mphangwa zadidi mbadzati kubatizwa? Inde! Munthu angakhala wakuthema toera kutumikira ninga m’mwazi mphangwa wakuti adzati kubatizwa pa mpingo, anakhala na mwai wakuenda kamwaza mphangwa nyumba na nyumba. Kusiyapo pyenepi, anakwanisa kuphatisira njira zinango zakumwaza mphangwa mwakubverana na maluso ace na makhaliro ace.

⁵ M’mwazi mphangwa angabatizwa, mwakukhonda penula iye asafuna kucita pyonsene pinakwanisa iye toera kuphedza anango kupfundza mphangwa zadidi. Onsene  mu mpingo, abale na alongo ali na basa yakumwaza mphangwa. Tingamwaza mphangwa zadidi za Umambo wa Mulungu tisapaswa nkhombo, mwakukhonda tsalakana khala tisakwanisa kucita pizinji peno nkhabe. Ale anakwanisa kucita pizinji m’makhundu anango a utumiki, mwandimomwene asakhala akutsandzaya kakamwe.

⁶ Panango cisa ca mpingo wanu cisaphatwa basa kazinji kene, pontho anthu azinji asamwazirwa mphangwa zadidi. Khala ndi tenepo, panango imwe munakwanisa kucita pizinji m’basa yakumwaza mphangwa mungafuluka mbamuenda ku mbuto inafunika kakamwe amwazi mphangwa. (Mabasa 16:9) Khala ndimwe nkulu wa mpingo peno ntumiki wakutumikira, panango pana mpingo wakuti usafuna ciphedzo canu. Muyang’aniri wanu wa cisa anakwanisa kukupasani maonero akuti munaphedza tani mpingo unango mucisa canu. Mungafuna kutumikira m’mbuto zinango za dziko yanu, ofesi ya filiali inakupasani mphangwa zakuti zinakuphedzani.

⁷ Kodi musafuna kutumikira ku dziko inango? Khala ndi tenepo, nyerezerani mwadidi kuti pyenepi pisaphatanizanji. Mukuona tani kucedza na akulu a mpingo wanu thangwi ya pyenepi. Mwakukhonda penula anewa anadzakhala macinjo makulu kuna imwe na kuna ale anafuna kuenda na imwe. (Luka 14:28) Pontho mungaona kuti nee munakwanisa kutumikira ku dziko inango mu ndzidzi uzinji, mphyadidi kutumikira pyanu kucisa cinango mu dziko yanu.

⁸ Madziko anango abale anapaswa basa yakuyang’anira asakhala apswa mu undimomwene. Abale akucepeseka a mpingo unoyu asasiya kuti akulu a mpingo a luso kakamwe adafulukira mu mpingo wawo atsogolere. Khala  ndimwe nkulu wa mpingo, pontho musanyerezera pyakufulukira ku dziko yakuti iri na makhaliro ninga anewa, musafunika kukumbuka kuti cifuno canu nee ndi kupitira mbuto abale a mpingo unoyu. Mbwenye musafunika kuphata nawo pabodzi. Wangisani abale toera athambaruke mbakhala na miyai yakutumikira mu mpingo. (1 Tim. 3:1) Khalani wakupirira pinthu pinango pingakhonda kucitwa ninga munacitwa ipyo mu dziko yanu. Phatisirani maluso ali na imwe ninga nkulu wa mpingo toera kuphedza abale. Natenepa, imwe mungabwerera ku dziko yanu, abale anewa anakwanisa kutsalakana mwadidi pinthu mu mpingo.

⁹ Ofesi ya filiali mbidzati kukupasani madzina a mipingo inafuna ciphedzo canu, Komiti Yakuyang’anira Basa mu mpingo isafunika kutumiza tsamba inapangiza kuti iwo akutawirisani. Tsamba ineyi ndi yakufunika mwakukhonda tsalakana khala musatumikira ninga nkulu wa mpingo, ntumiki wakutumikira, mpainiya peno m’mwazi mphangwa. Komiti yakuyang’anira basa inatumiza tsamba ineyi pabodzi na phembo yanu ku ofesi ya filiali ya ku dziko inafuna imwe kuenda katumikira.

¹⁰ Toera kucita pizinji mu utumiki, panango munanyerezera pya kupfundza cilongero cinango kuphatanizambo cilongero ca manja. Khala musafuna kumwaza mphangwa mu cilongero cinango, mukuona tani kucedza na akulu a mpingo na muyang’aniri wa cisa. Iwo anakwanisa kukuwangisani mbakupasani pitsogolero. Na citsogolero ca ofesi ya filiali, pisa pinango pisacita masasanyiro toera amwazi mphangwa na apainiya apfundze cilongero toera akwanise kumwaza mphangwa mu cilongero cinango.

¹¹ Amwazi mphangwa onsene asafunika kudziwa pinthu pinafunika toera munthu atumikire ninga mpainiya wakuphedza, wa ndzidzi onsene, wakupambulika peno kucita mabasa anango a ndzidzi onsene. Mpainiya asafunika kukhala Nkristu wakubatizwa, wacitsandzo cadidi, pontho makhaliro ace asafunika kuntawirisa kukwanirisa maora anafunika m’basa yakumwaza mphangwa. Komiti Yakuyang’anira Basa mu Mpingo isadinga mapetisau mbikhazikisa apainiya akuphedza na a ndzidzi onsene, mbwenye apainiya akupambulika asakhazikiswa na ofesi ya filiali.

¹² Apainiya akuphedza anakwanisa kukhazikiswa toera atumikire mwezi ubodzi, miyezi mingasi peno miyezi mizinji mwakubverana na makhaliro awo. Amwazi mphangwa azinji a Umambo asakomerwa kutumikira ninga apainiya m’midzidzi yakupambulika, ninga mu ndzidzi wa Cikumbuso na pa mwezi wakucedzerwa na muyang’niri wa cisa. Anango asasankhula kutumikira ninga apainiya m’miyezi ya maferya. Amwazi mphangwa akubatizwa anapfundza xikola anakwanisa kutumikira ninga apainiya akuphedza mu ndzidzi wa maferya. M’miyezi ya Março na Abril peno pa mwezi wakucedzerwa na muyang’aniri wa cisa, amwazi mphangwa anakwanisa kutumikira ninga apainiya akuphedza mbapereka maora akucepa. Mwakukhonda tsalakana makhaliro anu, khala ndimwe Nkristu wa citsandzo cadidi, pontho mukuona kuti munakwanirisa maora anaphembwa apainiya akuphedza nkati mwa mwezi ubodzi peno yakupiringana, akulu a mpingo anakomerwa kudinga petisau yanu toera mukhazikiswe ninga mpainiya wakuphedza.

¹³ Toera kutumikira ninga mpainiya wa ndzidzi onsene musafunika kukwanirisa maora anaphembwa pacaka. Ninga mpainiya wa ndzidzi onsene, imwe musafunika kuphata basa pabodzi na mpingo wanu. Apainiya angaphata  basa mwaphinga mpingo usapaswa nkhombo, thangwi pisacitisa anango kukomerwa na kumwaza mphangwa mbafunambo kutumikira ninga apainiya. Mbwenye toera mutumikire ninga mpainiya wa ndzidzi onsene musafunika kukhala m’mwazi mphangwa wa citsandzo cadidi na wakubatizwa mu miyezi mitanthatu.

¹⁴ Kazinji kene apainiya akupambulika asasankhulwa pakati pa apainiya a ndzidzi onsene akuti ndi aphinga m’basa yakumwaza mphangwa. Asafunika kukhala dzololo toera kuenda konsene kwene kunatumizwa iwo na ofesi ya filiali. Kazinji kene asatumizwa m’mbuto zakusowa amwazi mphangwa toera kugumana anthu anafuna kupfundza undimomwene na kukhazikisa mipingo. Midzidzi inango apainiya akupambulika asatumizwa m’mipingo inafuna ciphedzo toera ikwanise kumwaza mphangwa mucisa cawo consene. Apainiya anango akupambulika akuti ndi akulu a mpingo asatumizwa m’mipingo ming’ono, ngakhale kuti iyo nee isafuna ciphedzo toera kumwaza mphangwa. Apainiya akupambulika asapaswa kobiri yakucepa toera agule pinthu pinango pinafuna iwo. Anango asakhazikiswa toera kutumikira ninga apainiya akupambulika mu ndzidzi wakucepa.

¹⁵ Komiti Yakuyang’anira Basa ya Mathubo Akutonga ndiyo inakhazikisa amisionaryo, buluka penepo Komiti ya Filiali ya mu dziko idatumizwa iwo, isaatumizambo mupisa pinagumanika anthu azinji. Basa inacita amisionaryo isawangisa mipingo, pontho isaphedza abale na alongo toera amwaze mphangwa mwaphinga. Kazinji kene, amisionaryo asakhala ale adaenda Kuxikola ya Amwazi Mphangwa a Umambo. Amisionaryo asasakirwa nyumba, pontho asapaswa kobiri yakucepa toera agule pinthu pinango pinafuna iwo.

¹⁶ Abale anasankhulwa na Mathubo Akutonga toera kutumikira ninga ayang’aniri a cisa asapfundziswa, pontho asakhala na maluso thangwi mbadzati kukhala ayang’aniri a cisa pakutoma asatumikira ninga anyakuphedza a ayang’aniri a cisa. Abale anewa asakomerwa kakamwe na basa yakumwaza mphangwa, pontho asafuna abale na alongo. Iwo ndi apainiya aphinga, asapfundza Bhibhlya mwaphinga, asacita nkhani zadidi, pontho asapfundzisa mwadidi. Iwo asakhala anthu a citsandzo cadidi cakupangiza misapo ya nzimu, pontho pinacita iwo pisapangiza kuti asanyerezera mwadidi, pontho ali na luso yakudzindikira. Khala ndi wakumanga banja, nkazace asafunika kukhala mpainiya wa citsandzo cadidi, pontho wakubverana mwadidi na anango. Iye asafunika kukhala waluso pakumwaza mphangwa. Ninga nkazi Wacikristu iye asafunikambo kubvera mamunace, nee asafunika kulonga mwakucimbiza pinthu pyakuti pisafunika kutsalakanwa na mamunace peno kulonga ndiye basi pakucedza na anango. Ayang’aniri a cisa pabodzi na akazawo asakhala na mabasa mazinji, natenepa, iwo asafunika kukhala na ungumi wadidi. Apainiya nee asafunika kulemba petisau toera kukhala ayang’aniri a cisa. M’mbuto mwace, iwo asacedza na muyang’aniri wa cisa thangwi ya cifuno cawo cakutumikira m’basa ineyi, buluka penepo iye asaapasa maonero.

¹⁷ Xikola ya Amwazi Mphangwa a Umambo: Asafunika amwazi mphangwa azinji a Umambo toera kumwaza mphangwa mupisa pyakuti nee pisamwazwa mphangwa kazinji kene na kuphedzera mipingo. Natenepa, abale na alongo akuti adzati kumanga banja, ngakhale anyakumanga banja anakwanisa kulemba petisau toera kuenda ku  Xikola ya Amwazi Mphangwa a Umambo. Xikola ingamala, abale na alongo anewa asatumizwa mu dziko yawo toera kutumikira ninga apainiya a ndzidzi onsene mucisa cakuti cisafuna kakamwe amwazi mphangwa. Mbwenye ale anafuna kuthimizira utumiki wawo anakwanisa kupaswa basa mu dziko yawo peno mu dziko inango. Anango asakhazikiswa ninga apainiya akupambulika peno apainiya akupambulika a ndzidzi wakucepa. Apainiya anafuna kuenda ku xikola ineyi anakwanisa kudziwa pizinji angagumanika pa nsonkhano wa ale anafuna kuenda ku xikola ineyi unacitwa pa nsonkhano wa gawo.

¹⁸ Xikola ya Bhibhlya ya Jiliyadhi: Abale na alongo akuti adzati kumanga banja na anyakumanga banja anasankhulwa toera kuenda ku xikola ineyi ndi ale akuti asadziwa kulonga cingerezi, pontho asatumikira ninga atumiki a ndzidzi onsene akupambulika. Iwo asaoneka kuti anakwanisa kuphedza mipingo peno kutsogolera mabasa pa ofesi ya filiali. Iwo asapangiza kuti asafuna kutumikira abale na alongo, pontho anakwanisa kuphedza anango toera kutowezera midida ya Bhibhlya na pitsogolero pya gulu. Abale na alongo adathema toera kuenda ku xikola ineyi, asaphembwa na Komiti ya Filiali toera kulemba petisau. Ale adamalisa xikola ineyi asatumizwa toera akatumikire m’mipingo peno pa ofesi ya filiali ya dziko yawo peno ya dziko inango.

¹⁹ Kutumikira pa Bheteli ndi mwai ukulu kakamwe. Dzina yakuti Bheteli isabveka “Nyumba ya Mulungu,” pontho dzina ineyi ndi yakuthema thangwi mabasa anacitwa penepo ndi a Mulungu. Abale na alongo anatumikira pa Bheteli asacita mabasa akufunika kakamwe ninga kucita mabukhu anatiphedza kupfundza Bhibhlya, kuathumburuza na kuatumiza. Basa ineyi ndi yakufunika kakamwe kuna  Mathubo Akutonga akuti asayang’anira na kupereka pitsogolero kuna mipingo pa dziko yonsene yapantsi. Abale na alongo azinji anatumikira ku Bheteli akuti ndi athumburuzi asakhala, pontho asaphata basa mucisa ca filiali yawo cinalongwa cilongero cinathumburuza iwo. Pyenepi pisaaphedza toera kubva kuti anthu asalonga tani ntsiku na ntsiku. Pisaaphedzambo kudziwa khala anthu asabvesesa mafala anaphatisirwa m’mabukhu anathumburuza iwo.

²⁰ Mabasa mazinji anacitwa pa Bheteli asaphemba mphambvu. Ndi thangwi yace, azinji anacemerwa pa Bheteli ndi aphale na atsikana akuperekeka na akubatizwa akuti ali na ungumi wadidi, pontho ndi amphambvu. Khala ofesi ya filiali inayang’anira basa mu dziko yanu isafuna abale na alongo toera kutumikira ku Bheteli, pontho imwe musafuna, akulu a mpingo wanu anakwanisa kukuphedzani kudziwa pinafunika imwe kucita.

²¹ Basa yakumanga nyumba zinaphatisirwa na gulu ya Mulungu, ndi basa yakupambulika ninga basa yakumanga templo ya Salomoni. (1 Ama. 8:13-18) Abale na alongo azinji asapangiza kuti ndi aphinga thangwi asaperekeka toera kuphatisira ndzidzi wawo na mpfuma yawo toera kuphedzera basa ineyi.

²² Kodi munakwanisa kuphedzera basa ineyi? Khala ndimwe m’mwazi mphangwa wakubatizwa, pontho musafuna kuphedzera basa ineyi, abale anayang’anira basa yakumanga mucisa canu anatsandzaya kakamwe na ciphedzo canu, pontho iwo ali dzololo toera kukupfundzisani,  maseze mukhonde kukhala na maluso mazinji akumanga. Musaona tani kucedza na akulu a mpingo thangwi ya cifuno canu? Amwazi mphangwa anango akuti ndi akuthema asaperekeka toera kuenda m’madziko anango kaphedzera basa yakumanga nyumba zinaphatisirwa na gulu ya Mulungu.

²³ Pana miyai mizinji toera kuphedzera basa yakumanga. Amwazi mphangwa akubatizwa akuti ndi a citsandzo cadidi, pontho ali na maluso akuphedzera basa yakumanga anakwanisa kutumikira ninga voluntários locais de desenho e construção mucisa cawo. Anango anaphedzera basa yakumanga mu ndzidzi wakucepa mupisa pyakutali, asakhazikiswa na ofesi ya filiali mbatumikira ninga voluntários de construção nkati mwa masumana mawiri peno miyezi mitatu. Ale anakhazikiswa toera kutumikira m’basa ineyi mu ndzidzi uzinji asacemerwa servos de construção. Ule anatumikira m’basa yakumanga mu dziko inango asacemerwa servo de construção no estrangeiro. Basa ibodzi na ibodzi yakumanga isatsogolerwa na Nsoka Ubodzi wa Anyakumanga. Nsoka unoyu usaphataniza servos de construção na voluntários de construção. Iwo asaphedzerwa na abale a mu dhepartamentu ya voluntários locais de desenho e construção, na ciphedzo ca abale na alongo a m’mipingo inacitwa basa ineyi. Misoka ya anyakumanga ingamalisa basa isaenda kucisa cinango nkati mwa cisa ca filiali yawo toera kucita basa inango.

²⁴ Khala mwaperekeka kuna Yahova, imwe musafuna kuntumikira kwenda na kwenda. Mphapo cincino ndi pipi pifuno pyanu pyauzimu? Kukhala na pifuno pyauzimu kunakuphedzani toera kuphatisira mwadidi mphambvu zanu na mpfuma yanu. (1 Akor. 9:26) Kukhala na pifuno pyauzimu kunakuphedzani toera kuthambaruka mwauzimu, pontho  kunakuphedzani toera kuikha manyerezero anu ku pinthu pyakufunika kakamwe mu ndzidzi unawangisira imwe toera kupaswa miyai inango yakutumikira.—Afil. 1:10; 1 Tim. 4:15, 16.

²⁵ Mpostolo Paulu ndi citsandzo cadidi toera kucitowezera mu ndzidzi unatumikira ife Mulungu. (1 Akor. 11:1) Paulu awangisira kakamwe toera kutumikira Yahova. Iye akhadziwa kuti Yahova akhadampasa miyai mizinji. Ndi thangwi yace iye alembera abale a ku Korinto: “Ndafungulirwa nsuwo ukulu toera kuphata basa.” Kodi ife nee tafungulirwambo nsuwo ukulu? Inde, ife tiri na miyai mizinji yakutumikira Yahova pabodzi na mpingo, makamaka pakumwaza mphangwa zadidi za Umambo. Mbwenye ninga Paulu, kupita na “nsuwo ukulu” pisaphataniza kuthimbana na “apingizi azinji.” (1 Akor. 16:9) Paulu akhali dzololo toera kusandikika ekhene. Onani pidalonga iye: “Ndisasandika manungo anga, mbandiatsogolera ninga bitcu.” (1 Akor. 9:24-27) Kodi ife tisacitambo pibodzi pyene?

²⁶ M’bodzi na m’bodzi wa ife asawangiswa toera kukhala na pifuno pyauzimu mwakubverana na makhaliro ace. Azinji akutumikira m’basa ya ndzidzi onsene thangwi akhazikisa pifuno pyenepi pikhali iwo ana. Mu uwana wawo, anyakubala awo na anango akhaawangisa toera kucita pyenepi. Natenepa, iwo asatsandzaya kakamwe thangwi yakutumikira Yahova, pontho nee asasandikika na cisankhulo ceneci. (Mis. 10:22) Pifuno pinango pyakufunika ndi kubuluka m’basa ya m’munda masumana onsene, kutomesa na kucitisa mapfundziro a Bhibhlya peno kuthimizira ndzidzi wakukhunganyika misonkhano. Cakufunika kakamwe ndi kukhala aphinga mbaticita pyonsene pinakwanisa ife mu utumiki. Tingacita pyenepi, tinapasa mbiri Yahova mbatikwanirisa cifuno cathu, cakuntumikira kwenda na kwenda.—Luka 13:24; 1 Tim. 4:7b, 8.